Kan Chhandamna Pathianah Chuan Lâwm Rawh
“Ka lâwm zêl ang, LALPA-ah chuan, ka chhandamna Pathianah chuan ka lâwm cheu dâwn.”—HABAKUKA 3:18.
1. B.C.E., 539-a Babulon a tlûk chhiat hma khân, eng chugchâng inlârna nge Daneila’n a hmuh?
B.C.E. 539 Babulon tlûk chhiat hma kum sâwm aia tamah, zâwlnei upa tawh tak Daniela chuan inlârna phûrawm tak a hmu a. Chu chuan Jehova hmêlmate leh A Lal ruat, Isua Krista indona vawrtâwpa hruai thleng tûr, khawvêl thilthlengte chu a hril lâwk a ni. Daniela chuan engtin nge a chhân lêt? Ani chuan: “Ka chau va, . . . inlârna chu mak ka ti êm êm mai a,” a ti a.—Daniela 8:27.
2. Eng indona nge Daniela’n inlârnaah a hmuh a, chu inlârna lo thlen hun a hnaihzia chungchâng engtin nge i ngaih?
2 Anih leh keini’n engtin nge kan chhân lêt ve? He hun kal zêlah hian kan lût thûk hle tawh a. Daniela’n inlârnaa a hmuh, Pathian indona Armageddon a hnai hle tawh tih kan hriatin engtin nge kan chhân lêt? Habakuka hrilh lâwknain a târ lan suahsualnate a pung êm êm a, Pathian hmêlmate tihboralna chu pumpelh theih a ni lo tih kan ngaihtuahin, engtin nge kan dawn sawn? Kan ngaihtuahna chu Habakuka’n a lehkhabu bung thumnaa a ngaihtuahna a sawi nên a inang ngei ang.
Habakuka’n Pathian Zahngaihna a Dîl
3. Tute tân nge Habakuka a ṭawngṭai a, a thu hian engtin nge keini min nghawng theih?
3 Habakuka bung 3-na chu ṭawngṭaina a ni. Bible dangin châng 1-naa a sawi dânin, bung 3-na chu sûnna hla, lungngaihna hla emaw, ṭah hla emaw a ni. Zâwlnei ṭawngṭaina chu ama tâna sawi niin a lang nâ a, Pathian hnam thlante tâna a sawi a ni zâwk a. Tûn hunah chuan Pathian Lalram thuhrilh rawngbâwlnaa telte tân chu ṭawngṭaina chuan awmzia tam tak a nei a ni. He mi rilrua vawng reng chunga Habakuka bung 3-na kan chhiar chuan, a thute chuan min tithlaphâng a; mahse, hlimnain min tikhat bawk a ni. Habakuka ṭawngṭaina, a nih loh leh sûnna hla chuan, kan chhandamna Pathiana kan lâwmna tûrin chhan ṭha tak min pe a ni.
4. Engvângin nge Habakuka chu a thlaphân a, Pathian thiltihtheihna lantîr dânah eng nge kan chian theih?
4 A hmaa thuziak pahniha kan lo hriat tawh angin, Habakuka hun laia Judai ram dinhmun chu a chhe hle a. Mahse, Pathian chuan he dinhmun awm zui zêl hi a phal lo vang. Jehova chuan hun kal tawha a tih angin, phuba a la ang. ‘Aw Jehova, i chanchin an hril ka lo hria a, Aw Jehova, i thiltihte avângin ka hlau va,’ tia zâwlnei a auchhuak pawh hi a mak lo ve! Eng a sawi duhna nge ni? ‘Jehova chanchin an hril’ chu Pathian thiltih chak tak, Tuipui Sen-a a thiltih te, thlalêr rama a thiltih te, leh Jeriko-a a thiltih te chu a ni. Chûng thiltihte chu Habakuka’n a hre chiang hle a, Pathian chuan a thiltihtheihna nasa tak chu a hmêlmate lakah a hmang leh dâwn tih a hriat avângin chûng chuan a tithlaphâng a ni. Tûn lai mihringte suahsualna kan hmuh hian, keini pawhin Jehova’n hmân laia a tih angin tûnah pawh a tive ang tih kan hria a ni. Chu chuan min tithlaphâng em? Teh rêng mai! Nimahsela Habakuka angin: “Hêng kum chhûng hian i hna tharthawh leh la, hêng kum chhûngte hian tilâr ang che: thinurnaah chuan zahngaihna telh ṭhîn ang che,” tiin kan ṭawngṭai a ni. (Habakuka 3:2) Pathianin a hun tiam, ‘hêng kum chhûngahte’ hian a thiltihtheihna mak tak chu hmang leh rawh se. Chu mi hun chuan, amah hmangaihtute chungah zahngaihna lantîr hmaih hauh suh se!
