Jehova’n A Ngaihsak Che
“Anin a ngaihsak ṭhin che u avângin in manganna zawng zawng [Pathian] chungah nghat vek rawh u.”—1 PETERA 5:7.
1. Eng thil pawimawh takah nge Jehova leh Setana chu chhim leh hmâr ang an nih?
JEHOVA leh Setana chu chhim leh hmâr ang an ni a. Jehova hnaihtu apiang chu Setana’n a hnâwl dâwn a ni. He inkalhna hi lehkhabu râwn tlâk tak pakhat chuan a sawi a. Bible-a Joba bua Setana thiltih chanchin chungchângah Encyclopædia Britannica (1970) chuan: ‘Setana hna chu leilung fan chhuaha chhiatna lama mawhpuh theih tûr mi emaw, thiltih emaw zawn reng hi a ni; chuvângin, a hnathawh chu thil ṭha titute tichak tûra khawvêl zawng zawnga lêng ruai ṭhîn, “Lalpa mit” nên a inkalh tlat a ni (II Chron. xvi, 9). Setana chuan mihringte mahni hmasial lova ṭhat chhuahna chu a âwih lo tlat a; chuvângin, Pathianin a thuneihna leh thununna leh a khuahkhirhna chhûnga mihringte ṭhatna a fiah chu phalsak a ni,’ a ti. An va inkalh tak êm!—Joba 1:6-12; 2:1-7.
2, 3. (a) Engtin nge “Diabola” tih thu mal awmzia chu Joba chunga thilthleng hian inchawih taka a târ lan? (b) Engtin nge Bible chuan Jehova chhiahhlawh leia awmte chu Setana’n a sawichhiat chhunzawmzia a târ lan?
2 “Diabola” tih thu mal chu “puhtu dik lo,” “sawichhetu” tihna Grik thu mal aṭanga lo chhuak a ni a. Setana’n: “Joba chuan vâng awm lovin a ṭih em ni?” tia zâwtin Jehova chhiahhlawh rinawm Joba chuan ama hmasialna avânga A rawng bâwlah a puh thu Joba lehkhabu chuan min hriattîr a ni. (Joba 1:9) Joba lehkhabua thuziak chuan fiahna leh hrehawmna a tuar chung pawhin Joba chuan Jehova a hnaihzual sauh tih a târ lang bawk. (Joba 10:9, 12; 12:9, 10; 19:25; 27:5; 28:28) Hrehawm nasa tak a tawrh chhuah hnuah chuan, Pathian hnênah: “Benga hriatna mai zawngin ka hre tawh chia, mahse, tûnah zawng ka hmu ta che,” a ti a ni.—Joba 42:5.
3 Joba hnu aṭang chuan Setana’n Pathian chhiahhlawh rinawmte a sawichhiat chu a bânsan mai em? Hnai lo ve. Setana chuan, he tâwpna hunah hian Krista hriak thih unaute leh an ṭhian rinawmte chu a la sawichhe zêl tih Thu Puan chuan a târ lang a ni. (2 Timothea 3:12; Thu Puan 12:10, 17) Chuvângin, Kristian dikte’n kan mamawh êm êm chu min ngaihsaktu Pathian, Jehova hnêna intukluh a, amah kan hmangaih avânga a rawng bâwlna hmanga Setana sawichhiatna dik lohzia târ lan hi a ni. Chutianga kan tih chuan, Jehova thinlung kan tilâwm dâwn a ni.—Thufingte 27:11.
Jehova’n Min Ṭanpui Theih Dân Tûr A Zawng
4, 5. (a) Setana nêna inkalhin, Jehova chuan leiah hian eng nge a zawn? (b) Jehova duhsakna dawng tûr chuan eng nge kan tih ngai?
4 Diabola chu leilungah hian sawichhiat theih leh lem theih tûr zawngin a phiruai reng a. (Joba 1:7, 9; 1 Petera 5:8) Jehova erawh chuan a chakna mamawhte ṭanpui tûrin a zawng thung a ni. Zâwlnei Hanania chuan Lal Asa hnênah: “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn,” tih a hrilh a ni. (2 Chronicles 16:9) Setana min enfiahna huatthlala tak leh Jehova min ngaihsakna chu a va inthlau tak êm!
