I Hmasâwnzia Lantîr Rawh
“Mi zawng zawng hnênah i sâwtna a lan theih nân chûng thilahte chuan taima la, chûngah chuan inhmang zo rawh.”—1 TIMOTHEA 4:15.
1. Thei rah chu a hmin a, a ei theih tawh a ni tih engtin nge i hriat theih?
ITHEI ngainat zâwng tak—theitê emaw, pear emaw, theihai emaw, a nih loh leh thei dangte han mitthla teh. A hmin hun leh a ei theih hun tûr i sawi thei em? I thei ngei ang. A rim te, a rawng te, leh i han khawih aṭangte chuan tui ti taka ei hluam hluam a hun tawh tih a hriattîr thei che a ni. I han ei chiah chuan tui ti êm êmin: Tui a ngahzia hi! A thlumzia hi! tiin i sawi chhuak hial mai thei a ni. Lungawina leh hlimna a pe ṭhîn che a ni.
2. Puitlinna hi eng anga lanchhuahtîr nge ni a, mi dang nêna inlaichînnaah eng nghawng nge a neih?
2 He thiltawn ho tak si, hlimawm êm êm bawk si hian nuna thiltawn dangte nên pawh inmilna a nei a ni. Entîr nân, thei hmin ang maiin, thlarau lama puitlinna pawh kawng chi hrang hrangin a lang a ni. Mi puitlinna chu thil chhût thiamna te, ngaihtuahna te, finna te, leh thil dang dang te aṭangin kan hre thei a ni. (Joba 32:7-9) An rilru put hmang leh thiltiha chutiang nihna lanchhuahtîrtute nêna inkawm leh thawhho chu a hlimawm tak zet a ni.—Thufingte 13:20.
3. Isua’n a hun laia mite chungchâng a sawi dân hian puitlinna chungchâng eng nge min hrilh?
3 Kawng leh lamah chuan mi chu taksa lamah chuan a puitling mai thei a; mahse, a ṭawng dân leh a thiltih dânte chuan rilru leh thlarau lama a puitlin lohzia a târ lang thei a ni. Entîr nân, a hun laia chhuan suaksual takte chungchâng sawiin Isua chuan: “Johana chu a lo kal a, a eiin a in lo va, ‘Ramhuai a zâwl a nih hi,’ an ti a. Mihring Fapa a lo kal a, a eiin a in a, ‘En teh u, chaw heh mi, uain heh mi . . . saw!’ an ti si a,” tiin a sawi a ni. Chûng mite chu taksa lamah chuan an puitling nâ a, Isua chuan “naupang” ang maiin an khawsa a ti—puitlinna rêng an nei lo. Chuvângin, hetiang hian a sawi belh a: “Finna chu a thiltih aṭangin a dikzia a lang a ni,” tiin.—Matthaia 11:16-19.
4. Eng kawngin nge hmasâwnna leh puitlinna lantîr a nih?
4 Isua thu aṭang hian, miin finna dik—mi puitling hriat hranna—a neih leh neih loh chu a thiltih leh a rah chhuah hian a lantîr a ni tih kan hre thei a ni. He mi chungchânga tirhkoh Paula’n Timothea a fuihna hi chhinchhiah ang che. Timothea ûm tûr thilte a hrilh hnuah Paula chuan: “Mi zawng zawng hnêna i sâwtna a lan theih nân chûng thilah chuan taima la, chûngah chuan inhmang zo rawh,” tiin a sawi a ni. (1 Timothea 4:15) Ni e, puitlinna lama Kristian hmasâwnna chu ‘lantîr,’ theih, a nih loh leh chiang taka hmuh theih a ni. Kristian puitlinna chu ni chhuak êng tak ang a ni a, hmuh theih loh emaw, thuhrûk bo theih emaw a ni lo. (Matthaia 5:14-16) Chuvângin, hmasâwnna leh puitlinna lantîr dân kawng hnih kan ngaihtuahho dâwn a ni. Chûngte chu: (1) hriatna, hriatthiamna, leh finna kawnga ṭhanlen; (2) thlarau rahte lantîr te a ni.
