Chhûngkua-in Pathian Thu Mumal Takin Zir Rawh
“Mihring hi chhang chauhvin an nung lo vang a, Pathian kaa thu tin chhuakin an nung zâwk ang.”—MATTHAIA 4:4.
1. Jehova kawngte chu an fate zirtîr tûra chhûngkaw lû-te mawhphurhnate chungchâng Bible-in eng nge a sawi?
PATHIAN JEHOVA chuan chhûngkaw lû-te hnênah an fate zirtîr tûra an mawhphurhna chu a hriatnawntîr fo va. Chutiang inzîrtîrna chuan naupangte chu tûn nun atân a thuam a, nun lo la awm tûr atâna inbuatsaihna nei tûrin a ṭanpui thei bawk. A chhûngte’n ‘Jehova kawng an zawh theih’ nân Pathian ai awh vântirhkoh chuan Abrahama hnênah a chhûngte zirtîr tûra mawhphurhna chu a pe a ni. (Genesis 18:19) Israel nu leh pate chu an fate hnênah Pathianin Israel mite Aigupta ram ata a chhanchhuah dân leh Horeb hmun, Sinai tlânga a Dân a pêk dânte hrilhfiah tûra hrilh an ni. (Exodus 13:8, 9; Deuteronomy 4:9, 10; 11:18-21) Kristian chhûngkaw lû-te chu an fate “Lalpa thununnaah leh zilhnaah chuan” enkawl tûrin fuih an ni. (Ephesi 6:4) Nu emaw, pa emaw chauhvin Jehova rawng a bâwl a nih pawhin, chu mi chuan naupangte chu Jehova kawng zirtîr a tum ṭâng ṭâng tûr a ni.—2 Timothea 1:5; 3:14, 15.
2. Naupang awm lohna in-ah chhûngkuaa zirna a ṭûl tho vem? Hrilhfiah rawh.
2 Hei hian naupang awmna chhûngkuaah chauh chhûngkuaa Pathian Thu zirhona neih tûr tih a kâwk lo. Nupate chuan inah naupang a awm loh pawha chhûngkaw zirna an neihin, chu chuan thlarau lam thilte an ngaihhlutzia a lantîr a ni.—Ephesi 5:25, 26.
3. Engvângin nge chhungkaw zirna mumal taka neih chu a pawimawh?
3 Rah chhuah ṭha ber nei tûr chuan, inzirtîrna chu mumal taka pêk tûr a ni: “Mihring hi chhang chauhvin an nung lo va, LALPA kâa thu tin chhuakin an nung zâwk a ni,” ti-a thlalêra Israel fate hnêna Jehova zirtîrna pêk nêna inmilin. (Deuteronomy 8:3) Chhûngkaw dinhmun azirin chhûngkaw ṭhenkhatte chuan chawlhkâr tina zirna an ruahman mai thei a; a dangte chuan ni tinin rei lo tê tê-a zirna an nei mai thei bawk. Ruahmanna engpawh chu thlâng la, zirna chu remchân huna tih atân dah mai suh. Chu mi atân chuan ‘hun lei rawh.’ Chutiang hun atâna mamawh a man pêk chu indahkhâwlna ṭha tak a ni. I chhûngkaw zînga mite nun chu chân mai theih a ni si a.—Ephesi 5:15-17; Philippi 3:16.
Rilru-a Vawn Reng Tûr Thiltumte
4, 5. (a) An fate zirtîrna kawnga thiltum pawimawh tak chu Jehova’n Mosia kaltlangin eng entawn tûr nge a pêk? (b) Chu chuan tûn laiah kaihhnawih eng nge a neih?
4 Chhûngkaw zirna i kaihhruaiin, thiltum bîk chiang tak i rilru-a i neih chuan, zirna chuan thil ṭha ropui ber a hlen chhuak ang. Thil ni thei tlêm han ngaihtuah teh.
