“Inring Rengin Awm Rawh U”!

“In hnêna ka sawi hi mi zawng zawng hnêna sawi ka ni. Inring rengin awm rawh u.”​—MARKA 13:37.

1, 2. (a) Mi pakhatin a thil neih vênhimna chungchângah eng nge a zir chhuah? (b) Rûkru chungchânga Isua tehkhin thu aṭangin, meng renga awm chungchâng eng nge kan zir?

JUAN-A chuan a thilhlu neihte chu a inah a kawl a. In chhûnga hmun him ber nia a hriatna hmun, a khum hnuaiah chuan a dah ṭha thân mai a ni. Nimahsela, zan khat chu a nupui nêna an muthilh hlânin, an mut pindanah chuan rûkru a lo lût a. Rûkru chuan a thil duhzâwng awmna chu a hria a ni ngei mai. Thâwm dîm takin, khum hnuaia thilhlu zawng zawng leh Juan-a’n khum sîr dawhkân pawhdawha pawisa a dahṭhat chu a ru ta vek mai a ni. A tûkah chuan Juan-a chuan rûkruin a rawk tih a hmu chhuak ta. A thil zir chhuah lungngaihthlâk tak chu a hre rei ngei ang le: Muhîl chuan a thil neih a vênghim thei lo, tih chu.

² Hei hi thlarau lam thilah pawh a dik a. Kan muthilh tlat chuan kan beiseina leh kan rinna chu kan vênghim thei lo a ni. Chuvângin, Paula chuan: “Mi dangte angin i muhîl suh ang u khai, i mengin i ngaihven zâwk ang u,” tiin min fuih a ni. (1 Thessalonika 5:6) Men reng a pawimawhzia târ lan nân, Isua chuan rûkru chungchâng tehkhin thu a hmang a. Rorêl tûra a lo kal huna thilthleng tûrte a sawifiah hnuah, heti hian a vaukhân a ni: “Chutichuan ngaihven rawh u, eng niah nge in Lalpa a lo kal dâwn in hre si lo. Nimahsela, hei hi hre rawh u, rûkru a lo kal hun tûr in neituin hria sela, a vêng ang a, a in a reh pawhtîr lo vang. Chuvângin, nangni pawh inring rengin awm rawh u, in rin loh hunah Mihring Fapa a lo kal dâwn si a,” tiin. (Matthaia 24:​42-44) Rûkru chuan a lo kal hun tûr a puang lâwk ngai lo va. Mite’n an beisei loh lai taka lo kal chu a tum zâwk ṭhîn. Chutiang bawkin, he khawvêl tâwpna pawh hi Isua sawi angin, ‘kan rin loh hunah’ a lo thleng dâwn a ni.

“Invêng Ula, Rinnaah Chuan Ding Nghet Ula”

3. An pu mo lawmnaa kal lo haw hun tûr nghâktu chhiahhlawhte tehkhin thu hmangin engtin nge Isua’n men reng a pawimawhzia a târ lan?

³ Chanchin Ṭha Luka ziaka chhinchhiahah hian, Isua chuan Kristiante chu chhiahhlawh, an pu mo lawmnaa kal lo haw hun nghâktute nên a tehkhin a. An pu a lo thlen huna an lo lawm theihna tûrin, an men reng a ngai a ni. Chutiang bawkin, Isua pawhin: “In rin loh hunah Mihring Fapa a lo kal dâwn,” a ti a ni. (Luka 12:40) Jehova rawng rei tak lo bâwl tawh ṭhenkhat chuan, kan chênna hun chungchângah hmanhmawhthlâk a ni tih an hriatna chu an hloh mai thei a. Tâwpna chu lo la thleng lawk lo tûrah an ruat hial pawh a ni thei. Mahse, chutiang ngaih dân chuan kan ngaihtuahna chu thlarau lam thil ata la pêngin, thlarau lama min timuthlu thei khawvêl thil lamah min tlântîr thei a ni.​—Luka 8:14; 21:​34, 35.