Rinna leh Hriatna Kawnga Thukhat Vuain
5. Puitlinna hi engtia hrilhfiah theih nge ni?
5 Dictionary tam zâwk chuan puitlinna chu ṭhankinna, kumtlinna tiin a hrilhfiah a. Atîra kan sawi tâk angin thei pawh khân a ṭhan dân tûr zawng zawnga ṭhan a, a hmêl lan dân te, a rawng te, a rim te, leh a tuina te chuan a nihna tûr ang tak a thlen hunah chauh, puitling, a nih loh leh a hmin a ni. Chuvângin, puitlinna chu ṭhat chungchuanna, famkimna, ṭhat famkimna tih nên hial pawh a awmzia a thuhmun a ni.—Isaia 18:5; Matthaia 5:5:45-48; Jakoba 1:4.
6, 7. (a) Jehova chuan amah betu zawng zawngte thlarau lama hma an sâwn duhzia engin nge lantîr? (b) Thalarau lama puitlinna leh eng thil nge inkungkaih?
6 Pathian Jehova chuan amah betu zawng zawngte chu thlarau lama hma an sâwn a duh êm êm a. Chuvângin, Kristian kohhran chhûngah ruahmanna ropui tak a siam rêng a ni. Ephesi khuaa Kristiante hnênah heti hian tirhkoh Paula chuan a ziak: “Rinna leh Pathian Fapa hriatna kawngah chuan thu khat vua a, puitling a, Krista famkimna lenzia tluka kan zaa kan lo awm hma loh zawng, rawngbâwl hna thawk tûra mi thianghlimte tihfamkim nân Krista taksa siam ṭha tûrin ṭhenkhatte chu tirhkoh atân te, ṭhenkhatte chu zâwlnei atân te, ṭhenkhatte chu chanchin ṭha hriltu atân te, ṭhenkhatte chu kohhran châwmtu leh zirtîrtu atân te a pe a, chutichuan dik lohna ngamthlêmna angin, fing vervêka mihring bum chawpin, zirtîrna thli tinrênga lehlam lehlama vawrh leh len len naupang kan ni tawh lo vang,” tiin.—Ephesi 4:11-14.
7 Hêng chângahte hian Paula chuan Pathianin kohhrana chutiang thlarau lam ruahmanna hnianghnâr taka a pêk chhan chu mi zawng zawng chu ‘rinna leh hriatna kawnga thukhat vua an nih theih nân,’ an ‘puitlin’ theih nân, leh ‘Krista tluka an awm’ theih nân a ni tih a sawifiah bawk a ni. Chutiang a nih chauhvin thlarau lam nausên anga ngaih dân dik lo leh zirtîrna dik lo vawrh leh len lenin kan awm lo vang. Chuvângin, Kristian puitlinna lama hmasâwnna leh ‘rinna leh Pathian Fapa hriatna kawnga thu khat vuak’ inkungkaihzia kan hmu ta a ni. Paula fuihna thuah hian kan zawm tûr thu pawimawh tam tak a awm a ni.
8. Rinna leh hriatnaa ‘thu khat vaw’ tûrin eng nge tih ngai?
8 A hmasa berin, “thu khat vua a” awm a ngaih avângin, Kristian puitling chu rinna leh hriatna kaihhnawih thil a nih phawt chuan a rinpuite nên a inthurualin, a inrem tûr a ni. Bible hriatthiamna chungchângah pawh mahni ngaih dân chauh dika ngaiin a ṭang tlat ngai lo. Jehova’n a Fapa, Isua Krista leh, “bawi rinawm, fing tak” kal tlanga a târ lan thutakah chuan rinna pumhlûm a nei zâwk a ni. “A hun apianga” thlarau lam chaw sem chhuah—Kristian thu leh hla chhuah te, inkhâwm te, assembly te, leh inkhâwmpuite kal tlanga tih chhuah—chu ei zat zatin, kan Kristianpuite nên rinna leh hriatnaah chuan ‘thu khat vuain’ kan awm tih kan chiang thei a ni.—Matthaia 24:45.
