Tûn Laia Pathian Rawngbâwltu Chu Tute Nge Ni?
“Kan tlin theihna chu Pathian hnên ata a ni zâwk. Amah bawk chuan thuthlung thar rawngbâwltuahte min tlintîr a.”—2 KORINTH 3:5, 6.
1, 2. Kum zabi pakhatnaa Kristian zawng zawngte chuan eng mawhphurhna nge an neih a, mahse chu chu engtin nge a inthlâk?
VANTLANG kum chhiar kum zabi pakhatnaah, Kristian zawng zawngte chuan mawhphurna pawimawh tak—chanchin ṭha hrilh hna chu an thawk ṭheuh va. An zain hriak thih an ni vek a, thuthlung thar rawngbâwltu an ni vek a ni. Mi ṭhenkhatte chuan kohhrana zirtîrna tih ang chi mawhphurhna dang an nei a. (1 Korinth 12:27-29; Ephesi 4:11-13) Nu leh pate chuan an in chhûngkhurah mawhphurhna lian tak an nei bawk. (Kolossa 3:18-21) Mahse, an zain hna pawimawh tak thuhrilh rawngbâwlna chu an thawk ṭheuh a ni. Atîra ziak Kristian Grik Pathian Lehkha Thu-ah chuan, he mawhphurhna hi di·a·ko·niʹa a ni a—rawngbâwlna tihna a ni.—Kolossa 4:17.
2 Khua a lo rei a, thil awm dân a inthlâk zo ta. An tâna thuhrilhna hauh tlattu, sakhaw rawngbâwltu pâwl a lo ding chhuak a. (Tirhkohte 20:30) Sakhaw hruaitute chu Kristian intite zînga mi tlêm tê chauh an ni a, mi dang tam takte chu kohhran mipui anga hriat a lo ni ta a ni. Kohhran mipuite chu sakhaw hruaitute enkawlna tûra thawhlâwm thawh ang chi an mawhphurhna eng engemaw zirtîr an nih laiin, thuhrilhna chungchângah chuan an zain ngaithlatute an lo ni ta zâwk a ni.
3, 4. (a) Kristianna rama mite rawngbâwltu nih dân chu eng nge? (b) Kristianna rama rawngbâwltu anga ngaih chu tunge ni a, engvângin nge Jehova Thuhretute zîngah a danglam?
3 Sakhaw hruaitute chu rawngbâwltu-ah an inchhâl a (Grik ṭawng di·aʹko·nos chu Latin ṭawngin minister tia lehlin a ni a, “chhiahhlawh” sawina a ni).a Puithiam ni tûr chuan, zirna sânga zir zawh a, nem ngheh nih a ngai a. The International Standard Bible Encyclopedia chuan: “‘Nem ngheh’ leh ‘nemnghehna’ tih chu dân narânin rawngbâwltute emaw, puithiamte emaw chu Pathian Thu sawi tûr emaw, sakrament buatsaih tûr emaw, a nih loh leh a pahniha tih theihna thuneihna emaw chu dân ang thlapa pêkna a ni,” a ti a. Tuin nge rawngbâwltute chu nem nghet? The New Encyclopædia Britannica chuan: “Bishop la nei kohhranahte chuan bishop chu rawngbâwltu nem nghettu a ni reng a. Presbyterian kohhranahte chuan, rawngbâwltu chu bial chhûng kohhran upa ṭhukhâwmin an nem nghet ṭhîn a ni,” a ti.
4 Chuvângin, Kristianna ram kohhranahte chuan rawngbâwltu nihna chanvo chu nasa taka khuahkhirh a ni. Mahse, Jehova Thuhretute zîngah chuan chutiang a ni ve lo. Engvângin nge? Kum zabi pakhatnaa Kristian kohhranah chutianga khuahkhirh a nih ve loh avângin.
Pathian Rawngbâwl Tak Taktu Chu Tute Nge Ni?
