Jehova’n Thuâwihte A Humhimin Mal A Sâwm Ṭhin

“Ka thu pawm apiangte erawh chu him takin an awm ang a, thil ṭha lo hlau lovin an awm hle hle ang.”​—THUFINGTE 1:33.

1, 2. Engvângin nge Pathian thuâwih chu a pawimawh êm êm? Entîrna pein hrilhfiah rawh.

ARNOTE hmul eng buk chhirchherte chuan hnim tawi kârah chaw an chuk mawlh mawlh a; an chung sâng takah chuan mupuiin a hêl reng tih rêng an hre lo. Thâwklehkhatah, arpui chuan ṭîk dial dialin a notête chu a ko khâwm a, a thla a zâr a. A notête chu an rawn tlân khâwm a, mitkhap kâr lovah a thla hnuaiah hîm takin an biru ta a ni. Tichuan, mupui pawh chuan a bei zui ta bîk lo.a Eng nge zir tûr awm? Thuâwihnain nun a chhanhim!

² He mi aṭanga zir tûr awm chu tûn laia Kristiante tân hian a pawimawh zual hle; a chhan chu Setana hian Pathian mite râl lâka lâk tumin theihtâwp a chhuah vâng a ni. (Thu Puan 12:​9, 12, 17) A tum ber chu Jehova duhsakna kan chân nân leh chatuan nunna hmabâk kan hloh nâna kan thlarau lam nun tihchhiat chu a ni. (1 Petera 5:8) Nimahsela, Pathian kan hnaih tlat a, a Thu leh inawpna pâwl hmanga a kaihhruaina kan dawnte kan chhân lêt vat ṭhin chuan, a vênhimna kan dawng ngei ang. “A thlain a khuh ang chia, a thla hnuaiah chuan i tlu lût ang,” tiin fakna hla phuahtu chuan a ziak a ni.​—Sâm 91:4.

Hnam Thuâwih Lo Chu Râl Lâka Lâk Tûr A Lo Ni

3. Israel thuâwih loh fona rah chhuah chu eng nge ni?

³ Israel hnam chuan Jehova thu an âwih chhûng chu ngun taka a vênhimna an dawng ṭhîn a. Mahse, mipuite chuan anmahni Siamtu chu kalsanin, “engmaha hnemhnâng lo tûr leh chhanchhuak thei lo” tûr, thing leh lunga siam pathiante lam an hawisan zîng hle a ni. (1 Samuela 12:21) Chutianga an hel hnu kum zabi engemaw zât hnuah chuan, hnam pum pui chu siam ṭhat leh theih rual lovin an kalpêng ta a. Chuvângin, Isua pawh: “Aw Jerusalem, Jerusalem! zâwlneiho thattu, i hnêna an rawn tirhte lunga lo dênghlumtu, arpuiin a notê a thla hnuaia a awp khâwm angin i fate vawi engzât nge awp khâwm ka tum kha! Nimahsela in duh si lo. En teh u, in in chu aruaka hnutchhiah che uin a awm ta,” tiin a rûm hial a nih kha.​—Matthaia 23:​37, 38.

4. Engtin nge Jehova’n Jerusalem a thlahthlamzia chu C.E. 70-ah a lo lan chian?

⁴ Jehova’n hel hmang Israel a thlahthlamzia chu C.E. 70 khân tawrhhrehawm taka târ lan a ni ta a. Chu mi kum chuan, Rom sipaite chu mupui lem chuanna an puanzârte lek kângin, tualthahna râpthlâk tak thlen tûrin Jerusalem lamah chuan an bîr thla ngar ngar a ni. Khawpui chu Kalhlên Kût hmang mipuitea a khah lai tak a ni a. Mahse, an thilhlan tam takte chuan Pathian duhsakna a dawntîr chuang lo. Chu chu thuâwih lo Lal Saula hnêna Samuela thu sawi: “LALPA chuan LALPA thu zâwm chu a lâwm angin hâlral thilhlante leh inthawinate hi a lâwm em ni? Ngai teh, inthawina aiin thuâwih chu a ṭha zâwk a, berâmpa thau aiin a thu pawm chu a ṭha zâwk a ni,” tih hriatnawntîrtu lungchhiatthlâk tak a ni.​—1 Samuela 15:22.

