Inrâlring leh Taima Ni Rawh!

“Chutichuan, ngaihven rawh u, a nî leh a hun chu in hre si lo va.”—MATTHAIA 25:13.

1. Tirhkoh Johana chuan eng lam nge a thlîr?

BIBLE-A thusawi tâwp ber-ah Isua chuan: “Ka lo kal thuai dâwn e,” tiin, a tiam a. A zirtîr Johana chuan: “Amen. Lo kal ta che, Lalpa Isu,” tiin, a chhâng a. Tirhkoh chuan Isua lo kal tûr chu rinhlelhna a nei lo va; Johana chu, “I loawmlehna [Greek ṭawngin pa·rou·siʹa] leh thil kalhmangte tâwpna chhinchhiahna chu engnge ni ang? min hrilh rawh,” ti a zâwttu a zirtîrte zînga mi a ni. Johana chuan ring tawk takin Isua loawmlehna tûr chu a thlîr rêng a.​—Thu Puan 22:20; Matthaia 24:3, NW.

2. Isua loawmlehna tûrin, kohhrante dinhmun chu engnge ni?

² Chutiang rintawkna chu tûn laiah a vâng hle a. Kohhran tam tak chuan Isua “lokallehna” chungchângah thu rin pawm bîk an nei a; nimahsela, tih tak zeta beiseitu chu an pâwla mi tlêmtê chauh an ni. Chutiang ang chuan an nung a. The Parousia in the New Testament lehkhabu chuan: “Kohhran mite hna leh ngaihtuahna, nunah loawmlehna (parousia) beiseina awmze neia hnehna chu tlêmtê chauh a ni . . . hmanhmawhna chhan tihtak taka vei leh inchhîrna leh chanchin ṭha missionary-te puandarhna chu, a zavaia hlauh a nih loh pawhin, a tâwp thawthâng a ni,” tiin, a sawi. Mahse, mi zawng zawngah chuan ni lovin!

3. (a) Engtin nge loawmlehna (pa·rou·siʹa) chungchâng Kristian dikte’n an ngaih? (b) Engnge tûnah a bîk taka kan ngaihtuah tûr chu?

³ Isua zirtîr tak takte chuan he thil kalhmang suaksualte tâwpna chu nghâkhlel takin an thlîr a. Rinawm taka chutiang kan tih laiin, Isua lo awmlehnain (NW) a kaihhnawih thil zawng zawngte lamah chuan thlîr dân dik chu vawn tlat leh chu mi anga kan chêt chu a pawimawh a ni. Chu chuan ‘tâwpna-a chhandam ni tûra tuar chhuak’ thei tûrin min siam dâwn a ni. (Matthaia 24:13) Matthaia bung 24 leh 25-a kan hmuh hrilhlâwkna-ah, Isua chuan chatuana ṭhatna tûra kan hman theih thurâwn fing tak min pe a ni. Bung 25-na hian i hriat ṭhan ngei tûr tehkhin thu, nula thianghlim sâwm (nula thianghlim fing leh â) chungchâng leh talent tehkhin thu a sawi a ni. (Matthaia 25:​1-30) Chûng tehkhin thu aṭangte chuan engtin nge hlâwkna kan neih theih ang?

Nula Thianghlim Pangate Anga Inrâlringa Awm!

4. Nula thianghlimte tehkhin thu-a pawimawh ber engnge ni?

⁴ Matthaia 25:​1-13 a mi nula thianghlim teh­khin thu hi chhiar nawn i duh mai thei a. A thu behchhan chu Juda mi ropui tak inneih niin mo neitu chu mo hruai tûrin monu pa inah chuan a thang mêk a. Chutih lai chuan rimawi tum thiamte leh zaithiamte pawh an tel ngei ang; tin, a lo thlen hun tûr chiah hriat a ni lo bawk. Tehkhin thu-ah chuan, nula thianghlim sâwmte chuan zânah mo neitu lo thlen hun chu an nghâk ṭhap a. Pangate chuan âtthlâk takin khâwnvârtui mamawh tâwk an ken loh avângin a dang lei tûrin an kal leh a. Panga dangte erawh chuan fing takin bûrah an ken belh a, tichuan an nghah laia an mamawh chuan an khâwnvârahte an thun khat thei a ni. Hêng pangate chauh hi mo neitu lo thlen lai nang leh inringa awm an ni. Chuvâng chuan an ni chauh chu ruaiah chuan luh phalsak an ni. Nula thianghlim â pangate chu an lo kîr leh chuan, lût ve tûrin an tlai lutuk ta.

