Jehova—Ṭhatna Kawnga Entawn Tûr Ṭha Ber
“Sipaihote LALPA hnênah chuan lâwm thu hril rawh u, LALPA chu a ṭha si a.”—JEREMIA 33:11.
1. Engvângin nge Pathian chu a ṭhatna avânga fak tûra chêttîr kan nih?
PATHIAN JEHOVA chu sawisêl bovin a ṭha a. ‘A ṭhatna chu a va nasa êm!’ tiin Zakaria chuan a puangchhuak a ni. (Zakaria 9:17) Pathian ṭhatna chu kan hlimna tûra he lei a buatsaihna engkimah hian a lang a ni. (Genesis 1:31) Pathianin lei leh vân a siam laia dân tam tak a siamte chu kan hre thiam ngai lo vang. (Thuhriltu 3:11; 8:17) Mahse, lei leh vân chungchâng kan hriat chhun tlêm tê hian Pathian chu a ṭhatna avânga fak tûrin min chêttîr a ni.
2. Engtin nge ṭhatna chu i hrilhfiah ang?
2 Ṭhatna chu eng nge ni? Ṭhatna chu nungchang ṭhat lawrna a ni. Mahse, thil ṭha lo zawng zawng aṭanga fihlîmna mai a ni lo. He thlarau rahte zînga mi ṭhatna hi mize pakhat a ni a, thil ṭha leh ṭangkai tihna hmanga târ lan theih a ni. (Galatia 5:22, 23) Mi dangte chunga thil ṭha leh ṭangkai kan tih hian ṭhatna kan lantîr tihna a ni. He khawvêlah hian mi ṭhenkhatin ṭhaa an ngaih pawh chu ṭhenkhat ngaihah chuan a ṭha lo ṭhîn a. Nimahsela, remna leh hlimna chen kan duh chuan, ṭhatna tehkhâwng pakhat kan hmang tûr a ni. Chu tehkhâwng chu tuin nge siam thei ang?
3. Genesis 2:16, 17 hian ṭhatna tehkhâwng chungchâng eng nge a târ lan?
3 Pathian chuan ṭhatna tehkhâwng chu a siam a. Mihring chanchin a inṭan phat aṭang khân, mihring hmasa ber hnêna: “Huana thing tinrêng rahte hi i duh duhin i ei thei e; a chhia leh a ṭha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni,” tia thu petu chu Jehova a ni. (Genesis 2:16, 17) Ni e, mihringte chuan a chhia leh a ṭha an hriat theih nân anmahni Siamtu lam an hawi a ngai a ni.
Phû Loh Ṭhatna Lantîrna
4. Adama a sual tâk avângin Pathianin mihringte tân eng nge a tih?
4 Adama a lo sual a, ṭhatna tehkhâwng siam tûra Pathian dikna neih a lo pawm duh loh tâkah chuan, mihringte neih ṭha famkima chatuana hlim taka nun beiseina chu a lo derthâwng ta a. (Genesis 3:1-6) Nimahsela, sualna leh thihna rochung saa Adama thlahte an lo pian hmain, Pathian chuan Chi Thlah ṭha famkim a lo lan tûr thu chu a hrilh lâwk diam tawh a ni. A nihna takah chuan “rûlpui tar,” Diabol-Setana hnênah Jehova chuan: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” tiin a puang a ni. (Thu Puan 12:9; Genesis 3:15) Sual rochung mihringte chhanchhuah chu Jehova thil tum a ni a. Phû loh ṭhatna lantîrin, Jehova chuan a Fapa duh tak tlanna inthawinaa rinna lantîrtu apiangte tân chhandamna kawng chu a ruahman ta a ni.—Matthaia 20:28; Rom 5:8, 12.
