Chhiartute Zawhna
Ranvulh hrisêl lo tak emaw, târ tawh tak emaw tihhlum chu a sual em?
Mi tam tak chuan ran chi hrang hrang chu an tuipuiin, an hlimpui hle a. In lama vulh ran ṭhenkhat phei chu ṭhian ang hial an lo ni thei a ni. Entîr nân, ui hi an pute thuâwih leh ngainatna lama lâr a ni a. Chuvângin, chutiang ranvulh chunga miin ngainatna nasa tak a nei pawh hi a hriatthiam awm hle, a bîk takin kum tam tak an lo vulh tawh phei chuan.
Nimahsela, ranvulh tam tak chu an dam rei vak lo va. Ui leh zawhtê te chu an chi azirin kum 10 aṭanga 15 thleng vêl chauh an dam a ni. Ranvulhte chu an lo upat chuan, an lo hrisêl lovin, ramtuileilovin an awm thei a; chu chuan, a dam ṭhat lai lo hmutu, a vulhtu rilru chu a tihrehawm thei a ni. Chutiang rante chu an hrehawmna ata an chawlhhahdamna tûra tihhlum mai chu a sual ang em?
Kristian chuan ran sate chungah Pathian duhzâwng nêna inrema chêt chu a duh ngei ang a. An chunga nunrâwn chu Pathian duhzâwng a ni hauh lo mai, a Thu chuan: “Mi fel chuan a ran nunna a engto va,” a ti. (Thufingte 12:10) Amaherawhchu, Pathianin ran sate chu mihring nêna thuhmun angin a thlîr tihna a ni lo. Pathianin mihring a siam khân, mihring leh ran sate inkâra danglamna awm chu chiang takin a târ lang a. Entîr nân, mihringte hnênah chatuana nun beiseina a pe a; mahse, ran sate hnênah chuan a pe ve lo. (Rom 6:23; 2 Petera 2:12) Siamtu a nih avângin, ani chuan mihringte leh ran sate inkâra inlaichîn dân tûr ruat tûrin dikna a nei a ni.
Genesis 1:28 chuan chu inlaichînna chu a târ lang a. Mihring hmasa berte hnênah Pathianin: “Tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” a ti. Chutiang bawkin, Sâm 8:6-8 pawhin: “[Mihring] ke hnuaiahte engkim [Pathianin a] dah a: berâm leh bâwng zawng zawngte nên, a ni, ram sate nên pawh; chunglêng sava leh tuifinriat sanghate . . . nên,” a ti.
Pathianin ran sate chhawr theih leh thah theih a nih thu a sawi chiang hle a. Entîr nân, an vun chu kâwr atân a hman theih a. Pathianin Nova Tuilêt a thlen hnuah ran sate chu chaw atâna ei phalna pein, atîra chaw atâna thlai a pêk chu a belhchhah bawk a ni.—Genesis 3:21; 4:4; 9:3.
Hei hian chhan awm lo leh infiamna atân maia ran sate thah mai mai chu a phal tih a kâwk lo. Genesis 10:9 chuan Bible chuan Nimroda chu “sapêl mi chak tak” angin a sawi a. Chu mi hma lawkah “Lalpa hmaah chuan [“kalhin,” NW]” tih ziak a ni.
Chuvângin, mihringin ran sate chungah thuneihna nei mah se, a thuneihna a hmang khawlo tûr a ni lo va, Pathian Thua thu bulte milin a hmang zâwk tûr a ni. Chutah chuan, kan ranvulh tar takte, hliam nasa tak tuarte, a nih loh leh natna khirh tak tuarte chu ṭûl lo taka tawrhtîr reng loh a tel thei ang. Chutiang dinhmunah chuan, Kristianin mawhphurhna lain thu a titlu ang. A dam chhuah beisei awm si lova tawrhtîr reng loh chu a ṭha zâwk dâwn nia thu a tihtlûk chuan, a ranvulh chu a tihlum thei ang. (w03 6/1)