“Inngaitlâwmte Hnênah Chuan Finna A Awm”

“LALPAN a phût che chu eng nge ni? . . . I Pathian nêna [inngaitlâwm] taka lên dun a ni lo vem ni?”—MIKA 6:8.

1, 2. Inngaihthlâwmna hi eng nge ni a, chapona nên eng nge a danglamna?

TIRHKOH hmingthang tak chuan ropuina a hnial a. Israel rorêltu huaisen tak chu a pa chhûngte zînga tê ber angin a insawi bawk a. Nung dam tawh zînga mi ropui ber chuan thuneihna zawng zawng hi ata a ni lo tih a pawm bawk a ni. An zain inngaihtlâwmna an lantîr a ni.

² Inngaihtlâwmna chu chapona nên a inkalh tlat a. Mi inngaithlâwm chuan a theihna leh a hlutnate chu a âwm tâwk aia nasa leh tamah a ruat ngai lo va; tin, mahni inngaihhlutna a nei lo bawk. Chapo emaw, a nih loh leh ropuina ûm emaw ai chuan mi inngaitlâwmte chuan an tlin tâwkte chu an hre reng zâwk a. Chuvângin, mi dangte ngaihtuahna leh thlîr dânte an zahin, an ngaihsak ṭhîn.

3. Eng kawngin nge finna chu mi ‘inngaitlâwmte hnênah a awm’?

³ Chhan ṭha tak neiin Bible chuan: “Inngaitlâwmte hnênah chuan finna a awm,” a ti a. (Thufingte 11:2) Pathian pawm zâwng kawngte a zawh vâng leh mualphona thlentu chapona thinlung a pumpelh avângin mi inngaitlâwm chu mi fing a ni. (Thufingte 8:13; 1 Petera 5:5) Inngaihtlâwmna a fin thlâkzia chu Pathian chhiahhlawh tam takte nun kawng chuan a nemnghet a. Atîra kan sawi tâk entîrna pathumte kha lo ngaihtuahho ila.

Paula—‘Rawngbâwltu’ leh ‘Enkawltu’

4. Paula’n eng chanvo ropui tak nge a chan?

⁴ Paula chu Kristian hmasate zînga mi pawimawh tak a ni tih a hriat theih mai a. A rawng bâwl hun chhûngin, tuipuiah leh khawmualah a zin nasa hle a, kohhran tam tak a din bawk a. Chu bâkah, Jehova’n inlârna pein mal a sâwm a, hnam dang ṭawnga ṭawng theihna a pe bawk a ni. (1 Korinth 14:18, NW; 2 Korinth 12:1-5) Tin, Thuthlung Thara telta lehkha thawn 14-te ziak tûrin Paula chu a hmang bawk a ni. Chuvângin, Paula chuan tirhkoh dang zawng zawngte aiin a thawk rim zâwk a tih theih ngei ang.—1 Korinth 15:10.

5. Engtin nge Paula’n a inngaithlâwmzia a lantîr?

⁵ Paula chu Kristian rawngbâwlna sûl sutu ber a nih avângin, ṭhenkhat chuan mi ngaihsak a hlawh avânga hlim taka a awm leh a thuneihna intithei taka a kenkawh vêl hmuh chu an beisei mai thei. Nimahsela chutiangin a ti lo, a inngaihtlâwm tlat avângin. “Tirhkoh zînga tê ber,” tia insawiin, “Pathian kohhranho ka tihduhdah avânga tirhkohva vuah tlâk loh ka ni si a,” tiin a sawi a ni. (1 Korinth 15:9) Kristiante lo tiduhdah ṭhîntu a nih angin Paula chuan, Pathian nêna inlaichînna leh a aia nasa, rawngbâwlna chanvo hlu tam tak a neih theih chhan chu khawngaihna avâng chauh a ni tih a theihnghilh ngai lo. (Johana 6:44; Ephesi 2:8) Chuvângin, rawngbâwlnaa a hlawhtlinna namên lo chuan mi dangte aia ropui zâwkah a inngaihtîr chuang lo.—1 Korinth 9:16.

6. Paula khân Korinth mite a dâwrnaah engtin nge a inngaihtlâwmzia a lantîr?

⁶ Paula inngaihtlâwmzia chu Korinth mite a dâwrnaah a lang chiang êm êm a. An zînga ṭhenkhat chuan hotu challang tak nia an ngaih, Apollova te, Kiphaa te, leh amah Paula ngei pawh chu an lo chhuang hle ni âwm tak a ni. (1 Korinth 1:11-15) Mahse, Paula chuan Korinth mite fak chu a phût lo va, an ngaihsânna chu remchângah a la hek lo. Anmahni chu “thusawi ropui leh finna nên” a tlawh lo va. “Keiniho hi Krista rawngbâwltuah leh Pathian thurûk enkawltuah miin min ngai rawh se,” tiin amah leh a thawhpuite chungchâng chu a sawi zâwk a ni.a—1 Korinth 2:1-5; 4:1.