5. Thinlung sual tak rochung mah ila, engvângin nge ṭhatna engemaw chen chu kan lantîr theih?
5 Mahse, Adama sualna avângin, kan zain thinlung sual tak chu kan pianpui ta a. (Genesis 8:21) Nimahsela, vânneihthlâk takin, Jehova chuan ṭhatna engemaw chen chu lantîr thei tûrin min ṭanpui a ni. A thu thianghlim hlu tak aṭanga kan thu zirahte kan awm chhunzawm zêlna chuan ‘chhandamna hmu khawpa min tihfin’ a, ‘hna ṭha tinrêng thawk tûra kim taka min thuam famkim’ bâkah, a mithmuha thil ṭha titûrin min ṭanpui bawk a ni. (2 Timothea 3:14-17) Nimahsela, Pathian Lehkha Thu zirtîrnate hlâwkpui tûr leh ṭhatna lantîr tûr chuan: “[Jehova] nang chu i ṭha a, thil ṭha i ti bawk a; i thuruatte chu mi zirtîr ang che,” tia zaitu fakna hla phuahtu rilru put hmang ang hi kan nei tûr a ni.—Sâm 119:68.
Jehova Ṭhatnain Chawimawi A Hlawh
6. Lal Davida’n Jerusalema thuthlung bâwm a lâk hnua Levia chite hla sakah khân, eng thu nge tel?
6 Hmân lai Israel lal, Lal Davida chuan Pathian ṭhatzia a hria a, A kaihhruaina a zawng a ni. Heti hian a ti: “LALPA chu a ṭhain a dik a ni. Chuvângin mi sualte chu kawng a entîr ang,” tiin. (Sâm 25:8) Israelte hnêna Pathian kaihhruaina pêkah chuan dân pawimawh tak tak sâwm—Thusâwm Pêk—a tel a, chu chu lungphêk pahniha ziak a ni a, thingrem thianghlim, thuthlung bâwm tia kohvah chuan dah ṭhat a ni. Davida’n thuthlung bâwm chu Israel khawpui, Jerusalema a lâk hnuah, Levia chite hla sakah chuan he thu hi a tel a ni: “LALPA hnênah lâwm thu hril rawh u, ani chu a ṭha si a; a ngilneihna pawh kumkhuain a awm dâwn si a,” tih hi. (1 Chronicles 16:34, 37-41) Chûng hlate Levia zai mite hmui aṭanga hriat chu a va ngaihnawm dâwn êm!
7. Thuthlung bâwm Hmun Thianghlim Bera lâk a nih hnu leh, Solomona’n biak in hlanna ṭawngṭaina a neih zawh khân eng thil nge lo thleng?
7 Davida fapa Solomona sak Jehova biak in hlannaah pawh khân, chutiang fakna thute chu chham uar a ni leh a. Thuthlung bâwm chu biak in sak thar Hmun Thianghlim Bera dah a nih hnu khân, Levia chite chuan Jehova fakna hla an sa, “ani chu a ṭha si a, a ngilneihna chu kumkhuain a awm dâwn a ni,” tiin. Chu mi ṭum chuan biak in chu mak tak maiin, ropui taka Jehova awmpuina chhinchhiahna chhûm chuan a khat vek a ni. (2 Chronicles 5:13, 14) Solomona’n a hlanna ṭawngṭaina a neih zawh chuan, “vân aṭangin mei a lo chhuk a, hâlral thilhlan leh inthawinate chu a rawn kângral ta a.” Chu mi an hmuh chuan, “Israela thlahte zawng zawng chuan . . . hmaia lei siin an bawkkhup a, ‘Ani chu a ṭha si a, a ngilneihna chu kumkhuain a awm dâwn a ni’ tiin chibai an bûk a, lâwm thu an sawi a.” (2 Chronicles 7:1-3) Ni 14 chhûng an kût hnu chuan Israela thlahte chu “LALPAN Davida leh Solomona leh a mi Israelte chunga a ṭhatna a lantîr avâng chuan hlim tak leh lâwm takin” an in lamah an ṭîn ta hlawm a ni.—2 Chronicles 7:10.
8, 9. (a) Israelte chuan Jehova ṭhatna chu fak mah se, a tâwpah chuan eng kawng nge an zawh tâk? (b) Jerusalem chungchâng eng nge Jeremia kal tlanga hrilh lâwk a nih a, chu chu engtin nge a thlen famkim?