5. Nula thianghlimte tehkhin thu-in a entîr thu awmzia hrethiam thei tûrin engin nge min ṭanpui?

⁵ He tehkhin thu kawng tam tak hi entîr nei a nih angin hriatthiam theih a ni. Entîr nân, Pa­thian Lehkha thu chuan Isua chu mo neitu angin a sawi a. (Johana 3:​28-30) Isua chuan inneihna ruai an buatsaihsaka lal fapa chu amah nên a tehkhin a. (Matthaia 22:​1-14) Tin, Bible pawhin Krista chu pasal nên a khaikhin bawk. (Ephesi 5:23) Tuiawm takin, Kristian hriak thihte chu hmun dangah Krista “mo” anga hrilhfiah a nih laiin, tehkhin thu chuan mo chungchâng a sawi lo. (Johana 3:29; Thu Puan 19:7; 21:​2, 9) Tichuan, nula thianghlim sâwm a sawi leh hriak thihte awmzia chu hmun dangah chuan Krista hnêna inneihna thu tiam thianghlim tehkhinna a ni.​—2 Korinth 11:2.a

6. Nula thianghlimte tehkhin thu-a a tihtâwp dâwn in Isua’n eng fuihna thu mi tiphûr thei tak nge a pêk?

⁶ Chutiang chipchiar tak leh zâwlneite lehkha aṭang mai bâkah, he tehkhin thu aṭanga kan zir theih thu bul ṭha takte pawh a awm a. Entîr nân, Isua chuan: “Chutichuan, ngaihven rawh u, a nî leh hun in hre si lo va,” ti a Isua tihtâwpna thu hi chhinchhiah ang che. Tichuan tehkhin thu chuan kan za-a mamawh inrâlringa awm tûr leh he khawvêl sual tâwpna hnai takah hian harh­vâng­a awm kan mamawh thu a târ lang a ni. A hun tak kan hre lo na-a, he tâwpna hi hnial­rual­loh­vin a lo thleng ngei dâwn. He mi chungchângah hian nula thianghlim pâwl hnihte hmanga rilru lanchhuahtîr chu chhinchhiah ang che.

7. Eng angin nge tehkhin thu-a nula thianghlim pangate khân an âtzia an lantîr?

⁷ Isua chuan: “An zînga mi panga an â a,” tiin, a sawi a. Mo neitu chu a lo kal dâwn tih an rin loh vâng em ni? Hlim hlawp ûmin an kal bo vek zâwk nge? A nih loh leh bumin an awm zâwk le? Chutiang chu a ni lo. Isua chuan hêng mi pangate hi ‘mo neitu hmuak tûrin an chhuak’ tih a sawi a. A ni chu a lo kal dâwn tih an hria a; tin, tel ve ngei pawh an duhin, “inneih ruai” pawh chu chhim ve ngei an duh a ni. A nih leh, chu mi atâna mamawh tâwk tûr chuan an inbuatsaih em le? Hun engemawti chhûng, “zan lai” thlengin an nghâk a; mahse, engtik hunah pawh ni thei, a rawn thlen huna pawm tûrin an inbuatsaih lo a ni​—a tîra an beisei aia a hma zâwk emaw a tlai zâwk emaw a nih pawhin.

8. Nula thianghlim panga tehkhin thu-ah khân engtin nge pangate khân an finzia an lantîr?

⁸ A dang panga​—Isua’n mi fing ti a a kohte pawh chu an khâwnvâr eng nên mo neitu lo thlen beisei-in an kal chhuak ve a. An ni pawhin an nghâk ve thova; mahse, an “fing” a ni. Greek thu mal “fing” ti a lehlin hian “fîmkhur thiamna, thil hriat theih, leh a thiltiha fing” nihna a kâwk a ni. Hêng pangate hian khâwnvârtui mamawh hun atâna thunkhah tûr bûra ken belhin an finzia an tilang a ni. Dik takin, mo neitu tâna inpeiha an khâwnvârtuite chu tihral loh an tum ruh tlat a ni. Chutianga inrâlrinna chu mo neitu a lo thlen a, an telvena leh a chi kima an inbuatsaihna chuan a ṭha a ni tih a tichiang a ni. Chûng “a inringte chu amah nên lawi chaw eiin an lût a; tin, kawng chu an khâr ta a.”

9, 10. Nula thianghlim tehkhin thu pawimawh lai engnge ni a, eng zawhnate nge keimahni leh keimahni kan inzawh tûr?