4. Eng rin tlatnain nge inring renga awm tûrin min chêttîr ang a, chu chu engtin nge Isua’n a târ lan?

⁴ He Isua tehkhinthu aṭang hian zir tûr dang pawh kan la nei thei a. Chhiahhlawhte chuan an pu lo thlen hun tûr a dârkâr chu hre lo mah se, a rawn thlen zân tûr erawh an hria niin a lang. Chhiahhlawhte chuan an pu chu zan danga lo thleng tûra an ngaih chuan, chu mi zâna zan khuaa men reng chu an harsat hle ang. Mahse, a lo thlen zân tûr chu an hria a, chu chuan meng reng tûrin nasa takin a chawk tho hlawm a ni. Chutiang bawk chuan, Bible hrilh lâwknate chuan tâwpna hunah kan awm tawh a ni tih chiang takin a târ lang a; mahse, tâwpna lo thlen hun tûr nî leh dârkâr erawh min hrilh lo. (Matthaia 24:36) Tâwpna a lo thleng thuai dâwn tih kan rinna chuan meng reng tûrin min ṭanpui a; mahse, Jehova nî chu a hnai tak zet tih kan rin tlat chuan, inring renga awm tûrin min tur nasa lehzual ang.​—Zephania 1:14.

5. Engtin nge “invêng” tûra Paula fuihna hi kan chhân lêt theih?

⁵ Paula chuan Korinth mite hnêna lehkha a thawnnaah: “Invêng ula, rinnaah chuan ding nghet ula,” tiin a fuih a. (1 Korinth 16:13) Ni e, invên reng emaw, men reng emaw chu Kristian rinnaa kan din nghehna nên a inzawm tlat a ni. Engtin nge kan men reng theih ang? Pathian Thu hriatna thûk lehzual neih belh zêlna hmangin. (2 Timothea 3:​14, 15) Mi mal zirna ṭha tak neih leh inkhâwmnaa tel ziahte hian kan rinna a tichak a; tin, Jehova nî rilrua vawn reng hi kan rinna pêng pawimawh tak a ni bawk. Chuvângin, he khawvêl tâwpna hnaih tawh takah kan chêng tih târ langtu Pathian Lehkha Thute a khât tâwka ennawnna chuan, tâwpna lo thleng tûr chungthua thutak pawimawh takte chu theihnghilh lo tûrin min ṭanpui ang.a Chu bâkah, Bible hrilh lâwkna tithleng famkimtu, tûn lai khawvêla thilthlengte lo thlîr reng pawh a ṭha bawk a. German rama unaupa pakhat chuan heti hian a ziak a: “Chanchin thara indona te, lîrnghîng te, tharum thawhna te, leh kan chênna leilung tihchhiat a nihzia te ka thlîr apiangin, tâwpna hnaih tawhzia ka hre chhuak lehzual ṭhîn,” tiin.

6. Eng kawngin nge Isua chuan hun a liam zêl ruala thlarau lama mutthlûk a awlsamzia a tehkhin?

⁶ Marka bung 13-ah chuan, Isua’n a hnungzuitute chu meng renga an awm nâna a fuihna dang kan hmu leh a. He mi bungin a sawi dânin, Isua chuan a hnungzuitute dinhmun chu kawngkhâr vêngtu, a pu ram hla taka zin lo haw hun nghâk rengtu dinhmun nên a tehkhin a. Kawngkhâr vêngtu chuan a pu rawn haw hun tûr chu a hre lo. Inring renga a awm a ngai ringawt mai a ni. Isua chuan a pu lo haw hun tûr âwm, vên hun hunbi chi hrang hrang pali a sawi a. Vên hun tâwp ber, a palina chu zîng dâr thum vêl aṭanga ni chhuah thleng a ni a. Chutih hunah chuan kawngkhâr vêngtu tân chuan mutthlûk a awlsam tawh hle ṭhîn a ni. Sipaite sawi dân chuan, hmêlmate beisei loh taka man theihna hun ṭha ber chu kâwl a ên ṭan hma chiah hi a ni a. Chutiang bawkin, he ni hnuhnûng a tâwpna hunah hian, kan vêla mite thlarau lama tui taka an muthilh laia kan lo men reng theih nân nasa takin kan beih a ngai mai thei a ni. (Rom 13:​11, 12) Chuvângin, Isua’n a tehkhin thuah chuan: “Fîmkhur ula, inring renga awmin ṭawngṭai rawh u . . . Chutichuan inring rengin awm rawh u . . . In hnêna ka sawi hi mi zawng zawng hnêna sawi ka ni. Inring rengin awm rawh u,” tiin min fuih nawn chhên a ni.​—Marka 13:​32-37.