Jehova A Kal Chhuak!
5. Engtin nge ‘Pathian chu Teman ram aṭangin a lo kal’ a, hei hian Armageddon chungchângah eng nge a lantîr?
5 Jehova’n zahngaihna dîla kan ṭawngṭaina a hriat hun chuan eng nge lo thleng ang? Habakuka 3:3, 4-ah a chhânna kan hmu a ni. Zâwlnei chuan, a hmasa berin: “Teman ram aṭangin Pathian a lo kal a, Mi Thianghlima chu Paran tlâng aṭangin,” a ti a. Zâwlnei Mosia hun lai chuan, Teman leh Paran te chu Israel mite’n thlalêr kal tlanga Kanaan an panna kawnga awm a ni a. Israel hnam lian tak an pêmin, Jehova ngei pawh a kalve niin a lang a, engmah hian ani chu a tiding thei lo. Mosia’n a thih hma rei lo tê-ah: “Sinai aṭangin LALPA chu a lo kal a, Seir aṭangin an hnênah a thawk a, Paran tlâng aṭangin a êng chhuak a, [vântirhkoh] mi thianghlim sângsâwm zîng aṭangin a lo kal,” a ti a. (Deuteronomy 33:2) Jehova chu a hmêlmate kalha Armageddon-a a kal chhuah hun chuan, chutiang bawka chelhdin rual loh a chakna lantîrna a awm ang.
6. Pathian ropuina mai bâkah, hriatthiamna nei Kristiante’n eng nge an hmuh?
6 Habakuka chuan: “[Jehova] ropuinain vânte khi a tuam a, a faknain lei a khat a. A tlêtzia chu êng ang mai a ni a,” tiin a sawi bawk. Êng ropui tak a va ni êm! Pathian Jehova hmu-a nung reng thei tumah an awm lo. (Exodus 33:20) Amaherawhchu, Pathian chhiahhlawh rinawnte erawh chuan a ropuizia chîk taka an ngaihtuahin, an thinlung mit a vai thung a ni. (Ephesi 1:18) Hriatthiamna nei Kristiante chuan Jehova ropuina mai bâkah thil dang engemaw an hmu bawk. Habakuka 3:4 chuan: “A kut aṭangin êng zâm a lo chhuak a, chutah chuan a thiltihtheihna inthupin a awm,” tiin a titâwp a ni. Ni e, Jehova chu a chakna leh thiltihtheihna a kut ding lam hmanga thil ti tûrin a inrâlring a ni tih kan hmu a ni.
7. Pathian hnehna nêna kal chhuahna chuan a chunga helte tân eng awmzia nge a neih?
7 Pathian hnehna nêna kal chhuahna chu a laka helho tân chhiatna râpthlâk tak a ni. Habakuka 3:5-na chuan: “Hripui chu a hma tâwnah a ṭang a, a hnungah chuan ṭêk a tla rum rum a,” a ti a. B.C.E. 1473-a Israel mite’n Ram Tiam an hnaih tawh hle tihah tam takte chu an hel a, nungchang bawlhhlawhna leh milem biaknaah an inhnamhnawih a. Chuvângin, mi 20,000 chuang chu Pathian hremna avângin an thi a ni. (Numbers 25: 1-9) Nakin lawka “Pathian Engkimtitheia ni ropuia indonaa” Jehova a kal hunah chuan, a laka hel apiangte chuan chutiang bawkin an sual man chu an hmu ang. A ṭhen chu hrilêng tak taka tihlum pawh an awm mai thei a ni.—Thu Puan 16:14, 16.
8. Habakuka 3:6 sawi angin, Pathian hmêlmate tân eng nge khâwl khâwm a nih?
8 Tûnah chuan, sipaihote Jehova thiltih chungchâng zâwlnei thusawi chiang tak chu ngai thla ang che. Habakuka 3:6-ah chuan tihian kan chhiar a: “A ding a, lei chu a tinghîng dur dur a, a hawi vêl a, hnamte chu a tithlabâr a; tlâng hlunte chu a tidarh a, kumkhaw mualte pawh a kimkî a; a kawngte chu chatuan ata a ni,” tih chu. A hmasa berin, sipai hotu-in indona mual a enfiah angin Jehova chu “a ding a.” A hmêlmate chu hlauvin an khûr a ni. An hmêlma an hmuh avângin, an khûr a, an buai nuai nuai a. Isua chuan, ‘leia chi tinin an âwmte an inchum’ hun tûr a lo sawilâwk diam a ni. (Mt. 24:30) Jehova kalhin tumah an ding thei lo tih an hriat hun chuan a tlai lutuk tawh ang. Mihring pâwl—“tlâng hlunte” leh “kumkhaw mualte” ang hiala nghet taka langte pawh—a tlu chhia ang. Chu chu Pathian ‘chatuan kawng’ ang a ni ang a, hmân lai huna a tih angin thil a ti ang.
