Puitling leh Rin Tlatna Neiin Ding Rawh
“Ani chuan Pathian duhzâwng apianga puitling leh rin tlatna neia in din theihna tûrin a ṭawngṭainaahte chuan nangmahni tân a bei fo ṭhîn a ni.”—KOLOSSA 4:12.
1, 2. (a) Kristian hmasate chungchâng pâwn lam mite’n eng nge an sawi? (b) Engtin nge Kolossa mite hnêna lehkha thawn chuan inngaihsakna a tihlan?
ISUA hnungzuitute chuan Pathian chibai an bûkpuite chu an ngaihsak tak zet a ni. Tertullian-a (C.E. kum zabi pahnihna leh pathumnaa thu ziaktu) chuan fa hrahte, retheite, leh tarte laka ngilneihna an lantîr dân a sawi a. Chûng hmangaihna thiltihte chu mak an tih avângin, ringlo mite chuan, ‘En teh u, hêng ho inhmangaih tawn dân hi,’ tiin Kristiante chungchâng chu an sawi a ni.
2 Tirhkoh Paula leh a ṭhian Epaphra’n Kolossa unaute tâna chutiang inngaihsakna an lantîrzia Kolossa mite hnêna lehkha thawn khân a tilang a. Paula chuan an hnênah: Epaphra chuan, “Pathian duhzâwng apianga puitling leh rin tlatna neia in din theihna tûrin a ṭawngṭainaahte chuan nangmahni tân a bei fo ṭhîn a ni,” tiin a ziak a ni. Kum 2001 chhûng chuan, Jehova Thuhretute chuan he Kolossa 4:12-a thu hi kum chângah an hmang ang: ‘Pathian duhzâwng apianga puitling leh rin tlatna neiin ding rawh’ tih chu.
3. Epaphra chuan eng thil pahnih nge a dîl?
3 A hmangaihte tâna Epaphra ṭawngṭaina chuan hmêlhmang pahnih a nei a: (1) ‘puitling taka an din theihna’ tûr leh (2) “Pathian duhzâwng apianga . . . rin tlatna neia” an din theihna tûrin a ni. He thu hi kan hlâwkpui atân Pathian Lehkha Thu-ah telh a ni. Chuvângin, ‘Pathian duhzâwng apianga puitling leh rin tlatna neia ka din theih nân, eng nge ka tih ngai? Chu mi ka tih chuan eng rah nge a chhuah dâwn?’ tiin inzâwt ang che. Chûng chu tûnah kan en dâwn a ni.
‘Puitling Taka Din’ Tumin Bei Rawh
4. Kolossa khuaa Kristiante chu eng kawngin nge an ‘puitlin’ a ngaih?
4 Epaphra chuan thlarau lama a unau Kolossa khuaa mite chu ‘puitling taka an din theih’ a duh tak zet a ni. Heta “Puitling” tia lehlin Paula thu hman hi famkim, ṭhan kin tihna a ni thei a. (Matthaia 19:21; Hebrai 5:14; Jakoba 1:4, 25) Baptisma chang tawh Jehova Thuhretu nihna chuan mi chu Kristian puitling a nihtîr mai lo tih i hriat ngei a rinawm a. Kolossa khaw thlang lama awm Ephesi khuaa berâm vêngtute leh zirtîrtute chu ‘rinna leh Pathian Fapa hriatna kawngah chuan thu khat vua a, puitling a, Krista famkimna lenzia tluka an zaa awm tûra’ ṭanpui tum ṭheuh tûrin Paula chuan lehkha a thawn a ni. Hmun dangah pawh Paula chuan Kristiante chu “rilru lamah . . . puitling” tûrin a fuih a ni.—Ephesi 4:8-13; 1 Korinth 14:20.