7. Eng thil hlauhawm tak zet nge awm a, chu mi avâng chuan, eng fuihna nge Bible-ah vawi tam tak kan hmuh?

⁷ Isua chuan a rawng bâwl chhûng leh a thawhleh hnuah pawh, harh reng tûrin vawi tam tak min fuih a ni. Dik tak chuan, Pathian Lehkha Thuin he khawvêl tâwpna chungchâng a sawina apiang deuhthawah meng tûr emaw, inring renga awm tûr emawa vaukhânna chu kan hmu a ni.b (Luka 12:​38, 40; Thu Puan 3:2; 16:​14-16) Thlarau lam muthlûkna chu a hlauhawm tak zet tih a chiang hle. Chu vaukhânnate chu kan vaiin kan mamawh ṭheuh a ni!​—1 Korinth 10:12; 1 Thessalonika 5:​2, 6.

Meng Reng Thei Lo Tirhkoh Pathumte

8. Gethsemane huanah khân, amah vênpui tûra Isua ngenna chu tirhkoh pathumte chuan engtin nge an chhân lêt?

⁸ Petera te, Jakoba te, leh Johana te thiltawn aṭanga kan hmuh angin, meng renga awm tûr chuan thiltum ṭha neih mai aia tam a ngai a ni. Hêng mi pathumte hi thlarau mi tak, rinawm nghet taka Isua hnungzuitu leh amah ngaina êm êmtute an ni a. Nimahsela, C.E. 33, Nisan 14 zân chuan, an meng reng thei lo a ni. Kalhlên Kût an neihna pindan chungnung ata chu chhuakin, hêng tirhkoh pathumte hian Isua chu Gethsemane huanah an zui a. Chutah chuan, Isua’n an hnênah: “Ka rilru a lungngai êm êm a, thihna khawp hial a ni; hetah hian awm ula, mi vênpui rawh u,” a ti a. (Matthaia 26:38) Isua chu a Pa, vâna mi hnênah tih tak zetin vawi thum a ṭawngṭai a, a rawn kîrleh apiangin anni chu muhîlin a rawn hmu ṭhîn a ni.​—Matthaia 26:​40, 43, 45.

9. Tirhkohte mut tichhuaktu chu eng nge ni thei ang?

⁹ Engvângin nge hêng mi rinawm pathumte hian chu mi zân chuan Isua chu an tihbeidawn? A chhan pakhat chu an chauh êm vâng a ni. Khua a tlai tawh hle a, zanlai a pelh tawh avângin “an mut a chhuak hle” mai a ni. (Matthaia 26:43) Chuti chung pawhin, Isua chuan: “Thlêmnaa in luh loh nân inring rengin ṭawngṭai rawh u; thlarau zawngin a peih a, tisa erawh chu a chak lo a ni,” a ti a ni.​—Matthaia 26:41.

10, 11. (a) Isua chu chau hle mah se, engin nge Gethsemane huanah khân inring renga awm tûrin ṭanpui? (b) Isua’n tirhkoh pathumte hnêna vênpui tûra a ngen ṭuma an chunga thilthleng aṭangin eng nge kan zir theih?