8 Mahse, lungchhiat thlâk takin, Israel mite chu Pathian an fakna hlate mil chuan an nung chhunzawm lo va. Hun a lo vei chuan, Juda mite chuan ‘Jehova chu an kâ leh an hmui chauhvin an chawimawi’ ta a. (Isaia 29:13) Ṭhatna lama Pathian tehkhâwngte mila nung lo vin, thil ṭha lo an chîng ṭan ta zâwk a. An thil tih ṭha lo chu engte nge ni? Milem biakna te, nungchang bawlhhlawhna te, rethei hnehchhiahna te, leh sual lian tak tak dangte a ni. Chuvângin, B.C.E. 607-ah chuan Jerusalem chu tihchhiat a ni a, Juda rama chêngte chu salah hruai an ni ta a ni.
9 Chutiang chuan Pathianin a mite chu a zilh a. Nimahsela, zâwlnei Jeremia hmangin, ani chuan: “Sipaihote LALPA hnênah chuan lâwm thu hril rawh u, LALPA chu a ṭha si a: a ngilneihna kumkhuain a awm dâwn si!” tih thâwm chu Jerusalemah hriat a ni leh dâwn tih a sawi lâwk a ni. (Jeremia 33:10, 11) Chutiang chiah chuan a lo thleng ta bawk a ni. Kum 70 chhûng ram tihṭiau a nih hnuah, B.C.E. 537-ah chuan Juda la bângte chu Jerusalemah chuan an kîr leh ta a. (Jeremia 25:11; Daniela 9:1, 2) Anni chuan Moria Tlâng biak in bulah chuan maichâm an siam a, chutah chuan inthawina an hlân ṭan leh ta a ni. Biak in lungphûm chu an kîr leh hnu a kum hnihnaah an phum ṭan a. Chu chu hun hlimawm a va ni êm! Ezra chuan heti hian a sawi: “Tin, a satuten LALPA in lungphûm an han rem chuan puithiamte chu an thuam inbela, tawtawrâwt kengin Levia chi Asapha fapate chu Israel lal Davida tih dân ruat anga LALPA fak tûrin an dintîr a. ‘Ani chu a ṭha si a, a ngilneihna chu Israel mite chungah a awm kumkhua dâwn a ni,’ tiin LALPA fak leh a hnêna lâwm thu sawiin hlain an inchhâwn a,” tiin.—Ezra 3:1-11.
10. Eng thu pawimawh takin nge Sâm 118-na hi a inṭan a, chu mi thu vêka a tâwp?
10 Chutiang bawka Jehova ṭhatna fakna chu fakna hla tam takah a lang a. Chûng zînga pakhat chu Sâm 118-na, Kalhlen Kût zawh nâna Israel chhûngkuate sak ṭhin hi a ni. Chu fakna hla chu: “Aw, LALPA hnênah lâwm thu hril rawh u; ani chu a ṭha si a: a ngilneihna pawh kumkhuain a awm dâwn si a,” tih thua inṭanin, chu mi thu vêka tihtâwp a ni. (Sâm 118:1, 29) Hei hi Isua Krista’n C.E. 33-a a thih hma zâna a tirhkoh rinawmte nêna fakna hla a sak hnuhnung ber ni âwm tak a ni.—Matthaia 26:30.
“I Ropuina Chu Khawngaih Takin Mi Han Entîr Teh”
11, 12. Mosia’n Pathian ropuina hlimthlâ a hmuh khân, eng thu puanchhuah nge a hriat?
11 Jehova ṭhatna leh ngilneihna inlaichîn dân chu Ezra hun hma kum zabi engemaw zâtah a lo lang ṭan tawh a. Israel fate’n thlalêra rangkachak bâwng no an biak hnu, leh thil sual titute tihhlum an nih hnu rei vak lovah chuan, Mosia chuan Jehova chu: “I ropuina chu khawngaih takin mi han entîr teh,” tiin a ngên a. Mosia’n a hmêl a hmuh chuan a nung reng thei dâwn lo tih a hriat avângin Jehova chuan: “Ka ṭhatna zawng zawng chu i hmaah ka lantîr ang,” tiin a hrilh ta zâwk a ni.—Exodus 33:13-20.