5 Jehova chu kan thil tihsual leh tlin lohnate man chhuah tuma min enthla rengtu a ni lo. Fakna hla phuahtu chuan: “LALPA, nangin khawlohnate i chhinchhiah chuan, Aw LALPA, tunge ding ang le?” tih a ziak a ni. (Sâm 130:3) A chhânna chu hei hi a ni: tumah an ding thei dâwn lo tih hi. (Thuhriltu 7:20) Thinlung zawng zawnga Jehova kan hnaih chuan, thiam loh min chantîr tûr ni lovin, kan ṭan lâk dân min enthla a, a ṭanpuina leh a ngaihdamna kan dîlnate chhâng tûrin a mit chu kan chungah a fu reng dâwn a ni. Tirhkoh Petera chuan: “Lalpa mit chu mi felte chungah a fu a, a beng pawh an ṭawngṭaina lamah a chhi si ṭhîn a, amaherawhchu Lalpa hmêl chu thil tisualtute chungah a awm [“Jehova hmêl chuan thil tisualtute a do,” NW] ṭhîn,” tih a ziak a ni.—1 Petera 3:12.
6. Engtin nge Davida thiltawn kha kan tân thlamuanna leh vaukhânna a nih?
6 Davida chu ṭha famkim lo a ni a, nasa takin thil a tisual a. (2 Samuela 12:7-9) Mahse, a thinlung chu Jehova hmaah leihbuain, ṭawngṭai fan fanin a hnaih a ni. (Sâm 51:1-12, a chunga thuziak) Jehova chuan a ṭawngṭaina ngaithlain a ngaidam a; mahse, Davida chuan a sualtih rah duhawm lo tak chu a seng tho a ni. (2 Samuela 12:10-14) Hei hi kan tân vaukhânna leh thlamuanna a ni tûr a ni. Kan inchhir tak zet chuan Jehova’n min ngaidam duh tih hriat chu a thlamuanthlâk a; mahse, sual tihin rahchhuah râpthlâk tak a thlen ṭhîn tih hriat chuan ngaihtuah a titam hle. (Galatia 6:7-9) Jehova hnaih kan duh chuan, amah tilâwm lo thei thilte chu a theih ang tâwkin kan hlat tûr a ni.—Sâm 97:10.
Jehova’n A Mite A Lamah A Hîp
7. Eng ang mite nge Jehova’n a enthlâk a, engtin nge a lamah a hîp?
7 Davida chuan fakna hla a phuahte zînga pakhatah chuan: “LALPA chu chungnung tak a ni nâa, mi tlâwmte chu a ngaihsak ṭhîn a: mi chapote erawh chu hla tak aṭangin a hre ṭhîn,” tih a ziak a. (Sâm 138:6) Chutiang bawkin fakna hla dang chuan: “LALPA kan Pathian, chung lama ṭhutphah neia, vâna thil awmte leh leia thil awmte en tûra intihnuai ṭhîna ang hi, tunge awm? Ani chuan rethei chu vaivut ata a kai tho ṭhîn,” a ti bawk. (Sâm 113:5-7) Ni e, engkim tithei Siamtu chu leilung en tûrin a intihnuai a, a mit chuan “mi inngaitlâwm,” “rethei,” “a chhûnga thil tenawm tih tawhte avânga thawpika ṭap ṭhînte” chu a hmu a ni. (Ezekiela 9:4) Chutiang mite chu a Fapa hmangin a lamah a hîp a. Leia a awm laiin Isua chuan: “Pa mi tîrtuin a hîp loh chuan tumah ka hnênah an lo kal thei lo vang . . . Pain a puih loh chuan tumah ka hnênah an lo kal thei lo vang,” a ti.—Johana 6:44, 65.
8, 9. (a) Engvângin nge Isua lam pana kan kal vek a ngaih? (b) Tlanna ruahmanna chungchânga thil chhinchhiah tlâk tak chu eng nge ni?
8 Mi zawng zawng chu suala piang, Pathian laka inmi hran an nih avângin, Isua hnênah lo kalin, tlanna inthawina chu an ring tûr a ni a. (Johana 3:36) Pathian nêna an inrem a ngai a ni. (2 Korinth 5:20) Pathian chuan mi sualte chu amah nêna an inrem theih nâna ruahmanna engemaw siam tûra an ngen a nghâk lo. Tirhkoh Paula chuan: “Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân. . . . Hmêlma kan nih lai maha a Fapa thihna avânga Pathian nêna lo inrem tawh kan nih si chuan, inrema kan awm tawh hnu hian a nunna avângin chhandamin kan awm ngei ang,” tih a ziak a ni.—Rom 5:8, 10.