5. Puitlinna chu engtin nge kan tum ber kan nihtîr theih ang?
5 Kolossa kohhrana mi ṭhenkhat chu thlarau lamah an la puitling lo, a nih loh leh an la ṭhan kin lo a nih chuan, puitlin chu an thil tum a nih a ngai a ni. Tûn laiah pawh chutiang tûr a ni dâwn lâwm ni? Baptisma kan channa a rei emaw, rei lo emaw pawh ni se, kan thil chhût dân leh thlîr dânah hma kan sâwn tak zet em? Thutlûkna kan siam hmain Bible thu bulte kan ngaihtuah hmasa em? Pathian leh kohhran lam thilte chuan kan nunah hmun pawimawh tak a chang em? Puitlin lam pana kan ṭhanchhohna kawng engkim chu tûnah kan sawi sêng dâwn lo va; mahse, entîrna pahnih chauh han chhût ta ila.
6. Jehova a ṭhat famkim anga ṭha famkim tûra hma kan sâwn theihna kawng khat chu eng nge ni?
6 Entîrna pakhatna: Hnam dang te, chi dang te, a nih loh leh ram dang mite pâwngpaw huatna leh hmêlmâkna hmuna seilian ni ta ila. Pathian chuan thlei bîk a nei lo va, keini pawhin kan nei tûr a ni lo tih kan hria a. (Tirhkohte 10:14, 15, 34, 35) Tichuan, kan kohhranah emaw, kan bial chhûngah emaw chutiang mi an awm hian, anni nên kan khawsaho ta a ni. Mahse, chutiang mite huat rûkna chu eng anga nasain nge a rûka kan pai? Chutiang miin thil a tihsual a, chhe têa kan lungâwi lohna tûr an tih hian ‘huatna thinlung’ kan nei em? ‘Pathian hleihneih lohna lama hmasâwn kan ngai em?’ tiin inzâwt ang che.
7. Kristian puitling nih nân, mi dangte chungah eng ngaihdân nge neih ngai?
7 Entîrna pahnihna: Philippi 2:3-in a sawi dânin, ‘elrel leh inngaihhlut avânga engmah ti lovin, mi tinin inngaitlâwm takin mahni aiin mi dang ṭha zâwkah an ruat ṭheuh’ tûr a ni. He mi chungchângah hian engtin nge hma kan sâwm? Mi tin hian chakna leh chak lohna lai kan nei ṭheuh va. Hun kal tawhah, mi dangte chak lohna kan hre hma viau a nih chuan, mi dangte “ṭha famkim” deuh thaw tûra beiseina nei lo tûrin hma kan sâwn tawh em? (Jakoba 3:2, NW) Tûn hma aiin, kan aia mi dangte ṭhat zâwkna kan hmu thei—a ni, kan zawng thei hial—tawh em? ‘He unaunu hi dawhtheihna kawngah kei aiin a ṭha zâwk.’ ‘Ani chu kei aiin rinna lamah a chak zâwk.’ ‘Zêp lovah chuan, ani chu kei aiin mite zirtîr a thiam zâwk alâwm.’ ‘Ani chuan kei aiin thinurna a thunun thei zâwk.’ Hetiang thilahte hian Kolossa khuaa unau ṭhenkhatte chuan hma an sâwn a ngai a ni. Keini kan ngai ve em?
8, 9. (a) Engtin nge Epaphra chu Kolossa unaute puitling taka ‘ding’ tûrin a ṭawngṭai? (b) ‘Puitling taka ding’ tih hian nakin huna awm dân tûr eng nge a hril?
8 Epaphra chu Kolossa unaute ‘puitling taka an dinna’ tûrin a ṭawngṭai a. Chiang takin, Epaphra chuan Kolossa unaute chu Kristian puitling, ṭhan kin tawh ni a, chu mi dinhmuna “ding,” a nih loh leh awm reng tûrin a ṭawngṭaisak a ni.