5. Eng ang chi thuâwihna nge Jehova’n a phût a, chutiang thuâwihna neih chu thil theih a nihzia engtin nge kan hriat?

⁵ Thuâwihna chu phût hle mah se, Jehova chuan mihring ṭha famkim lote theih chin tâwk chu a hre hle a. (Sâm 130:​3, 4) A phût tak chu rinna te, hmangaihna te, leh amah tihlâwm loh hlauhna ṭha tea innghat rilru ngîl tak leh thuâwina chu a ni. (Deuteronomy 10:​12, 13; Thufingte 16:6; Isaia 43:10; Mika 6:8; Rom 6:17) Chutiang thuâwihna neih chu thil theih a nihzia fiahna nasa tak, thihna hial kâra an rinawmna lo vawng tlattu ‘chhûmpui nasa tak ang Kristian hun hmaa thuhretuten’ an lantîr a ni. (Hebrai 11:​36, 37; 12:1, NW) Chûng mite chuan Jehova thinlung an va tilâwm tehrêng êm! (Thufingte 27:11) Nimahsela, mi dangte chu atîrah chuan an rinawm a; mahse, thu an âwih reng ta lo va. Chutiang mite zînga pakhat chu hmân lai Juda Lal Joasa hi a ni.

Ṭhian Sualin An Tihkhawloh Lal Pakhat

6, 7. Jehoiada dam chhûng chuan lal Joasa chu eng ang lal nge a nih?

⁶ Lal Joasa chuan a nausên laiin tualthahna chu a pumpelh chang chang a ni. Joasa kum sarih a tlin chuan, Puithiam Lalber Jehoiada chuan huaisen takin a bihrûkna ata a la chhuak a, lalah a siam ta a. Pathian ṭih mi Jehoiada chu Joasa pa leh a thurâwnpetu anga a ṭan avângin, rorêltu naupang tak chuan “puithiam Jehoiada dam chhûng chuan LALPA mithmuhin thil ṭha a ti a.”​—2 Chronicles 22:​10–23:​1, 11; 24:​1, 2.

⁷ Joasa thiltih ṭhatte zîngah chuan Jehova biak in siam ṭhat​—tih tûra “a rilrûk” ṭhin chu a tel a. Ani chuan Puithiam Lalber Jehoiada chu ‘Mosia ruat’ anga Juda leh Jerusalem aṭanga biak in siam ṭhat nâna chhiah khawn a ngaihzia a hriattîr a ni. A lan dân chuan, Pathian Dân zira, zâwm tûra lal naupang tak a fuihnaah chuan Jehoida chu a hlawhtling hle a ni. Chuvângin, biak in tuaiṭhatna leh biak in bungraw siamna hna chu zawh a ni ta thuai a ni.​—2 Chronicles 24:​4, 6, 13, 14; Deuteronomy 17:18.

8. (a) Thlarau lama Joasa tlûkchhiat chhan bul ber kha eng nge ni? (b) Thuâwih lohna chuan a tâwpah lal chu eng nge a tihtîr tâk?

⁸ Lungchhiatthlâk tak maiin, Joasa chuan Jehova thu a zâwm reng ta lo. Eng nge a chhan? Pathian Thu chuan: “Jehoiada thih hnu chuan Juda mi liante chu an lo thawk a, lal hnênah dawvân an rawn kai a. Lal chuan an thu chu a lo pawm a. Tichuan an pi leh pute Pathian LALPA in chu an hawisan a, Aserite leh milemte rawng an bâwl ta a: tin, an sualna avângin Judate leh Jerusalem chungah thinurna a lo thleng ta a,” tih min hrilh a ni. Juda mi liante thununna ṭha lo chuan lal chu Pathian zâwlneite lamah a beng a chhittîr ta lo va; chûng zâwlneite zînga pakhat chu an thuâwih loh avânga Joasa leh mipuite huaisen taka zilhtu, Jehoiada fapa Zekaria hi a ni. Inchhîr ahnêkin, Joasa chuan Zekaria chu a dênhlumtîr ta zâwk a. Ṭhian sual thununna hnuaia a tlâwm avângin, Joasa chuan khawngaihna a va nei ta lovin, thu a va âwih ta lo êm!​—2 Chronicles 24:​17​—22; 1 Korinth 15:33.