9 Tirhkoh Johana chuan Pathianin mihringte nêna inremna a siam thu thutak hlu êm êm mai chu nemnghetin: “He miah hian Pathian hmangaihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian. He miah hian hmangaihna a awm, keimahnin Pathian kan hmangaih ka ti a ni lo va, amahin min hmangaih a, kan sualte thupha chawina ni tûrin a Fapa a rawn tîr ka ti a ni zâwk e,” tih a ziak a ni. (1 Johana 4:9, 10) Hma la hmasatu chu mihringte ni lovin, Pathian a ni. “Mi sualte” mai ni lova, “hmêlma” pawh heti khawpa hmangaihtu Pathian lamah chuan hîpin i awm a ni lâwm ni?—Johana 3:16.
Jehova Kan Zawn A Ngai
10, 11. (a) Jehova zawng tûrin eng nge kan tih ang? (b) Setana khawvêl hi engtin nge kan thlîr ang?
10 Kan hriat angin, Jehova chuan a lam pan tûrin min nawrlui lo va. “Ani chuan min hlat lo ṭheuh” mah se, kan zawngin, ‘kan dap kan dap’ tûr a ni. (Tirhkohte 17:27) Jehova chuan a laka intukluhna min phût thei tih kan pawm tûr a ni a. Tirhkoh Jakoba chuan: “Chutichuan Pathian thu thuin awm rawh u, amaherawhchu Diabola dodâl rawh u, tichuan a tlân bosan ang che u. Pathian hnaih rawh u, tichuan anin a hnaih ang che u. Mi sualte u, in kutte silfai rawh u; rilru bulbâl nei lote u, in thinlung tithianghlim rawh u,” tiin a ziak a ni. (Jakoba 4:7, 8) Jehova tâna dingnghet a, Diabola dodâl chu kan hreh tûr a ni lo.
11 A awmzia chu Setana khawvêl suaksual tak ata tlân chhuah hi a ni. Jakoba chuan heti hian a ziak bawk a ni: “Khawvêl ṭhian nihna hi Pathian hmêlma nihna a ni tih in hre lo vem ni? Chutichuan tupawh khawvêl ṭhian nih duh apiang chuan Pathian hmêlmaah a insiam ṭhîn a ni,” tiin. (Jakoba 4:4) Jehova ṭhian nih kan duh chuan Setana khawvêl huat kan ni dâwn tih a chiang hle.—Johana 15:19; 1 Johana 3:13.
12. (a) Eng thu thlamuanthlâk tak nge Davida’n a ziah? (b) Zâwlnei Azaria hmangin eng vaukhânna thu nge Jehova’n a pêk?
12 Setana khawvêl hian engtin emawa min dodâl chuan, ṭawngṭaia Jehova kan pan a ngai zual a, a ṭanpuina kan dîl a ngai a ni. Jehova chhanchhuahna vawi tam tak tawngtu Davida chuan min thlamuan nân heti hian a lo ziak a: “LALPA chuan a kotu zawng zawngte chu a hnaih ṭhîn a. Tih tak zeta amah kotu zawng zawngte chu. Amah ṭihtute duh chu a hlawhtlintîr ang a; an au thâwm a hria ang a, anni chu a chhandam ang. LALPA chuan amah hmangaihtute zawng zawng chu a vawng ṭha ṭhîn a; mi suaksual erawh chu a tiboral vek ang,” tiin. (Sâm 145:18-20) He fakna hla hian Jehova chuan mi mala fiahna kan tawh hunah min chhanchhuak thei a, a mite chu a huhovin ‘hrehawm nasa takah’ a chhanchhuak dâwn tih a târ lang a ni. (Thu Puan 7:14) Jehova kan hnaih chuan ani pawhin min hnaih ve ang a. “Pathian thlarau” kaihhruainain zâwlnei Azaria chuan hmun tina hman theih tûra pawm theih thu hetiang hi a sawi a: “A lama in ṭan chhûng zawng LALPA chu in lamah a ṭang a, amah in zawn chuan in hmu ang a, amah in hawisan chuan ani pawhin a hawisan ang che u,” tih chu.—2 Chronicles 15:1, 2.