5. Bible sawi dân chuan, rawngbâwltute zîngah tute nge tel?
5 Bible sawi dân chuan, lei leh vâna Jehova chibai bûktu zawng zawng chu rawngbâwltu an ni. Vântirhkohte chuan Isua rawng an bâwlsak a. (Matthaia 4:11; 26:53; Luka 22:43) Anni chu “chhandamna rochungtu tûrte tân rawngbâwl tûra tirh” an ni bawk. (Hebrai 1:14; Matthaia 18:10) Isua chu rawngbâwltu a ni a. Ani chuan: ‘Mihring Fapa hi rawngbâwlsaka awm tûrin a lo kal lo va, rawngbâwl tûr . . . zâwka lo kal a ni,’ tih a sawi a ni. (Matthaia 20:28; Rom 15:8) Chuvângin, Isua hnungzuitute chu ‘a hniaka zui tlat tûr,’ an nih avângin, anni pawh hi rawngbâwltu an ni tûr a ni tih chu thil mak a ni lo.—1 Petera 2:21.
6. Isua’n a zirtîrte chu rawngbâwltu an ni vek ang tih engtin nge a târ lan?
6 Vâna a lâwn hma lawk khân, Isua chuan a zirtîrte hnênah: “Kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,” a ti a. (Matthaia 28:19, 20) Isua zirtîrte chu mite zirtîra siamtu—rawngbâwltu—an ni tûr a ni. Zirtîr thar an siamte chuan Isua thupêk zawng zawng pawm dân an zir ang, chu thupêk zîngah chuan kal a, zirtîr siamna pawh a tel a ni. A hmei a pa, a pui a pangin Isua zirtîr dik takte chu rawngbâwltu an ni vek tûr a ni.—Joela 2:28, 29.
7, 8. (a) Eng Bible chângte hian nge Kristian dik zawng zawngte chu rawngbâwltu an ni tih târ lang? (b) Nemnghehna chungchângah eng zawhnate nge lo chhuak?
7 Chu mi thu nêna inremin, C.E. 33, Pentikost nî khân, chuta awm Isua zirtîr a hmei a pate chuan “Pathian thiltih ropuite” an sawi a ni. (Tirhkohte 2:1-11) Chu bâkah, tirhkoh Paula chuan: “Miten thinlungin an ring a, felna an hmu ṭhîn a; kain an ṭan a, chhandamna an hmu bawk ṭhîn a ni,” tih a ziak a. (Rom 10:10) Paula chuan chûng thute chu sakhaw hruaitute tân chauhva a sawi a ni lo, amah ngeiin ‘Rom khuaa awm Pathian mi duh takte’ tâna a ziah a ni tih a sawi a vângin. (Rom 1:1, 7) Chutiang bawkin, “mi thianghlim Ephesi khuaa awm Krista Isuaa mi rinawmte” chuan ‘remna chanchin ṭha inbuatsaihna chu an keah an bun’ tûr a ni. (Ephesi 1:1; 6:15) Hebrai lehkha thawna thu awm ngaithlatu apiang chuan ‘an beiseina chu a nghîn lohna tûrin kâin an ṭan tlat’ tûr a ni.—Hebrai 10:23.
8 A nih leh, eng hunah nge mi chu rawngbâwltu a nih ṭan? Thu danga sawi chuan, eng hunah nge nem ngheh a nih a, tuin nge nem nghet?
Rawngbâwltu Anga Nemnghehna—Eng Hunah Nge?
9. Eng hunah nge Isua chu nem ngheh a nih a, tuin nge nem nghet?
9 Nemnghettu leh a nem ngheh hun chungchângah chuan, Isua chanchin hi ngaihtuah rawh. Ani chuan rawngbâwltu a nihzia fiah nân, nemnghehna lehkha emaw, zirna sâng aṭanga zir chhuahna emaw a nei lo va; tin, mihring nem ngheh a ni lo bawk. Chuti ni si, engah nge ani chu rawngbâwltu a ni kan tih theih? Isaia hrilh lâwk thute amaha a lo thlen famkim vâng a ni: “Chanchin ṭha hril tûra [“hriak mi thih,” NW] avângin Lalpa thlarau chu ka chungah a awm,” tih chu. (Luka 4:17-19; Isaia 61:1) Chûng thute chuan Isua chu chanchin ṭha hril tûra tirh a nihzia a tilang chiang hle. Mahse, tu tirh nge ni? Chu hna thawk tûra Jehova thlarauva hriak thih a nih avângin, Isua nemnghettu chu Pathian Jehova a ni. Eng hunah nge nem ngheh a nih? Baptisma a chan khân Jehova thlarau chu a chungah a lo thleng a. (Luka 3:21, 22) Chuvângin, baptisma a chan khân, ani chu nem ngheh a ni.
