Thinlung Nghet Puin Jehova Rawng Bâwl Reng Rawh
“Ka thinlung hi a nghet a ni, aw Pathian, ka thinlung hi a nghet a ni.”—SAM 57:7.
1. Engvângin nge Davida anga rin tlatna kan neih theih?
JEHOVA chuan a chhiahhlawh inpumpêkte anga Kristianna dik kan vawn ngheh tlat theih nân Kristian rinnaah min tinghet thei a ni. (Rom 14:4) Chuvângin, “Aw Pathian, ka thinlung hi a nghet a ni,” tia zaitu fakna hla phuahtu Davida neih ang rin tlatna kan nei thei a ni. (Sâm 108:1) Kan thinlung hi a ngheh chuan, Pathian laka kan inpumpêkna thutiam hlen tûra chêttîr kan ni dâwn a. Tin, min kaihruai tûr leh chakna min pe tûra amah kan belh chuan, tihchêt rual loh, rinawmna vawngtu anga tumruhna leh rinna kawnga nghet tak, “Lalpa hna ṭhahnemngai taka thawk fo” kan ni thei a ni.—1 Korinth 15:58.
2, 3. 1 Korinth 16:13-a ziak Paula fuihna thu awmzia hi eng nge ni?
2 Hmân lai Korinth khuaa Isua hnungzuite a fuihnaah tirhkoh Paula chuan: “Invêng ula, rinnaah chuan ding nghet ula, intihuai (“mipa angin thawk,” NW) ula, chak takin awm rawh u,” a ti a, hei hi tûn laia Kristiante tân pawh a ni. (1 Korinth 16:13) Greek ṭawng chuan hêng thupêk tinahte hian tûn hun sawina thu mal vek hman a ni a, chuvângin thil tichhunzawm reng tûra fuihna a ni. He fuihna hi eng tihna nge ni?
3 Pathian hnaih chunga Diabola dodâlna hmangin, thlarau lamah kan “invêng” thei a ni. (Jakoba 4:7, 8) Jehova chunga innghahna chuan kan inpumkhatna vawng tlat tûr leh ‘Kristian rinnaa ding nghet tlat’ tûrin min ṭanpui thei a ni. Kan za hian—kan zînga hmeichhe tam takte pawh tiamin—Lalram thupuangtu anga huaisen taka Pathian rawng bâwlin ‘mipa angin kan thawk’ a ni. (Sâm 68:11) A duh zâwng ti tûra chakna kan neih nâna kan Pa vâna mi belh rengna hmangin, ‘chak takin kan awm’ bawk a ni.—Philippi 4:13.
4. Kristian anga baptisma kan chan hmain, eng rahbite nge kan rah?
4 Jehova hnêna kan inpumpêk pumhlûm a, tuia inhnimphûmna hmanga kan lantîr chuan rinna dik chu kan pawm tlat tihna a ni. A nih leh, baptisma kan chan hmain eng rahbite nge kan rah le? A hmasa berin, Pathian Thu hriatna dik kan nei phawt a. (Johana 17:3) Chu chuan rinna min siam a, tûn hmaa thil dik lo kan lo tih tawhte avânga lungngaihna dik lantîra sim tûrin, min chêttîr a ni. (Tirhkohte 3:19; Hebrai 11:6) A dawtah chuan, Pathian duhzâwng mila kan nun zêl theih nân thil chîn ṭha lo ata kan hawikîr a, kan inthlâk danglam a ni. (Rom 12:2; Ephesi 4:23, 24) Chu chu ṭawngṭainaa Jehova hnêna thinlung tak taka inpumpêknain a zui leh a. (Matthaia 16:24; 1 Petera 2:21) Tichuan, chhia leh ṭha hriatna thiang tak dîlin Jehova hnênah kan ṭawngṭai a; tin, a hnêna kan inpumpêkna lantîr nân baptisma kan chang ta a ni. (1 Petera 3:21) Hêng rahbite ngaihtuahna hian kan inpumpêkna thutiam hlen tûra beih reng leh thinlung nghet taka Jehova rawng bâwl reng a ngaihzia hre reng tûrin min ṭanpui ang.