5 Zirna tinah, Pathian Jehova kan hmangaihna tihchangkân dân tûr zawng rawh. Israel fate Thutiam Rama an luh hmâ Moab phaia an kal khâwm lai khân, Mosia chuan an ngaihtuahna chu Isua Krista’n nakina ‘Dân thupêka ropui ber’ a tih tûrah chuan a lakhâwm tlat a ni. Chu chu eng nge ni? “LALPA in Pathian chu in thinlung zawng zawngin, in rilru [“soul,” NW] zawng zawngin, in chakna zawng zawngin in hmangaih tûr a ni,” tih hi a ni. (Matthaia 22:35-37; Deuteronomy 6:5) Mosia chuan Israel mite chu he thupêk hi an rilru-a tuh ṭheuhva, an fate pawh zirtîr tûrin a fuih a ni. Chu mi ti tûr chuan hrilhnawnna te, Jehova hmangaih nachhan tûr lama ngaihtuahna pêk te, chutiang hmangaihna lanchhuahtîrna dang thei nungchang leh rilru put hmang hmachhawn te, leh an mahni nun ngei-a Jehova hmangaihna lanchhuahtîr te a ṭûl a ni. Kan fate’n chutiang bawk inzirtîrna chu an mamawh em? Teh rêng mai! Pathian an hmangaihna tibahlah thei thil rêng rêng tibo tûra ‘an thinlung serh tan’ tûrin ṭanpui an ngai bawk a ni. (Deuteronomy 10:12, 16; Jeremia 4:4) Chûng tihbahlahnate zîngah chuan khawvêl thilte châkna leh a thiltihnaa tel vek tûra hun remchâng neih duhnate a tel thei a ni. (1 Johana 2:15, 16) Jehova hmangaihna chu a nung tûr a ni a, sawi fiah theih a ni bawk tûr a ni a, kan van lam Pa lâwm zâwng ti tûrin min chêttîrtu a ni bawk tûr a ni. (1 Johana 5:3) In chhûngkaw zirna-in hlâwkna tluantling thlen tûr chuan, zirna tin chu he hmangaihna tichak thei tûr zâwnga kaihhruai a ni tûr a ni.
6. (a) Hriatna dik pe chhuak tûrin eng nge ṭûl? (b) Pathian Lehkha Thu-in entin nge hriatna dik pawimawhzia a sawi uar?
6 Pathian phût hriatna dik pe rawh. Hei hian eng nge a kaihhnawih? Magazine emaw, lehkhabu emaw aṭanga zawhnate chhânna chhiar chhuah mai aia tam a kaihhnawih a ni. A thu pawimawhte leh ngaih dân bulte chiang taka hriat nân sawihona a mamawh tlângpui a. Hriatna dik chu mihring thara inthuam nân, nun harsatna kan hmachhawn laia thil pawimawh tak takte ngaihtuah nân; tichuan, Pathian lâwm zâwng tihnaah hriatna dik chuan thil pawimawh tak a ni.—Philippi 1:9-11; Kolossa 1:9, 10; 3:10.
7. (a) Zirlai thute a taka hmang tûrin eng zawhnate hmanna hian nge chhûngkua chu ṭanpui thei? (b) Chutiang thiltum hlu chu Pathian Lehkha Thu-in engtin nge a sawi uar?
7 Zir tawhte a taka hmang tûrin ṭanpui rawh. He thiltum thlîr chungin, chhûngkaw zirna hun tinah: ‘He thu hian engtin nge kan nun a nghawng ang? Tûna kan tih dân aṭang hian thlâkthleng ngai engemaw a awm em? Engvângin nge insiamrem chu kan duh ang?’ tiin, zâwt ang che. (Thufingte 2:10-15; 9:10; Isaia 48:17, 18) Thil zirte a taka hman dâna ngaihsakna tam tâwk pêkna chu chhûngkaw zînga mite thlarau lam ṭhanlen nân thil pawimawh tak a ni thei a ni.
Zirtîrna Hmanruate Thiam Takin Hmang Rawh
8. Bible zirna atân, bawih hote chuan eng hmanruate nge an ruahman?
8 ’Bawih rinawn, fingte’ chuan zir theih hmanrua tam tak an ruahman a. Bible nêna hman tûr Vênnainsâng magazine te chu ṭawng chi hrang 131-in a hmuh theih a. Bible zir nâna hman tûr lehkhabu ṭawng chi hrang 153-in a awm a, brochure ṭawng chi 284-in, cassette ngaihthlâk chi ṭawng chi 61-in, leh videocassette ṭawng chi 41-in, leh computer research program ṭawng chi 9-in hmuh theih a ni bawk!—Matthaia 24: 45-47.