9. Ephesi mite hnêna Paula lehkha thawna a thu hman “rinna” tih awmzia kha sawi fiah rawh.
9 A pahnihnaah chuan, “rinna” tih hian Kristian mi mal thurin nghet a kâwk lo va, kan thurin zawng zawng leh chu mi thurin, ‘zauzia te, seizia te, thûkzia te’ chu a kâwk zâwk a ni. (Ephesi 3:18; 4:5; Kolossa 1:23; 2:7) Kristianin “rinna” engemaw lai chauh a pawm chuan engtin nge a rinpuite nên chuan thu khat an vuak theih tehlul ang ni? Chu mi awmzia chu Bible zirtîrna thu bulte hriatnaah mai emaw, thutak hriatna chiang lo leh kim lo emawah kan duhtâwk mai tûr tihna a ni lova, chutih ahnêkin, a Thu rilte kher tûra Jehova’n a inawpna pâwl kal tlanga châwmna a pêk zawng zawngte hi kan hmang ṭangkai vek zâwk tûr tihna a ni. Pathian duhzâwng leh thil tum hriatna famkim leh hriatna dik chu nei tûrin theihtâwp kan chhuah tûr a ni. Hei hian Bible leh Bible ṭanchhana thu leh hla chhuahte chhiar leh zir nâna hun neih te, Pathian ṭanpuina leh kaihhruaina dîla ṭawngṭai te, Kristian inkhâwmnaa tel zat zat te, Lalram thuhrilna leh zirtîr siamnaa tel ziahte a huam a ni.—Thufingte 2:1-5.
10. Ephesi 4:11-13-a mi “kan zaa kan lo awm hma loh zawng,” tih thu hian eng pawimawhna nge a neih?
10 A pathumnaah Paula chuan thil tum pathum inkawpte sawi nân “kan zaa kan lo awm hma loh zawng,” tih thu mal a hmang a. “Kan zaa” tih thu hi Bible handbook pakhat chuan, “a vai ni lo, mi mal tin, a hrang ṭheuh ni si, mi tin tihna ni bawk si,” tiin a hrilhfiah a ni. Thu danga sawi chuan, khawvêl puma unau zawng zawngte ruala Kristian puitlinna ûm zêl tûrin theih tâwp kan chhuah ṭheuh tûr a ni. The Interpreter’s Bible chuan tihian a sawi: “Taksa pum pui hrisêl taka a ṭhangho zêl a nih chauh loh chuan taksa pêng pakhat mai ṭhan a kin thei lo ang chiah hian, thlarau lama puitlinna pawh mi mala a hranga neih theih a ni lo,” tiin a sawi. Paula chuan Ephesi khua Kristiante chu rinna pawimawhzia hre thiam tûr chuan “mi thianghlim zawng zawngte nên” ṭan an la tûr a ni tih a hrilhnawn a ni.—Ephesi 3:14-19.
11. (a) Thlarau lama hmasâwnna siam tih hian eng nge a kawh loh? (b) Chutianga hma sâwn tûr chuan eng nge kan tih ngai?
11 Paula thusawi aṭang hian thlarau lama hmasâwnna chu hriatna leh zir tam ringawt a ni lo tih a chiang hle a. A finna hmanga mi dangte hneh tum mi chu Kristian mi puitling tak a ni lo. Bible chuan: “Mi felte kawng erawh chu chhûn ên lai tak pawha êng zual deuh deuh, êng fîm tak ang a ni,” a ti zâwk a ni. (Thufingte 4:18) Ni e, “êng zual deuh deuh” chu mi tuemaw ni lovin, a “kawng” a ni zâwk. Jehova’n a mite tâna a pêk Pathian Thu hriatthiamna êng zual zêl hi kan ûm zêl chuan, thlarau lama hmasâwnna kan nei dâwn a ni. Hetiang hian, ûm zêl tih hi hma sâwn zêl tihna a ni a, chu chu mi tinin kan ti thei ṭheuh a ni.—Sâm 97:11; 119:105.
“Thlarau Rah” Lantîr Rawh
12. Tharau lama hmasâwnna kan zawnnaah engvângin nge thlarau rah târ lan a pawimawh?
12 ‘Rinna leh hriatna kawnga thu kat vuak’ a pawimawh ang chiahin kan nun kawng engkima Pathian thlarau rah lantîr pawh a pawimawh êm êm bawk a ni. Engvâng nge? A chhan chu kan hriat tawh angin puitlinna chu thup bo mai theih a ni lo va, mi dangte tichak leh hlâwkna petu fiah taka hmuh theih nungchang a nih vâng a ni. Thlarau lama hmasâwn tum chu chêtze thar ṭha tak lantîr tumna mai a ni lo. Chutiang ni lovin, Pathian thlarau kaihhruaina zui a, thlarau lama kan ṭhan zêl chuan, kan rilru put hmang leh thiltihah inthlâkdanglamna nasa tak a lo awm mai zâwk dâwn a ni. Tirhkoh Paula chuan: “Thlarauvah awm rawh u, tichuan tisa châkna chu in zâwm dâwn lo nia,” tiin min hrilh a ni.—Galatia 5:16.