Hriatna Dik Zawng Zêl Rawh
5. Engvângin nge Pathian Lehkha Thu hriatna chu kan neih chhunzawm zêl ang?
5 Pathian hnêna kan inpumpêkna thutiam hlen tûr chuan, rinna tichak thei Pathian Lehkha Thu hriatna kan nei chhunzawm zêl tûr a ni. Pathian thutak kan hriat ṭan tirh lai khân, thlarau lam chaw ei nuam kan tih ṭhin êm kha! (Matthaia 24:45-47) Khâng “chaw” kha a tuihnai a—thlarau lamah min châwm ṭha bawk a ni. Tûnah chuan Jehova chhiahhlawh inpumpêkte anga thinlung nghet tak kan neih reng theih nân, thlarau lam chaw ṭha chu kan ei reng a ngai ta a ni.
6. Engtin nge Bible thutak ngaihhlut tak zetna nei tûra ṭanpui i nih?
6 Pathian Lehkha Thu hriatna neih belh zêl tûr chuan thawh rim a ngai a. Ro phûm rûk zawn anga thawh rim ngai a ni. Mahse, “Pathian hriatna” hmuh chhuah chu a va manhla tak êm! (Thufingte 2:1-6) Lalram thuchhuahtu nêna Bible in zir hmasak ber ṭum chuan, ani chuan Chatuan Nunnaa Hruaitu Hriatna tih lehkhabu chu a hmang mai thei. Bung khat zêl zir zawh nân hun rei tâwk hman a ngai ngei ang a, ṭum khata bung khat in zawh loh châng pawh a awm mai thei bawk. Pathian Lehkha Thu târ lante chhiar leh sawikhâwm chu i hlâwkpui hle a ni. Hriatthiam harsa a awm a nih chuan, a zirpuitu che chuan a hrilhfiah zêl che a. Bible zirpuitu che chu ṭha takin a inpuahchah a, Pathian thlarau dîlin a ṭawngṭai a; tin, thutak ngaihhlut tak zetna thinlung nei tûrin a ṭanpui che a ni.
7. Engin nge mi chu Pathian thutak mi dangte zirtîr tûra tlintîr?
7 Chutianga thawh rim chu a phu a ni, Paula chuan: “Thu zirtîr dawngtu chuan thil ṭha zawng zawng zirtîrtu hnênah pe ve rawh se,” a ti si a. (Galatia 6:6) Heta Greek thuziak hian “thu zirtîr dawngtu” chuan Pathian Thu zirtîrna chu a rilru leh a thinlungah a tuh tih a târ lang a ni. Chutianga zirtîr i nihna chuan mi dangte zirtîr lehchhâwng tûrin a tlintîr che a ni. (Tirhkohte 18:25) I inpumpêkna thutiama rinawm tlat tûr chuan, Pathian Thu zir rengna hmangin i thlarau lam hrisêlna leh nghehna chu i enkawl reng tûr a ni.—1 Timothea 4:13; Tita 1:13, 14; 2:2.
I Simna leh Inthlâk Danglamna Hre Reng Rawh
8. Engtin nge Pathian duhzâwng nungchang chu put theih a nih?
8 Thutak i hriat te, i simna te, Isua tlanna inthawina chunga rinna lantîr avânga Pathian ngaihdamna i dawng tih i inhriatna te’n a chhâwkzângkhai dân che kha i la hre reng em? (Sâm 32:1-5; Rom 5:8; 1 Petera 3:18) Nun suala kîr leh chu i duh hauh lo vang le. (2 Petera 2:20-22) Thil dang zawng zawngte bâkah, Jehova hnêna ṭawngṭai ziahna chuan Pathian duhzâwng nungchang pu tûr te, i inpumpêkna thutiam hlen chuak tûr te, leh rinawm taka Jehova rawng bâwl reng tûrtein a ṭanpui ang che.—2 Petera 3:11, 12.