7. Mite hnêna zilhna a pêk hunah pawh Paula chuan engtin nge inngaihtlâwmna a lantîr?

⁷ Paula chuan mi dangte hnêna zilhna leh kaihhruaina a pêk châng pawhin inngaihtlâwmna a lantîr bawk ṭhîn. A Kristianpuite chu a tirhkoh thuneihna avâng ni lo; mahse, “Pathian khawngaihna avâng,” leh ‘hmangaihna avâng zâwkin’ a ngên ṭhîn. (Rom 12:1, 2; Philemona 8, 9) Engvângin nge Paula chuan chutianga a tih? A chhan chu a unaute tâna ‘rinna chunga lal’ ang ni lovin, an ‘thawhpui’ angah a inngaih tlat vâng a ni. (2 Korinth 1:24) Chuvângin, kum zabi pakhatnaa Kristiante tâna Paula duhawm êm êm nachhan chu a inngaihtlâwm vâng a ni tih a chiang hle.—Tirhkohte 20:36-38.

A Awm Tâwka Kan Chanvote Thlîr Dân

8, 9. (a) Engvângin nge mahni inthlîr dân inngaihtlâwm tak kan neih ang? (b) Mawhphurhna tam tak chelhtute’n engtin nge inngaihthlâwmna an lantîr theih?

⁸ Paula chuan tûn lai Kristiante tân entawn tûr ṭha tak a siam a. Mawhphurhna eng anga tam pawh kawltîr ni mah ila, tumahin mi dang aia chungnungah kan inngai tûr a ni lo. “Mi engmah ni si lovin, mi lian deuhva a inruat chuan a inbum chawp mai a ni si,” tiin Paula chuan a ziak a. (Galatia 6:3) Engvâng nge? ‘Mi zawng zawngin thil an tisual tawh vek a, Pathian ropuina an chan zawh tâk loh’ avângin. (Rom 3:23; 5:12) Ni e, kan zain Adama hnên aṭangin sual leh thihna kan rochung tih kan theihnghilh ngai tûr a ni lo. Chanvo engemaw bîk channa chuan kan dinhmun hniam tak ata min hlângkai lo. (Thuhriltu 9:2) Paula chungchâng ang bawkin, mihringte’n Pathian nêna inlaichînna leh a aia nasa, rawngbâwlna chanvo hlu an neih theih chhan hi khawngaihna avâng chauh a ni.

⁹ Hei hi hre rengin, mi inngaitlâwm chuan a chanvo dawnte a thlahlel lo va, an thiltih pawh a uanpui ngai hek lo. (1 Korinth 4:7) Zilhna emaw, kaihhruaina emaw a pêk hunah pawh, hotu ang ni lovin, thawhpui angin a pe ṭhîn. Dik takin, hna engemawa thiam bîktu chuan a rinpuite fak a phût emaw, ngaihsânna chu remchânga a lâk emaw chuan, chu chu thil dik a ni lo. (Thufingte 25:27; Matthaia 6:2-4) Mi dangte hnên aṭanga lo kal fakna engpawh chu a hlu a, chu chu phût avânga lo kal tûr a ni lo. Mi dangte fakna kan dawn hian, inngaihhlut tâwk aliama inngaihlut nân kan hmang tûr a ni lo.—Thufingte 27:2; Rom 12:3.