⁹ Isua chuan inneihna-a chêt mawi leh nalh thu a sawi lo va, chu ta telvena chungchâng thurâwn a pe bawk hek lo. A sawi chu: “Ngaihven rawh u, a nî leh a hun in hre si lo va,” tih a ni. ‘Isua loawmlehna hun atân ka inring chiah em?’ tih zawhna hi han inzâwt teh? Tûnah Isua chuan vânah a awp tih kan ring a; mahse, ‘mihring fapa hi thiltihtheihna leh ropuina nasa tak nên vân chhûm chunga a lo kal’ hun tak takah chuan engtin nge thlîr kan nih ang? (Matthaia 24:30) “Zan lai” vêlah chuan nula thianghlimte mo neitu hmuak tûra an kal chhuah tirh lai ai chuan a rawn thlen hun chu an hnai zâwk ngei ang. Chutiang chiah chuan, he thil kalhmang sualte tichhe tûra mihring Fapa lo thlen hun tûr chu a loawmleh hun tûr kan thlîr tirh ai chuan a hnai zâwk a ni. (Rom 13:​11-14) Chu hun chu a hnaih deuh deuh avângin inrâlring zual sauhvin, ka inrâlrinna chu ka vawng ṭha em le?

¹⁰ He thu pêk “ngaihven rawh u” tih zawm tûr chuan inthlah dul lo va inrâlrinna a ngai a ni. Nula thianghlim pangate chuan an khâwnvârtui a ral ṭêp avângin lei belh tûrin an chhuak a. Tûn lai Kristian-ah pawh Isua lo thlen hnai tawh takah hian inpeih pumhlûm lohna tûra rilru lâk pen an awm ngei ang. Kum zabi pakhatna-a Kristian ṭhenkhatte chungah pawh a thleng a, tûn lai mi ṭhenkhatte chungah pawh a thleng thei a ni. Chuvângin, ‘Hei hi ka chungah a thleng em?’ tiin, keimahni leh keimahni i inzâwt ang u.​—1 Thessalonika 5:​6-8; Hebrai 2:1; 3:12; 12:3; Thu Puan 16:15.

Tâwpna a Hnaih Avângin Taima Rawh

11. Eng tehkhin thu nge a hnu-ah Isua’n a sawi a, eng inanna nge an neih?

¹¹ A tehkhin thu dang leh-ah chuan, Isua’n a hnung zuitute chu inrâlringa awm tûrin a nawr leh a. Nula thianghlim fing leh â chungchâng a hrilh hnu-ah, talent tehkhin thu a sawi leh a. (Matthaia 25:​14-30 chhiar rawh.) Chu tehkhin thu Isua sawi chuan a tehkhin thu hmasa rangkachak tangka tehkhin thu nên kawng tam taka a inan avângin mi tam takin ‘Pathian ram chu lo lang nghâl tûr niin an ring’ a ni.​—Luka 19:​11-27.

12. Talent tehkhin thu-a a thu pawimawh ber engnge ni?

¹² Talent tehkhin thu-ah hian, Isua’n mi pakhat ram hla taka zin tûrin a bawih pathumte a koh khâwm thu a sawi a. Pakhat hnênah chuan talent nga a kawltîr a, midang hnênah talent hnih; tin, a dang leh pakhat hnênah chuan talent khat chauh a kawltîr a​—“an theih tâwk tûr ang zêl ṭheuh­vin.” Chutiang bawkin, he tangkaraw tangka pawh hian chu hnathawktu-in kum 14-a a hlawh tûra pawisa ruahman chu a sawi a​—pawisa tam tak chu! Chu mi chu a lo haw chuan, “hun rei tak” a awm bo chhûngin engnge an lo tih sawifiah tûrin a chhiahhlawhte chu a kova. A chhiahhlawh hmasa pahnihte chuan an hnêna a hlan chu a lêtin an lo tipunga. A ni chuan, “i ti ṭha e” ti a mawhphurhna dang tiam belh leh ve ve-in: “I pu lâwmna-ah lût rawh,” tiin, a titâwp a ni. Talent khat kawltu chhiahhlawh chuan an pu chu mi tikher kher anga puhin, tangka chu engah mah a hmang ṭangkai lo va ni. A pung nei tûra pawisa kawltu hnên pawha dah lovin, pawisa chu a thukru ngawt mai a. A pu hamṭhatna kalh zâwnga hna a thawh avângin a pu chuan “Bawi sual leh zawmthawpa” tiin, a sawi a, a tâwpah chuan, tangka chu a lâk sak a, ‘ṭah leh ha ṭhial awmna’ tûr pâwnah chuan an paih chhuak ta a ni.

13. Engtin nge Isua khân tehkhin thu-a pu ang kha a ni tih a tihchian a; tin, eng thu bul zau zâwk nge kan ngaihtuah tûr?