9. Thil chîn sualte hawisanin, eng kawng nge kan ûm tlat ang?
9 Thil chîn sualte hawisanna hmanga inthlâk danglamin, i thinlung tinghet reng tûrin Jehova ṭanpuina dîl reng ang che. Dik taka sawi chuan, kawngpui dik lovah i kal a; mahse, map rin tlâk tak i râwnna aṭanga kawngpui dik zawh ta ang hi i ni. Tûnah chuan kawng dik ata kal pêng tawh suh. Pathian kaihhruainaah innghat zêlin, nunna kawngah chuan kal tum tlat zâwk rawh.—Isaia 30:20, 21; Matthaia 7:13, 14.
I Inpumpêkna leh Baptisma Channa Theihnghilh Ngai Suh
10. Pathian hnêna kan inpumpêkna chungchângah eng nge kan hriat reng tûr?
10 Chatuana rinawm taka a rawng bâwl tumin, ṭawngṭaiin Jehova hnênah i inpumpêk tawh tih hre reng ang che. (Juda 20, 21) Inpumpêkna chuan thiltum thianghlim engemaw atâna tihhran, a nih loh leh thliar hran tihna a kâwk a ni. (Leviticus 15:31; 22:2) I inpumpêkna chu hun rei lo te chhûng mai atân chauh a ni lo va, mihring hnêna intiamkamna mai lah a ni hek lo. Lei leh Vâna Lal Chungnungber hnêna chatuan atâna inpumpêkna a ni a, chu mi inpumpêkna thutiam hlen chhuak tûr chuan dam chhûnga Pathian tâna rinawm tlat a ngai a ni. Ni e, ‘kan nung emaw, kan thi emaw Jehova ta kan ni.’ (Rom 14:7, 8) Kan hlimna chu a duhzâwng kan tih leh tih lovah leh thinlung nghet taka a rawng kan bâwl zawm leh zawm lovah a innghat a ni.
11. Engvângin nge i baptisma chan leh a awmzia chu i hriat reng ang?
11 Pathian hnênah thinlung tak taka inpumpêkin baptisma i chang tawh tih englai pawhin hre reng ang che. Nangmah ngei chu thutlûkna siamtu i nih avângin, chu chu tihluihna baptisma a ni lo. Tûnah chuan, i dam chhûngin i duhzâwng chu Pathian duhzâwng nêna inmilin hman i tum tlat em? Chhia leh ṭha hriatna ṭha chu Pathian hnênah i dîl a, a hnêna i inpumpêkzia lantîrna baptisma i chang tawh a. I inpumpêkna thutiam hlenna hmangin chu chhia leh ṭha hriatna ṭha chu humhim tlat la; tichuan, Jehova malsâwmna nasa tak chu i dawng ang.—Thufingte 10:22.
I Duhzâwngin Chanvo A Nei
12, 13. Engtin nge kan duhzâwng chu inpumpêkna leh baptisma channa nên a inkungkaih?
12 Inpumpêkna leh baptisma channa chuan khawvêl puma mi nuai tam takte chungah malsâwmna nasa tak a thlen a. Tuia baptisma channa hmanga Pathian hnêna kan inpumpêkna kan lantîr hian, kan nun kawng hlui ata kan thi a; mahse, kan mi mal duh thlan theihna chu kan la nei tho va. A nihna tûr taka zirtîrna dawng ringtute kan nih angin, ṭawngṭaia Pathian hnêna inpumpêka baptisma kan chan khân, kan mi mal duh thlan theihna kan hmang a ni. Inpumpêka baptisma chang thei tûr chuan, Pathian duhzâwng hmuh chhuah a, chu a duhzâwng chu duhrêng vânga kan tih a ngai a ni. (Ephesi 5:17) Chutianga tiin, mahni duhthua thingrem siam kalsan a, baptisma chang a, a Pa vâna mi duhzâwng ti tûra inpumpêk, Isua chu kan entawn a ni.—Sâm 40:7, 8; Johana 6:38-40.
