Englo Pêk Avânga Hlimnaah Tel Ve Rawh
“Englo lâk aiin pêkin lukhâwng a nei zâwk.”—TIRHKOHTE 20:35.
1. Englo pêkah hlimna a neihzia engtin nge Jehova’n a lantîr?
THUTAK kan hriat avânga kan hlimna leh, chu thutak hriatna rah chhuah malsâwmnate chu Pathian thilpêk hlu takte a ni. Chuvângin, Jehova hretute chuan lâwmna chhan tûr tam tak an nei a ni. Thilpêk kan dawnga kan hlim êm êm ang hian, a petu tân pawh hlimna a awm bawk. Jehova chu “thilpêk ṭha leh thilpêk famkim zawng zawng” Petu a ni a, “Pathian hlim” a ni bawk. (Jakoba 1:17; 1 Timothea 1:11, NW) A ngaithla duhtu apiangte hnênah chuan zirtîrna thu ṭha tak tak a pe ṭhîn a, hmangaih taka nu leh pate’n an fate an zirtîrna an zâwm avânga nu leh pate an lâwm ang chiah hian, Pathian pawh a zirtîrte’n a thu an âwih hian a lâwm êm êm ṭhîn a ni.—Thufingte 27:11.
2. (a) Eng lo pêk chungchâng Isua’n eng nge a sawi? (b) Mi dangte Bible thutak kan zirtîr hian eng hlimna nge kan dawn?
2 Chutiang bawk chuan, Isua pawh he leia a awm lai khân a zirtîrna ṭha taka ngaithlatu a hmuhin a hlim êm êm ṭhîn a. Tirhkoh Paula chuan: “Englo lâk aiin pêkin lukhâwng a nei zâwk,” tia sawiin Isua thusawi chu a sawi chhâwng a ni. (Tirhkohte 20:35) Bible thutak mite kan zirtîr avânga hlimna kan neih chu miin kan thurin an pawm tih kan hriat avânga hlimna mai mai a ni lo. Chu aia hlimna nasa zâwk, chatuan daih, thil hlu êm êm mi kan pe a ni tih hriatna avânga hlimna chu kan nei a ni. Thlarau lam thil pêin, mite chu tûnah leh chatuana an ṭhatna tûrin kan ṭanpui thei a ni.—1 Timothea 4:8.
Englo Pêkin Hlimna A Thlen
3. (a) Paula leh Johana te’n mi dangte thlarau lama an ṭanpui avânga an hlimzia engtin nge an sawi chhuah? (b) Engvângin nge mahni fate Bible thutak zirtîr chu anmahni kan hmangaihzia lantîrna a nih?
3 Ni e, Jehova leh Isua’n thlarau lam thil pêk pêk nuam an tih ang bawkin Kristiante pawhin an ti ve a. Tirhkoh Paula chu Pathian Thu, thutak, zir tûra mi dangte a ṭanpui tih a inhriat avângin a hlim hle a. Thessalonika kohhran mite hnênah hetiang hian a ziak hial a ni: “Kan beiseina emaw, kan hlimna emaw, kan lallukhum chhuan emaw, engnge ni le? A lo kal hunah kan Lalpa Isua hmaah chuan nangmahni ngei in ni dâwn lâwm ni?” tiin. (1 Thessalonika 2:19, 20) Chutiang bawkin tirhkoh Johana pawhin a thlarau lam fate chungchângah: “Ka fate thutakah an awm tih ka hriat aliama lâwmna nasa zâwk rêng ka nei lo ve,” tiin a sawi bawk. (3 Johana 4) Tin, mahni fate ngei mai, kan thlarau lam fate ni tûra kan han ṭanpui hlimawmzia hi han ngaihtuah bawk teh! “Lalpa thununnaah leh zilhnaa” fate enkawl hi nu leh pate’n an fate chunga hmangaihna an lantîrna a ni a. (Ephesi 6:4) Chuvângin nu leh pate chuan an fa tleirâwlte kumkhaw ṭhatna tûr chu an ngaihtuah êm êm a ni. Chûng an enkawlnate chu an fate’n an zawm chuan nu leh pate chuan lungawina leh hlimna nasa tak an nei ṭhîn a ni.