¹³ He thu pawh hi hriatthiam theih taka entîr nei a ni leh a. Entîr nân, mi ram hla taka zin bo chuan, Isua’n a zirtîrte vânah a kalsanin, chutah chuan lalna thuneihna a chan hma loh chu hun rei tak a nghah tûr thu a entîr a ni.b (Sâm 110:​1-4; Tirhkohte 2:​34-36; Rom 8:34; Hebrai 10:12, 13) Chu bâkah, zirlai zau zâwk emaw, thu bul emaw kan nuna kan hman ngei tûr kan hmu leh thei a. Chu chu engnge ni?

14. Talent tehkhin thu khân eng thu pawimawh tak nge a sawi uar?

¹⁴ Kan beisei chu vâna thi thei lo nunna emaw, lei paradis-a chatuana nunna a ni emaw Isua tehkhin thu aṭang hian Kristian thiltihna-ah kan tha kan hmang tûr a ni tih a chiang a ni. Dik tak chuan, he tehkhin thu-in a sawi hi thu mal: taih­mâk­na tiin, kan sawifiah thei ang. Tirhkohte chuan C.E. 33-a Pentikost aṭangin zui tûr an lo siam tawh a. “Tin, thu dang tam takin a hrilh­fiah a; ‘Tûn lai ṭhangthar bengtla lote lakah hian intihim rawh u,’” tiin, kan chhiar a ni. (Tirhkohte 2:​40-42) A beihna chuan rah chhuah a va nei ṭha chungchuang tak em! Kristian thuhrilhna hna-ah midangte pawhin tirhkohte an thurualpui a, an ni pawh chu an taima êm êm a, chanchin ṭha chu ‘khawvêl zawng zawngah a pung zêl’ a ni.​—Kolossa 1:​3-6, 23; 1 Korinth 3:​5-9.

15. Talent tehkhin thu-a rinna chu eng kawng bîk-in nge kan hman theih ang?

¹⁵ He tehkhin thu-in a a sawi ber chu rilru-ah vawng reng la​—Isua loawmlehna chungchâng hrilhlâwkna chu. Isua loawmlehna (pa·rou·siʹa) hma sâwn zêlin, a vawrtâwp a thleng thuai dâwn tih hriatchianna thûk zâwk kan nei a ni. “He ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” ti a Isua’n “tâwpna” leh Kristiante hna thawh tûr inzawm dân a sawi kha ngaihtuah kîr leh la. (Matthaia 24:14) Hei hi vawng reng chungin, bawih eng ang nge kan nih tûr le? He zawhna: “A mimal ngaihtuahna chuan vawng ṭha a inngaih laia, bawih a hnêna kawltîr a thukrutu, ang kha ka ni em? A nih loh leh chûng mi ṭha leh rinawmte ang chu ka ni tih a chiang em? Rem châng apiangah Pu hlâwkna punna tûrin ka tum ruh tlat em?’ tih zawhnate hi nangmah leh nangmah inzâwt ang che.

A Loawmleh Hun Chhûnga Inrâlrin leh Taihmâk

16. Tehkhin thu pahnih kan sawi ho takte khân eng thuchah nge i tâna a siam?

¹⁶ Hêng tehkhinna thil emaw, hrilhlâwkna lam thu mai bâkah emaw, hêng tehkhin thu pahnihte hian amah Isua ka ngei aṭanga chhuak fuihna thu fiah tak takte min pe bawk a ni. A thuchah chu hei hi a ni: Inrâlring ula; taima rawh u, a bîk takin Krista loawmlehna (pa·rou·siʹa) chhinchhiahna hmuh a nih lai hian tih hi. Chu chu tûn hun hi a ni. Chuvângin, kan taima-in, kan inrâlring tak meuh em?

17, 18. Zirtîr Jakoba chuan Isua loawmlehna chungchâng ngaihtuahin eng fuihna thu nge a pêk?

¹⁷ Isua unau Jakoba chu Isua hrilhlâwkna thu sawi ngaithla tûrin Oliv Tlângah khân a awm ve lo va; mahse, a hnu-ah a zir a, a pawimawhna chu chiang takin a man a ni. “Chutichuan unaute u, Lalpa loawmleh hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnûng chu a hmuh hma loh chuan chhel takin lei rah hlu tak chu a nghâk ṭhîn. Nangni pawh chhel takin awm rawh u; in thinlung tinghet tawh u; Lalpa loawmlehna chu a hnai tawh si a,” (Hawrawp kan tihâwn a ni) tiin, a ziak a ni.​—Jakoba 5:​7, 8, NW.