¹⁰ Rinhlelhrual lovin, Isua pawh chu zân pawimawh takah chuan a chau ve ngei ang. Nimahsela, muhîl mai lovin, chu a hun neih hnuhnûng ber chu tih tak zeta ṭawngṭai nân a hmang ta zâwk a ni. Chu mi nî a lo thlen hma lawk chuan, a zirtîrte chu: “Chutichuan chûng thil lo thleng tûr zawng zawng chu pumpelh tlâkah leh Mihring Fapa hmaa ding tlâka ruat in nih theihna tûrin, eng lai pawhin ṭawngṭai chungin ngaihven rawh u,” tia hrilhin, ṭawngṭai tûrin a fuih a ni. (Luka 21:36; Ephesi 6:18) Ṭawngṭai chungchânga Isua zilhna kan ngaih pawimawh a, a entawn tûr siam ṭha tak chu kan zui chuan, Jehova hnêna tih tak zeta kan dîlnate chuan thlarau lama meng reng tûrin min ṭanpui ang.

¹¹ Isua chuan​—chutih hun lai chuan a zirtîrte’n hre thiam lo mah se​—rei lo têah man a ni ang a, thi tûra thiam loh chantîr a ni dâwn tih a hre kar a. A fiahna tawn chuan nghaisakna banah a vâwrtâwp a thleng dâwn a ni. Isua chuan chûng thilte chu a tirhkohte a hriattîr vek tawh a; mahse, a sawi chu an la hre thiam lo va. Chuvângin, ṭawngṭaia a inrin reng laiin, anni chu an lo muthlu a ni. (Marka 14:​27-31; Luka 22:​15-18) Tirhkohte ang bawkin, kan taksa pawh hi a chau va; tin, thil tam tak hriat loh kan la nei a ni. Chuti chunga kan chênna hun hmanhmawhthlâk tawhzia hi kan theihnghilh lehzêl phei chuan, thlarau lamah kan muthlu thei a ni. Kan harhfîm chauhvin kan meng reng thei dâwn a ni.

Mize Pawimawh Chi Thum

12. Kan ngaihven theihna chu eng mize chi thum nên nge Paula’n a thlunzawm?

¹² Engtin nge a hmanhmawhthlâk a ni tih kan hriatna chu kan vawn reng theih ang? Ṭawngṭai pawimawhzia leh Jehova nî rilrua vawn reng a pawimawhzia kan hre tawh a. Chûngte bâkah, Paula chuan kan neih tûr mize pawimawh tak chi thum a sawi leh a ni: “Keini zawng chhûna mi kan nih avâng hian rinna leh hmangaihna âwmphaw chu hain, chhandam beiseina chu lukhuma hmangin i ngaihven zâwk ang u,” tiin. (1 Thessalonika 5:8) Tûnah chuan rinna te, beiseina te, leh hmangaihna te chuan thlarau lama harhfîm tûra min ṭanpui dân tâwi têtêin lo en ila.

13. Harhfîma kan awm nân rinnain eng chanvo nge a neih?

¹³ Jehova a awm tih leh amah “zawngtute hnêna lâwmman pêk hmang a ni” tih rinna tihnghîn rual loh kan nei tûr a ni. (Hebrai 11:6) Tâwpna chungchânga Isua hrilh lâwkna thlen famkimna hmasa, kum zabi pakhatnaa mi chuan kan huna a thlen famkimna ropui zâwk tûra kan rinna chu a tinghet a ni. Tin, kan rinna chuan Jehova nî chu nghâkhlel takin min thlîrtîr a, “[Inlârna] chu a lo thlen ngei dâwn avângin a tlai chuang lo vang” tih min rin nghehtîr a ni.​—Habakuka 2:3.