4. Thlarau lam thil pêkna avânga hlimna chu eng thil tawnin nge lantîr?
4 Dell-i chu fa panga lai nei, full time pioneer a ni a. Heti hian a sawi: “Ka fate paliin ‘thutak an zawh’ avânga ka lâwm êm avângin tirhkoh Johana thute hi ka sawi chhuak nawn ve thei a ni. Biakna dika chhûngkua kan inzawmkhâwm hian Jehova ropuina leh chawimawina a thlen tih ka hria a; chuvângin, ka fate thinlunga thutak tuh tuma ka beihnate mal min sâwm tih ka hmuh hian ka lungawi hliah hliah a ni. Kan chhûngkuaa paradis-a tâwp thei lo nun hmabâk ropui tak kan nei hian harsatna leh dodâlna kârah pawh chhel tûrin min tiphûr a, beiseina min pe a ni,” a ti. Amaherawhchu, Dell-i fanute zînga pakhat chu khawvêl nun kawng a zawh avângin kohhran aṭanga hnawh chhuah a ni ta hlauh mai a. Mahse, Dell-i chuan a ṭha zâwnga rilru put a tum hrâm hrâm a ni. “Engtik nîah emaw chuan ka fanu chu inngaitlâwm leh tih tak zetin Jehova hnênah a rawn kîrleh ang tih ka beisei tlat a, ka fate tam zâwkin a rawng rinawm taka an bâwl avângin Pathian hnênah lâwmthu ka sawi a ni. Chu ka hlimna chu min tichaktu bul ber a ni bawk,” tiin a sawi.—Nehemia 8:10.
Chatuan Daih Ṭhiante Siamin
5. Zirtîr siam hna kan thawh hian, eng hriatnain nge lungawina min pe?
5 Isua chuan a hnungzuitute chu Kristian zirtîrte siam a, Jehova leh a thil phûtte chungchâng zirtîr tûrin a ti a. (Matthaia 28:19, 20) Jehova leh Isua chuan thutak kawng chu mahni hmasialna nei hauh lovin mite an zirtîr a. Keini pawh chutiang bawka zirtîr siam hnaa kan inpêk hian, Kristian hmasate ang bawkin Jehova leh Isua kan entawn a ni tih hriain kan lungawi a ni. (1 Korinth 11:1) Chutianga Engkim Tithei Pathian leh a Fapa duh tak kan thawhpui chuan kan nunin awmzia tak tak a nei ṭhîn a ni. Pathian “hnathawhpuite” zînga chhiar tel kan ni hi malsâwmna a va ni êm! (1 Korinth 3:9) Chubâkah, he chanchin ṭha hrilh rawngbâwlnaah hian vântirhkohte meuh pawh an telve a ni tih hriat pawh chu a phûr thlâk hle lo maw?—Thu Puan 14:6, 7.
6. Thlarau lam thil pêknaa kan telin, tute nge kan ṭhiante lo ni?
6 Dik takin, he thlarau lam thil pêk rawngbâwlnaa kan telve hian, Pathian hnathawhpuite mai ni lo—amah nêna chatuana inṭhianna chu kan lo nei thei a ni. Abrahama chu a rinna avângin Jehova ṭhian tia koh a ni a. (Jakoba 2:23) Keini pawh Pathian duhzâwng tih kan tum tlat chuan Pathian ṭhiante kan lo ni ve thei a ni. Chutiang kan tih chuan Isua ṭhian kan lo ni bawk ang. Isua chuan hetiang hian a zirtîrte a hrilh a: “Ṭhiante ka ti tawh zâwk ang che u; Pa hnêna thil ka hriat zawng zawng in hnênah ka puang tawh si a,” tiin. (Johana 15:15) Mi tam takte chu mi lian tak tak te leh hotu lûte ṭhian an nih avângin an hlim a, keini erawh chu vânlâwt pum puia mi ropui ber pahnihte ṭhiana chhiar kan ni asin!