9. Engtin nge Joasa leh a mi liante tâwp dân chuan thuâwih loh âtthlâkzia a târ lan?

⁹ Jehova an hawisan tâk avângin, Joasa leh a ṭhian mi lian suaksual takte chuan eng thil nge an tawn? Suria sipai “tlêmtê” chauhte chuan Judai ram chu an rûn a, “an milian zawng zawngte chu an tihboralsak a.” Anmahni rûntute chuan lal thil neih zawng zawng leh biak in hungchhûnga rangkachak leh tangkarua zawng zawng chu an lâksak bawk a ni. Joasa chu dam khawchhuak mah se, chan chau tak leh natna nasa tak tuarin an kalsan a ni. Chu mi hnu rei lo têah chuan, ama chhiahhlawh zînga mite ngei chuan phiar ruin an that ta a ni. (2 Chronicles 24:​23-25; 2 Lalte 12:​17, 18) Israel mite hnêna Jehova thusawi: “LALPA in Pathian awkâ chu ngun taka in ngaihthlâk loh va, . . . thu ka pêk che u thupêk zawng zawngte fîmkhur taka in zawm loh chuan hêng ânchhia zawng zawngte hi in chungah a lo awm ang a, a nangchîng ang che u,” tih hi a va dik êm!​—Deuteronomy 28:15.

Thuâwihnain Lehkhaziaktu A Chhanhim

10, 11. (a) Engvângin nge Jehova’n Baruka a zilhna thute ngaihtuah chu a ṭangkai? (b) Eng zilhna thu nge Jehova’n Baruka a pêk?

¹⁰ Kristian rawngbâwlnaa i mi tawn ṭhenkhatin chanchin ṭha an ngaihsak loh avângin lunghnual châng i nei em? Mi hausate leh an nawmsip bâwlna nun kawng chhe tê tala ît châng i nei em? I neih chuan, Jeremia lehkhaziaktu, Baruka chungchâng leh Jehova zilhhauhna thu hi ngun takin ngaihtuah ang che.

¹¹ Hrilh lâwk thu a ziah lai ngeiin Baruka chuan Jehova ngaihsakna a la tlat mai. Engvâng nge? Baruka chu a chantâwkah lungawi lovin a vui ṭan a, Pathian rawngbâwlna chanvo hlu tak a neih aia ṭha thil engemaw a châk a ni. Baruka rilru put hmang inthlâk thleng chu hriain, Jehova chuan zilhna thu fiah tak, dam tak siin hetiang hian a pe a ni: “Mahni tân thil ropui i zawng em ni? Zawng lo mai rawh: tîsa zawng zawng chungah thil ṭha lo ka rawn thlen dâwn si a, . . . mahse i nun zawng i kalna apiangah ka zuahsak hrâm ang che,” tiin.​—Jeremia 36:4; 45:5.

12. Engvângin nge he khawvêla mahni tâna “thil ropui” zawn chu kan pumpelh ang?

¹² Jehova’n Baruka a zilhna thu aṭang hian, rinawm taka a rawng bâwl a, huaisen taka Jeremia thlâwp tlattu he mi ṭha A ngaihsakzia hi i hre thei em? Chutiang bawkin, tûn laiah pawh Jehova chuan he khawvêla thil ṭha zâwk nia an hriatte ûm châktute chu a ngaihtuah êm êm a ni. Hlimawm takin, chutiang mi tam takte chuan Baruka ang bawkin, mawhphurhna nei thlarau lam unaute zilhna chu an chhâng lêt a ni. (Luka 15:4-7) Ni e, he khawvêla mahni tâna “thil ropui” zawngtute chuan hmabâk beisei tûr engmah an neih lohzia i hre ṭheuh ang u. Chutiang mite chuan hlimna tak tak an hmuh theih loh mai bâkah, chu aia râpthlâk lehzual, nakin lawkah he khawvêl leh a châknate a boral rualin an boral dâwn si a.​—Matthaia 6:​19, 20; 1 Johana 2:​15-17.

