Engvângin Nge Bâng Lovin Kan Ṭawngṭai Ang?
“Bâng lovin ṭawngṭai ula; engkimah lâwmthu hril fo rawh u.” —1 Thessalonika 5:17, 18.
1, 2. Engtin nge Daniela chuan ṭawngṭaina chanvo a hlutzia a lantîr a, chu chuan Pathian nêna an inlaichînnaah eng nghawng nge a neih?
ZAWLNEI Daniela chu ni khatah vawithum Pathian hnênah a ṭawngṭai ziah a. Jerusalem khawpui lam hawi, a in chung tukverh inhawng hmaah chuan ṭhingṭhiin a ṭawngṭai ṭhîn. (1 Lalte 8:46-49; Daniela 6:10) Daria hnênah chauh lo chuan tu hnênah mah ṭawngṭai lo tûra khapna lal dân chhuah a ni chung pawhin, Daniela chuan vawite khat mah a ṭhulh lo. A nun atân a hlauhawm emaw, hlauhawm lo emaw pawh ni se, he ṭawngṭai mi tak hi Jehova hnênah bâng lovin a ṭawngṭai a ni.
2 Engtin nge Jehova chuan Daniela chu a thlîr? A ṭawngṭainate zînga pakhat chhâng tûra vântirhkoh Gabriela a lo kal khân, zâwlnei chu mi “duhawm tak” a nih thu a sawi a ni. (Daniela 9:20-23) Ezekiela hrilh lâwknaah, Jehova chuan Daniela chu mi fel a nih thu a sawi bawk. (Ezekiela 14:14, 20) A dam chhûng zawngin Daniela ṭawngṭaina chuan a Pathian nêna inzawmna ṭha a neihtîr a, chu chu Daria ngei pawhin a pawm a ni.—Daniela 6:16.
3. Missionary pakhat thiltawnin a târ lan angin, engtin nge ṭawngṭaina chuan rinawm reng tûra min ṭanpui?
3 Ṭawngṭai ziahna pawhin fiahna nasa tak hmachhawn thei tûrin min ṭanpui thei bawk. Entîr nân, China rama missionary thawk, kum nga chhûng tân ina khung hran Harold King chungchâng hi ngaihtuah teh. A thiltawn chungchâng chu ani chuan heti hian a sawi: “Ka mihringpuite lak aṭang chuan lâk hran ka ni mai thei; mahse, Pathian lak aṭang chuan tuman min la hrang thei lo. . . . Bible-in Daniela chungchâng a sawi chu hre rengin, ka awmna hmun kal tlang apiangte hmuh theihah, ni khatah vawithum aw chhuahin ka ṭawngṭai ziah ṭhîn. . . . Chutiang hunah chuan Pathian thlarau chuan thil ṭangkai ber lamah ka rilru a kaihruai a, thlamuanna min pe niin a lang. Ṭawngṭaina chuan thlarau lam chakna leh tlamuanna min va pe tak êm!” tiin.
4. He thuziakah hian ṭawngṭaina chungchâng eng zawhnate nge kan ngaihtuah dâwn?
4 Bible chuan: “Bâng lovin ṭawngṭai ula: engkimah lâwmthu hril fo rawh u,” a ti. (1 Thessalonika 5:17, 18) He fuihna hi ṭanchhanin a hnuaia zawhnate hi i ngaihtuah ang u: Engvângin nge kan ṭawngṭai dân hi kan ngaihtuah ngun ang? Jehova pan rengna tûr chhan eng nge kan neih? Kan tlin lohnate avânga Pathian hnêna ṭawngṭai tlâk lova kan inngaih chuan eng nge kan tih ang?
Ṭawngṭaina Hmangin Inṭhianna Siam Rawh
5. Ṭawngṭaina hian eng ang inṭhianna ṭha nge nei tûra min ṭanpui?
5 Jehova’n a ṭhian anga a ngaih che i duh em? Thlahtu Abrahama chu chutiangin a ngai a ni. (Isaia 41:8; Jakoba 2:23) Jehova chuan amah nêna chutianga inlaichînna kan neih chu a duh a. Amah hnaih tûrin min sâwm hial a ni. (Jakoba 4:8) Chu sâwmna chuan ṭawngṭai theihna chanvo hlu tak chu min ngaihtuah nguntîr tûr a ni lâwm ni? Sawrkâr hotu pawimawh ṭhian nih chu sawi loh, amah be tûr ringawta phalna lâk pawh a va harsa tak êm! Mahse, lei leh vân Siamtu erawh chuan kan duh hun apiang emaw, kan mamawh hun apiang emawa ṭawngṭaia zalên taka amah pan tûrin min fuih a ni. (Sâm 37:5) Bâng lova kan ṭawngṭaina chuan Jehova nêna inṭhianna nghet nei tûrin min ṭanpui a ni.