7. (a) Engtin nge hmeichhe pakhatin ṭhian tak tak a siam? (b) Chutiang bawk thil tawn chu i nei tawh em?
7 Chubâkah, Pathian hre tûra mite kan puih hian, anni chu kan tân pawh ṭhiante an lo ni a, chu chuan hlimna min pe a ni. United State-a chêng Joan-i chuan hmeichhe pakhat Thelma-i chu Bible a zitîr ṭan a. Thelma-i chuan chhûngte lam aṭangin dodâlna tâwk mah se, a zir zawm ṭâng ṭâng a, kum khat hnuah chuan baptisma a chang ta a ni. Joan-i chuan tihian a ziak: “Baptisma a chan hnu chuan kan inkawmna chu a tâwp mai lo va, inṭhianna nghet a siam zâwk a, tûnah chuan kum 35 vêl lai kan inṭhian ta a ni. Rawngbâwlnaah leh inkhâwmpuinaah te kan kal dûn fo va. A tâwpah chuan, kilometer 800 vêl laia hlaah chuan ka insawn ta a. Mahse, Thelma-i chuan lehkha ṭawngkam duhawm tak takte chu min rawn thawn chhunzawm zêl a, min ngaihzia thu te min hrilhin, a ṭhian ka nih avâng leh entawn tûr ka siam avângte, leh Bible aṭang thutak ka zirtîr avângtein lâwmthu min rawn hrilh ṭhîn bawk. Chutiang khawpa ṭhian bul leh duhawm ka neih chu Jehova chungchâng zirtîr tûra ka beihna lâwmman ropui tak a ni,” tiin.
8. Eng ang rilru put hmang ṭhain nge rawngbâwlnaah min ṭanpui ang?
8 Kan mi tawn tam takte’n Jehova Thu an ngaihven duh lo chung pawhin, tuemaw thutak zir duh tawn kan beisei tlatna chuan chhel tûrin min ṭanpui thei a ni. Chutianga inngaihsak lohna chuan kan rinna leh chhelna atân chona a siam thei a. Mahse, a ṭha zâwnga rilru putna chuan min ṭanpui ang. Guatemala a mi fausto-a chuan tihian a sawi: “Mi dangte hnêna thu ka hril hian, ka biakte hi thlarau lam unaupa emaw, unaunu emaw lo ni ta se, a ropui tûrzia ka ngaihtuah ṭhîn a. Ka mi tawh pakhat tal hian Pathian Thu thutak pawm tûrin kan ngaihtuah ṭhîn a. Chutiang ngaihtuahna chuan thu hril zêl tûrin min tichak a, hlimna tak tak min pe a ni,” tiin.
Vânah Rote Khâwl Khâwmin
9. Isua’n vâna ro chhêkkhâwm chungchâng eng nge a sawi a, chuta ṭang chuan eng nge kan zir theih?
9 Kan fate an ni emaw, mi dang an ni emaw zirtîra siam hna hi thil awlai a ni reng lo. Hun a duh a, dawhtheih a ngai a; tin, taihmâk a ngai bawk a ni. Amaherawhchu, mi tam takte’n hlimna petu pawh ni lo, daih rei bawk si lo sum leh pai, hausakna khawl khâwm tuma thawh rim an inhuamzia hi hre reng la. Isua chuan a thu ngaithlatute chu thlarau lam thilte atâna thawh rim a ṭhat zâwkzia thu tiang hian a hrilh a: “Leia sûlrûl leh tuiêkin a ei chhiatnaah, rûkrute’n an reh pawha an rûkna hmunah hian, in tân rote khâwl khâwm suh u; vânah, sûlrûl leh tuiêkin a ei chhiat lohnaah, rûkrute’n an reh pawha an rûk hek lohnaah chuan, in tân rote khâwl khâwm zâwk rawh u,” tiin. (Matthaia 6:19, 20) Hna pawimawh tak, zirtîra siam hnaa telvena pawh tiamin, thlarau lam thil tumte ûmna hmangin Pathian duhzâwng kan ti a, ani’n lâwmman min pe ang tih kan hria a; chumi hriatna aṭang chuan lungawina kan nei thei a ni. Tirhkoh Paula chuan: “In hnathawh leh a hming chunga hmangaihna in lantîr . . . chu theihnghilh tûrin Pathian chu mi fel lo a ni si lo va,” tiin a ziak a ni.—Hebrai 6:10.