13. Baruka chanchin hian inngaihtlâwmna chungchângah eng nge min zirtîr?

¹³ Baruka chungchâng thuziak chuan inngaihtlâwmna lamah pawh thil ṭha tak min zirtîr bawk a. Jehova chuan Baruka chu amah ngeiin a zilh lo va, Baruka’n a famkim lohna leh a zei zia a hriat chian êm êm tûr Jeremia hmangin a zilh tih hre reng la. (Jeremia 45:​1, 2) Mahse, Baruka chu a chopo lo; inngaitlâwm takin zilhna lo chhuahna chu Jehova a nihzia a chhût zâwk a ni. (2 Chronicles 26:​3, 4, 16; Thufingte 18:12; 19:20) Chuvângin, ‘kan hriat lohva kawng dik lo kan zawh’ avânga Pathian Thu aṭanga zilhna kan dawn chuan, Baruka puitlinna, thlarau lam hmuhthiamna, leh a inngaihtlâwmna hi i entawn ang u.​—Galatia 6:1, NW.

14. Engvângin nge hotute thuâwih chu kan tân a ṭhat?

¹⁴ Chutianga kan inngaihtlâwmna chuan zilhna min petute pawh a ṭanpui bawk. Hebrai 13:17 chuan: “In hotute thu âwih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” a ti. Upate hian an berâm enkawl rawngbâwlna khirh tak hlen chhuah theih nâna thil ṭûl huaisenna te, finna te, leh remhriatna te dîla ṭawngṭaiin, Jehova hnênah an thinlung an va leihbaw ngun êm! Chuvângin, “hetiang mite hi [i] lâwm” ang u.​—1 Korinth 16:18.

15. (a) Engtin nge Jeremia khân Baruka a rinzia a târ lan? (b) Engtin nge Baruka chu inngaitlâwm taka thu a âwih avânga lâwmman pêk a nih?

¹⁵ Baruka chuan a rilru a thlâkzia a lang chiang hle, a chhan chu a hnu lawkah Jeremia chuan chanvo khirh ber mai​—biak ina kala, Jeremia kâ aṭanga a hriat rorêlna thu ama ziak chhuah ngeite chhiar chhuak tûra thu a pêk avângin. Baruka chuan a zâwm em? Aw, “zâwlnei Jeremia thupêk zawng zawng ang zêl chuan” a ti a. Dik tak chuan, chu thuchah bawk chu Jerusalem hotute hmaah pawh a chhiar chhuak hial a, chutiang ti tûr chuan huaisen thawkhat a ngai a ni. (Jeremia 36:​1-6, 8, 14, 15) A hnu kum 18 vêla Babulon kuta khawpui a chhiat khân, Jehova vaukhânna a ngaih pawimawha “thil ropui” zawn a bânsan avânga zuaha a awm khân, Baruka chu a va han lâwm dâwn êm!​—Jeremia 39:​1, 2, 11, 12; 43:6.

Hmêlma Hual Laia Thuâwihnain Nun A Chhanhim

16. Engtin nge Jehova’n Jerusalema Judate chungah B.C.E. 607-a Babulon beihna hnuaiah pawh a lainatna a lantîr?

¹⁶ B.C.E. 607-a Jerusalem tâwpna a lo thlen khân, Pathianin thuâwihte a khawngaihzia a lo lang leh a. Khawpui an hual nasat vânglai takin, Jehova chuan Judaho hnênah: “Ngai rawh u, thihna kawng leh nunna kawng ka dahsak che u hi. He khawpui chhûnga awm chu khandaihin emaw, ṭâmin emaw, hrîin emaw an thi ang; Kaldai a hualtu che u hnêna chhuaka inpete erawh chu an nung ang, an nunna chu indo lâwmman atân a ni ang,” tiin a sawi a ni. (Jeremia 21:​8, 9) Jerusalem chhûnga chêngte chuan tihboral phû hliah hliah mah se, chu hun khirh tak leh chêp tak kârah pawh Jehova chuan a thuâwihtute a lainatzia a lantîr a ni.b

