“Thu Ka Pêk Zawng Zawng Che U Pawm Tûrin Zirtîr Rawh U”
“Chutichuan kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u.”—MATTHAIA 28:19, 20.
1. Zirtîr Philipa leh Ethiopia mi chu engtin nge an titi?
ETHIOPIA rama mi pakhat chu Jerusalemah a zin vang vang a. Chutah chuan a hmangaih êm êm, a Pathian Jehova chu chibai a bûk a ni. Ani chuan Pathian thâwk khum Thu pawh a ngaina hle niin a lang. A tawlailîra a haw kawngah chuan, zâwlnei Isaia lehkhabu a chhiar a, chutah Krista zirtîr Philipa chuan amah a rawn tâwk a. “I chhiar kha a awmzia i hria em?” tiin a va zâwt a ni. Chu pa chuan: “Tuma mi hrilhfiah lohvin engtin nge ka hriat theih ang?” tiin a lo chhâng a. Chutah Philipa chuan chu Bible zirlai taima tak chu Krista zirtîr lo ni tûrin a ṭanpui ta a ni.—Tirhkohte 8:26-39.
2. (a) Eng kawngin nge Ethiopia mi chhânna kha awmze nei tak a nih? (b) Zirtîr siam tûra Isua thupêk nêna inkûngkaih zawhna engte nge kan ngaihtuah dâwn?
2 Ethiopia mi chhânna hi chhinchhiah tlâk tak a ni. “Tuma mi hrilhfiah lohvin engtin nge ka hriat theih ang?” a ti. Ni e, ani chuan hrilhfiahtu, kawng dika kaihruaitu tûr a mamawh a ni. A thusawi chuan zirtîr siam tûra thu a pêknaa tel Isua kaihhruaina pawimawhzia a târ lang a ni. Eng kaihhruaina nge? A chhânna hriat nân, Matthaia bung 28-a chhinchhiah Isua thute hi i ngaihtuah zawm zêl ang u. Thuziak hmasa khân engvângin nge? tih leh khawi hmunah nge? tih zawhna a thlûr bing tawh a. Tûnah chuan zirtîr siam tûra Isua thupêk nêna inkûngkaih zawhna dang pahnih—eng nge? tih leh engtikah nge? tih kan thlûr bing thung ang.
‘Thu Zawng Zawng Pawm Tûra Zirtîr’
3. (a) Engtin nge mi tuemaw chu Isua Krista zirtîr a lo nih theih? (b) Zirtîr siamnaah chuan eng thu zirtîr nge tel?
3 Mi dangte Krista zirtîr lo ni tûra ṭanpui tûrin eng nge kan zirtîr ang? Isua chuan a hnungzuitute hnênah: “Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,” tiin thu a pe a ni. (Matthaia 28:19, 20) Chuvângin, Krista thupêkte chu a ni, kan zirtîr tûr chu ni.a Mahse, Isua thupêk kan zirtîrte chu zirtîr an lo nih mai bâkah an nih chhunzawm zêl nân eng nge kan tih theih? Kan tih theih thil pawimawh tak pakhat chu Isua’n uluk taka a ṭawngkam thlanah hian a hmuh theih a ni. Ani chuan: ‘Thu ka pêk zawng zawng che u hi zirtîr rawh u’ a ti mai lo tih hi chhinchhiah ang che. Hetiang hian a ti zâwk a ni: “Thu ka pêk zawng zawng che u pawm tûrin zirtîr rawh u,” tiin. (Matthaia 19:17) Chu chu eng tihna nge ni?
4. (a) Thupêk pawm tih chu eng tihna nge? (b) Krista thupêk pawm tûra mite kan zirtîr dân sawifiah rawh.