14. Engvângin nge meng reng tûr chuan beiseina a pawimawh?

¹⁴ Kan beiseina chiang tak chu “nunna thîrchakai” ang a ni a, chu chuan Pathian thutiam thlen famkimna engemawte chu nghah a ngaih hunah pawh harsatnate chhel taka tuar tûrin min ṭanpui a ni. (Hebrai 6:​18, 19) Thlarauva hriak thih, tûn hma kum 70 chuanga baptisma chang, tûna kum 90 chuang tawh Margaret-i chuan, heti hian a sawi: “Kum 1963-a ka pasal cancer veia a thih lek lek khân, khawvêl tâwp thuai se ka ti hle ṭhîn a. Mahse, tûnah chuan keima hmakhua chauh ka lo ngaihtuah ṭhîn tih inka hre chhuak a ni. Kha tih lai kha chuan, khawvêl pum puia rawngbâwlna darhzau dân tûr kha kan lo ngaihtuah thiam lo va. Tûnah ngei pawh hian, hmun tam takah chung rawngbâwlna neih ṭan a ni chauh a ni. Jehova’n dawhtheihna a lo lantîr avâng hian, ka lâwm tak zet a ni,” tiin. Tirhkoh Paula chuan heti hian min tiam a: “Chhelna chuan hriatfiahna a siam a, hriatfiahna chuan beiseina a siam . . . beiseina chuan a timualpho [“tibeidawng,” NW] lo va,” tiin.​—Rom 5:​3-5.

15. Hun rei tak chhûng lo nghâk tawh mah ila, engtin nge hmangaihna chuan min chêttîr ang?

¹⁵ Kristian hmangaihna hi kan thiltih zawng zawnga min chêttîrtu ber a nih avângin, mize ropui tak a ni. A hun duan chu eng pawh ni se, amah kan hmangaih avângin Jehova rawng kan bâwl a. Ṭhenawmte kan hmangaihna chuan Lalram chanchin ṭha hril tûrin min chêttîr a ni: Pathian duhzâwng chu eng anga rei tih ngai leh in khatah vawi tam tak kal nawn ngai pawh ni se. Paula’n “hêng pathum rinna te, beiseina te, hmangaihna te hi a awm reng ang; tin, hêngahte hian a ropui ber chu hmangaihna hi a ni,” tia a ziak angin. (1 Korinth 13:13) Hmangaihna chuan chhel tûr leh harhfîm reng tûrin min ṭanpui a. “[Hmangaihna] chuan engkim a beisei a, engkim a tuar chhuak ṭhîn. Hmangaihna hi engtikah mah a reh lo vang.”​—1 Korinth 13:​7, 8.

“I Thil Neih Sa Kha Vawng Tlat Rawh”

16. Thatchhiat ai chuan, eng ang rilru put hmang nge kan neih zâwk ang?

¹⁶ Khawvêla thilthleng apiangte’n ni hnuhnûng tâwpna huna kan awm tawhzia min hriatnawntîrna hun pawimawh takah kan chêng a. (2 Timothea 3:​1-5) Tûn hi thatchhiat hun a ni lo va; ‘kan ‘thil neih sa vawn tlat’ hun a ni. (Thu Puan 3:11) ‘Ṭawngṭai theih nâna rilru harhfîmna’ hmangin leh rinna te, beiseina te, leh hmangaihna te neihna hmangin, fiahna hunah hmachhawn tûrin kan lo inpeih reng ang. (1 Petera 4:7) Lalpaah chuan tih tûr tam tak kan nei a. Pathian ngaihsak kawnga buai rengna chuan harhfîm tak tak tûrin min ṭanpui ang.​—2 Petera 3:11.

17. (a) Engvângin nge a châng chânga beidawnnate chuan min tihlunghnual loh vang? (Phêk 17-a bâwm en rawh.) (b) Engtin nge Jehova chu kan entawn theih a, a entawntute chu eng malsâwmnain nge hmuak?