6. Isua entawn tûr siam chuan “ṭawngṭai reng” a pawimawhzia chungchângah eng nge min zirtîr?
6 Mahse, ṭawngṭai chu kan va ngaihthah awl si êm! Kan nî tin nuna nêksâwrnate hian kan rilru a lâk hneh lutukna lamah Pathian nêna inbiakna hun pawh kan insiam thei ṭhîn lo. Isua chuan a zirtîrte chu “ṭawngṭai reng” tûrin a fuih a, amah ngei pawh a ṭawngṭai reng a ni. (Matthaia 26:41, NW) Nilêngin buai reng ṭhîn mah se, a Pa vâna mi biak nân chuan hun a insiam ṭhîn a. A châng chuan Isua chu “zîngah khawvâr hma daihin” ṭawngṭai tûrin a tho ṭhîn a ni. (Marka 1:35) Hun dangah chuan, nilênga a buai hnuah Jehova a biak theih nân hmun fianrialah a châwl ṭhîn bawk. (Matthaia 14:23) Isua chuan ṭawngṭai nân hun a insiam reng a, keini pawh kan insiam ve tûr a ni.—1 Petera 2:21.
7. Eng dinhmunte’n nge kan Pa vâna mi nî tina be tûra min chêttîr ang?
7 Buainate, thlêmnate, leh thutâwp siam tûrte kan hmachhawn ṭhin avângin nî tin hian mahnia ṭawngṭaina tûr hun ṭha kan nei reng a. (Ephesi 6:18) Kan nun kawng engkima Pathian kaihhruaina kan zawn hian, amah nêna kan inṭhianna chu a ṭhang ngei dâwn a ni. Ṭhian pahnihin buaina tâwk dûn ta se, an inṭhianna chu a nghet sawt dâwn lo vem ni? (Thufingte 17:17) Chutiang bawkin, Jehova chunga kan innghah a, a ṭanpuina kan dawn hian, kan inṭhianna pawh a nghet sawt ṭhîn a ni.—2 Chronicles 14:11.
8. Nehemia te, Isua te, leh Hani te entawn tûr siam aṭangin, kan mi mal ṭawngṭaina rei zâwng tûrah eng nge kan zir?
8 Pathian hian ṭawngṭaia amah kan biak rei zâwng tûr emaw, kan biak ngun dân tûr emaw bituk chin min siamsak lo hi a va lâwmawm êm! Nehemia chuan Persia lal hnêna dîlna a thlen hmain a rilruin a ṭawngṭai zawk a. (Nehemia 2:4, 5) Isua pawh Lazara kaitho tûra Jehova hnêna thiltihtheihna a ngen khân, a ṭawngṭai tâwi hle a ni. (Johana 11:41, 42) A leh lamah lah Hani chu Jehova hnêna a thinlung a phawrh chhuah ṭumin, rei tak ‘LALPA hmaah a ṭawngṭai reng’ thung. (1 Samuela 1:12, 15, 16) Kan mi mal ṭawngṭaina chu kan mamawh ang leh dinhmun azirin a tâwiin, a sei thei a ni.
9. Engvângin nge kan ṭawngṭainaah hian kan tâna Jehova thiltih zawng zawngte avânga amah fakna leh lâwmthu sawina a tel ang?
9 Bible-a ṭawngṭaina tam tak hi Jehova dinhmun chungnunna leh a thiltih makte ngaihhlutna ṭawngkam a ni hlawm a. (Exodus 15:1-19; 1 Chronicles 16:7-36; Sâm 145) Inlârnaah tirhkoh Johana chuan upa 24-te—an van lam dinhmun chelh hriak thih Kristian zawng zawngte—chu “Nang, kan Lalpa leh kan Pathian, ropuina te, chawimawina te, thiltihtheina te chu hmu tlâk i ni e; nangin engkim i siam a, i duh avânga awm leh siam a ni bawk si a,” tia Jehova faka zai lai a hmu a. (Thu Puan 4:10, 11) Keini pawhin Siamtu fak ziah nachhan tûr kan nei a ni. Thil engemaw an tihsak avânga an fate’n thinlung chhûng aṭanga lâwmthu an hrilh hian nu leh pate chu an va hlim thei tak êm! Jehova ngilneihna hlut taka ngaihtuahna leh chu mi avânga kan lâwmzia sawi chhuah chu ṭawngṭai ṭhat theih dân kawng ṭha ber a ni.