12 A tûkah chuan, Sinai Tlângah Jehova chuan a ṭhatna chu Mosia hmaah a lantîr ta a. Chutah chuan Mosia chuan Pathian ropuina hlimthlâ chu a hmu a; tin, “LALPA chu, LALPA chu, Pathian lainatnaa khat, mi khawngaih thei tak, thin nel tak, ngilneihna leh thu tak ngah, mi sâng tam tak chunga khawngaihna [“ngilneihna,” NW] lantîr ṭhîn, khawlohna te, bawhchhiatna te, suahsualna te ngaidam ṭhîn; thiam lova ruatte chhuah mai ngai lo; pate khawlohna avânga fate, fate fa lehte, chhuan thumna leh chhuan lina thleng pawha hrem ṭhîn chu,” tih thu puanchhuah pawh a hre bawk a ni. (Exodus 34:6, 7) Hêng thute hian Jehova ṭhatna chu a ngilneihna leh a mize dangte nên pawh a inkungkaih tlat a ni tih a târ lang a ni. Hêng thilte ngaihtuahna hian ṭhatna lantîr tûrin min ṭanpui ang. Tûnah chuan, he Pathian ṭhatna puanchhuahna ropui tak zînga vawihnih lai sawinawn mize pakhat hi ngaihtuah hmasa ila.
“Pathian . . . Ngilneihna . . . Ngah”
13. Pathian ṭhatna puanchhuahnaah, eng mizia nge vawihnih sawi nawn ni a, engvângin nge chu chu a inhmeh?
13 “LALPA chu, Pathian . . . ngilneihna . . . ngah, mi sâng tam tak chunga khawngaihna [“ngilneihna,” NW] lantîr ṭhîn,” a ni. He Hebrai thumal “ngilneihna” tia lehlin hi “hmangaihna rinawm” tihna pawh a ni. Hei hi Mosia hnêna Pathian thu puanchhuahnaa mizia lang nawn awmchhun a ni. Jehova mize lâr ber chu hmangaihna a nih avângin, a va inhmeh êm! (1 Johana 4:8) Jehova fakna hla châng hriat lâr tak: “Ani chu a ṭha si a, a ngilneihna chu kumkhuain a awm dâwn si a,” tih thu chuan chu hmangaihna mizia chu a sawi uar hle a ni.
14. Tute’n nge Pathian ṭhatna leh ngilneihna dawng bîk?
14 Jehova ṭhatna a lanna pakhat chu “ngilneihna . . . ngah” a nihna chu a ni. Hei hi a chhiahhlawh rinawm inpumpêkte a ngaihsak dânah hian a lang chiang êm êm a ni. (1 Petera 5:6, 7) Jehova Thuhretute’n an hriat chian angin, ani chuan amah hmangaihtute leh a rawng bâwltute chungah chuan ‘khawngaihna a lantîr ṭhîn’ a ni. (Exodus 20:6) Tisa lam Israel hnam chuan a Fapa an hnâwl avângin, Jehova ngilneihna, a nih loh leh hmangaihna rinawm chu an chân ta a. Mahse, hnam tina Kristian rinawmte chunga Pathian ṭhatna leh hmangaihna rinawm chuan chatuan a daih ang.—Johana 3:36.
Jehovah—Lainatnaa Khat, Mi Khawngaih Thei Tak
15. (a) Sinai Tlânga Mosia hriat thu puanchhuah chu eng thuin nge a inṭan? (b) Khawngaihna hian eng nge a huam tel?
15 Sinai tlânga Mosia hriat thu puanchhuah chu: “LALPA chu, LALPA chu, Pathian lainatnaa khat, mi khawngaih thei tak,” tih thuin a inṭan a. Hebrai thumal “khawngaihna” tiha lehlin hian “kawchhûng” tihna pawh a kâwk thei a; chu chu “chhûl” tihna nên pawh a inhnaih hle a ni. Tichuan, khawngaihna tihah chuan, mihring chhûngril aṭanga veina dik tak a tel tihna a ni. Mahse, khawngaihna chu tuarpuina mai a ni lo. Chu chuan mi dangte hrehawm tawrhna chhâwk tûrin thil engemaw tal min tihtîr tûr a ni. Entîr nân, Kristian upa hmangaihna neite chuan an rinpuite chunga khawngaihna lantîr a ṭûlzia an hria a, a ṭûl hunah chuan ‘lâwm takin khawngaihna an lantîr’ ṭhîn a ni.—Rom 12:8; Jakoba 2:13; Juda 22, 23.