10. Tlâwm taka lang ṭhenkhatte chu “rinnaa hausa” tak an nih theih dân sawifiah rawh.

¹⁰ Mawhphurhna tam tak pêk kan nihin, inngaihtlâwmna chuan mahni intihpawimawh lutukna te, kan thawhrimna leh thiamnate avâng chauhva kohhran dingchang anga ngaih theih tûr zâwnga thiltihte pumpelh tûrin min ṭanpui ang. Entîr nân, zirtîr thiamna kan lo nei bîk mai thei a. (Ephesi 4:11, 12) Mahse, kan inngaihtlâwm chuan kohhran inkhâwmna aṭanga kan thil zir ropui berte ṭhenkhat chu thusawi aṭang a ni lo tih kan hria ang. Entîr nân, nu leh pa malte’n an fate Kingdom Hall-a an rawn hruai diah diahte i hmuh hian, chu chuan a tichak sawt che lâwm ni? A nih loh leh mi lungngai, thlâktlai lo nia inhre reng chung pawha rinawm taka inkhâwm zat zat i hmuhte pawh hian an tiphûr lo che em ni? A nih loh leh school emaw, hmun dang khawi lai emawa thununnna ṭha lo nêkchêpa an awm chung pawha thlarau lama hmasâwntu ṭhalaite hian an tichak sawt bawk lo che em ni? (Sâm 84:10) Hêng mite hi an challang lêm lo mai thei a. Rinawmna fiahna an tawhte chu mi dangin an hriatsak lo fo bawk. Mahse, mi challangte ang bawkin ‘rinnaah an lo hausa’ reng thei a ni. (Jakoba 2:5) Engpawh nise, a tâwpa Jehova duhsakna changtu chu rinawmna a ni.—Matthaia 10:22; 1 Korinth 4:2.

Gideona—A Pa Chhûngte Zînga “Tê Ber”

11. Pathian vântirhkoh nêna a inbiaknaah entin nge Gideona’n a inngaihtlâwmzia a lantîr?

¹¹ Manasea hnam tlangvâl chak leh huaisen Gideon-a chu Israel ram buai laia seilian a ni a. Pathian mite chu Midianho awpbehna hnuaiah kum sarih chhûng an awm a. Nimahsela, tûnah chuan Jehova tân a mite a chhandamna hun a lo thleng ta. Chuvângin, vântirhkoh pakhat chu Gideon-a hnênah a inlâr a, a hnênah: “Nang mi chak huaisen, LALPA chu i hnênah a awm e,” a ti a. Gideona chu mi inngaitlâwm tak a nih avângin, rin loh taka chawimawina a dawn chu a chapopui lo. “Aw ka pu, LALPA kan hnêna a awm si chuan, eng tizia nge hetianga kan chunga thil a lo thlen si?” tiin zah takin a chhâng zâwk a ni. Vântirhkoh chuan Gideon-a hnênah: “Israel-ho hi Midian-ho lak ata chhandam ang che,” tiin a hrilh a. Engtin nge Gideona’n a chhân lêt? A thiltih tûr chu hnampa nih theihna hun remchângah ngaiin, vawileh khata remtih nghâl ai chuan ani chuan: “Aw LALPA, engtin nge Israel-hote hi ka han chhandam tehlul ang? Ngai teh, Manasea thlah zîngah hnam rethei ber kan ni a, kei lah hi ka pa chhûngte zînga tê ber ka ni si a,” tiin a chhâng zâwk a ni.—Rorêltute 6:11-15.

12. Engtin nge Gideona’n a hna a hlenchhuahnaah remhriatna a lantîr?

¹² Indonaa a tirh hmain, Jehova chuan Gideona chu a fiah a. Engtin nge? Baal tâna a pain a siam maichâm chu tichim a, a bula Asera chu kit tûrin a hrilh a. Chu hna thawk tûr chuan huaisen a ngai a; mahse, Gideona chuan a hna a thawhnaah inngaihtlâwmna leh remhriatna a lantîr a ni. Mipui hmuha tih ai chuan, mite hriat loh hun tûr, zânah a thawk zâwk a ni. Chumai bâkah, a hna hi fîmkhur takin a thawk bawk. Mi dangin maichâm leh Asera an tihchhiat laia ṭhenkhat vêngtua an lo ṭan theihna tûr ni âwm takin chhiahhlawh sâwm a hruai a ni.b Engpawhnise, Gideona chuan Jehova ṭanpuinain a hna chu a hlenchhuak a, a hun takah chuan Midianho laka Israelho zalentîr tûrin Pathianin a hmang ta a ni.—Rorêltute 6:25-27.

Inngaihtlâwmna leh Remhriatna Lantîrin

13, 14. (a) Rawngbâwlna chanvo pêk kan nihin, engtin nge inngaihtlâwmna kan lantîr theih? (b) Inngaihtlâwmna lantîrnaah engtin nge Unau A. H. Macmillana’n entîr ṭha a siam?