¹⁷ Jeremia chuan: “LALPA chu ka chanpual a ni, . . . chuvângin amah chu ka beisei ang. LALPA chu amah nghâktute tân a ṭha a, amah zawngtu tân chuan. LALPA chhandamna beiseia nghah veng veng chu a ṭha a ni,” a ti a. (Jeremia Ṭah Hla 3:​24-26) Kan zînga ṭhenkhat chuan hun rei lote chhûng chauh an la nghâk a. A dangte chuan Jehova chhandamna hmu tûrin kum tam tak chhûng an lo nghâk tawh thung a ni. Mahse, tûna kan nghah hun chhûng hi chatuan lo la awm tûr nêna khaikhin chuan a va rei lo êm! (2 Korinth 4:​16-18) Jehova hun tiam kan nghah chhûng hian, Kristian mize pawimawhte kan chhawmnung thei a, mi dangte chu Jehova dawhtheihna chhawr ṭangkai a, thutak pawm tûrin kan ṭanpui thei bawk a ni. Chuvângin, kan za hian inring rengin i awm ṭheuh vang u. Jehova entawnin dawhthei ila, beiseina min pêk avângin i lâwm hle ang u. Tin, rinawm taka kan harhfîm reng pahin, chatuan nun beiseina kan neih chu i vuan nghet tlat bawk ang u. Tichuan, hêng hrilh lâwk thu thutiam: “[Jehova chuan] ram hi luah tûrin a chawimawi ang che: mi suaksualte tihborala an awm lai chu i la hmu ang,” tihte hi kan chungah a thleng dik ngei dâwn a ni.​—Sâm 37:34. (w03 1/1)

[Footnote-te]

Engtin Nge I Chhân Ang?

• Engtin nge he khawvêl tâwpna a hnai tawh tih kan rinna chu kan tihngheh theih?

• Petera te, Jakoba te, leh Johana te thiltawn aṭangin eng nge kan zir theih?

• Eng mize chi thumin nge thlarau lama harhfîm tûrin min ṭanpui ang?

• Engvângin nge tûn hi ‘kan thil neihsa vawn tlat’ hun a nih?

[Phêk 17-naa bâwm/milem]

“Nghâk Hrâm Hrâma . . . Chu A Eng A Thâwl E.”​—Daniela 12:12

Kawngkhâr vêngtu chuan a in vên chu rûkruin rawk a tum tih hriat rûkna a nei tlat maiah han chan teh. Zân a lo thlen chuan, kawngkhâr vêngtu chuan rûkru a lo kal tih hriattîrtu thawm chu ngun takin a ngaithla a. Dârkâr a han liam zêl a, a beng leh a mit chu a chhi rân mai a. Thil ri hlek​—thliin thinghnah a chhêmrîk emaw, zawhtêin thil a rah rîk emaw​—chuan a bum awlsam tûrzia chu ngaihruat a har lo vang.​—Luka 12:​39, 40.

Chutiang bawk chu nghâkhlel taka ‘kan Lalpa Isua Krista inlârna nghâktute’ chungah pawh a thleng thei a ni. (1 Korinth 1:7) Tirhkohte chuan Isua’n thihna ata kaihthawh a nih veleha ‘Israelte hnêna ram a pêk leh’ an ring a. (Tirhkohte 1:6) A hnu kum engemaw zâtah chuan, Thessalonika khuaa Kristiante chu Isua lo awmlehna chu nakina lo la thleng tûr a nihzia hriatnawntîr an ngai a ni. (2 Thessalonika 2:​3, 8) Mahse, Jehova nî chungchânga an beiseina a thlen famkim loh avângin, Isua hnungzui hmasatute chuan nunna kawng chu an kalsan chuang lo.​—Matthaia 7:13.

Kan hunah pawh, kan rin anga he khawvêl tâwpna lo thleng lawk lo tûra ngaihna avânga lunghnualna chuan kan harhfîmna a titâwp tûr a ni lo. Kawngkhâr vêngtu harhfîm tak chu thâwm dangin a bum pawh a ni thei; mahse, a inring reng tûr a ni tlat! Chu chu a hna a ni si a. Kristiante pawh chutiang bawk chu an ni.

[Phêk 14-naa milem]

Jehova nî a hnai tawh tih i ring tlat em?

[Phêk 15-naa milemte]

Inkhâwm te, ṭawngṭai te, leh zirna ṭha tak neihte hian inring reng tûrin min ṭanpui

[Phêk 18-naa milem]

Margaret-i angin, dawhthei tak leh harhfîm takin i inring reng ang u