4 Thupêk pawm tih chu thupêk nêna “inmila thil tih”—thupêk zawm tihna a ni. A nih leh, engtin nge Krista thupêkte pawm, a nih loh leh zâwm tûra mi dangte kan zirtîr le? Aw le, motor khalh dân zirtîrtuin a zirlaite hnêna traffic dân zâwm tûra a zirtîr dân hi han ngaihtuah ta ila. Zirtîrtu chuan a zirlaite hnênah kawngpui dân leh dûnte chu classroom chhûngah a zirtîr a ni thei. Amaherawhchu, chûng dânte zâwm tûra zirlaite zirtîr tûr chuan, kawngpuia motor an khalh a, an thil zirte a taka hman an tum hrâm hrâm laia kaihhruaina a lo pêk zêl a ngai a ni. Chutiang bawkin, mite Bible kan zirpui hian, Krista thupêkte chu kan zirtîr a ni a. Amaherawhchu, zirlaite’n Krista zirtîrnate an nî tin nun leh rawngbâwlnaa nunpui an tum hunah kaihhruaina kan pêk tel a ngai bawk a ni. (Johana 14:15; 1 Johana 2:3) Chuvângin, zirtîr siam tûra Krista thupêk hlen chhuak tak tak tûr chuan, zirtîrtu leh kaihruaitu nih kawp a ngai a ni. Chutiang kan nih chuan, Isua leh Jehova ngeiin an siam entawn tûr chu kan zui tihna a ni ang.—Sâm 48:14; Thu Puan 7:17.
5. Engvângin nge kan Bible zirpuite chuan zirtîr siam tûra Krista thupêk zawm chu an hreh mai theih?
5 Isua thupêkte pawm tûra mi dangte zirtîrnaah chuan, zirtîr siam tûra thupêk zâwm tûra ṭanpui pawh a tel a. Kan Bible zirpui ṭhenkhat tân chuan chu chu hna harsa tak a ni thei. Tûn hmaa Kristianna ram kohhrana inhmang ṭhîn pawh ni mah se, chuta an zirtîrtute chuan kal a, zirtîrte siam tûrin an zirtîr chu a beisei awm lo va. Sakhaw hruaitu ṭhenkhat phei chuan an berâmte chanchin ṭha hriltu ni tûra zirtîr kawngah chuan Kristianna ram kohhrante chu a hlawhchham ṭhak tih an pawm thlap a ni. Khawvêl zawng zawnga kal a, mi tinrêngte zirtîra siam tûra Isua thupêk chungchângah, Bible zirlai John R. W. Stott-a chuan: “He thupêk awmzia dik tak zawm loh hi tûn laia chanchin ṭha hrilhna kawnga Kristiante chak lohna lian ber a ni,” tiin a sawi a. “Chanchin ṭha chu a ralkhat aṭanga hrilh kan duh a. A châng phei chuan, tuipuikam hmun him lai aṭanga tui tla pil mêkte hnêna tihdân tûr hrilh ang mai kan ni. Anmahni chhan chhuak tûra tuia zuan luh chu kan duh lo. Huh palh kan hlauh avângin,” tiin a sawi belh bawk.
6. (a) Bible zirlai kan ṭanpui hunah, engtin nge Philipa entawn tûr siam chu kan zui theih? (b) Kan Bible zirpui thuhrilh rawngbâwlnaa a tel ṭan hian, engtin nge kan ngaihtuahzia kan lantîr theih?
6 Kan Bible zirpui tuemaw chu ‘huh palh hlau’ pâwl zînga mi a lo nih ṭhin chuan, a tui hlauhna hneh a, zirtîr siam tûra Krista thupêk zawm chu atân a harsa hle thei a. Ṭanpuina a mamawh dâwn a ni. Chuvângin, Philipa zirtîrnain Ethiopia mi a tihvâr a, baptisma chang tûra a chêttîr ang chiah khân, kan Bible zirpui hriatthiamna tithûk thei leh thil ti tûra chêttîr thei tûr zirtîrna leh kaihhruaina kan pêk hian, kan dawhtheih a ngai a ni. (Johana 16:13; Tirhkohte 8:35-38) Chu bâkah, zirtîr siam tûra thupêk zâwm tûra kan Bible zirlaite zirtîr kan châkna chuan, Lalram thuhrilhnaa an tel ṭan huna an ruala rawngbâwl a, kaihhruaina pe tûrin min chêttîr ang.—Thuhriltu 4:9, 10; Luka 6:40.
‘Thu Zawng Zawng’
7. ‘Thu zawng zawng pawm’ tûra mi dangte zirtîrnaah chuan eng thupêk zirtîr nge tel?
7 Zirtîrte siam lehchhâwng tûra zirtîr tharte zirtîr mai chu kan duhtâwk lo. Isua chuan thu a pêk ‘zawng zawngte pawm’ tûra mi dangte zirtîr tûrin min zirtîr a. Chutah chuan thupêk ropui ber pahnih a tel ngei a ni—Pathian leh ṭhenawmte hmangaih tûra zirtîrna chu. (Matthaia 22:37-39) Engtin nge zirtîr tharte chu chûng thupêkte pawm tûra zirtîr theih an nih?