13 “Tuarnate avânga [a Fapa] tihfamkim” chu Pathian Jehova thiltum a ni a. Chuvângin, Isua chuan rinawm taka chûng tuarnate a tawrh chhuah nân duh thlan theihna a neih chu a hman a ngai a ni. Chutianga a tih theih nân, “nasa taka au leh mittui tla chungin ṭawngṭainate leh dîlnate a hlân a, a ṭih dêk ṭhin avângin ngaihthlâkin a awm bawk” a ni. (Hebrai 2:10, 18; 5:7, 8) Chutiang Pathian ṭihna ṭha kan lantîr chuan, “ngaihthlâkin” kan awm ve ngei ang tih kan chiang thei a; tin, Jehova chuan a hnêna inpumpêk Thuhretute angin min nghehtîr ang tih kan ring tlat thei a ni.—Isaia 43:10.
Thinlung Nghet I Nei Reng Thei
14. Engvângin nge nî tinin Bible kan chhiar ang?
14 Thinlung nghet nei renga Pathian hnêna i inpumpêkna thutiam hlen tûrin engin nge ṭanpui ang che? Pathian Thu hriat belh zêl tum ran chungin nî tin Bible chhiar rawh. Hei hi “bawi rinawm, fing tak” min fuih reng thil pakhat a ni. Hêng fuihna hi pêk kan nih chhan chu kan inpumpêkna thutiam hlen chhuah nâna Pathian thutaka kan awm reng a ngaih vâng a ni. Jehova inawpna pâwl hian hre reng chungin zirtîrna dik lote dawh ni sêng, Jehova Thuhretute leh an thuhrilh mi dangte hi Bible chhiar tûrin a fuih hauh lo vang.
15. (a) Thutlûkna siam hunah eng nge ngaihtuah tûr? (b) Engvângin nge ei zawnna hna thawh hi Kristiante hna pawimawh ber a ni lo kan tih theih?
15 Thutlûkna i siam rêng rêngin, Jehova hnêna i inpumpêkna thutiam a nghawng theih dân tûr chu ngaihtuah tel ṭhîn ang che. I thutlûkna siam tûr chu i hnathawhna lam thil a ni mai thei a. I hna thawh chu biakna dik tihhmasâwn nâna hman ṭangkai i tum tlat em? A tlângpuiin hlawhfa ruaitute chuan an hna thawk inpumpêk Kristiante chu innghahna tlâk an niin, hna an thawk ṭha tih an hria a; chutih rual chuan Jehova Thuhretute chu khawvêl lama tumsânnain a tibuai ve lo tih leh sum leh pai hui luh tam theihna dinhmun sâng chan tumin mi dangte an el lo tih an hre bawk a ni. A chhan chu Thuhretute thil tum ber chu hausak te, hmingthan te, mite zahkai te, a nih loh leh thiltihtheihna neih te a nih loh vâng a ni. Pathian hnêna an inpumpêkna thutiam hlentute tâna pawimawh ber chu Pathian duhzâwng tih hi a ni. An mamawh zualpuite phuhrûktu, an eizawnna hna chu, an hna pawimawh ber a ni lo. Tirhkoh Paula angin, an hna pawimawh ber chu Kristian rawngbâwlna a ni. (Tirhkohte 18:3, 4; 2 Thessalonika 3:7, 8; 1 Timothea 5:8) Lalram hmakhua chu i nunah i dah pawimawh ber em?—Matthaia 6:25-33.
16. Ṭûl lo taka lungkhamnain Pathian hnêna kan inpumpêkna thutiam hlen a tihharsat chuan eng nge kan tih theih?