13. Eng inthlâkthlengna nge hmasâwnna lantîrtu chiang tak a nih?
13 Paula chuan ‘tisa thiltih,’ tam tak leh “lang fiah” takte a sawi leh a. Miin Pathian thil phûtte hlutna a hriat hma chuan, khawvêl dân anga nungin, Paula sawi ṭhenkhat: “Inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te, zu ruihna te, zu hmun hlimna te, chutiangte,” chu an nun dân pawh a ni mai thei. (Galatia 5:19-21) Mahse, miin thlarau lama hma a sâwn chuan, zawi zawiin hêng ‘tisa thiltih,’ duhawm lo tak takte hi hnehin, “thlarau rah” hian a luahlân ta a ni. He pawn lam aṭanga hmuh theih inthlâkthlengna hi miin Kristian puitlin lam a panzia lantîrna chiang tak a ni.—Galatia 5:22.
14. Hêng thil pahnih “tisa thiltihte” tih leh “thlarau rah” tih hi sawifiah rawh.
14 Hêng thu pahnih “tisa thiltihte” leh “thlarau rah” hi kan chhinchhiah tûr a ni. “Thiltihte” hi mi thiltih rah chhuah a ni a. Thu danga sawi chuan, tisa thiltihte tia Paula târ chhuahte chu sual tisa thiltih emaw, mihring ṭhat famkim loh vânga lo awm emaw a ni. (Rom 1:24, 28; 7:21-25) Kawng leh lamah chuan, “thlarau rah” chuan a rah târ lante chu, nungchang siam ṭhatna emaw, mize tihṭhatna emaw avânga lo awm ni lovin, mi chunga Pathian thlarau hnathawh avânga lo awm a ni zâwk a ni. Ṭha taka enkawl thingkungin rah ṭha a chhuah ang chiah hian, nuna thlarau thianghlimin hna ṭha taka a thawh chuan chu mi chuan thlarau rah chu a lantîr mai dâwn a ni.—Sâm 1:1-3.
15. Engvângin nge “thlarau rah” zawng zawnga rilru pêk a pawimawh?
15 Thu dang ngaihtuah leh tûr chu Paula’n mize duhawm a sawi zawng zawngte sawi nâna a thu hman “rah” tih hi a ni. Thlarau chuan kan duhzâwng apiang thlan theih nân rah chi hrang hrang a chhuah lo va. Paula mize sawi zawng zawngte—hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te—chu a pawimawh dân a inang vek a, a vaia ṭanho chuahvin Kristian mize thar a siam thei a ni. (Ephesi 4:24; Kolossa 3:10) Chuvângin, hêng miziate zînga a engemaw ber hi kan mizia leh ngaihtuah dân nêna a inmil avânga a kan nunah a langsâr hle thei; mahse, Paula sawi zawng zawngah hian kan rilru kan pêk vek chu a pawimawh a ni. Chutianga kan tih chuan, kan nunah Krista neih ang nungchang kan lantîr lehzual thei ang.—1 Petera 2:12, 21.
16. Kristian puitling ni tûra ṭan kan lâknaah kan tum ber chu eng nge ni a, chu chu engtia thlen theih nge ni?
16 Paula thusawi aṭanga kan zir tûr pawimawh tak mai chu hei hi a ni—Kristian puitling ni tûra ṭan kan lâknaah hian, kan tum ber chu hriatna leh thiamna nasa tak neih a ni lo va, mize siam chawp neih tum a ni hek lo tih hi. Kan nuna Pathian thlarau luantîr reng chu kan tum ber a ni zâwk. Kan ngaihtuahna leh thiltihnaahte Pathian thlarau kan inkaihhruaitîr chhûng chu, thlarau lama kan puitlin chen tûr a ni. Chu chu engtin nge kan thlen theih ang? Kan rilru leh thinlung chu Pathian thlarauvin a thunun theih nân kan hawng tûr a ni. Hei hian taima taka Kristian inkhâwmnaa kan tel a, chhânna kan pêk zat zat pawh a huam a ni. Tin, Pathian Thu kan zîr zat zatin, chûngte chu kan chhût ngun bawk tûr a ni a; mi dangte kan dâwrna leh duh thlanna leh thutlûkna kan siam chungchângah a thubulte chu kan inkaihhruaitîr tûr a ni. Chutianga kan tih chuan hma kan sâwnna chu a lang chiang ngei ang.