10. (a) Engvângin nge Isua chuan thlarau lam ro a neih? (b) Engtin nge Isua chu a inpêk a, chu chu engtin nge mi dangte tân hlâwkna ropui tak a nih?
10 Zirtîra siam hnaa kan thawh rim chuan Isua sawi angin, kan tân “vânah rote” kan chhêk khâwl a ni. Hei hian dawn avânga hlimna min thlen a ni. Mahni hma sialna nei lova kan pêk chuan, a tâwpa kan tâna hlâwkna a ni. Isua chuan kum tlûklehdingâwn tam tak Jehova rawng rinawm takin a bâwl a. Vâna ro a khâwl khâwm zât chu han ngaihtuah teh! Nimahsela, Isua chuan ama hlâwkna chauh a zawng lo. Tirhkoh Puala chuan: “[Isua] chuan kan Pathian leh ka Pa remtihzâwngin tûn lai khawvêl sual tak lakah hian min chhanchhuah theih nân kan sualte aiah amah a inpe ta,” tiin a ziak a ni. (Galatia 1:4) Isua chu a rawngbâwlnaah chauh inpe lovin, mi dangte pawhin vâna ro an chhêk khâwm ve theih nâna tlan nân a nun ngei a pe a ni.
11. Engvângin nge thlarau lam thil pêk chu sum leh pai, leh hausakna lam thil aiin a ṭhat zâwk?
11 Pathian chungchâng mite kan zirtîr hian, thlarau lam ro chhe thei lo chu khâwl khâwm ve dân kan zirtîr tihna a ni a. Chu aia thil pêk ropui zâwk eng nge i pêk theih? I ṭhian hnênah sana man to tak emaw, car emaw, a nih loh leh in hial pawh i pêk chuan i ṭhian chu a lâwmin a hlim hle ang a, nang pawhin pêk avânga hlimna chu i nei ang. Mahse, chu i thil pêk chu a hnu kum 20 emaw, 200 emaw, 2,000 emaw vêlah chuan engtin nge a awm ang? Jehova rawng bâwl tûra mi dang ṭanpui nâna i inpêk erawh chuan, i mi ṭanpui chuan chatuanin i thil pêk chu a hlâwkpui thung dâwn a ni.
Thutak Duhtute Zawng Chhuakin
12. Mi dangte thlarau lama ṭanpui nân mi tam tak chu engtin nge an inpêk?
12 Thlarau lam thil pêk avânga hlimnaa telve tûrin Jehova mite chu khawvêl hmun hrang hrangah an kal chhuak a. Mi sâng tam takte chu ṭawng thar leh hnam dân thar zir chawp an ngaihna ram, ram dangahte missionary rawngbâwl hna thawk tûrin mahni in lum leh chhûngte an kalsan a. Ṭhenkhatte chu anmahni ram chhûng vêk, Lalram thupuangtu mamawh zualna hmunahte an insawn bawk. Ṭhenkhat danglehte chuan an vêng chhûnga khawsa ram dang aṭanga lo pêm lûtte hnêna thu an hrilh theih nân ram dang ṭawng an zir bawk. Entîr nân, khawvêla Jehova Thuhretute hmunpui pakhat New Jersey, (U.S.A.)-a rawngbâwl mêk nupa tuak khat chuan fa pahnih an neih hnuah pioneer hna thawk ṭanin, China ṭawng an zir a. Kum thum hnuah chuan, an bûl hnai college-a kal China mi 74 lai chu Bible an zirpui ta a ni. Zirtîr siam rawngbâwlnaa hlim lehzualna i hmuh theih nân, kawng eng kawng zâwng emaw talin i rawngbâwlna i tizau thei em?