¹³ Gedeon-a inngaihtlâwmna aṭang hian zir theih tam tak kan nei a. Entîr nân, rawngbâwlna chanvo thar kan chanin engtin nge kan chhân lêt? Challanna emaw, hmingthanna emaw lo awm tûr chu kan ngaihtuah hmasak ber a ni em? A nih loh leh kan hna chu kan tlin dâwn nge dâwn lo tih chu tih tak zet leh inngaihtlâwm takin kan ngaihtuah zâwk em? Kum 1966-a a hringnun hmangzo ta unaupa A. H. Macmillan-a chuan he mi chungchângah h ian entawn tûr ṭha tak min hnutchhiah a. Ṭum khat chu Watch Tower Society president hmasa ber C. T. Russell-a chuan a awm loh huna a ai awhtu tûr chungchânga Unaupa Macmillan-a ngaihdân a zâwt a. An titi zui zêlnaah, amah insawi hmuh rem viau mah se, a insawi hmuh hauh lo. A tâwpah chuan Unau Russell-a chuan chu hna chu pawm mai tûra inngaihtuah tûrin Unau Macmillan-a chu a hrilh a. A hnu kum engemaw zâta Unau Macmillana’n: “A ngaihna hre lovin ka ding reng a. Tichuan, hun engemaw ti chhûng chu ṭawngṭaina nên ngun takin ka ngaihtuah a, a tâwpah chuan amah ṭanpui tûra ka tih theih awm apiang tih ka tum thu ka hrilh ta a ni,” tiin a ziak a ni.

¹⁴ Chu mi hnu rei vak lovah chuan, Unau Russell-a chu a boral a, Watch Tower Society president hmun chu a ruahsan ta a ni. Unau Macmillan-a chu Unau Russell-a thuhrilh zinvah hnuhnûng ber chhûnga a ai awhtu a nih avângin unaute chuan: “Mac, he president hna hi chelh theihna chhan ṭha tak i nei a. Unau Russell-a a awm loh hlâna a ai awhtu i ni a; tin, amah pawhin i sawi ang zêla ti tûrin min hrilh bawk a ni. Tichuan, tûnah chuan a kal bo va, a bo hlen ta a. Nangmah hi enkawl zuitu tûr i nih hmêl khawp mai,” tiin an sawi a. Unau Macmillan-a chuan: “Unaute u, he mi chungchâng hi chutianga thlîr tûr a ni lo ve. Hei hi Lalpa hna a ni a, Lalpain tling a tihte chauhvin a inawpna pâwlah dinhmun an chelh ṭhîn; he mi hna atân hian ka tling lo tih ka inhre chiang êm êm a ni,” tiin a chhâng a ni. Tichuan, mi dang chu, chu hna chelh tûr chuan a ti ta zâwk a ni. Gideon-a angin, inngaitlâwm taka mahni inthlîr dân a nei a ni—kan zir ve tûr mizia chu.

15. Mi dangte thu kan hrilhin hriatthiamna a taka kan hmannna tûr kawng ṭhenkhatte chu eng nge ni?

¹⁵ Keini pawhin kan chanvo kan thawhnaah inngaihlâwmna kan lantîr tûr a ni. Gideona chu a fing a, amah dotute chu ṭûl lo taka tihthinrim loh a tum a ni. Chutiang bawkin, kan thuhrilhnaah pawh, mi dangte kan biak dânah kan fingin, kan inngaitlâwm tûr a ni. “Kulhpui nghet takte” leh “hnialnate” ṭhiat tûrin thlarau lam indonaah kan tel tih chu a dik a. (2 Korinth 10:4, 5) Mahse, mi dangte ngainêp zâwngin thu kan sawi tûr a ni lo va, kan thuchah ken an huatna tûr chhan engmah kan siam tûr a ni lo. Chu ai chuan, an ngaihdânte zah sakin ngaihdân inang kan neih theih thute kan sawi uar zâwk tûr a ni; tichuan, kan thuchah ṭha tak chu ngaihtuahpui ang che.—Tirhkohte 22:1-3; 1 Korinth 9:22; Thu Puan 21:4.

Isua—Inngaihtlâwmna Kawnga Entawn Tûr Ṭha Ber

16. Isua’n inngaitlâwm taka mahni inthlîr dân a nei tih engtin nge a lantîr?

¹⁶ Inngaihtlâwmna kawnga entawn tûr ṭha ber chu Isua Krista hi a ni a.c A Pa nêna inlaichînna bul tak a nei chung pawhin, thil ṭhenkhat chu a thuneihna piah lam thil a ni tih chu a pawm hreh miah lo. (Johana 1:14) Entîr nân, Jakoba leh Johana nuin a fate pahnih a lalrama a sir ve vea ṭhûttîr tûra a dîl khân, Isua chuan: “Ka ding lam leh vei lama ṭhut tûr thu chu keia pêk tûr a ni lo,” tiin a chhâng a ni. (Matthaia 20:20-23) Tin, hun dangah pawh Isua chuan: “Keimahin engmah ka ti thei lo . . . keima thu thuin awm ka tum lo va, mi tîrtu thu thu zâwka awm ka tum ṭhin,” tiin a sawi thlap bawk.—Johana 5:30; 14:28; Philippi 2:5, 6.