16 Ṭhenkhat chu thutak an hriat hmain lungkhamna chi hrang hrang hnuaiah an tlâwm lek lek a ni thei. Mahse, Lalram beiseina an han neih chuan, an thinlung chu hlimna te, lâwmna te, leh Pathian hmangaihna tein a lo khat ta! Chutih hun lai aṭanga malsâwmna an dawnte ngaihtuah lêtna chuan Jehova hnêna an inpumpêkna thutiam hlen chhuak tûrin a ṭanpui ngei ang. A nih leh, hnimhlîngneiin thlai ṭo chu puitling thei lo tûra a dîp tlat anga tûn lai khawvêl harsatna tlânglâwn tak tak avânga ṭûl lo taka lungkhamnain “Pathian thu” a dîp ral a hlauhawm chuan engtin nge ni ang? (Luka 8:7, 11, 14; Matthaia 13:22; Marka 4:18, 19) Chûng chu i chungah emaw, i chhûngkuaah emaw a thleng ṭan nia i hriat chuan, i lungngaihna chu Jehova chungah leihbua la, hmangaihna leh lâwmnaa ṭhang zêl tûra ṭanpui tûr chein, ṭawngṭai ang che. I rit phurh chu a chunga i nghah phawt chuan, ani chuan a enkawl ang che a, hlim chung leh thinlung nghet chunga a rawng bâwl zêl tûrin chakna a pe ang che.—Sâm 55:22; Philippi 4:6, 7; Thu Puan 2:4.
17. Engtin nge fiahna nasa tak chu tawrh chhuah theih a nih?
17 Inpumpêkna i neih laia i ṭawngṭai ang khân, Pathian Jehova hnênah chuan ṭawngṭai reng ang che. (Sâm 64:2) Thil dik lo ti tûra thlêmna i tawh lai emaw, fiahna nasa tak i tawh lai emawin, Pathian kaihhruaina leh chu a kaihhruaina zui thei tûra a ṭanpuina chu dîl rawh. Rinna a pawimawhzia hre reng rawh, zirtîr Jakoba pawhin heti hian a lo ziak si a: “In zîngah tupawhin [fiahna tawrh theih nâna] finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang. Nimahsela ringhlel hauh lovin rinna neiin dîl rawh se, ringhleltu chu tuifinriat fâwn thli chhêm len leh vawrh ang a ni si a. Chutiang mi, rilru bulbâl nei lo, a thil tih zawng zawnga nghet lo mi chuan Lalpa hnênah engmah hmuh inring suh se,” tiin. (Jakoba 1:5-8) Fiahna chu nasa lutuka a lan chuan, he thu: “Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tih hi kan ring tlat thei a ni.—1 Korinth 10:13.
18. Sualna khûnkhân tak, hai lan si lohvin Jehova hnêna kan inpumpêkna thutiam hlen chhuahna a tihchauh chuan eng nge kan tih theih?
18 A nih leh sual khûnkhân tak, hai lan si loh chuan i chhia leh ṭha hriatna a tihbuai a, Pathian hnêna i inpumpêkna thutiam hlen chhuak tûra i tumna a tihchauh chuan engtin nge ni ang? I sim phawt chuan, Jehova chuan ‘thinlung lungchhia leh inchhîr ngawih ngawih hi a hmusit lo vang’ tih hriain thlamuanna i nei thei a ni. (Sâm 51:17) Hmangaihna nei Kristian upate chuan—Jehova entawnin—i Pa vâna mi nêna inlaichînna ṭha neih leh i duhna chu an ngaizam mai mai lovang tih hre rengin, an ṭanpuina zawng ang che. (Sâm 103: 10-14; Jakoba 5:13-15) Tichuan, thlarau lama chakna thar leh thinlung nghet nei lehin, i ke tân kawng i tingîl thei ang a, Pathian hnêna i inpumpêkna thutiam chu i hlen chhuak thei ang.—Hebrai 12:12, 13.
Thinlung Nghetin Rawng Bâwl Reng Rawh
19, 20. Engvângin nge kan inpumpêkna thutiam chu kan hlen chhuah reng a pawimawh?
19 He hun khirh takah hian, kan inpumpêkna thutiam hlen chhuak tûr leh thinlung ngheta Pathian rawng bâwl tûrin kan thawk rim tûr a ni. Isua chuan: “A tâwp thlenga tuar peih apiang chu, chu mi ngei chu chhandamin a awm ang,” a ti. (Matthaia 24:13) “Ni hnuhnûngahte” kan awm avângin, tâwpna chu engtik lai pawha lo thleng thut thei reng a ni a. (2 Timothea 3:1) Chu bâkah, naktûk thleng kan dam ang tih tuman kan hre bawk si lo. (Jakoba 4:13, 14) Chuvângin, vawiin ngeia kan inpumpêkna thutiam kan hlen chu a va pawimawh tak êm!