9, 10. Habakuka 3:7-11 hmang hian eng thil nge hriatnawntîr kan nih?
9 Jehova chu a hmêlmate lakah a “thinur” ta a. A nih leh a indona ni ropuiah chuan eng râlthuam nge a hman dâwn? Zâwlnei thusawi: “Peih diam a ni e, i thal ngul, hnamte tân chhechham a nghet e. I vaw phel ta, lei chu, luiin. Tlâng lianten an hmu chia, an hlau, tuifâwnte pawh mual an liam ta: tui thûk takin awrâwl a chhuah, sâng takah a bân a phar ta. Tûrnî, chhawrthlapui an ding reng, mahni hmunah, i thal lêng chhuak êngah te leh, i fei tle zawr zawr êngah chuan,” tih chu han bengkhawn teh.—Habakuka 3:7-11.
10 Josua hun laiin, Jehova chuan nî leh thla dintîrin, a thiltihtheihna mak tak a lantîr a. (Josua 10:12-14) Habakuka hrilh lâwkna chuan, chu thiltihtheihna vêk chu Jehova’n Armageddon-ah a hmang ang tih min hriatnawntîr a ni. B.C.E. 1513-ah Pharaoa sipaite tihboral nâna Tuipui Sen a hman khân, Jehova chuan leilung tuipui thûk tak pawh a thunun theihzia a lantîr a. Kum sawmli hnuah pawh, Jordan lui luang liam chuan Israelte hlawhtling taka Ram Tiam an panna chu a dang zo lo. (Josua 3:15-17) Zâwlnei Debori hun laiah pawh, luiin Israel hmêlma Sisera-ho indo tawlailîrte chu a hnâwl vek a ni. (Rorêltute 5:21) Chutiang bawkin tui lian, lui, leh tuipui thûk tak chaknate chu Armageddon-a Jehova hman tûr râlthuam a ni. Ṭêk leh kâwlphête pawh chu fei emaw, thal fanga khat thal bâwm emaw angin a kutah a awm a ni.
11. Jehova’n a thiltihtheihna chak taka a hman hunah chuan eng nge lo thleng ang?
11 Jehova’n a thiltihtheihna ropui tak a hman hun chuan a râpthlâk hle ngei ang. Habakuka thu chuan zân chu chhûnah a lo chang ang a, chhûn chu nîin a tih ên theih tâwk aiin a êng zâwk ang tih a sawihmuh a ni. Armageddon chungchânga he thlarauva thâwk khum hrilh lâwk thusawi hi a ngial a ngan emaw, entîr nei emaw pawh ni se, thil pakhat chiang tak a awm a ni—Jehova chuan a hneh ang a, a hmêlma tumah a chhuah lo vang tih chu.
Pathian Mite tân Chhandamna a Chiang!
12. Pathianin a hmêlmate chungah eng nge a tih ang a; mahse, tute nge him thung ang?
12 Zâwlnei chuan Jehova’n A hmêlmate a tihchhiat dân a sawi belh a. Habakuka 3:12-ah chuan: “Thinurin ram i chîl chhuak a, thinrimin hnamte i pal ta,” tiin kan chhiar a. Mahse, Jehova chuan a pâwngpaw tihboral mai mai lo vang. Mi ṭhenkhat chu an him dâwn a ni. Habakuka 3:13 chuan: “I mite chhandam nân i chhuak, i hriak thiha chhandam nân chuan,” a ti a. A ni, Jehova chuan a chhiahhlawh hriak thih rinawmte chu a chhandam ang. Chu tih hun chuan, Babulon khaw Ropui, khawvêl sakhuana dik lo tihchhiatna chu zawh a ni ang. Nimahsela, tûn laiah, hnamte chuan biakna dik chu thai bo an tum a ni. Rei lo tê-ah Pathian chhiahhlawhte chu Magoga rama Goga’n a bei ang. (Ezekiela 38:1–39:13; Thu Puan 17:1-5, 16-18) Chu Setana beihna chu a hlawhtling ang em? Hlawhtling lo vang! Chu mi hunah chuan Jehova chuan thinur takin a hmêlmate chu a chîl ang, hruiha buh chîl ang maiin. Amaherawhchu, thlarau leh thutaka amah chibai bûktute chu a chhandam ang.—Joh. 4:24.