10. Kristian rawngbâwltu chu tuin nge ‘tlintîr’?
10 Kum zabi pakhatnaa Isua hnungzuitute kha eng hunah nge nem ngheh an nih a, tuin nge nem nghet? Rawngbâwltu an nihna chu Jehova hnên aṭanga lo kal bawk a ni. Paula chuan: “Kan tlin theihna chu Pathian hnên ata a ni zâwk. Amah bawk chuan thuthlung thar rawngbâwltuahte min tlintîr a,” a ti a. (2 Korinth 3:5, 6) Jehova chuan amah chibai bûktute chu rawngbâwltu ni tûrin a tlintîr? Paula’n “Krista chanchin ṭha lama Pathian rawngbâwltu,” tia a koh Timothea chanchin ngaihtuah rawh.—1 Thessalonika 3:2.
11, 12. Rawngbâwltu lo ni tûrin Timothea chuan engtin nge hma a sâwn?
11 Timothea hnêna thusawi a hnuaia mi chuan rawngbâwltu a lo nih dân hre thiam tûrin min ṭanpui ang: “Nimahsela nang zawng, tu hnêna zir nge i nih leh, Krista Isuaa rinna awm avâng chuan chhandamna hmu khawpa tifing thei che Lehkha Thianghlimte chu i naupan têt ata hre tawh i ni tih hriain, i thil zir leh i thil hriat chianahte chuan awm reng rawh,” tih chu. (2 Timothea 3:14, 15) Timothea rinna bul ṭhut, mipui hmaa kâa ṭanna neihtîr thei, chu Pathian Lehkha Thu hriatna a ni a. Chu hriatna neih nân chuan mahnia chhiar mai a tâwk em? Tâwk lo ve. Timothea chuan a thil chhiarte hriat thiam nân leh hriatna dik a neih theih nân ṭanpuina a mamawh a ni. (Kolossa 1:9) Chuvângin Timothea chu ‘a thil hriat chiante ring tûra thlêmthlûkin a awm’ a ni. Pathian Lehkha Thu chu a “naupan têt ata” a hriat avângin, amah zirtîrtute chu a nu leh a pi an ni ngei ang, a pa chu ringtu a ni si lo va.—2 Timothea 1:5.
12 Amaherawhchu, Timothea chu rawngbâwltu a lo ni mai lo. Rawngbâwltu a nih theihna zînga pakhat chu a bul hnai vêl kohhrana Kristiante nêna inkawmna aṭangin a rinna chu tihnghehin a awm a ni. Chu chu engtin nge kan hriat theih? Paula’n a hmuh hmasak ber ṭum chuan Timothea chu “Lustra leh Ikonion khuaa unau awmte chuan . . . an fak ṭhîn” avângin. (Tirhkohte 16:2) Chu bâkah, chûng hun lai chuan unau tuemawte chuan kohhran tihchak nân lehkha thawn an ziak ṭhin a. Unaute fuih tûrin enkawltute’n kohhrante an tlawh ṭhîn bawk a. Chutiang thilte chuan Timothea chu thlarau lama hmasâwn tûrin a ṭanpui a ni.—Tirhkohte 15:22-32; 1 Petera 1:1, 2.
13. Eng hunah nge Timothea chu rawngbâwl tûra nem ngheh a nih a, thlarau lama hma a sâwnna chu chutah a tâwp mai lo tih engvângin nge i sawi theih?
13 Matthaia 28:19, 20-a Isua thupêk han en hian, Timothea rinna chuan engtik hunah emaw chuan Isua entawn tûra baptisma chang tûrin a chêttîr a ni tih kan ring thei a ni. (Matthaia 3:15-17; Hebrai 10:5-9) Chu chu thinlung zawng zawnga Pathian hnêna Timothea inpumpêkna chhinchhiahna a ni. Baptisma a chan aṭang chuan, Timothea chu rawngbâwltu a lo ni ta a. Chuta ṭang chuan, a nunna te, a chakna te, leh a thil neih zawng zawngte chu Pathian ta a lo ni ta bawk a ni. Chu tak chu a ni, ‘Pathian rawng a bâwl’ chhan ber chu ni. Mahse, Timothea chuan rawngbâwltu nih mai chu a duh tâwk lo. Thlarau lamah hma a sâwn zêl a, Kristian rawngbâwltu puitling a lo ni chho va. Chutiang a lo nih theih chhan chu, Paula te anga Kristian mi puitlingte a kawm vâng te, mahnia zirna a neih vâng te, leh phûr taka thuhrilh rawngbâwlnaa a tel vângte a ni.—1 Timothea 4:14; 2 Timothea 2:2; Hebrai 6:1, 2.