9. Chhûngkuaa Vênnainsâng zirna neih laiin, Pathian thu châng târ lana thurâwnte chu engtin nge kan hman theih?
9 Chhûngkaw tam takte chuan chhûngkaw zirna hun chu kohhran Vênnainsâng zirna atân inpuahchah nân an hmang ṭhîn a. Chu chu a va ṭangkai êm! Vênnainsâng-ah chuan khawvêl pumpuia Jehova mite tihsâwtna tûra ruahman thlarau lam chaw pawimawh berte a tel a ni. Chhûngkuaa Vênnainsâng in zirin paragraph chhiar mai leh a zawhna chhân mai aia nasa-in ti ṭhîn ang che. Ṭhahnemngai takin hriat thiam tum ang che. Lâk chhâwn ni lo Pathian thu châng târ lante en nân hun insiam bawk ang che. Chûng chu paragraph ngaihtuah mêka thu awmte nêna an inlaichîn dân sawi tûrin chhûngkaw zînga mite chu sâwm rawh. Sawihonaah thinlung inrawlh rawh se.—Thufingte 4:7, 23; Tirhkohte 17:11.
10. Zirnaa naupangte inrawlh ve ngei tûr leh an tâna hun hlimawm tak nihtîr tûrin eng nge a tih theih?
10 In chhûngkhurah naupang a awm chuan, zirna chu chhûngkaw tih dân ang mai chauh ni lo va, mi tihsâwt thei, tuiawm, leh hun hlimawm tak nihtîr tûrin eng nge i tih theih? Zirlai-a ngaihtuahna a awm theihna tûrin mi tin chu a remchân ang zêlin chanvo neihtîr tûm ang che. A theih phawt chuan, naupang tinte tân mimal Bible leh zirlai magazine ruahman sak ang che. Isua lantîr nêlawmna chu entawnin, nu leh pate chuan naupangte chu an kiang hnai takah an ṭhuttîr thei a, kuah pawh an kuah hial thei a ni. (Marka 10:13-16 khaikhin rawh.) Chhûngkaw pa ber chuan zirlai thu-a lo lang milemte chu naupangte a hrilhfiahtîr thei ang. Naupang tê chu Pathian thu châng eng engemaw chhiar tûra ruat lâwk theih a ni. Naupang upa zâwkte chu zirlai thu a taka hman dân sawina hun remchâng nei tûra ruat lâwk theih a ni bawk.
11. Eng zirna hmanraw dangte nge ruahman a nih a, a hmuh theihna hmunah chuan hêngte hi chhûngkaw zirnaah eng anga hman ṭangkai theih nge a nih?
11 Vênnainsâng chu sawikhâwmna atân in hmang ber a nih pawhin, zirna hmanraw dang, ṭawng chi hrang hranga hmuh theihte chu theihnghilh suh ang che. Bible thusawite hrilhfiahna emaw, a ṭobul hriat emaw a ṭûl a nih chuan, Insight on the Scriptures a hman theih ang. Zawhna dangte chu Watch Tower Publication Index râwnin emaw, Society ruahman Computer research program râwnin emaw a chhân theih ang. In ṭawnga chhuah a nih chuan, hêng hmanruate hman dân zir hi chhûngkaw zirna pêng hlu tak a ni thei a ni. Naupangte tuina chawh thawh tumin, in zir hun ṭhenkhat chu mi zirtîr thei Society video-te zînga pakhat en nân emaw, lemchan cassette ngaithlaa chumi chungchâng sawiho nân emaw i dah hrang thei bawk. Hêng zirna hmanruate hman ṭangkaina chuan i chhûngkaw zirna chu in zavai tân tuiawm leh ṭangkai nihtîr tûrin a ṭanpui thei a ni.
I Chhûngkaw Mamawh ang Zêlin Siam Rem Rawh
12. Chhûngkuaa nasa taka pawimawh thil mamawhte hmachhawnnaah chhûngkaw zirna chuan engtin nge chanvo a neih theih?
12 Chawlhkâr khât atâna Vênnainsâng zirlai chu i chhûngkaw thu zir a ni tlângpui mai thei a. Mahse, chhûngkuaa harsatna inphûm rû-te hria ang che. Sawrkâr hna a thawh loh chuan, nu berin school bânah naupangte nên ni tin hun a hmang thei ang. Tichuan dinhmun ṭhenkhat chu a enkawl theih ang a; a dangte chuan ngaihsakna nasa zâwk a mamawh mai thei a ni. Chhûngkua-in nasa taka pawimawh thil mamawh a neih chuan ngaihthah mai suh. (Thufingte 27:12) Chûng mamawhah chuan school-a harsatna mai bâkah, dinhmun danga harsatna pawh a tel thei a ni. Thu inchawih tak thlang la, zir tûr chu chhûngkuaa mite hriat lâwktîr ang che.