13. Engtin nge Habakuka 3:13 hi a thlen famkim ang?
13 Mi suaksualte tihboral phiarna chu hetiang hian sawi lâwk a ni: “[Jehova’n] mi sual in a chung hlîp zovin nghahchhan lang râwtin [a] suasam,” tiin. (Habakuka 3:13) He “in” hi Diabol-Setana thununna hnuaia awm kalhmang suaksual hi a ni. Chu chu tihkehsawm a ni ang. ‘In chung,’ a nih loh leh Pathian dodâltute hruaitu chu râwtsawm a ni bawk ang. In chu a nghahchhan thlengin chhutchhiat a ni ang a, chu chu a awm leh tawh rêng rêng lo vang. Inchhâwk zângkhaina mak tak a va ni dâwn êm!
14-16. Habakuka 3:14, 15 sawi angin, Jehova mite leh an hmêlmate chungah eng nge lo thleng ang?
14 Armageddon-ah chuan, Jehova “hriak thiha” tihboral tumtute chu tihbuai an ni ang. Habakuka 3:14, 15-na sawi angin, zâwlnei chuan Jehova chungchâng chu: “Arûktea rethei ei rala lâwmtute, ṭhâwngaleivir ang lo thawk e, mi tihdarh nân; an tiang ngeiin i chhun ta a, a indo thiamte lu-ah chuan. I sakawrin tuipui i zawh, tuifâwn nasa tak mai chu,” tiin, a sawi a ni.
15 Habakuka’n ‘indo thiamte chu ṭhâwngaleivir angin a lo thawk, mi tidarh tûrin,’ a tih khân zâwlnei chuan Jehova chhiahhlawh hriak thihte tân a sawi a ni. Suam hmangte’n mi an chân angin, hnamte chuan Pathian chibai bûktute tiboral tûrin an châng ang. Anni chu hlawhtlin inbeiseiin an ‘lâwm’ ang a, Kristian rinawmte chu ‘retheite’ angin, chau angin an lang ang. Mahse, Pathian dotu pâwlte’n beihna an ṭanin, Jehova chuan an râlthuamte chu anmahni laka hmang tûrin a tibuai ang. Anni chuan an râlthuamte, a nih loh leh an “tiang” hmangin an sipaite ngei chu an vua ang.
16 Chu chang a ni lo. Jehova chuan a hmêlmate tihboral phiar nân mihring aia chungnung thlarau lam sipaite a hmang ang. Isua Krista hnuaia a van lam sipai ‘sakawrte’ nên, ani chuan “tuipui” leh hmêlma mipui tam tak “tuifâwn nasa tak mai,” chu hneh taka nawrin hma lam a pan zêl ang. (Thu Puan 19:11-21) Tichuan, mi suaksualte chu lei ata paih bo an ni ang. Pathian rorêl dikna leh thiltihtheihna lantîrna nasa tak a va ni êm!
Jehova Nî a Lo Thleng Dâwn!
17. (a) Habakuka thu thlen famkimnaah hian engvângin nge rinngamna kan neih theih? (b) Jehova ni ropui kan nghahin, engtin nge Habakuka ang kan nih theih ang?
17 Habakuka thute chu a lo thleng famkim thuai ang tih kan chiang thei a. Chûng chu a tlai lo vang. He hriat lâwkna hi engtin nge i chhân lêt? Habakuka chuan thlarau thâwk khumin a ziak tih hre reng la. Jehova chuan thil a ti ang a, chu mi hun chuan leiah chhiatna râpthlâk tak a lo thleng ang. Zâwlneiin: “Ka hriatin ka khûr, ti rilan, a awah ka khâ a inkhâwng; ka ruh a muatin, ka khûr a, mahni hmunah: mahse sipai rual pui ang buaina nî mipui chunga a lo thlen hunin ka nghîng lo vang,” tia a ziak pawh hi a mak lo ve. (Habakuka 3:16) Habakuka chu a khûr nasa hle tih chu a hriat theih a. Mahse, a rinna chu a nghîng em? Teuh lo mai! Jehova nî chu ngawi renga nghah a inhuam zâwk a ni. (2 Petera 3:11, 12) Kan rilru put hmang pawh chutiang bawk chu a ni lâwm ni? Teh rêng mai! Habakuka hrilh lâwkna chu a lo thleng famkim ngei ang tih kan ring tlat a ni. Mahse, chu mi lo thlen hma zawng chu dawhthei takin kan nghâk ang.
