Khawvêl Hlimawm Tak Neih Theih Dân

“HE kum sângbi pahnih chhûng mai ni lo, mihring chanchin tluan chhuaka mite rilru la ber chu Nazareth mi Isua hi a ni,” tiin Time magazine chuan a sawi a. He leia a awm lai khân, rilru ṭha pu mi tam takte chuan a ropuina mai ni lovin, mi dangte a ngaihtuahna chu chiang takin an hria a ni. Chuvângin, lala siam an tum hial pawh hi thilmak a ni lêm lo. (Johana 6:​10, 14, 15) Amaherawhchu, thuziak hmasaa kan sawi tawh angin, Isua chuan politics-a inhnamhnawih chu a duh lo va ni.

ADUH LOH chhan chu a lo berah pawh thil pawimawh pathumah a innghat a, chûngte chu: Mihringte mahnia ro inrêlna chungchâng a Pa ngaih dân leh, mahnia ro inrêlnaah chuan mihringte inawpna a tel tih a hriatna te; mihring rorêltute theihtâwp chhuahna chu hmuh theih loh thlarau sual thiltithei takte chuan an do reng tih a hriatna te; leh Pathianin leilung awptu tûr vân sawrkâr din a tum tih a hriatna te a ni. Hêng thu pawimawh pathumte kan bihchian chuan, minringte’n he khawvêl hi hmun ṭha zâwka siam an tumna a hlawhchham chhan chu kan hmu ang a, a hlawhtlin theih dân pawh kan hmu bawk ang.

Mihringte Chu Anmahniin An Inawp Thei Em?

Pathianin mihringte a siam khân, ramsate chunga thuneihna a pe a. (Genesis 1:26) Mahse, mihringte chu Pathian thuneihna hnuaiah an awm a ni. Mipa leh hmeichhe hmasa berte chuan Pathian laka an intukluhzia chu thing rah pakhat, “a chhia leh a ṭha hriatna thing rah” ei lohna hmangin an nemnghet tûr a ni a. (Genesis 2:17) Vânduaithlâk takin, Adama leh Evi te chuan zalên taka duhthlan theihna an neih chu an hmang sual a, Pathian thu an zâwm ta lo va. Ei loh tûra khap thing rah ei chu rûkrûkna mai a ni lo. Pathian thuneihna kalha helna a ni. The New Jerusalem Bible-a Genesis 2:​17-na footnote sawi dânin, Adama leh Evi chuan “chhia leh ṭha thliarhranna kawnga an zalen pumhlûm nân, thil siam an nihna dinhmun chu an pawm duh lo . . . Sual hmasa ber an tih chu Pathian lal chungnunna dona a ni,” a ti.

Thil pawimawh tak a inhnamhnawih avângin, Pathian chuan Adama leh Evi, leh an thlahte chu an duhzâwng nun kawng thlan chu a phal a, chhia leh ṭha tehna tûr tehkhâwng chu an insiam ta a ni. (Sâm 147:​19, 20; Rom 2:14) Chuta ṭang chuan, mihringte mahni thua ro inrêlna chu a inṭan ta a. A nih leh chu chu a hlawhtling em? Kum sâng engemaw zât kal tawh kan thlîr lêt hian, a hlawhtling lo kan ti thei! Thuhriltu 8:9 chuan: “Mi, mi dang chungah pawi khawpin a intilal ṭhîn,” a ti. He mihring inawpna chanchin lungchhiatthlâk tak hian Jeremia 10:23 thu: “Aw LALPA, mihring awm dân chu, mahni thu mai a ni lo tih ka hre ta: tungchhova kal mihringah hian, a pheikhai hruai tûr a awm lo,” tih a dikzia hi a nemnghet a. Mihringte hian anmahni Siamtu tel lovin a mihringpuite chu hlawhtling taka awp theihna a nei lo tih thil thlengte chuan a finfiah tawh a ni.