9 Kristian tawh phawt chu, thlarau lama puitling takte pawh ni se, chutiangin an puitling reng ang kan ti thei lo. Isua chuan Pathian fa vântirhkoh chu “thutakah a awm lo” tih a sawi a ni. (Johana 8:44) Tin, Paula pawhin Korinth khuaa unaute chu hmâna Jehova rawngbâwl ṭhîn, tûna bâwl tawh lote chanchin a hriattîr a. Thlarauva hriak thih unaute chu heti hian a zilh a ni: “Dinga inring chu fîmkhur rawh se, chutilochuan a tlu dah ang e,” tiin. (1 Korinth 10:12) Hei hian Kolossa unaute ‘puitling taka an din theihna’ tûra ṭawngṭaina chu a hrilhfiah zual a ni. An puitlin a, an ṭhan kin chuan, hnungtawlh lo, a nih loh leh tawlh bo lova an beih ṭâng ṭâng a ngai a ni. (Hebrai 2:1; 3:12; 6:6; 10:39; 12:25) Chutichuan anni chu enfiahna niah “puitling” an ni thei ang a, Pathian duhsakna an dawng thei ang.—2 Korinth 5:10; 1 Petera 2:12.
10, 11. (a) Ṭawngṭaina chungthu-ah Epaphra chuan eng entawn tûr nge min siam? (b) Epaphra lo tih angin, eng ang thutlûkna nge i siam duh?
10 Mi dangte hming lama ṭawngṭai a pawimawhzia te, Jehova’n anmahni ṭanpui tûr te, hnêm tûr te, malsâwm tûr te, leh thlarau thianghlim pe tûr tea dîlsak bîk neih a pawimawhzia te chu kan sawiho tawh a. Kolossa unaute tâna Epaphra ṭawngṭaina chu, chutiang chi ṭawngṭaina a ni. Tin, chûng thu-ahte chuan kan tâna kan ṭawngṭai huna Jehova kan hriattîr tûr thu pawimawh tak takte chu kan hmu theiin, kan hmu bawk tûr a ni. Rinhlehrual lovin, a mi mala ‘puitling taka kan din’ theihna tûrin Jehova hnênah ṭanpuina dîl chu kan tih âwm a ni. Chutiang chuan i ti em?
11 Ṭawngṭainaah engvângin nge i dinhmun chu i telh loh vang? ‘Puitlin’ lam i pan chhoh dân chu Pathian hriattîr la. Thlarau lama hmasâwn i ngaihna laite hre tûrin a ṭanpuina dîl rawh. (Sâm 17:3; 139:23, 24) Hmasâwn ngaihna lai chu i nei ngei ang. Tichuan, chu mi avânga lunghnual mai lovin, chiang tak leh fiah takin, hmasâwn nâna i mamawh ṭanpuina chu Pathian hnênah dîl ang che. Vawi khat dîl mai chu duhtâwk suh. Dik takin, chawlhkâr lo thleng tûrah ‘puitling taka ka din’ theihna tûrin ka ṭawngṭai ang tih thutlûkna chu engah nge i siam loh vang? Kum châng ngaihtuahin, tih zualsauh tum rawh. I ṭawngṭainaah chuan, Pathian rawngbâwlna ata hnungtawlh duhna, a nih loh leh tawlh bo duhna rilru put hmang i neihte chu a bîk takin thlen la, chûng thilte i pumpelh theih dân tûr dîl bawk ang che.—Ephesi 6:11, 13, 14, 18.
Rin Tlatna Dîl Rawh
12. Engvângin nge Kolossa unaute chuan “rin tlatna” an mamawh bîk?
12 Kolossa unaute Pathian pawmtlâka puitling an nihna tûra thil pawimawh dang chu Epaphra chuan a ṭawngṭainaah chuan a telh a. Chu chu kan tân pawh a ṭûl a ni. Chu chu eng nge ni? “Pathian duhzâwng apianga . . . rin tlatna neia” awm hi a ni a, chu mi atân chuan a ṭawngṭaisak a ni. Rin dân veiherh mi tichhe thei tak khawvêl finnate hual vêlin an awm a, a ṭhen phei chuan biakna dik anna an nei a ni. Entîr nân, anni chu hmân lai Juda biaknaa an lo tih ṭhin angin, ni pawimawhte chu chawnghei ni emaw, kût ni emawte hmang tûrin nawr an ni a. Zirtîrtu derte chuan Mosia hnêna Dân Thupêk pe tûra hman thlarau thil siam thiltithei tak, vântirhkohte chibai bûkna an zirtîr bawk. Chutiang nêksâwrna hnuaia awm chu han ngaihtuah teh! Ngaihdân inkalh tak tak a awm nuai mai a ni.—Galatia 3:19; Kolossa 2:8, 16-18.