16. Engvângin nge Jehova chu lainatnaa khat a ni kan tih theih?
16 Pathian ṭhatna chu mi a lainatnaah a lang bawk a. Mi lainat thei chu, mi dangte tuarpui theitu leh a bîk taka mi hnuaihnungte hnêna khawngaihna lantîr theitu hi a ni. Jehova chu a chhiahhlawh rinawmte a dâwrnaa lainatna lantîrna kawngah entawn tûr ṭha ber a ni a. Entîr nân, Pathian chuan zâwlnei upa tawh tak Daniela chu a vântirhkoh hmangin lainat takin a tichak a; tin, a vântirhkoh hmang vêkin nula thianghlim Mari chu Isua a hrin tûr thu a hriattîr a ni. (Daniela 10:10; Luka 1:26-38) Jehova mite kan nih angin, Bible hmanga lainat taka min hîpna chungah kan lâwm êm êm a ni. He a ṭhatna târ lan avâng hian amah chu kan fak a, mi dangte nêna kan indâwrnaah lainatna lantîr kan tum a ni. Thlarau lama tlinna neite’n ‘thuhnuairawlh taka’ an rinpuite an zilh hunah chuan, lainat tak leh nunnêm taka zilh an tum ṭhîn.—Galatia 6:1.
Pathian Thin Nel Tak
17. Jehova a “thin nel” avângin engvângin nge kan lâwm ang?
17 Jehova chu “Pathian . . . thin nel tak,” a ni. Hêng thute hian Jehova ṭhatna dang a sawi uar leh a. Jehova chuan dawhthei takin kan tlin lohnate chu a dawh hrâm hrâm a, kan chak lohna nasa takte hneh theih nân leh thlarau lama kan intihchak nân hun min pe a ni. (Hebrai 5:12–6:3; Jakoba 5:14, 15) Pathian dawhtheihna chuan amah la be rih lote tân pawh hlâwkna a thlen a ni; Lalram thuchah chhâng lêt a, inlamlêtna hun an la neih avangin. (Rom 2:4) Jehova chu dawhthei hle mah se, a ṭhatna chuan a châng chuan a thinrimna târ lang tûrin a chêtîr ṭhîn; Israelte’n Sinai Tlânga rangkachak bâwng no an biak ṭuma a lantîr ang khân. Nakin lawka Setana kalhmang suaksual tak a tihtâwp hunah chuan Pathian thinurna chu nasa lehzuala leihbuak a ni dâwn a ni.—Ezekiela 38:19, 21-23.
18. Thutak chungchângah Jehova leh hruaitu mihringte danglamna chu eng nge ni?
18 “LALPA chu, Pathian . . . thutak ngah” a ni. Jehova chu he khawvêla hruaitu, thu ropui tak tak tiama, hlen chhuak leh si lote lakah chuan a va danglam tak êm! Anni ang lo takin, Jehova chibai bûktute chuan a thâwk khum Thua a thusawi zawng zawngte chu kan rinchhan thlap thei a ni. Pathian chu thutak ngah a nih avângin, a thutiamte chu kan rinchhan tlat thei a. A ṭhatna avângin, kan Pa, vâna mi chuan thlarau lam thutak dîla kan ṭawngṭaina chu a chhâng lo ngai lo va; achuang aliamin min pe zâwk a ni.—Sâm 43:3; 65:2.