14. Tûn laiah, ‘chatuana nun duhna rilru dik tak neitu’ chuan rawngbâwltu ni tûrin eng hmasâwnna nge a siam?
14 Tûn laia Kristian rawngbâwl tûra nemnghehna pawh chu chutiang chiah a ni. ‘Chatuana nun duhna rilru dik tak neitu’ chu Pathian chanchin leh a thil tumte hre tûrin Bible zirna hmanga ṭanpui a ni. (Tirhkohte 13:48, NW) Ani chuan Bible thu bulte a nuna zawm dân leh Pathian hnêna tum neia ṭawngṭai dân a zir a. (Sâm 1:1-3; Thufingte 2:1-9; 1 Thessalonika 5:17, 18) Ringtu dangte a kâwm a, “bawi rinawm, fing tak” ruahman châwmnate chu a hmang ṭangkai bawk a. (Matthaia 24:45-47; Thufingte 13:20; Hebrai 10:23-25) Chutiang chuan, ani chuan hma a sâwn chho a ni.
15. Miin baptisma a chan hian eng nge lo thleng? (Footnote en rawh.)
15 A tâwpah chuan, Bible zirlai chuan, Pathian Jehova hmangaihna leh tlanna inthawinaa rinna nghet tak a nei ta a, chuvângin a Pa, vâna mi hnênah inpumpêk pum hlum a duh ta hial a ni. (Johana 14:1) Amaha a ṭawngṭainaah a inpumpêk a; tin, chu a thiltih chu mipui hriattîr nân baptisma a chang ta a ni. Baptisma a channa chuan amah chu inpumpêk tawh chhiahhlawh, di·aʹko·nos, a nihzia a târ lan avângin, chu chu atân nemnghehna hun serh a ni. Ani chu khawvêl ata a inlahrang reng tûr a ni. (Johana 17:16; Jakoba 4:4) Ani chuan tiamchin nei lovin, a taksa pum chu “inthawina nung leh thianghlim leh Pathian lawm tlâk ni tûrin” a hlân tawh a. (Rom 12:1)b Chuvângin, ani chu Krista entawntu Pathian rawngbâwltu a lo ni ta a ni.
Kristian Rawngbâwlna Chu Eng Nge Ni?
16. Rawngbâwltu a nih anga Timothea mawhphurhna ṭhenkhat chu engte nge ni?
16 Timothea rawngbâwlnaah eng dang nge tel? Ani chuan Paula zinpui theihna chanvo hlu a nei a. Kohhran upa a lo nih chuan, a Kristianpuite zirtîr nân leh tihchak nân nasa takin a thawk rim a ni. Mahse, Isua leh Paula ang bawkin, a rawngbâwlna pawimawh ber chu chanchin ṭha hrilh leh zirtîr siam hi a ni. (Matthaia 4:23; 1 Korinth 3:5) Paula chuan Timothea hnênah: “Nang erawh chu engkimah fimkhur la, hrehawm tuar la, chanchin ṭha hriltu lam hna thawk la, i rawngbâwlna kha hlen rawh,” tiin a hrilh a. (Hawrawp kan tihâwn a ni.)—2 Timothea 4:5.
17, 18. (a) Eng rawngbâwlnaah nge Kristiante chu an tel? (b) Kristian rawngbâwltu tân thuhrilhna chu eng anga pawimawh nge?
17 Chu chu tûn lai Kristian rawngbâwltute tân pawh a ni. Anni chu mipui rawngbâwlnaah te, chanchin ṭha hrilhnaah te, Isua inthawina zâra lo awm chhandamna kawng mi dangte kawhhmuhnaah te, leh mi thuhnuairawlhte chu Jehova hming lam tûra zirtîrnaah te an tel a ni. (Tirhkohte 2:21; 4:10-12; Rom 10:13) Anni chuan hrehawm tuarte tâna beiseina awmchhun chu Lalram a nihzia an hrilhfiah a; tin, Pathian thu bulte kan zawm chuan tûn la laah pawh thil a ṭhat zâwk theihzia an kawhhmuh a ni. (Sâm 15:1-5; Marka 13:10) Mahse, Kristian rawngbâwltu chuan Kristian thu bulte hmanga khawtlâng buaina sutkian dân thu an hril lo. Chu ai mahin, ani chuan ‘nunna tûna awm sa leh la awm leh tûr pêk tiamna nei Pathian ngaihsakna’ chu an zirtîr zâwk a ni.—1 Timothea 4:8.