17. (a) Jehova’n Judate chu ‘Kaldaiho hnêna inpe’ tûra a hrilhtîr khân, chu chuan eng kawng chi hnihin nge Jeremia thuâwihna chu a fiah? (b) Jeremia’n huaisen taka Jehova thu a âwihna aṭangin eng nge kan zir theih?

¹⁷ Judate inpe tûra hrilhna chuan Jeremia thuâwihna a fiah bawk a. A chhan pakhat chu, Pathian hming tâna mi ṭhahnemngai tak a ni a. An chak chhan chu nunna nei lo an milemte vâng nia ngaitu tûr hmêlmate’n Pathian hming an sawichhiat chu a duh lo a ni. (Jeremia 50:​2, 11; Jeremia Ṭah Hla 2:16) Chu bâkah, mite chu inpe tûra a hrilh chuan, a thusawi chu mi tam takin helnaah an lâksak ang a, ama nun ngei tân a hlauhawm dâwn tih a hre bawk a ni. Mahse, a dâwihzep lo, thuâwih takin Jehova thupuan chhuah chu a sawi zâwk a ni. (Jeremia 38:​4, 17, 18) Jeremia ang bawkin keini pawhin mite lawm loh zâwng tak thuchah kan puang a. Isua ngei pawh an hmuhsit phahna thuchah bawk kha kan puang a ni. (Isaia 53:3; Matthaia 24:9) Chuvângin, ‘mihringte chu hlau lo’ ila, Jeremia angin, Jehova ring tlatin, huaisen takin a thu i âwih zâwk ang u.​—Thufingte 29:​25, NW.

Goga Beihna Hnuaia Thuâwihna

18. Hma lam hunah thuâwihna chungchânga eng fiahna nge Jehova chhiahhlawhte’n an tawn dâwn?

¹⁸ Nakin lawkah, Setana khawvêl suaksual chu tûn hmaa la awm ngai lo “hrehawm nasa tak” hian a tiboral dâwn a. (Matthaia 24:21) Chu mi hma leh chu mi chhûng chuan, Pathian mite chuan an rinna leh thuâwihna fiahna nasa ber chu an tawng ngei dâwn a ni. Entîr nân, Bible chuan “Magog rama mi . . . Goga,” Setana chuan “sipai rual nasa tak . . . chhûmin ram a tuam mup mup” anga sawi mite khâwmin, Jehova chhiahhlawhte chu theihtâwpin a bei dâwn a ni. (Ezekiela 38:​2, 14-16) Chhiarsên loh leh râlthuam nei lo Pathian mite chuan, Jehova’n thuâwihte humhim nâna a zâr a “thla” hnuaiah inhumhimna an zawng ang.

19, 20. (a) Engvângin nge Tuipui Sena an awm lai khân Israelte tân thuâwih a pawimawh êm êm? (b) Engtin nge Tuipui Sen chungchâng thuziak hi ṭawngṭaina nêna ngun taka ngaihtuah chu tûn laiah kan hlâwkpui theih?

¹⁹ He dinhmun hian Aigupta ram aṭanga Israelte chhuah lai min hriat chhuahtîr a. Aigupta mite chu hri sâwm râpthlâk tak hmanga a hrem hnuah, Jehova chuan a mite chu kawng hnai ber aṭang ni lo; hmêlmate’n an nêkchêpa an beih mai theihna hmun, Tuipui Sen kawng lam aṭangin Ram Tiam lam a panpui ta zâwk a ni. Indo thiam mite thlîrna aṭang chuan chu kawng zawh chu thihna a ni ringawt mai. Chuta tel ve chu ni ta la, Mosia hmanga Jehova thusawite chu âwihin, Ram Tiam chu in kalna kawng lo lam daiha awm a ni tih hre reng chung pawhin, rinhlelhna nei hauh lovin Tuipui Sen lam chu i pan ang em?​—Exodus 14:​1-4.