Jehova Chu Kan Tân A Tak Tûr A Ni
13. Engtin nge kan tân Jehova a takzia kan lantîr theih?
13 Tirhkoh Paula chuan Mosia’n “hmuh theih lohva chu a hmuh avângin a tuar ṭan ṭan” a ti a. (Hebrai 11:27) A nihna takah chuan, Mosia chuan Jehova chu a hmu ngai lo. (Exodus 33:20) Mahse, atân chuan Jehova chu a tak êm avângin, mita hmu ang mai a ni. Chutiang bawkin, fiahna a tawn hnuah Joba rinna mit chuan Jehova chu a chhiahhlawhte fiahna tawrh phal mah se, kalsan ngai lo Pathian a nihzia a hmu chiang zâwk a ni. (Joba 42:5) Enoka leh Nova chu ‘Pathian nêna lêng dûn’ anga sawi an ni a. Pathian tihlâwm dân kawng zawn leh a thu âwihna hmangin an lêng dûn a ni. (Genesis 5:22-24; 6:9, 22; Hebrai 11:5, 7) Jehova chu Enoka te, Nova te, Joba te, leh Mosia te tâna a tak anga kan tân a tak ve chuan, kan kawng zawng zawngah “amah [kan] hre reng” ang a, kan “kawngte chu [min] kawhhmuh zêl ang.”—Thufingte 3:5, 6.
14. Jehova “vuan tlat” tih chu eng tihna nge ni?
14 Israel mite chu Ram Tiama an luh hma lawkah, Mosia’n a zilh a: “LALPA in Pathian chu in zui ang a, amah chu in ṭih ang a, a thupêkte chu in zâwm ang a, a thusawite chu in pawm ang a, a rawng te in bâwl ang a, amah chu in vuan tlat tûr a ni,” tiin. (Deuteronomy 13:4) Anni chuan Jehova chu an ṭih a, an zâwm a, an vuan tlat tûr a ni a. Heta “vuan tlat” tia lehlin thu mal chungchângah Bible lama mi thiam pakhat chuan “a ṭawngkam hman chuan inlaichînna hnai tak leh innêl tak a kâwk a ni,” a ti. Fakna hla phuahtu chuan: “LALPA thurûk chu amah ṭihtute hnênah a awm,” a ti. (Sâm 25:14) He Jehova nêna inlaichînna hnai tak leh hlu tak hi kan ta a ni thei: ani chu kan tâna a tak viau va, amah kan hmangaih êm avânga eng kawng maha tihlâwm loh kan hlauh phawt chuan.—Sâm 19:9-14.
Jehova’n Mi A Ngaihsakzia I Hria Em?
15, 16. (a) Engtin nge Sâm 34-na chuan Jehova min ngaihsakzia a târ lan? (b) Kan chunga Jehova ṭhatnate hriat chhuah harsa kan tih chuan, eng nge kan tih ang?
15 Setana ngamthlêmna pakhat chu kan Pathian Jehova’n a chhiahhlawh rinawmte a ngaihsak reng a ni tih min theihnghilhtîr hi a ni a. Israel Lal Davida chuan hun râpthlâk ber a tawn lai pawhin Jehova’n a humhimzia a hre tlat a ni. Gath Lal Akisa hmaa a intih ât der lai khân fakna hla mawi tak a phuah a, chutah chuan rinna tilangtu hêng thute hi a tel a ni: “Aw, LALPA chu mi fakpui ula, a hming chu i chawimawi tlâng ang u. LALPA chu ka zawng a, tin ani chuan mi chhâng a, ka hlauhzâwng zawng zawng lakah chuan mi chhanhim ta a. Amah ṭihtute chu, an vêlah LALPA vântirhkoh chuan a awm chilh a, a chhanhim ṭhîn. Aw, LALPA ṭhatzia chu tem chhin teh rêng u: Amaha rinna nghat mi chu a eng a thâwl e. LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn. Mi fel hrehawmnate chu a tam a, nimahsela LALPAN chûng zawng zawngah chuan a chhan chhuak ṭhîn,” tihte hi.—Sâm 34:3, 4, 7, 8, 18, 19; 1 Samuela 21:10-15.
16 Chhan chhuak tûra Jehova thiltihtheihna chu i ring em? A vântirhkohte vênhimna i hria em? Nangmah ngeiin Jehova ṭhatzia chu i tem chhin tawh em? I chunga a bîka Jehova ṭhatzia i hriat hnuhnûn ber chu engtikin nge? Hriat chhuah han tum teh. Chu chu rawngbâwlnaa tithei tawh ngang lova i inhriat hnua i tlawh hnuhnûng ber inah em ni? Chutah chuan in neitu nên titina ṭha tak in nei pawh a ni mai thei a ni. I mamawh chakna a pêk che avâng leh mal a sâwm che avângin lâwmthu hrilh nachâng i hria em? (2 Korinth 4:7) Kawng leh lamah chuan, i chunga Jehova ṭhatna engemaw chu ngaihtuah chhuah harsa i ti mai thei a. Chawlhkâr khat emaw, thla khat emaw, kum khat emaw, a aia tam emaw i ngaihtuah lêt a ngai mai thei a ni. Chu chu i awm dân a nih chuan, engah nge Jehova hnaih lehzual a, i kawng a kaihhruai a, a kawhhmuh dânte hmuh chhuah chu i tum loh vang ni? Tirhkoh Petera chuan: “Pathian kut chak tak hnuaiah chuan intihnuai ula, . . . anin a ngaihsak ṭhin che u avângin in manganna zawng zawng ama chungah nghat vek rawh u,” tiin Kristiante chu a fuih a ni. (1 Petera 5:6, 7) A ngaihsak dân che chu mak i ti viau ngei ang!—Sâm 73:28.