19. Eng ṭhatna ṭha chungchuang nge Jehova’n mi sual inlamlêtte hnênah a lantîr?
19 “LALPA chu, . . . khawlohna te, bawhchhiatna te, suahsualna te ngaidam ṭhîn[tu],” a ni. A ṭhatna avângin, Jehova chuan thil sual ti inlamlêtlehte ngaihdam chu a peih reng a. Hmangaihnaa khat kan Pa, vâna mi hian Isua inthawina zâra sual ngaihdamna a ruahman avâng hian kan lâwm tak zet a ni. (1 Johana 2:1, 2) Tupawh, tlanna chunga rinna lantîr apiangte chuan, a thutiam anga lei thara chatuan nun beiseina neiin, Jehova nêna inlaichînna duhawm tak an neih theih avâng chuan kan lâwm hle a ni. Mihringte chunga ṭhatna a lantîr avânga Jehova chawimawina tûr chhan ṭha chungchuang a va ni êm!—2 Petera 3:13.
20. Pathianin sualna a ngaizam mai mai lo tih fiahna eng nge kan neih?
20 Jehova chu “thiam lova ruatte chhuah mai ngai lo,” a ni. Hei hi a ṭhatna avânga Jehova kan fakna tûr chhan dang dik tak a ni. Engvângin nge? Engti kawng maha sual ngaihzam loh chu ṭhatna lantîrna pêng pawimawh tak a nih avângin. Chu bâkah, “Lalpa Isua . . . a vântirhkoh chak takte nên . . . vân aṭanga a inlâr hunah . . . Pathian hre lo mi leh kan Lalpa Isua chanchin ṭha âwih lo mite” chungah phuba lâk a ni ang. Anni chuan “hrem an tuar ang, Lalpa hnên ata leh a chakna ropuina aṭanga chatuana boralna chu.” (2 Thessalonika 1:6-10) Jehova chibai bûktu, dam khawchhuakte chuan, Pathian thu âwih lo, “ṭha duh hauh lote” tihbuai miah lovin nun chu an chên tak tak thei tawh ang.—2 Timothea 3:1-3.
Jehova Ṭhatna Entawn Rawh
21. Engvângin nge ṭhatna kan lantîr ang?
21 Jehova chu a ṭhatna avânga fak leh a hnêna lâwm thu sawina tûr chhan tam tak kan nei a. A chhiahhlawh kan nih angin, chu mizia chu lantîr ve tûrin theih tâwp kan chhuah tûr a ni dâwn lâwm ni? Ni e, tirhkoh Paula chuan Kristiante hnênah: “Fa duh takte angin Pathian awm dân latute ni rawh u,” tia min fuih avângin. (Ephesi 5:1) Kan Pa, vâna mi chuan ṭhatna chu engtik lai pawhin a lantîr reng a, keini pawhin kan lantîr ve tûr a ni.
22. Thuziak dawt lehah eng nge kan ngaihtuah dâwn?
22 Jehova hnêna kan inpumpêk tak tak chuan, a ṭhatna entawn chu kan châk ngei ang. Mahse, mi sual Adama thlahte kan nih avângin, thil ṭha tih chu har kan ti ṭhîn. Nimahsela, thuziak dawt lehah chuan ṭhatna kan lantîr theih chhan kan hmu ang. Tin, Jehova—ṭhatna kawnga entawn tûr ṭha ber—kan entawn theih dân leh entawn a ngaih chhan chi hrang hrang pawh kan ngaihtuah bawk ang. (w02 1/15)
Engtin Nge I Chhân Ang?
• Ṭhatna chu eng nge ni?
• Eng Pathian Lehkha Thu ṭawngkam hian nge Pathian ṭhatna târ lang?
• Jehova ṭhatna lanchhuahtîrtu ṭhenkhat chu engte nge ni?
• Engvângin nge ṭhatna chungchânga Jehova entawn tûr siam chu kan entawn ang?
[Phêk 21-naa milem]
Mosia chuan Pathian ṭhatna puanchhuahna ropui tak a hria
[Phêk 22-naa milem]
Jehova chuan hmân laia a mite chu fakna hla an chhamchhuahte mila an nun loh avângin a zilh
[Phêk 22-naa milem]
Mi rinawm la bângte chu Jerusalemah an kîr
[Phêk 23-naa milem]
Jehova ṭhatna chu Bible hmanga min hîp dânah a lang