13. I rawngbâwlna chu hlawhtling lehzual tûra i duh chuan eng nge i tih theih?
13 Bible zirpui neih chu i châk a; mahse, i nei thei lo pawh a ni mahna. Ram ṭhenkhatah chuan tuina neite hmuh hi thil harsa tak a ni rêng a ni. I mi kawmte chuan Bible an ngaihven lo pawh a ni mai thei a. Chuti anih chuan, Jehova leh Isua Krista chu rawngbâwl hnaah an tui tak zet a, berâm ang mite hnênah an hruai mai ang che tih hre rengin, i châkzia chu i ṭawngṭainaah i chham ngun lehzual thei a ni. In kohhrana thil tawn nei tam zâwkte leh rawngbâwlnaa hlawhtling zâwkte hnên aṭangin thurâwn la la. Kristian inkhâwmnaa rawtna siam leh zirtîrna pêk rêng rêng chu hlâwkpui tum tlat ang che. Bial kantute leh an nupuite fuihna aṭangin hlâwkna neih tum bawk ang che. Tichuan, Bible zirpui tûr i zawn chu bânsan lovin, chhunzawm ṭâng ṭâng bawk ang che. Mi fing tak pakhat chuan: “Zîngah i chi tuh la, tlaiah i kut sûm suh; i hre si lo, a ṭhang tûr chu khawii nge,” tiin a lo ziak a. (Thuhriltu 11:6) Chutianga i thawh lai chuan mi rinawm Nova leh Jeremia ang te i rilruah vawng reng ang che. An thusawi dawngsawngtute kha an tlêm hle nâ a, an rawngbâwlna kha a hlawhtling a ni. Chumai bâkah, chûng an rawngbâwlna chuan Jehova a tilâwm a ni.
I Tih Theih Tâwk Tiin
14. Engtin nge Jehova’n a rawngbâwlnaa inhmang tar ṭhakte a thlîr?
14 Rawngbâwlnaa thawh tam i duh ang huin i dinhmunte avângin i duh anga tam i thawk thei lo pawh a ni thei e. Entîr nân, i upat tawh avângin Jehova rawngbâwlnaa i tihtheih chu a tlêm mai thei. Mahse, mi fing pakhat thuziak hi hre reng ang che: “Lu ṭuak chu ropuina lallukhum a ni a, felna kawngah hmuh a ni ang,” tih hi. (Thufingte 16:31) Jehova tân chuan, a rawngbâwlnaa hun hman ral hi a lâwmawm êm êm a ni. Pathian Lehkha Thu chuan heti hian a sawizawm zêl a: “In tarkûn thleng pawhin amaha chu ka ni ang a, in lûa kêlsam a ṭo vek thleng pawhin keiman ka siam a, keimah vêkin ka pua ang; a ni, kei chuan ka pawm ang a, ka chhanhim ang,” tiin. (Isaia 46:4) Hmangiahnaa khat kan Pa vâna mi chuan a mi rinawm nghette chu ṭanpui leh chhawmdâwl a tiam a ni.
15. Jehova chuan i dinhmunte a hriat thiam i ring em? Engvâng nge?
15 Dam lohna te, ring lo mi kawppui dodâlna te, chhûngkaw mawhphurhna te, a nih loh leh harsatna dang engemaw te i tawng a ni thei e. Jehova chuan tlin tâwk leh dinhmunte a hre thiam vek a, a rawng bâwl tûra theihtâwp kan chhuah avângin min hmangaih a ni. Mi dangte aiin thawk tlêm zâwk mah ila min hmangaih dân a inang reng tho a ni. (Galatia 6:4) Jehova chuan ṭha famkim lo kan ni tih a hria a, kan laka a beisei hian chin tâwk a nei a ni. (Sâm 147:11) Chuvângin, kan theih tâwp kan chhuah phawt chuan, Pathian mithmuhah kan hlu êm êm a, rinna avânga kan thiltih chu a theihnghilh dâwn lo tih kan hre chiang tûr a ni.—Luka 21:1-4.