Jehova Zawng Zêl Rawh
17. Jehova zawng reng tûr chuan eng nge ngai?
17 Jehova nêna kan inlaichînna chu a ṭhang zêl tûr a ni a. Isua chuan a Pa hnêna a ṭawngṭainaah: “Hei hi chatuana nunna a ni, nang Pathian tak chauh leh i tirh Isua Krista hriat hi,” a ti a. (Johana 17:3) Jehova leh a Fapa hriatna nei tûr chuan, kan beih hrâm hrâm reng a ngai a. “Pathian thu ril” hre tûrin ṭawngṭaina leh thlarau thianghlim ṭanpuina kan mamawh a ni. (1 Korinth 2:10; Luka 11:13) Chu bâkah, kan rilru chu “a hun apianga” thlarau lam chawa châwm tûrin, “bawi rinawm, fing tak” kaihhruaina kan mamawh bawk. (Matthaia 24:45) Chu palai hmang chuan, Jehova chuan nî tina a Thu chhiar tûr te, Kristian inkhâwma tel ziah tûr te, leh “ram chanchin ṭha” hrilhna kawnga ṭhahnemngai taka tel tûr tein min zilh a ni. (Matthaia 24:14) Chutiang tihna hmangin, min ngaihsaktu kan Pathian Jehova chu kan zawng reng ang.
18, 19. (a) Eng nge tih tlat kan tum ang? (b) Diabola kan dodâl tlat a, Jehova kan zawn reng chuan, eng anga mal sâwm nge kan nih dâwn?
18 Setana chuan Jehova mite chunga tihduhdahna te, dodâlna te, leh nêksâwrna te chu kil tin aṭanga thlentîr tûrin a tihtheih apiang a ti a. Remna kan neih chu tihbahlah a tum a, Pathian hmaa dinhmun ṭha kan neih chu tihchhiat a tum a ni. Mi thinlung ṭhate zawng chhuaka lei leh vâna lal chungnunna thu buaia Jehova lam ṭang ni tûra ṭanpuina hna kan thawh zawm zêl chu a duh lo. Mahse, Jehova laka rinawm ngheh chu kan tum tlat tûr a ni a, mi sual laka min chhandam tûrin kan beisei tûr a ni. Pathian Thu inkaihhruaitîrna leh mita hmuh theih a inawpna pâwl belh rengna hmangin, a ṭanpuina kan ring reng thei a ni.—Isaia 41:8-13.
19 Chuvângin, Diabola leh a ngamthlêmnate chu dodâlin, mathei lova ‘min tinghet a, min tichaktu’ kan Pathian duh tak, Jehova chu i zawng reng ang u. (1 Petera 5:8-11) Chuti chuan, “chatuan nunna neihtîrna khawp kan Lalpa Isua Krista khawngaihna chu nghâk chungin, Pathian hmangaihnaah chuan [kan] in vawng ṭha” a ni ang.—Juda 21. (w02 10/15)
Engtin Nge I Chhân Ang?
• “Diabola” tih thu mal awmzia chu eng nge ni a, engtin nge Diabola chu a hming phua a nun?
• Engtin nge leilunga chêngte a enthlâk dânah Jehova chu Diabola laka a danglam?
• Engvângin nge Jehova hnaih nân miin tlanna a pawm ngei ngei a ngaih?
• Jehova “vuan tlat” tih chu eng tihna nge ni a, engtin nge amah kan zawn reng theih ang?
[Phêk 27-naa milem]
Fiahna tuar mah se, Joba chuan Jehova ngaihsakna a hre thiam
[Phêk 28-naa milemte]
Nî tina Bible chhiar te, Kristian inkhâwmnaa tel ziah te, leh thuhrilh rawngbâwlnaa ṭhahnemngai taka telna te chuan Jehova min ngaihsakzia min hriatchhuahtîr