Isua’n chu chu a pawm thlap a. Pathian laka intihzalen chu a tân chuan thil tenawm a ni. Ani chuan: ‘Mahni thuin thil engmah ka ti lo va . . . Pathian lâwmzâwng apiang ka ti fo,’ a ti. (Johana 4:34; 8:​28, 29) Chuvângin, Pathian thupêk tel lova mihringte hnên aṭanga lalna dawn chu, Isua chuan a ngaihin a ngaihtuah chhin eih lo. Chutiang a nih avâng chuan, a mihringpuite ṭanpui a hreh tihna erawh a ni hauh lo thung. Chutih ahnêkin, a hun laia mite chu, an damchhûng leh nakina hlimna ropui ber an neih theih nân theihtâwp chhuahin a ṭanpui zâwk a. A nunna hial pawh mihringte tân a pe a ni. (Matthaia 5:​3-11; 7:​24-27; Johana 3:16) Mahse, Isua chuan Pathianin mihringte chunga a thuneihna a lek hun pawh tiamin, “engkim tân hian hun ruat a awm” tih a hria a. (Thuhriltu 3:1; Matthaia 24:​14, 21, 22, 36-39) Mahse, Eden huanah chuan kan nu leh pa hmasa berte chuan hmuh theih rûl hmanga thusawitu, thlarau thil siam suaksual tak duhzâwng an zâwm tih hre chhuak ang che. Chu chuan politics-a Isua a inhnamhnawih duh loh chhan pahnihnaah min hruai thleng a ni.

A Rûka Khawvêl Awptu

Bible min hrilh dânin, Setana chuan Isua hnênah vawikhat chibai a bûk chuan “khawvêl ram zawng zawng leh a ropuina chu” pêk a tiam a. (Matthaia 4:​8-10) A nihna takah chuan, Isua chu khawvêl rorêltu nihna pêk tiam a ni a; mahse, Diabola nêna inremna hmangin a ni. Chu thlêmnaah chuan Isua chu a tlâwm lo. A nih leh, chu chu thlêmna a ni chiah em? Setana chuan chutiang thil ropui tak pêk tiam theihna chu a nei rêng em ni? Nei e, Isua ngei pawhin Diabola chu “khawvêl lal” a ti a, tirhkoh Paula pawhin ani chu “he khawvêl pathian” a tih avângin.​—Johana 14:30; 2 Korinth 4:4; Ephesi 6:12.

Diabola’n mihringte ṭhatna tûr a ngaihtuah lo tih Isua chuan a hre chiang hle a. Chuvângin, Setana chu “tualthat” leh “dâwt pa leh thudik lo zawng zawng pa” tiin a ko a ni. (Johana 8:​44, The Amplified Bible) Chutiang thlarau sual “thu thua awm” khawvêl chu a hlim tak tak thei ngai lo vang tih chu a chiang hle a ni. (1 Johana 5:19) Mahse, Diabola chuan chu thuneihna chu a chelh reng lo vang. Tûna thlarau thil siam ropui tak ni ta, Isua chuan Setana leh a thuneihna zawng zawng chu a paih bo thuai ang.​—Hebrai 2:14; Thu Puan 20:​1-3.

Amah Setana ngei pawhin khawvêl awptu a nih theih hun chu a ral thuai dâwn tih a hria a. Chuvângin, mihringte chu Nova Tuilêt hun hmaa mite anga siam ṭhat theih rual loh nihtîr a tum ruhin, hmanrua engkim a hmang a ni. (Genesis 6:​1-5; Juda 6) Thu Puan 12:12 chuan: “Lei leh tuifinriat chung a pik e! Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” a ti. Bible hrilh lâwkna thu leh khawvêl thilthlengte chuan he “hun tlêm tê chauh” tâwpna hi kan hnaih hle tawh tih a târ lang a ni. (2 Timothea 3:​1-5) Hrehawm kianna hun a hnai hle tawh a ni.

Hlimna Thlentu Tûr Sawrkâr

Politics-a Isua a inhnamhnawih loh chhan pathumna chu, Pathianin a hun ruat takah leilung awptu tûr vân sawrkâr a rawn din dâwn tih a hriat vâng a ni. Bible chuan chu sawrkâr chu Pathian Ram a ti a, chu chu Isua zirtîrna thupui ber a ni. (Luka 4:43; Thu Puan 11:15) Chu Lalram awpna hnuaiah chauh ‘Pathian duhzâwng vâna an tih anga leiah pawh tih ve’ a nih dâwn avângin, chu Lalram lo thleng tûra dîl tûrin Isua’n a zirtîrte chu a zirtîr a. (Matthaia 6:​9, 10) ‘Chu Lalram chuan leilung zawng zawng a awp dâwn a nih chuan, mihring siam sawrkârte hi engtin nge an awm tâk ang?’ tih i ngaihtuah mai thei.