²⁰ Exodus bung 14-na kan chhiar chuan, Jehova’n thiltihtheihna mak ropui tak lantîra a mite a chhanchhuah dân kan hmu a. Zir nân leh chûng kan zirte rilrua chhût ngun nâna hun kan hman hian chûng thuziakte chuan kan rinna a va tichak thei tehlul êm! (2 Petera 2:9) Chu rinna chak tak chuan Jehova thil phûtte chu mihringte ngaihtuahna nêna inkalh nia a lan châng pawha zâwm tlat tûrin min thuam a ni. (Thufingte 3:​5, 6) Chuvângin, ‘Taima taka Bible zirna te, ṭawngṭaina te, rilrua chhût ngunna te, leh Pathian mite nêna inkawm ziahna te hmanga ka rinna tihngheh deuh deuh ka tum em?’ tiin inzâwt ang che.​—Hebrai 10:​24, 25; 12:​1-3.

Thuâwihnain Beiseina A Siam

21. Jehova thuâwihtute tân tûnah leh nakinah eng malsâwmna nge lo awm dâwn?

²¹ Jehova thuâwih tute chuan Thufingte 1:33 thu thlen famkimna hi tûnah pawh an tawng a. Chutah chuan: “Ka thu pawm apiangte erawh chu him takin an awm ang a, thil ṭha lo hlau lovin an awm hle hle ang,” tih ziak a ni. Hêng thlamuanna thute hi Jehova phuba lâkna nî lo thleng tûrah ropui taka hman a va ni dâwn êm! Dik tak chuan, Isua’n a zirtîrte hnênah hetiang hian a hrilh a ni: “Chûng thil chu a lo thlen tirhin, en chho ula, dâk chhuak rawh u; in tlanna tûr chu a hnaih tâk avângin,” tiin. (Luka 21:28) Chiang takin, Pathian thuâwihtute chauhvin chutiang thu chu an ringngam dâwn a ni.​—Matthaia 7:21.

22. (a) Jehova mite’n rinngamna tûr chhan eng nge an neih? (b) Thuziak dawt lehah eng nge kan sawiho dâwn?

²² Kan rinngamna tûr chhan dang pakhat leh chu, ‘Lalpa PATHIAN chuan a rawngbâwltu, a zâwlneite hnênah a thurûk hrilh lovin engmah a tih dâwn loh vâng’ a ni. (Amosa 3:7) Tûn laiah hian, Jehova chuan hmân lai angin zâwlneite a thâwk khum tawh lo va; a chhûngte hnêna a hun apianga thlarau lam chaw sem tûrin bawi rinawm pâwl chu a ruat zâwk a ni. (Matthaia 24:​45-47) Chuvângin, chu “bawi” chunga thuâwihna rilru kan neih chu a va pawimawh êm! Thuziak dawtlehin a târ lan tûr angin, chutiang thuâwihna chuan “bawi” pu, Isua chunga kan rilru put hmang pawh a lantîr bawk a ni. Ani chu ‘hnam tinin a thu an âwiha’ chu a ni.​—Genesis 49:10. (w02 10/1)

[Footnote-te]

I Hre Chhuak Em?

• Israel thuâwih loh fona chuan eng nge a rah chhuah?

• Engtin nge Lal Joasa chu a hun tîr lam leh tâwp lamah khân a ṭhian kawmte’n an hneh?

• Baruka aṭangin eng nge kan zir theih?

• Engvângin nge Jehova thuâwihtute chuan he khawvêl tâwpna hnaih tawh takah hian hlauhna tûr chhan an neih loh?

[Phêk 9-naa milem]

Jehoiada kaihhruaina hnuaiah, Joasa chuan Jehova thu a âwih

[Phêk 11-naa milem]

Joasa chu a ṭhian sualte’n Pathian zâwlnei an thahtîr

[Phêk 12-naa milem]

Jehova thu âwihin, mi chhanchhuak tûra a thiltihtheihna ropui tak chu i hmu ang em?