13. Retheihna hneh theih dân chungchâng chhûngkuaa sawihona neih chu engvângin nge a ṭangkai theih?
13 Entîr nân, khawvêl hmun zau tak hi retheihna-in a ṭhâm mêk a; chuvângin, hmun tam takah chuan chu mi hneh dân tûr sawiho chu a ṭûl mai thei a ni. A taka kan tawn mêk dinhmun leh Bible thu bula innghat chhûngkaw zirna chu i chhûngkua hian a hlâwkpui ang em?—Thufingte 21:5; Thuhriltu 9:11; Hebrai 13:5, 6, 18.
14. Tharum thawhna, indona, leh Kristiante tualdawihna chungchâng Jehova thlîr dân a hun taka sawihona chu engin nge awmtîr thei?
14 Sawiho ngai thu dâng leh chu tharum thawhna chungchâng hi a ni. Kan za-in Jehova thlîr dân chu kan rilru leh kan thinlungah nghet taka kan tuh a pawimawh a. (Genesis 6:13; Sâm 11:5) He thute chhûngkuaa zirna hian school-a mi sawisak hmangte dâwr dân te, indo thiamna (martial arts) zir a ṭha em tih te, leh a âwm tâwk intihhlimna thlan dânte sawihona hun min siam thei a ni. Tharum thawha inbeihna hi a hluar hle tawh a; ram tin deuh thaw chu tual râl, ram thuneihna emaw hnam hrang emaw innghirnghona, a nih loh leh misual rual râlin a chîm buai mêk a ni. Chuvângin, i chhûngkua chuan innghirnghona-in a hual vêl laia Kristian nungchang chhawnnunna chungchâng sawihona neih chu a mamawh ngei ang.—Isaia 2:2-4; Johana 17:16.
15. Naupangte chu mipat hmeichhiatna leh inneihna chungchâng eng anga zirtîr tûr nge a nih?
15 Naupangte an lo ṭhanlenin, an kum milin mipat hmeichhiatna chungchâng leh inneih chungchâng inzirtîrna an mamawh a ni. Hnam dân ṭhenkhatah chuan nu leh pate chuan an fate chu mipat hmeichhiatna chungchâng an sawipui ngai lo va. Hrilhhriat loh naupangte chuan ṭhalai dangte hnên aṭangin ngaih dân veiherh an dawng ang a, a rah chhuah chu râpthlâk tak a ni thei ang. Hemi chungchângah chuan Bible-a tlang tak, mahse thiam tak si-a zilhna min petu Jehova entawn chu a ṭha zâwk lo vang maw? Pathian lam zilhna chuan kan fate chu mahni inzahna chhawmnung tûrin leh chi anpui lote (opposite sex) zahawmna nêna cheibâwl tûrin a ṭanpui dâwn a ni. (Thufingte 5:18-20; Kolossa 3:5; 1 Thessalonika 4:3-8) Hêng thilte hi in lo sawiho tawh a nih pawhin, sawi nawn hreh phah suh ang che. Dinhmun a thar zêl angin, sawi nawn chhen hi thil pawimawh tak a ni.
16. (a) Chhûngkaw hrang hrangah chuan, chhûngkaw zirna chu eng hunah nge an neih? (b) Mumal taka chhûngkaw zirna neih nâna harsatna awmte chu engtin nge i dâwr?
16 Eng hunah nge chhûngkaw zirna chu neih theih a nih? Khawvêl puma Bethel chhûngkuaa mite entawnin, chhungkaw tam takte chuan an chhûngkaw zirna chu Thawhṭanni tlai-ah an nei ṭhîn a. A dangte chuan hun dangah an nei bawk. Argentina ram mi chhûngkaw pakhat, an fa 9-te tiama mi 11-te chuan chhûngkaw zirna nei tûrin zîng tin dâr ngaah an tho ziah a. Hnathawh hun duan chi hrang hrangte avângin, hun dang chu a rem thei lo a ni. Thil awlsam a ni lo; mahse, chhûngkaw zirna pawimawhzia chu naupangte rilru leh thinlungah a tuh nghet tlat a ni. Philippine rama upa pakhat chuan a nupui leh a fate pathum nên, a fate an lo ṭhanlen rualin chhûngkaw zirna a neihpui ziah a. Nu leh pa chuan naupang tinte’n thutak anmahni ta nihtîr ṭheuh thei tûrin chawlhkâr chhûngin naupang tinte chu mimal zirna an neihpui ṭheuh bawk a ni. United States rama Thuhretu ni lo pasala nei unaunu pakhat chuan zîng tin a fate nên school bus dinna thleng kê-in an kal ziah a. Bus an nghah lai chuan, Pathian thu, zirlai thu inhmeh takte chhiar leh sawiho nân minute sâwm vêl an hmang dûn ṭhîn a; tichuan, naupang chu bus-a a luh hmâ-in ṭawngṭaina tâwitê a hmang ṭhîn a ni. Democratic Republic of Congo rama ringlo mi a pasalin a tlân san nu pakhat chuan lehkha a thiam tâwk loh avângin chhûngkaw zirna a neih nân nasa taka a beih a ngai a. A fapa puitling tawh chuan a nu leh a naute telna zirna kaihruai tûrin chawlhkâr tin tlawhin a ṭanpui ṭhîn a ni. Nu ber chuan taima taka inpuahchahna hmangin entawn tûr ṭha tak a siam a ni. I chhûngkuaah chhûngkaw zirna mumal taka neih nân harsatna siam thei dinhmun ṭhenkhat a awm em? Tlâwm hauh suh ang che. Mumal taka Bible zirna nei thei tûra i beih ṭâng ṭângnaah Jehova malsâwmna chu tih tak zetin dîl ang che.—Marka 11:23, 24
Beidawn Lohna Lâwmman
17. (a) Mumal taka chhungkaw zirna neih theih nân eng nge ṭûl? (b) Jehova kawnga mumal taka chhûngkaw inzirtîrna hlutzia chu eng thiltawn hian nge lantîr?