18 Rawngbâwltu tinte chuan rawng bâwl dân chi dang an nei ṭheuh va, chu chu a inang lo thluah mai thei a ni. Entîr nân, tam takte chuan in chhûngkhurah mawhphurna an nei a. (Ephesi 5:21–6:4) Upate leh kohhranho rawngbâwltute chuan kohhranah thawh tûr an nei bawk a. (1 Timothea 3:1, 12, 13; Tita 1:5; Hebrai 13:7) Kristian tam takte chuan Kingdom Hall sakna an ṭanpui a. Ṭhenkhatte chuan chanvo hlu tak, Watch Tower Society Bethel inahte inpumpêkin rawng an bâwl a ni. Mahse, Kristian rawngbâwltu zawng zawngte chu chanchin ṭha hrilhnaah an tel vek a. Chu chu pumpelh theih a ni lo. Chu rawngbâwlnaa telna chu Kristian rawngbâwltu dik tak nihna chhinchhiahna a ni.
Kristian Rawngbâwltu Rilru Put Hmang
19, 20. Kristian rawngbâwltute chuan eng rilru put hmang nge an neih ang?
19 Kristianna ram rawngbâwltu tam takte chuan mite zah an inbeisei a, “reverend” leh “father” ang chi nihna an dawng a ni. Amaherawhchu, Kristian rawngbâwltu chuan Jehova chauhvin zahna a phû tih a hria a ni. (1 Timothea 2:9, 10, NW) Kristian rawngbâwltu tumahin chutiang zahna thûk tak phû-ah an inchhâl lo va, nihna bîk an phût lo bawk. (Matthaia 23:8-12) Ani chuan di·a·ko·niʹa awmzia bul ber chu “rawng bâwl” a ni tih a hria a. Chu thu mal nêna inlaichîn verb (thiltih) chu Bible-ah a châng chuan, chaw ei lai lo vilna ang chi, mi mal rawngbâwlsakna sawi nâna hman a ni. (Luka 4:39; 17:8; Johana 2:5) Kristian rawngbâwlna kawnga a hman dân chu chûng ai chuan sâng zâwk mah se, di·aʹko·nos chu chhiahhlawh a la ni cheu.
20 Chuvângin, Kristian rawngbâwltute chuan mi dang aia indah pawimawh chhan tûr an nei lo. Kristian rawngbâwltu dik takte chu—kohhrana mawhphurhna lian tak neite pawh ni se—chhiahhlawh inngaitlâwm tak an ni. Isua chuan: “Tupawh in zîng mi lian nih duh apiang chu in rawngbâwltuah a awm zâwk tûr a ni; tupawh in zînga hmasa ber nih duh apiang chu in chhiahhlawhah a awm bawk tûr a ni,” a ti a. (Matthaia 20:26, 27) A zirtîrte hnêna rilru put hmang dik nei tûra a zirtîrnaah, Isua chuan an kete silsakin, chhiahhlawh hniam ber hna a thawk a ni. (Johana 13:1-15) Rawngbâwlna tlâwm tak a va ni êm! Chuvângin, Kristian rawngbâwltute chuan inngaitlâwm takin Pathian Jehova leh Isua Krista rawng an bâwl a ni. (2 Korinth 6:4; 11:23) Anni chuan rawng inbâwlsak tawnnaah inngaihtlâwmna an lantîr a. Chanchin ṭha an hrilh hian, ringtu ni lo an ṭhenawmte rawng chu hmasial lovin an bâwl a ni.—Rom 1:14, 15; Ephesi 3:1-7.
Rawngbâwlnaah Chhel Rawh
21. Rawngbâwlnaa Paula chhelna chu eng anga lâwmman pêk nge a nih?
21 Rawngbâwltu nih nân Paula tân chhel a ngai a. Ani chuan Kolossa khuaa mite hnênah chuan an hnêna chanchin ṭha a hrilh theih nân harsatna tam tak a tuarzia a hrilh a. (Kolossa 1:24, 25) Mahse, a chhel avângin, tam tak chuan chanchin ṭha an pawm phah a, rawngbâwltu an lo ni ve ta a ni. Tichuan, anni chu, ama ruala vâna thlarau thil siam nih theihna beiseina nei, Pathian fapate ang leh Isua Krista unaute anga hrin an lo ni ta bawk. Chhelna lâwmman ropui tak a va ni êm!