13. Eng thil hriatthiamna hian nge Kolossa unaute chu a ṭanpui theih a, chutiang thil chuan engtin nge min ṭanpui theih?
13 Paula chuan Isua Krista chanvo sawi uarin a do lêt a. “Krista Isua, Lalpa chu in lawm ang khân, amaha zung kai leh rem chhoh deuh deuhva awmin, an zirtîr che u ang khân . . . amahan chuan awm rawh u.” A ni, Pathian thil tum leh kan nuna Krista chanvo rin tlatna chu (Kolossa unaute tân leh keini tân pawh) a ngai a ni. Paula chuan heti hian a hrilhfiah a ni: “Amahah chuan Pathian famkimna tinrêng chu taksa neiin a awm reng si a. Amahah chuan in famkim ta bawk a; ani chu lalna leh thuneihna zawng zawng lû a ni,” tiin.—Kolossa 2:6-10.
14. Kolossa unaute tân engvângin nge beiseina chu a der mai a nih loh?
14 Kolossa unaute chu thlarauva hriak thih Kristian an ni hlawm a. Vân nun beiseina mak tak an nei a; tin, chu an beiseina vawn rengna tûrin chhan engkim an nei a ni. (Kolossa 1:3-5) An beiseina takzia rin tlatna neih chu “Pathian duhzâwng” a ni. Chu an beiseina chu an ringhlel tûr em ni? Hnai lo ve! A nih leh tûn laia lei lam paradis-a Pathian pêk nun beiseina neite chuan an beiseina chu an ringhlel tûr em ni? Teuh lo mai! Chu beiseina chu “Pathian duhzâwng” zînga mi ngei a ni. Tûnah he zawhna hi ngaihtuah rawh: ‘Hrehawmna nasa taka’ dam khawchhuak tûr, “mipui tam tak” zînga tel tuma bei mêk i nih chuan, i rinna chu eng angin nge a tak? (Thu Puan 7:9, 14) Chu chu ‘Pathian duhzâwng apianga i rin tlatte’ zîngah a tel em?
15. Beiseina telna eng thu indawt nge Paula’n a sawi?
15 “Beiseina” kan tih hian, thil tum chiang lo tak, a nih loh leh duhthusâm thil mai sawina a ni lo. Rom unaute hnêna lehkha a thawn laia Paula thu ziak indawt dân aṭangin, chu chu kan hmu thei a ni. Chu thu indawtah chuan, a sawi apiang chuan, a dawta a sawi nên kawng engemaw takin inzawmna a nei zêl a ni. Paula’n “beiseina” a dahna lai hi lo ngaihsak teh mah: “Kan hrehawmnaah pawh lâwmin i awm ang u, hrehawmna chuan chhelna a siam a, chhelna chuan hriatfiahna [“dinhmun pawmtlâk,” NW] a siam a, hriatfiahna [“dinhmun pawmtlâk,” NW] chuan beiseina a siam tih kan hre si a; tin, thlarau thianghlim . . . khân Pathian hmangaihna chu kan thinlunga a leih tawh avângin beiseina chuan a timualpho lo va.”—Rom 5:3-5.
16. Bible thutak i zir hian, eng beiseina nge i neih?
16 Jehova Thuhretute’n Bible chanchin an hrilh hmasak ber che ṭum chuan, mitthite dinhmun emaw, thawhlehna thu ang chi thutak engemaw ber chuan i ngaihsakna a la vat a. Mi tam tak tân chuan, an hriat thar ber chu Bible-a innghat lei paradis-a nun theihna hi a ni. Chu zirtîrna i hriat hmasak ber ṭum chu han ngaihtuah teh. Natnate leh tarna te a awm tawh lo vang a, i thawh rah seng tûrin i dam reng ang a; tin, ramsate nêna intihnat a awm tawh dâwn lo—beiseina mak a va ni êm! (Thuhriltu 9:5, 10; Isaia 65:17-25; Johana 5:28, 29; Thu Puan 21:3, 4) Beiseina ropui tak i nei a ni!