¹⁸ Tupawh an hausakna hmang sualtute chu Pathianin dik takin a ro a rêl dâwn tih tiamna pe-in, Jakoba chuan che tûra Jehova kan nghah laiin dawhthei tak ni tûrin Kristiante chu a ngên a ni. Kristian dawhtheihna tlachham chuan chutiang thil dik lote chu amah ngeiin tih dik nghâl a duh ngei ang. Nimahsela, rorêlna ni chu a lo thlen ngei dâwn avângin chutiang chu a ni tûr a ni lo. Loneitu tehkhin thu entîrna Jakoba lo sawi tawh ang khân.

19. Israel loneitute khân eng ang dawhtheihna nge an lantîr?

¹⁹ Israel loneitu chawm tûra buh chi chîngtute chuan, a hmasa ber-ah chuan ṭo tûra chîn a ngai a; tin, ṭhang puitling tûra châwm leh sengkhâwm chu a ni. (Luka 8:5-8; Johana 4:35) Khîng thla chhûng zawng khi chuan ruah hmasa tam tâwk a sûr ang em? Ruah hnuhnung engnge ni ang? Thlipui leh rannungten thlai chu an tihlum ang em? tih ngaihtuahna awm thei te avângin enghelh taka awm hun lai a ni. (Joela 1:4; 2:​23-25 khaikhin rawh.) Chutichung pawhin, Israel lo neitute chuan kawng engkim-ah Jehova an ringin leh awm dân phungchâng pangngai inthlâkkual dân a ruatte chu an ring tlat a ni. (Deuteronomy 11:14; Jeremia 5:24) Loneitute dawhtheihna chuan beiseina nghet tak nei tûrin a ṭanpui tak zet a ni. A thil nghah lo thleng tûr chu rinna-in a hria a ni. Lo ni ngei tûr chu!

20. Jakoba fuihna thu nêna inmilin engtin nge dawhtheihna kan lantîr ang?

²⁰ Loneitu-in buh seng hun tûr hriatna ṭhenkhat an neih laiin, kum zabi pakhatna Kristiante erawh chuan Isua loawmlehna hun tûr an chhût thei lo thung. Thlasik anga khêl lo va thleng tûr ni chung siin. Jakoba chuan: “Lalpa loawmlehna [Greek, ṭawngin pa·rou·siʹa] chu a hnai tawh si a,” tiin, a ziak a. Chutiang thu Jakoba’n a ziah lai chuan chûng chhinchhiahna, a nih loh leh khawvêl pumpuia Krista-a loawmlehna tihchianna chu a la chiang rih lo va. Mahse, a hun chu tûn hi a ni! Tichuan engtin nge he hun chhûng hi kan ngaih ang? Chhinchhiahna chu a tak takin a hmuh theih a. Chu chu kan hmu a ni. ‘Chhinchhiahna thleng famkim chu ka hmu,’ tiin, kan sawi thei a ni. ‘Lalpa loawmlehna leh a vâwrtâwp chu a hnai’ tiin, ring tak chungin kan sawi thei a ni.

21. Tih kan tum tlat tûrte chu engte nge ni le?

²¹ Lalpa loawmlehna chu a hnaih avângin, kan sawi ho tâk Isua tehkhin thu pahnih zirtîr bulpui a taka hmanna tûr leh rilru-a vawnna tûr chhan ṭha bîk zual kan nei a ni. A ni chuan: “Chu­ti­chuan, ngaihven rawh u, a nî leh a hun chu in hre si lo va,” tiin, a sawi a ni. (Matthaia 25:13) Tûn hi hnial rual lo va Kristian rawngbâwlna-a taihmâk kan chhuah hun lai chu a ni. Isua thute kan hriatthiam chu kan nitin nun-ah i lantîr ang u. I in­râl­ring reng ang u! Taima takin i awm ang u!

[Footnote-te]

I Hre Chhuak Thei Em?

◻ Nula thianghlim fing leh â tehkhin thu aṭangin eng thuchah pawimawh tak nge i hmuh chhuah?

◻ Talent tehkhin thu hmangin eng thurâwn bul nge Isua’n a pêk che?

◻ Israel loneitute angin i dawhtheihna chu eng ang kawngin nge loawmlehna (pa·rou·siʹa) nên a inlaichîn?

◻ Engvângin nge chu hun chhûnga nun chu a bîk taka phûrthlâk tak leh cho awm tak hun a nih theih le?

[Phêk 23-naa milem]

Nula thianghlim tehkhin thu leh talent tehkhin thu aṭangin eng thu nge kan zir?