18. Habakuka chuan harsatna beisei mah se, a rilru put hmang chu eng ang nge ni?
18 Indona chuan a tâwpa hnehna changtute lakah pawh harsatna a thlen fo va. Ei leh in a tlachham thei a, in leh lo pawh chân a ni thei bawk. Nun phung pawh a tla hniam thei bawk a ni. Chûng chu kan chungah lo thleng ta se, engtin nge kan chhân lêt ang? Habakuka chuan rilru put hmang entawntlâk tak a nei a ni: “Theipui thing pâr vul dâwn lovin, grêp hrui rah dâwn hek suh sêng, Oliv thing pawh rah lovin, lovin ei tûr chhuah dâwn lo sêng, huang ata ran rual tibovin, ran inah ran awm lo mah sêng, ka lâwm zêl ang, LALPA-ah chuan, ka chhandamna Pathianah chuan ka lâwm cheu dâwn,” tia a sawi avângin. (Habakuka 3:17, 18) Habakuka chuan harsatna, ṭâm tlâk emaw chu a beisei tlat a. Chutichung pawhin, a chhandamna lo chhuahna Jehova laka a hlimna chu a hloh ngai lo.
19. Kristian tam takte tân eng harsatna nge awm a; mahse, kan nunah Jehova kan dah hmasak ber chuan eng nge kan chian theih?
19 Tûn laiah pawh, mi suaksualte nêna Jehova indona a lo thlen hma aṭang pawhin, tam takte chuan manganna nasa tak an tuar a. Isua chuan indonate, ṭâm tlâknate, lîrnghîngte, leh natnate chu a lal thiltihtheihnaa ‘a lo awm lehna chhinchhiahna’ zînga mi a nih tûr thu a sawi lâwk a ni. (Matthaia 24:3-14; Luka 21:10, 11) Kan unau tam takte chu Isua thusawi thlen famkimna-in nasa taka a nghawngna ramah an khawsa a, harsatna namai lo an tuar a ni. Mi dangte chu chutiang harsatna chuan nakinah a la nghawng mai thei bawk. Kan zînga mi tam takte tân pawh tâwpna lo thlen hmain ‘theipui thing pâr a vul lo’ thei a ni. Nimahsela, hêng thilte lo thlen chhan kan hria a, chu chuan chakna min pe a ni. Chu bâkah, ṭanpuitu kan nei a. Isua’n: “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tiin min tiam a ni. (Matthaia 6:33) Nun hahdamthlâk tak chu min tiam lo. Mahse, kan nunah Jehova kan dah hmasak chuan, ama’n min enkawl ang tih chu min tiam a ni.—Sâm 37:25.
20. Rei lo te chhûng harsatna awm chung pawhin, eng tih nge kan tum tlat ang?
20 Chuvângin, tûnah rei lo te chhûng harsatna engpawh tâwk mah ila, Jehova chhanchhuah theihnaa kan rinna chu kan hloh lo vang. Kan unau tam tak Africa, Europe Khawchhak lam, leh hmun danga mite chuan harsatna namai lo an tâwk a; mahse, ‘Jehova-ah chuan an lâwm zêl’ a ni. Anni angin chutianga tih chu i bânsan ngai lo vang u. Chatuan Lal Jehova chu kan “chakna” Hnâr a ni tih hre reng ang che. (Habakuka 3:19) Ani chuan min ensan ngai lo vang. Armageddon chu a lo thleng ngei dâwn a, Pathian tiam khawvêl tharin a rawn zui ngei bawk ang. (2 Petera 3:13) Chu mi hunah chuan “Tuifinriat chu tuiin a khat vek angin LALPA ropuizia hriatnain lei hi a khat vek dâwn” a ni. (Habakuka 2:14) Chu hun mak ropui tak kan thlen hma loh zawng, Habakuka entir ṭha chu i zui ang u. ‘Jehova-ah lâwmin, kan chhandamna Pathianah chuan i lâwm zêl’ ang u.
I Hre Chhuak Em?
• Engtin nge Habakuka ṭawngṭaina hian min nghawng theih?
• Engvângin nge Jehova a kal chhuah?
• Habakuka hrilh lâwkna-in chhandamna chungchâng engtin nge a sawi?
• Eng rilru put hmang nei chungin nge Jehova ni ropui chu kan nghah ang?
[Phêk 18-naa milem]
Armageddon-a mi suaksualte lakah Pathianin eng chakna nge a hman dâwn tih i hria em?