17 Remruatna a ngai a, beidawn loh a ṭûl bawk. Mahse, chhûngkuaa mumal taka zirna neihna aṭanga lo awm hlâwkna chuan, chutianga tih chu a phû a ni. (Thufingte 22:6; 3 Johana 4) German ram mi Franz-a leh Hilda-i te chuan, fa 11 an enkawl a. Kum engemaw zât ral hnu chuan an fanu Magdalena-i chuan: “Tûn laia thil pawimawh bera ka ngaih chu thlarau lam inkaihhruaina engemaw tal dawn loh nî kan neih loh hi a ni,” tiin, a sawi a ni. Adolf Hitler hruaina hnuaia ram hmangaihna boruak a sosân hle laiin, Magdalena-i pa chuan rawn thleng tûr ni-a a hriat fiahna atân a chhûngkua buatsaih nân Bible a hmang a. Nakinah chuan, chhûngkaw zînga naupang lamte chu man niin reform school-ah hruai an ni a, mi dangte chu mana awmin, tân inah khung leh concentration camp-a dah an ni. Ṭhenkhatte chu tihhlum an ni bawk. An za-in an rinna chu an vawng nghet tlat a ni—tihduhdahna firfiak tak chhûng mai ni lo vin, dam khawchhuakte chuan tihduhdahna hnû kum kal zêlahte pawh.
18. Nu leh pa malte theihtâwp chhuahna chu eng anga lâwmman pêk nge a nih?
18 Nu leh pa mal tam takte leh an rinna ṭawmpui lo kawppui neite pawhin chutiang bawkin an fate chu Bible inkaihhruaina mumal takin an neihpui ṭhîn a ni. India mi nu mal, hmeithai, chuan a fa pahnihte laka Jehova hmangaihna tuh nghet tûrin nasa takin a thawk rim a. Nimahsela, a fapa-in Jehova mite a kalsan chuan a rilru a na hle a. Jehova hnênah a fapa zirtîrnaa a tlinlohna engpawh chu ngai dam tûrin a ngen a ni. Mahsela, a fapa chuan a thil zir tawhte chu a theihnghilh tak tak lo va. Kum sâwm aia tam a vei hnû chuan, a lo hawikîr leh a, thlarau lamah hmasâwnna ṭha tak neiin, kohhran upa a lo ni ta a ni. Tûnah chuan amah leh a nupui chu hun zawng zawnga hmatâwnga rawngbâwltu-ah an ṭang a ni. In chhûngkhura mumal taka Bible inzirtîrna nei tûra Jehova leh a inawpna pâwl aṭanga zilhnate thinlung taka lo dawngsawngtu nu leh pate chu an va hlim êm! Chûng zilhnate chu i chhungkuaah i hmang ve em?
I Hrilhfiah Thei Em?
◻ Engvângin nge mumal taka chhûngkaw zirna a pawimawh?
◻ Chhûngkaw zirna hun chhûng tinah eng nge kan tum ber ang?
◻ Eng zirna hmanruate nge kan tân hmuh theiha buatsaih a nih?
◻ Engtin nge zirna chu chhûngkaw mamawh ang zêlin a siam rem theih?
[Phêk 15-naa milem]
Thiltum chiang tak neihna chuan i chhûngkaw zirna a tichangkâng ang