‘Bâng Lova Ṭawngṭai’—Engvâng Nge?
10. Kan rinna tihchakna kawngah ṭawngṭaina hian eng chanvo nge a neih?
10 Ṭawngṭai ziah hi kan rinna atân a ṭûl a. ‘Beidawng lova ṭawngṭai fo’ a ṭûlzia tehkhin thu a sawi hnuah, Isua chuan: “Mihring Fapa hi a lo kal hun chuan khawvêlah hian rinna a rawn hmu ang em ni?” tiin a zâwt a. (Luka 18:1-8) Tih tak zeta awmze nei taka ṭawngṭaina chuan rinna a tichak a ni. Thlahtu Abrahama chuan a tar hnu pawha fa a la neih loh avângin, chu mi chungchângah chuan Jehova a bia a. A chhân nân Jehova chuan vân lam hawi chho va, a theih chuan vâna arsite chhiar tûrin a ti phawt a. Chutah Pathian chuan Abrahama chu: “I thlahte chu khiti zât khi an la ni ang,” tiin a tiam a ni. Eng nge a rah chhuah? Abrahama chuan “LALPA chu a ring a; tichuan ani chuan chu chu a felnaah a ruatsak ta a.” (Genesis 15:5, 6) Ṭawngṭaina hmanga Jehova hnêna kan thinlung kan phawrh a, Bible aṭanga a thutiamte kan pawm a, a thu kan âwih bawk chuan, kan rinna a tichak ngei ngei ang.
11. Engtin nge ṭawngṭaina chuan buainate hmachhawn thei tûra min ṭanpui theih?
11 Ṭawngṭaina chuan buainate chingfel thei tûrin min ṭanpui thei bawk. Nuna kan thil tawnte chu a harsain, kan dinhmun tawnte chu a khirh em? Bible chuan: “I rit phurh chu LALPA chungah nghat la, tichuan anin a tichak ang che; mi fel chu engtikah mah tihnghîn a phal lo vang,” tiin min hrilh a ni. (Sâm 55:22) Thutlûkna siam harsa tak kan tawng a nih chuan, Isua entawn tûr siam hi kan zui thei a ni. Ani chu a tirhkoh 12-te a thlan hmain zankhuain a ṭawngṭai a ni. (Luka 6:12-16) Tin, a thih hma zânah pawh, Isua chu nasa takin a ṭawngṭai a, “a thlan chu thi far lian tak angin leiah a far” hial a ni. (Luka 22:44) Eng nge a rah chhuah? “A ṭih dêk ṭhin avângin ngaihthlâkin a awm,” a ni. (Hebrai 5:7) Ṭhahnemngai tak leh bâng lo va kan ṭawngṭaina chuan dinhmun harsa leh fiahna khirh tak takte tuar thei tûrin min ṭanpui ang.
12. Engtin nge ṭawngṭaina chuan Jehova’n a mi malin min ngaihsak tih a târ lan?
12 Ṭawngṭaina hmanga Jehova kan hnaihna tûr chhan dang leh chu, chutianga kan tih chuan ani pawhin min hnaih ve dâwn vâng a ni. (Jakoba 4:8) Ṭawngṭaina hmanga Jehova hnêna kan thinlung kan phawrh hian, kan mamawhte chu a ngaihsakin, min ngaihtuah hle tih kan hre thei a ni lâwm ni? Pathian hmangaihna chu a mi mal takin kan dawng a. Jehova chuan a chhiahhlawhte’n an Pa vâna mi anga a hnêna ṭawngṭaina an hlante ngaithla tûrin tu hnênah mah mawhphurhna a pe lo. (Sâm 66:19, 20; Luka 11:2) ‘Anin min ngaihsak ṭhin avângin kan manganna zawng zawng ama chungah nghat vek’ tûrin min sâwm a ni.—1 Petera 5:6, 7.
13, 14. Bâng lo va ṭawngṭai chhan tûr eng nge kan neih?
13 Ṭawngṭaina chuan vântlâng rawngbâwlnaa ṭhahnemngai lehzual tûrin min tichak theiin, mite min chhân lêt ṭhat loh avâng emaw, dodâlna avâng emawa rawngbâwlna bânsan kan duh hunin min tichak thei bawk a ni. (Tirhkohte 4:23-31) Ṭawngṭaina chuan “Diabola ngamthlêmnate” lakah min vênghim thei bawk. (Ephesi 6:11, 17, 18) Nî tina fiahna kan tawnte hneh tûra kan beih hian, Pathian hnênah min tichak tûrin kan dîl reng thei a ni. Isua’n ṭawngṭai dân min zirtîrah chuan, Diabol-Setana ‘misual laka min chhandam’ tûra Jehova hnêna ngenna pawh a tel a ni.—Matthaia 6:13.