17, 18. (a) Rom unaute hnêna Paula thu indawt sawi hian engtin nge beiseina a thlen chhoh? (b) Rom 5:4, 5-a sawi beiseina chu eng ang beiseina nge ni a, chutiang beiseina chu i nei em?
17 Dodâlna emaw, tihduhdahna emaw tawn châng i nei ngei ang a. (Matthaia 10:34-39; 24:9) Tûn hnai maiah pawh, ram hrang hranga Thuhretute chu an in leh lo chu tih ramsak emaw, râltlân nih luihtîr emaw an ni a. Ṭhenkhat chuan kut an tuar a, an Bible thu leh hlate lâk bosak emaw, a nih loh leh an chanchin dik lo taka thehdarhna emaw chu an tuar a ni. Eng ang tihduhdahna pawh tawng dâwn mah la, Rom 5:3-in a sawi angin, hrehawmnaah chuan i lâwm thei ta a, chu chuan rah ṭha a chhuah a ni. Paula’n a lo ziah ang khân, hrehawmna chuan chhelna a siam a. Tin, chhelna chuan dinhmun pawmtlâk a siam a ni. Pathian duhzâwng thil dik i ti a ni tih i hria a, chuvângin i thiltih chu a pawm a ni tih i hria a ni. Paula sawi dân chuan, ‘dinhmun pawmtlâkah’ i awm tih i inhre ta a. Tichuan, Paula chuan “dinhmun pawmtlâk chuan beiseina a siam” tiin a ziah belh a ni. Chu chu thil dangdai a ang mai thei. Engvângin nge Paula chuan thu indawt a ziaknaah “beiseina” chu a dah hlat êm êm? Chanchin ṭha i hriat tirh ata beiseina chu i nei tawh a ni lâwm ni?
18 Paula’n nun ṭha famkim beiseina kan neih chu a sawi lo a ni tih a chiang hle. A sawi tum chu, chu mi piah lam daih thil; thu thûk zâwk, min chêttîr thei zâwk thil a ni. Rinawm taka kan tuar a, chu mi avânga Pathian pawmna kan hriat chuan, chu chuan atîra beiseina kan neih chu nasa takin a belhchhah a, a tinghet bawk a ni. Tûna kan neih beiseina chu a lo tak zâwk a, a lo sakhat zâwkin, mi mal ta a lo ni zual a ni. Chu chuan beiseina chu a tithûk zâwkin, a tiêng zual bawk. Chu chuan nun a fan chhuak vek a ni. “Tin, thlarau thianghlim . . . khân Pathian hmangaihna chu kan thinlunga a leih tawh avângin beiseina chuan a timualpho lo va.”
19. I beiseina chu i ṭawngṭainaah eng anga tel tûr nge ni?
19 Kolossa khuaa unaute chu an hmaa thil lo thleng tûr nghawng leh ring tlata an awm a, “Pathian duhzâwng apianga . . . rin tlatna neia” an awm chu tih tak zeta Epaphra ṭawngṭaina a ni. Chutiang bawkin, mi tinin kan beiseina chungchângah Pathian i pan fo vang u. I mi mal ṭawngṭainaah chuan khawvêl thar i beiseina chu telh rawh. A lo thleng ngei dâwn tih rin tlatna nên, i nghahhlelhzia chu Jehova hriattîr ang che. I rin tlatna tithûk zâwk tûr leh tizau zâwk tûrin ngên rawh. Epaphra’n Kolossa unaute’n “Pathian duhzâwng apianga . . . rin tlatna neia” an awm theihna tûra Epaphra a ṭawngṭai angin ṭawngṭai fo rawh.