16. Zirtîr siam rawngbâwlnaah hian eng kawngin nge kohhrana mi zawng zawng an tel?
16 Tin, zirtîr siam rawngbâwlna hi a huhova thawh chi hna a ni tih hre reng bawk ang che. Mi pakhat maiin zirtîr a siam thei lo va, ruah mal khat lekin thlai a châwm thei hek lo. A, Thuhretu pakhat chuan tuina nei mi a hmuin, Bible a zirtîr pawh a ni thei. Mahse, chu mi thar chu Kingdom Hall-a a lo kal chuan, kohhran mi zawng zawngte chuan thutak a nihzia hmu tûrin an lo ṭanpui a. Inunauna duhawm tak chuan Pathian thlarauvin a kaihhruaizia a lantîr a. (1 Korinth 14:24, 25) Naupangte leh tleirâwl tê tête’n chhânna ṭha tak tak an pe a, chûngte chuan kan ṭhalaite chu khawvêl ṭhalaite laka an danglamzia mi thar hnênah chuan an lantîr a ni. Kohhrana dam lo te, chak lo te, leh tarte chuan chhelna hian eng nge a huam tih mi thar chu an zirtîr a. Kan kumte chu upain, kan tlin tâwkte tlêm hle mah se, mi tharte chu Bible an hmangaihna a lo thûk telh telh a, baptisma chan tuma hma sâwn zêl tûrin kan zain kan ṭanpui a ni. Rawngbâwlnaa leh tlawhkîr neih nâna kan dârkâr sên te, leh Kingdom Hall-a tuina neite titipui nâna kan hun hmante hian pawimawhna an nei tham pawhin a lang lo nâ a; Jehova hlenchhuah mêk a hna ropui tak pêng a ni vek a ni.
17, 18. (a) Zirtîra siam rawngbâwlnaa kan tel mai bâkah, englo pêkna avânga hlimna dangah engtin nge kan tel theih? (b) Englo pêk avânga hlimnaa telvena hmangin tunge kan entawn?
17 Zirtîr siam hna pawimawh taka kan tel mai bâkah hian, keini Kristiante hi kawng danga pêk avânga hlimnaah kan tel bawk a. Biakna thianghlim chhawmdâwl nân leh ṭanpui ngaite ṭanpui nân thawhlâwm kan thawh thei a. (Luka 16:9; 1 Korinth 16:1, 20) Mi dangte lawmna hun remchâng kan zawng thei bawk a ni. (Rom 12:13) Tin, ‘mi zawng zawng chunga thil ṭha ti a, rinna chhûngte zînga mi chunga ti deuh ber’ tûrin kan bei thei a ni. (Galatia 6:10) Mi dangte chu—lehkha thawn hmang te, telephone-a biak te, thilpêk pêk te, ṭanpui an ngaiha ṭanpuina te hmangin—kan fuih thei a, hei hi mi dangte kan fuih theih dân kawng ho tak, pawimawh êm êm si a ni.
18 Englo pêkna hmangin kan Pa vâna mi kan entawn tih kan lantîr a. Kristian dikte chhinchhiahna, unau hmangaihna kan lantîr bawk a ni. (Johana 13:35) Hêng thilte rilrua vawn rengna hian englo pêkna avânga hlimnaa telve tûrin min ṭanpui thei a ni. (w01 7/1)
I Hrilhfiah Thei Em?
• Engtin nge Jehova leh Isua’n thlarau lam thilte pêknaah entawn tûr an lo siam?
• Engtin nge chatuan daih ṭhiante kan siam ang?
• Kan rawngbâwlna tihlawhtling lehzual tûrin eng kawngte nge kan zawh theih?
• Englo pêkna avânga hlimnaah engtin nge kohhran mi zawng zawngte an tel?
[Phêk 13-naa milemte]
Naupangte’n zirtîrna ṭha taka an zawm chuan, nu leh pate chuan hlimna leh lungawina nasa tak an tawng ṭhîn
[Phêk 15-naa milem]
Zirtîr siamnaah ṭhian tak tak kan siam thei
[Phêk 16-naa milem]
Kan lo upatin Jehova’n min enkawl
[Phêk 17-naa milemte]
Kawng hotê, pawimawh êm êm sia englo pêkna aṭangin hlimna kan hmu