14 Kan pianpui sual ngaihtuahna thununna kawnga ṭanpuina kan dîl reng chuan, Jehova ṭanpuina kan dawng ang. He thutiam hi kan nei a ni: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tih hi. (1 Korinth 10:13) Tirhkoh Paula ngei chuan dinhmun chi hrang hrang hnuaiah Jehova tihchakna a tawng a ni. Ani chuan heti hian a ti: “Mi tichaktuah chuan engkim ka ti thei a ni.”—Philippi 4:13; 2 Korinth 11:23-29.
Tling Lo Chung Pawha Ṭawngṭai Fan Fan
15. Kan nungchângin Pathian tehnate a tlin loh hian eng nge lo thleng thei?
15 Kan ṭawngṭaina ngaihthlâk ni tûr chuan, Pathian Thu zilhna chu kan hnâwl tûr a ni lo. Tirhkoh Johana chuan: “A thupêkte kan zawm a, a mithmuha thil lâwmawm kan tih ṭhin avângin, kan dîl apiang a hnên ata kan hmu zêl ṭhîn,” tiin a ziak a ni. (1 Johana 3:22) Mahse, kan nungchangin Pathian tehnate a tlin loh chuan eng nge lo thleng thei? Adama leh Evi chu thil sual an tih hnuah Eden huanah an biru a. Keini pawhin ‘LALPA Pathian bihrûksan’ a, ṭawngṭai tawh lohte kan duh mai thei. (Genesis 3:8) Bial kantu Klaus chuan: “Jehova leh a inawpna pâwl aṭanga tawlh bote tihsual hmasak ber ni fo chu ṭawngṭai loh hi a ni,” a ti. (Hebrai 2:1) José Ángel chu chutiang mite zînga pakhat chu a ni a. Heti hian a sawi: “Kum riat dâwn lai chu Jehova hnêna ṭawngṭai ngai mang lovin ka awm a. Ka Pa vâna mi angah la ngai tho mah ila, amah be tlâkah ka inngai lo a ni,” tiin.
16, 17. Ṭawngṭai ziahnain thlarau lama chak lohna hneh tûra min ṭanpui theih dân entîrna pe rawh.
16 Kan zînga ṭhenkhat chu thlarau lama kan chak loh vâng emaw, thil ṭha lo kan tih vâng emawin ṭawngṭai tlâk lovah kan inngai mai thei. Mahse, chu mi hun tak chu a ni, ṭawngṭai theihna hman ṭangkai kan mamawh zual lai tak chu ni. Jona chuan a hna thawh tûr chu a tlân chhiatsan a. Mahse, ‘a hrehawmna avângin LALPA chu a ko va, anin a chhâng a; seol kawchhûng aṭangin a au va, anin a aw a hria’ a ni. (Jona 2:2) Jona chu a ṭawngṭai a, Jehova chuan a ṭawngṭaina chu a chhâng a; tichuan, thlarau lamah a lo chak tharleh ta a ni.
17 José Ángel pawh ṭanpui dîlin a ṭawngṭai fan fan a. Heti hian a sawi leh a ni: “Ka thinlung ka hawng a, Pathian hnênah ngaihdam ka dîl a. Tichuan, ani’n min ṭanpui tak zet a ni. Ṭawngṭainain min ṭanpui lo se la chuan thutakah ka kîr leh ka ring lo. Tûnah chuan nî tin ka ṭawngṭai ziah tawh a, chûng ṭawngṭai hunte chu ka nghâkhlel thei êm êm a ni,” tiin. Pathian hnênah chuan kan thiltihsualte hrilh leh inngaitlâwm taka a ngaihdamna dîlte chu kan hreh ngai tûr a ni lo. Lal Davida’n a thiltih sual a puan khân Jehova chuan a sualte a ngaihdam a. (Sâm 32:3-5) Jehova chuan thiam loh min chantîr ni lovin, min ṭanpui chu a duh a ni. (1 Johana 3:19, 20) Tin, kohhrana upate ṭawngṭaina chuan thlarau lamah min tidam thei a ni, chûng mite ṭawngṭaina chuan “thil nasa tak a ti ṭhîn” si a.—Jakoba 5:13-16.