20 He mi chungchâng hi tirhkoh Petera chuan a lehkha thawn pahnihnaah a sawi uar hle a. Ani chuan Tuilêta Pathian ngaihsak lo mite an boral vek ang khân, he entîr nei lei, a nih loh leh mihring suak sualte hi ‘Jehova nîah’ tihboral vek an ni dâwn tih a târ lang a ni. Chuvângin Petera chuan: “Awm dân thianghlim leh Pathian ngaihsak kawngah chuan mi eng ang nge in nih tûr le?” a ti a ni. Tin, “Duh takte u, nangnin chûng thu chu in lo hriat lâwk avângin fîmkhur rawh u, chutilochuan mi sualte [leh zirtîrtu derte] dik lohnaa hruai bova awmin in nghet ṭha lai in tlu dah ang e,” a ti bawk a ni. (2 Petera 3:5-17) Baptisma chang tawh chu hruai bova awmin, thinlung nghet vawng thei lotu anga a boral mai chuan, a va lungchhiat thlâk dâwn êm!
21, 22. Engtin nge Sâm 57:7 thu hi Davida tân leh Kristian dikte tâna a dik?
21 I baptisma chan lai hun hlimawm tak i hriat reng a, i ṭawngkam leh thiltih hian Pathian thinlung a tihlâwm nâna a ṭanpuina i dîl chuan, chu chuan Pathian hnêna i inpumpêkna thutiam hlen i tumna chu a tichak sawt ang. (Thufingte 27:11) Jehova chuan a mite chu a tilunghnual ngai lo va; chuvângin, a lakah kan rinawm ve ngei tûr a ni. (Sâm 94:14) Ani chuan Davida a chhanhimna leh a hmêlmate ruahmanna tihbahlahna hmangin lainatna leh khawngaihna a lantîr a. Chu mi avânga a lâwmzia lantîrin, Davida chuan amah Chhanhimtu a hmangaihna nghehzia te, tihnghîn rual a nih lohziate chu a puang chhuak a. Tih tak zetin: “Ka thinlung hi a nghet a ni, aw Pathian, ka thinlung hi a nghet a ni: hla ka sa ang, a ni fakna hla ka sa ang,” tih hla hi a sa a ni.—Sâm 57:7.
22 Davida angin, Kristian dikte chu Pathian hnêna an inpumpêkna ata chu an nghîng lo. Thinlung nghet tak puin, hlim taka fakna hla an sakna Jehova hnênah chuan, an chhandamna leh chhanhim an nihna lâwmthu chu an sawi a ni. I thinlung a ngheh chuan, Pathianah a innghat tlat ang a, ama ṭanpuinain i inpumpêkna thutiam chu i hlen chhuak thei dâwn a ni. Ni e, fakna hla phuahtu hla sakin: “Chanchin ṭha lo takte a hlau lo vang: LALPA ringin a thinlung chu a nghet a ni,” tia a chungchâng a sawi, “mi fel” ang hi i ni thei a ni. (Sâm 112:6, 7) Pathiana rinna nei chung leh amaha innghat tlatin, i inpumpêkna thutiam chu i hlen chhuak thei a, thinlung nghet takin Jehova rawng i bawl reng thei bawk a ni. (w02 4/1)
I Hre Chhuak Em?
• Engvângin nge Bible hriatna dik chu kan lâk luh chhunzawm reng ang?
• Engvângin nge kan simna leh inthlâk danglamna chu kan thinlungah kan vawn reng ang?
• Engtin nge kan inpumpêkna leh baptisma channa kan hriatrengna chu kan hlâwkpui?
• Engin nge thinlung ngheta Jehova rawng bâwl reng tûrin min ṭanpui ang?
[Phêk 18-naa milem]
Nî tina Pathian Thu chhiar ziahna hmangin i thlarau lam hrisêlna chu i enkawl em?
[Phêk 18-naa milemte]
Kristian rawngbâwlna kan hna pui bera neihna chuan thinlung ngheta Jehova rawng bâwl reng tûrin min ṭanpui