20. Mi tlêm tête’n Kristian kawng an pênsan hian, engvângin nge lunghnual nachhan tûr a awm loh?
20 Mi zawng zawng chu rin tlatna nêna puitling taka an din loh avângin i lunghnual emaw, i buai emaw tûr a ni lo. Ṭhenkhat chuan an ti thei lo va, an pênsan emaw, an chawlhsan emaw mai ṭhîn. Chutiang thil chu Isua nêna inbul hnai tak a tirhkohte chungah pawh a lo thleng a ni. Mahse Juda chu hêktu a lo nih khân, tirhkoh dangte chuan an hnungtawlhsan emaw, an bânsan emaw mai em? Hnai lo ve! Petera chuan Sâm 109:8 chu mi dangin Juda dinhmun a chelh chho tûr a ni tih lantîr nân a hmang a ni. A thlâktu tûr thlan a ni a, tichuan Pathian mi rinawmte chuan an thuhrilhna hna chu phûr takin an chhunzawm a ni. (Tirhkohte 1:15-26) Anni chuan puitling leh rin tlatna neia din an tum tlat a ni.
21, 22. Puitling leh rin tlatna neia i dinzia chu eng anga hriat nge ni dâwn?
21 Pathian duhzâwng apianga puitling leh rin tlatna neia i dinna chu mite’n an hre ngei ang tih i ring tlat thei a ni. Chu chu hmuh a ni ang a, hlut a ni bawk ang. Tuin nge?
22 Aw le, nangmah hmangaihtu i nunaute chuan an hre ngei ang. Mi tam tak chuan ṭawngkamin sawi kher lo mah se, a sawhkhâwk chu 1 Thessalonika 1:2-6 ziak ang hi a ni ang. Chutah chuan heti hian ziak a ni: “Kan Pathian leh Pa hmaah chuan rin avânga in thiltihzia te, hmangaih avânga in thawh rimzia te, kan Lalpa Isua Krista beisei avânga in chhelzia te kha theihnghilh lova hre rengin, kan ṭawngṭainaahte chuan in hming lamin, nangmahni zawng zawng avângin Pathian hnênah lâwmthu kan hril fo ṭhîn a ni. . . . Chanchin ṭha chu thu chauhva in hnêna thleng lova, thiltihtheihna leh thlarau thianghlim leh nasa taka rin tlatna nên a lo thlen zâwk kha . . . Tin, . . . keimahni leh Lalpa zirtute in lo ni a,” tiin. I bula Kristian mi rinawmte pawhin, ‘Pathian duhzâwng apianga puitling leh rin tlatna neia i ding’ an hmuh hian chutiang bawk chuan an ti ang.—Kolossa 1:23.
23. Kum lo thleng tûr chhûng hian, eng tih nge i tum tlat ang?
23 Chutiang bawkin, i Pa, vâna mi chuan a hmu ang chia, a hlim hle ang. Chu chu ring nghet rawh. Engvângin nge? “Pathian duhzâwng apianga” puitling leh rin tlatna neia i din avângin. Paula chuan Kolossa unaute hnênah ‘kawng tinrênga amah tilungawi tûra Jehova zui tlâka’ an kal thu phûr takin a ziak a. (Kolossa 1:10-12) A ni, mi ṭha famkim lo mah ni ila, kawng tinrênga amah tihlungawi chu a theih a ni. Kolossaa i unaute chuan Pathian an lo tilungawi a. I bula awm Kristiante chuan an tilungawi mêk a. Nangpawhin i tilungawi thei a ni! Chuvângin, kum lo thleng tûr chhûng hian, i ni tin ṭawngṭaina leh i thiltih hian ‘Pathian duhzâwng apianga puitling leh rin tlatna neia din theih’ i tumruhna chu tilang rawh se. (w00 12/15)
I Hre Chhuak Thei Em?
• ‘Puitling taka i dinnaah’ eng nge tel?
• Ṭawngṭainaah i chungchâng engte nge i telh ang?
• Rom 5:4, 5-in a sawi angin, eng ang beiseina nge neih i duh?
• Kan thu zir chuan kuminah eng thil tum nge nei tûra a chawhthawh che?
[Phêk 27-naa milem]
Epaphra chuan a unaute chu Krista leh an beiseina chungthua puitling leh rin tlatna neia an din theihna tûrin a ṭawngṭaisak
[Phêk 29-naa milemte]
I beiseina nghet leh i rin tlatna ang chu mi maktaduai têlte’n an nei ve