Pathian Chawimawi nân Hmasâwn Rawh
17. Hmasâwnna leh kan Pa vâna mi chawimawina chu engtin nge a inzawm?
17 A pawimawh berah chuan, hma kan sâwnzia lantîrna chuan keimahni ni lo, thlarau lama puitlinna min neihtîr theitu kan Pa vâna mi, Jehova chu a fakin, a chawimawi a ni. Tihhlum a nih hma zânah Isua chuan: “He mi avângin ka Pa chu chawimawiin a awm ṭhîn, tam taka in rah hian; chutichuan ka zirtîrte in ni ang,” tiin a zirtîrte a hrilh a ni. (Johana 15:8) Thlarau rah leh an rawngbâwlnaa Lalram rah hmangin, zirtîrte chuan Jehova an chawimawi a ni.—Tirhkohte 11:4, 18; 13:48.
18. (a) Tûn laiah eng buhsengna hlimawm tak nge thleng? (b) He buhsengna hian eng chona nge a thlen?
18 Tûn laiah, Jehova malsâwmna chu khawvêl pum pui buhseng hnaa tel a mite’n an dawng a. Tûnah chuan kum engemaw zât chu kum tinin mi 300,000 vêl chuan Jehova hnênah Baptisma changin an inpumpêkzia an târ lang a. Chu chuan min tihlimin Jehova thinlung pawh a tilâwm ngei a ni. (Thufingte 27:11) Nimahsela, hêngte hi Jehova tân hlimna leh fakna bul ni reng thei tûr chuan, chûng mi thar zawng zawngte chu ‘amah [Kristaa] zung kai leh rem chhoh deuh deuhva awmin, an zirtîr anga an rinnaa nghet taka an awm’ a ngai a ni. (Kolossa 2:6, 7) Hei hian Pathian mite tân chuan chona thuah hnih a awmtîr a. Kawng khatah chuan, baptisma chang thar i nih chuan, ‘mi zawng zawng hnêna i hmasâwnzia a lan theih nâna’ chona chu i pawm ang em? Kawng dangah chuan, thutaka engemaw chen i awm tawh a nih chuan, mi tharte thlarau lam ṭhatna tûra enkawl mawhphurhna chu i la ang em? A enga pawh chu ni se, puitlin lam pan zêl a ṭûl tih chu a chiang a ni.—Philippi 3:16; Hebrai 6:1.
19. Hma i sâwnzia i lantîr chuan eng chanvo hlu leh malsâwmna nge i neih theih?
19 Hmasâwnzia lantîr tûra thawk rim zawng zawngte chu malsâwmna ropui takin a nghâk a ni. Paula’n Timothea chu hmasâwn tûra a fuih hnuah: “Nangmah leh i zirtîrnaah chuan fîmkhur la; chûng thil tiin awm reng rawh; chutiang tiin nangmah leh i thu ngaithlatute chu i chhandam dâwn zuk nia,” tiin a fuih a ni. (1 Timothea 4:16) Taima taka i hmasâwnzia lantîrna hmangin, Pathian hming chawimawina leh a malsâwmna chan theihna chanvo hlu tak chu i chang ve thei a ni. (w01 8/1)
I Hre Chhuak Thei Em?
• Eng kawngin nge thlarau lama puitlinna chu lantîr theih a nih?
• Eng ang hriatna leh hriatthiamnain nge puitlinna tilang?
• “Thlarau rah” lantîrna chuan engtin nge thlarau lama hmasâwnna a târ lan?
• Puitlin lam kan pan zêl lai hian eng harsatnate nge tawn kan inhuam ang?
[Phêk 13-naa milem]
Hminna, a nih loh leh puitlinna chu chiang takin a hmuh theih
[Phêk 15-naa milem]
Thutak hmasâwn chho zêl chu ûmin, thlarau lamah hma kan sâwn
[Phêk 17-naa milem]
Ṭawngṭaina chuan “thlarau rah” lantîr tûrin min ṭanpui