22, 23. (a) Tûn laia Kristian rawngbâwltute chuan engvângin nge chhelna an mamawh? (b) Kristian chhelna aṭangin eng rah chhuah ropui tak nge lo awm?
22 Tûn laia Pathian rawng bâwl tak taktute tân pawh chhel a ngai êm êm a. Tam takte chu natna leh bawrhsâwmnate hian ni tinin a tlâkbuak reng a ni. Nu leh pate chuan an fate enkawl tûrin nasa takin an thawk rim a, an zînga tam takte chu an mal ṭan a ni. School kal lai naupangte chuan an chhehvêla awm thil ṭha lote chu huaisen takin an hnâwl a. Kristian tam takte chuan ei leh bâr harsatna nasa tak an tâwk bawk a ni. Tin, tûn lai “hun khirh takte” avângin tam takte chuan tihduhdahna leh harsatna tam tak an hmachhawn reng bawk a ni. (2 Timothea 3:1) Ni e, tûn laia Jehova rawngbâwltu maktaduai ruk dâwn laite chuan tirhkoh Paula thu chu an sawi thei a ni: “Pathian rawngbâwltute angin engkimah mi mit tlungin kan awm zâwk ṭhîn, nasa taka chhelnaah te,” tih chu. (2 Korinth 6:4) Kristian rawngbâwltute chu an tlâwm mai lo. An chhelna avângin an fak tlâk tak zet a ni.
23 Chu bâkah, Paula tawn ang bawkin, chhelna chuan rah chhuah ropui tak a nei a. Kan chhelna hmangin, Jehova nêna kan inlaichînna bul tak chu kan tinung reng a, a thinlung kan tilâwm a ni. (Thufingte 27:11) Keimahni rinna tichakin zirtîr kan siam a, chu chuan Kristian inunauna a tipung a ni. (1 Timothea 4:16) Jehova chuan he ni hnuhnûngah, a rawngbâwltute chu châwmin, an rawngbâwlna chu mal a sâwm a ni. Chuvângin, hriak thih 1,44,000-te zînga a la bângte chu lâk khâwm an ni tawh a, mi maktaduai tam takin lei paradis-a chatuan nun beiseina nghet tak an nei a ni. (Luka 23:43; Thu Puan 14:1) Kristian rawngbâwlna chu Jehova khawngaihna lantîrna a ni tak zet a ni. (2 Korinth 4:1) Kristian rawngbâwlna chu kan zain i hlut reng ang u, a rah chhuah chuan chatuan a daih dâwn avângin i lâwm tlâng bawk ang u.—1 Johana 2:17. (w00 11/15)
[Footnote-te]
a Grik thu mal di·aʹko·nos chu kohhrana mi lian “kohhran hotu tihna ‘deacon’” tih thu mal lo chhuahna bul a ni. Hmeichhiate kohhran hotu an nih theihna kohhranah chuan, anni chu hotu hmeichhia (deaconesses) tia koh an ni.
b Rom 12:1 chu hriak thih Kristiante tân bîk ni mah se, a thu bul chu “berâm dang” tân pawh a hman theih a ni. (Johana 10:16) Berâm dangte chuan ‘LALPA rawng bâwl tûr leh, LALPA hming ngaina tûr leh, a chhiahhlawhahte awm tûrin LALPA an zâwm’ a ni.
I Hrilhfiah Thei Em?
• Eng mawhphurhna nge kum zabi pakhatna Kristian zawng zawngte’n an neih?
• Eng hunah nge Kristian rawngbâwltu chu nem ngheh a nih a, tuin nge nem nghet?
• Kristian rawngbâwltu chuan eng rilru put hmang nge a chhawm reng ang?
• Engvângin nge Kristian rawngbâwltu chu harsatna a tawn pawhin a chhel tlat ang?
[Phêk 24, 25-naa milemte]
Timothea chu a naupan têt ata Pathian Thu zirtîr a ni. Baptisma a chan khân rawngbâwl tûra nem ngheh a lo ni
[Phêk 26-naa milemte]
Baptisma channa chu Pathian hnêna inpumpêkna a ni a, rawngbâwltu anga nemnghehna a entîr
[Phêk 28-naa milemte]
Kristian rawngbâwltute chuan mi dangte rawngbâwlsak an inhuam