17. Mi dangte nêna an indâwrnaah Isua’n engtin nge inngaihtlâwmna a lantîr?

¹⁷ Isua chu kawng engkimah famkim lo mihringte aiin a chungnung zâwk a, a Pa Jehova hnên aṭangin tuma neih loh thuneihna a chang a ni. Chutichung pawh chuan, a hnungzuitute a dâwrnaah a inngaitlâwm êm êm a. A finnate lantîrin anni chu a timangang ngai lo. Lainatna nên mihringte mamawh chu a ngaihsak zâwk a ni. (Matthaia 15:32; 26:40, 41; Marka 6:31) Isua chu ṭha famkim ni mah se, ṭha famkim lo ngaimawhtu a ni lo. A zirtîrte lakah an theih bâk thil a phût ngai lo va, an tlin tâwk bâk an chungah engmah a ti ngai bawk lo. (Johana 16:12) Chuvângin, mi tam takin a kianga awm hahdam thlâk an ti pawh hi a mak lo ve!—Matthaia 11:29.

Inngaihtlâwmna Kawnga Isua Entawn Tûr Siam Chu Entawn Rawh

18, 19. (a) Mahni kan inthlîr dânah, leh (b) mi dangte kan cheibâwl dânah engtin nge Isua inngaihtlâwmna kan entawn theih ang?

¹⁸ Nungdam tawh zînga mi ropui ber mahin inngaitlâwmna a lantîr chuan, keini phei chuan kan lantîr lehzual tûr a va ni êm! Ṭha famkim lo mihringte chuan thuneihna zawng zawng an nei lo tih pawm chu an hreh fo ṭhîn. Nimahsela, Kristiante chuan Isua entawnin, inngaihtlâwm an tum a ni. A tlingte hnêna mawhphurhna pêk chu an hreh lo va; kaihhruaina pe tûra ruatte hnên aṭanga kaihhruaina dawn pawh chu an hreh hek lo. Thawhho duhna rilru lantîrin, kohhranah thil “engkim mawi tak leh fel taka tih” an phal a ni.—1 Korinth 14:40.

¹⁹ Inngaihtlâwmna chuan mi dangte mamawh ngaihsak tûr leh mi dangte laka beisei sâng lutuk lo tûrin min chêttîr bawk ang. (Philippi 4:5) Mi dangte neih loh chakna leh theihna eng engemaw pawh nei ila, kan inngaihtlâwm phawt chuan, mi dangte’n kan duh anga thil ti reng tûrin kan beisei lo vang. Mi tinin, tlintâwk kan nei ṭheuh tih hre rengin, mi dangte tlin lohna pawh inngaihtlâwm takin kan hre thiam tûr a ni. Petera chuan: “Eng dang zawng aiin inhmangaih tawn uar rawh u; hmangaihnain sual tam tak a khuh si ṭhîn a,” tiin a ziak a ni.—1 Petera 4:8.

20. Inngaihtlâwm duh lohna lam hawi ngaihtuahna pumpelh tûrin eng nge kan tih theih?

²⁰ Kan hriat tawh angin, inngaihtlâwm mi hnênah chuan finna a awm ngei a. Mahse, inngaithlâwm duh lohna emaw, chapona emaw lam hawi ngaihtuahna nei nia i inhriat chuan engtin nge ni ang? Beidawng mai suh. “[Chapo taka] thil tisual lui lo tûrin i chhiahhlawh hi mi chelh tlat ang che,” tia ṭawngṭaitu Davida entawn tûr siam hi entawn zâwk ang che. (Sâm 19:13) Paula te, Gideona te, leh mi dang zawng aiin, Isua Krista rinna entawnin, “inngaitlâwmte hnênah chuan finna a awm,” tih thu dikzia hi keimahni ngeiin kan tawng ang.—Thufingte 11:2.

[Footnote-te]

I Hrechhuak Thei Em?

• Inngaihtlâwmna hi eng nge ni?

• Engtin nge Paula inngaihtlâwmna kan entawn theih ang?

• Gideona entawn tûr siam aṭangin eng inngaihtlâwmna nge kan zir theih?

• Isua’n inngaihtlâwmna kawngah entawn tûr ṭha ber engtin nge a siam?

[Phêk 15-naa milem]

Paula chu a unaute ‘rawngbâwlpuitu’ angah a inngai

[Phêk 17-naa milem]

Gideona chuan Pathian duhzâwng a hlen chhuahnaah remhriatna a hmang

[Phêk 18-naa milem]

Pathian fapa Isua chuan a thil tih apiangah inngaithtlâwmna a lantîr