18. Pathian chhiahhlawhte chuan eng anga hla pawhin tawlh bo mah se, eng rinna nge an neih theih?
18 Thil a tihsual hnua ṭanpuina leh thurâwn dîla inngai tlâwm taka a pa pantu fapa chu tu pain nge lo hnâwl ang? Fapa tlân bo tehkhin thu chuan eng anga hla pawhin tawlh bo mah ila, a hnêna kan kîrleh phawt chuan kan Pa vâna mi chu a hlim tih a târ lang a ni. (Luka 15:21, 22, 32) Jehova chuan thil tisual zawng zawngte chu amah ko tûrin a fuih a ni, “anin a ngaidam nasa khawp dâwn si a.” (Isaia 55:6, 7) Davida chuan sual khûn khân tak tak engemaw zât ti mah se, hetiang hian Jehova a ko a ni: “Aw Pathian, ka ṭawngṭainaah hian beng lo chhi la; khawngaih ka dîlnaah hian inthup suh ang che,” tiin. Hetiang hian a ti leh bawk: “Tlaiah te, zîngah te, chhûnah te ka mangan thu ka sawiin ka rûm ang a: tichuan, anin [Jehova’n] ka aw a ngaithla ang,” tiin. (Sâm 55:1, 17) A va han thlamuanthlâk êm!
19. Engvângin nge ṭawngṭaina chhân loh ni âwm taka langte hi Pathian pawm loh vânga kan ngaih mai loh vang?
19 A nih leh kan dîlna chu chhân nghâl ni lo ta se, engtin nge ni ang? Kan dîlna chu Jehova duhzâwng nên a inmilin, Isua hmingin kan dîl ngei tih kan tichiang tûr a ni. (Johana 16:23; 1 Johana 5:14) Zirtîr Jakoba chuan Kristian ṭhenkhat ‘an dîl dik loh avânga’ an ṭawngṭaina chhân lohva awmte chungchâng a sawi a. (Jakoba 4:3) A leh lamah chuan, kan ṭawngṭaina chhân loh nia langte pawh hi Pathianin a pawm loh vângah kan ngai nghâl mai tûr a ni lo. Jehova chuan amah betu rinawmte ṭawngṭaina a chhânna a lan chian hmain, engemaw chen an ṭawngṭai tlut tlut chu a remti a ni. Isua chuan: “Dîl reng rawh u, tichuan an pe ang che u,” a ti. (Matthaia 7:7, NW) Chuvângin, kan “ṭawngṭai fan fan” a ngai a ni.—Rom 12:12.
Ṭawngṭai Ziah Rawh
20, 21. (a) Engvângin nge hêng “ni hnuhnûngahte” hian bâng lo va kan ṭawngṭai a ngaih? (b) Nî tina Jehova khawngaihna lalṭhutphah kan pan ziah chuan eng nge kan dawn ang?
20 “Hun khirh takte” hmanga chhinchhiah hêng “ni hnuhnûngahte” hian, nêkchêpna leh buainate a pung telh telh a. (2 Timothea 3:1) Fiahnate hian awlsam têin kan rilru a luahkhat thei a ni. Nimahsela, bâng lova kan ṭawngṭaina chuan buainate, thlêmnate, leh lunghnualnate awm reng chung pawhin thlarau lam ngaihsak reng tûrin min ṭanpui ang. Nî tina Jehova hnêna kan ṭawngṭaina chuan kan mamawh ṭanpuina pawimawh tak chu min pe thei a ni.
21 “Ṭawngṭaina ngaithlatu” Jehova chu kan ṭawngṭainate ngaithla lo tûr khawpin a buai lutuk ngai lo. (Sâm 65:2) Chuvângin, amah be tûrin i buai lutuk ngai lo vang u. Pathian nêna kan inṭhianna chu kan thil neihte zînga thil hlu ber a ni si a. Chu chu i hlut lo ngai lo vang u. “Chutichuan zahngaihna kan hmuh theihna tûr leh puih kan ngaih huna ṭanpuina khawngaihna kan hmuh theihna tûrin, khawngaihna lalṭhutphah chu huai takin i hnaih ang u.”—Hebrai 4:16. (w03 9/15)
Engtin Nge I Chhân Ang?
• Zâwlnei Daniela hnên aṭangin ṭawngṭai hlutna eng nge kan zir theih?
• Engtin nge Jehova nêna kan inṭhianna kan tihngheh theih?
• Engvângin nge bâng lo va kan ṭawngṭai ang?
• Engvângin nge tling lo intihna chuan Jehova hnêna kan ṭawngṭaina a dâl loh vang?
[Phêk 26-naa milem]
Nehemia chuan lal a biak hmain, a rilruin a ṭawngṭai zawk
[Phêk 27-naa milem]
Hani chu ‘LALPA hmaah a ṭawngṭai reng’