A chhânna chu Daniela 2:​44-ah a awm: “Chûng lalte [thilte kalhmang tâwpna huna rorêltute] nîah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng [mihring siam] ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin. Engvângin nge Pathian Ramin lei lam inawpnate hi ‘a tihkeh sawm’ ang? A chhan chu, Setana’n Eden huana a lo siam, mahni thua ro inrêlna hmanga Pathian thu zawm lohna awm chhunzawmtîr reng an tum tlat vâng a ni. Chutiang duhna awm nghehtîr tumtute chuan mihringte ṭhatna tûr ber mai kalha thil an tih mai bâkah, anmahni ngei chu Siamtu dotu an innihtîr a ni. (Sâm 2:​6-12; Thu Puan 16:​14, 16) Chuvângin, ‘Pathian awpna hnuaia mi nge kan nih a, a dotu zâwk?’ tih kan inzawh a ngai a ni.

Tu Thuneihna Nge I Thlan Dâwn?

Rorêlna chungchângah mite chuan hriatna dik tak nei chunga thutâwp an siam theih nân, Isua’n a zirtîrte chu he kalhmang tâwp hmaa ‘ram chanchin ṭha hi hnam zawng zawng hriattîrna tûra khawvêl zawng zawnga hrilh’ tûrin a tîr a ni. (Matthaia 24:14) Tûn laiah, tute’n nge Pathian Ram chu khawvêl hmun tina puang? Jehova Thuhretute’n an puang a ni. He chanchinbu Sâpṭawnga chhut hian, “Jehova Lalram Puanchhuahna” tih thu chu a kâwmah hun rei tak a lo târ tawh a ni. Tûn laiah chuan, ram 230 chuanga awm Thuhretu mataduai ruk chuangte chuan Lalram chanchin hriatna dik nei tûrin mite an ṭanpui mêk a ni.a

Lalram Khua leh Tuite Tâna Malsâwmnate

Isua chuan Pathian duhzâwngin thil a ti reng a. Chuvângin, mahni thu thua ro inrêl, leh tûna thil kalhmang awm mêkte politics hmanga tihchangkân emaw, ṭanpui emaw ai chuan, khawvêl buaina tihven theihna awmchhun Pathian Ram hmakhua atâna thawh rim chu a thlang zâwk a ni. A rinawm nghehna avângin, chu Lalram ngeia Lal ni tûr chuan vânah lalthutthlêng ropui tak chu pêk a ni ta a ni. Pathian laka intukluhna lâwmman ropui tak a va ni êm!​—Daniela 7:​13, 14.

Pathian Ram dah hmasak leh Pathian duhzâwng anga intukluhna kawnga Isua entawntu, tûn laia mi maktaduai tam takte pawhin thilthlâwnpêk ropui tak chu an dawng ang​—he leia Pathian Ram khua leh tui nih theihna chanvo hlu tak chu. (Matthaia 6:33) Chu Lalram awpna hnuaiah chuan anni chu chatuana nun beiseina neiin, ṭha famkim ni tûra enkawl chhoh an ni ang. (Thu Puan 21:​3, 4) 1 Johana 2:​17 chuan: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” a ti a. Setana leh a hote paih bo vek an ni ang a, lei pum pui hi mite tikehchhetu hnam inhmangaih bîkna te, sumdâwnna kalhmang sual te, leh sakhaw dik lo te awm tawh lohna paradis-a siam a ni ang; chu mi hmuna kumkhuaa awm reng chu a va nuam dâwn êm!​—Sâm 37:29; 72:16.

A ni, Pathian Ram chu khawvêl hlimawm taka siam theitu a ni tak zet a, chu mi chanchin chu inhmeh takin chanchin ṭha tia koh a ni. Jehova Thuhretute thusawi i la ngaithla lo a nih chuan, an rawn kal leh hunah i ina chanchin ṭha an rawn ken chu engah nge i lo ngaihthlâksak loh vang? (w01 10/15)

[Footnote]

[Phêk 5-naa milemte]

Pathian tel lo chuan mihringin hlawhtling takin ro a rêl thei lo tih thilthlengte chuan a târ lang

[Phêk 5-naa milem]

Setana chuan tûn lai “khawvêl” a awp avângin, Isua chu “khawvêl ram zawng zawng leh a ropuina” chu pêk a tiam thei

[Phêk 7-naa milemte]

Isua chuan Pathian Ram rorêlna hnuaiah chuan, khawvêl chu hmun nuam tak a ni ang tih a zirtîr