8. Zirtîr thar chu hmangaihna lantîr tûra thupêk zirtîr theih dân hrilhfiah rawh.
8 Motor khalh zirlai entîrna kha han ngaihtuah leh ta la. A sîra a zirtîrtu ṭhu reng chunga zirlaiin kawngpuia motor a khalh chuan, zirlai chuan motor khalh dân chu zirtîrtu thu a ngaihthlâkna aṭang mai bâkah, motor khalhtu dangte khalh dân enin a zir bawk a ni. Entîr nân, a zirtîrtu chuan kawngpuia amah tlân pelhtîrtu motor khalhtu ngilnei tak te; a nih loh leh, a lam pana rawn tlân motor khalhtu khawhmuh a tihbuai loh nâna hawihhâwm taka a motor êng tihniamtu te; a nih loh leh, a hmêlhriatte motor kawng laka chhia ṭanpui inhuamtu motor khalhtu te chu a kawhhmuh a ni. Chutiang entîrnate chuan zirlai chu ama’n a khalh ve huna a tih ve theih tûr thil hlu tak a zirtîr a ni. Chutiang bawkin, nunna kawngpuia zin ṭan mêk zirtîr thar chuan amah zirtîrtu hnên aṭang chauh ni lo, kohhrana entawn tûr ṭha tak a hmuhte aṭang pawhin a inzir thei a ni.—Matthaia 7:13, 14.
9. Engtin nge zirtîr thar chuan hmangaihna lantîr tûra thupêk zawm awmzia chu a zir?
9 Entîr nân, Bible zirlai chuan nu leh pa mal ṭanin a fa naupangte enkawl chunga Kingdom Hall-a rawn inkhâwm ṭâng ṭâng chu a hmu mai thei a. Tin, mi lungngai tak, harsatna leh lungngaihna nei chung pawha rinawm taka inkhâwm tûra lo kal ṭâng ṭâng te, hmeithai upa tawh lamin tar dangte kohhran inkhâwma a rawn hruai te, leh Kingdom Hall tihfainaa tel tleirâwlte pawh a hmu mai thei bawk. Bible zirlai chuan kohhran upa, kohhrana mawhphurhna tam tak nei chung pawha thlawhhma rawngbâwlnaa rinawm taka hma hruai ṭâng ṭâng pawh a hmu mai thei. Tin, Thuhretu, ramtuileilo leh pâwn chhuak thei lo; mahse, amah kantu apiangte tâna thlarau lam chakna hnâr ni si pawh a hmu mai thei. Chu bâkah, zirlai chuan an nu leh pa tar tawhte enkawl tûra nuna insiamremna nasa tak siam nupate pawh a hmu thei a. Chutianga Kristian ngilnei, mi ṭanpui peih, leh innghahna tlâkte a hmuh chuan, zirtîr thar chuan entîrna hmangin Pathian leh ṭhenawmte, a bîk takin rinpuite hmangaih tûra Krista thupêk zawm awmzia dik tak a zir ṭhîn a ni. (Thufingte 24:32; Johana 13:35; Galatia 6:10; 1 Timothea 5:4, 8; 1 Petera 5:2, 3) Hetiang kawng hian, Kristian kohhrana mi tinte chu zirtîrtu leh kaihruaitu an ni thei a, an ni bawk tûr a ni.—Matthaia 5:16.
“Khawvêl Tâwp Thleng Pawhin”
10. (a) Eng chen nge zirtîr kan siam zêl dâwn? (b) Hna thawh tûr thawh zawh chungchângah eng entawn tûr nge Isua’n a siam?
10 Zirtîr siam chu eng hun thleng thawh tûr nge? Khawvêl tâwp thlenga thawh tûr a ni. (Matthaia 28:20) He Isua hna min tuk hi kan hlen thei ang em? Khawvêl pum puiah kohhran angin hlen kan tum a ni. Kum kal tawhahte chuan, “chatuana nun duhna rilru dik tak nei apiang” zawn chhuah nân, kan hun te, tha leh zung te, leh sum leh paite chu lâwm takin kan hmang ral a. (Tirhkohte 13:48, NW) Tûnah pawh, Jehova Thuhretute chuan khawvêl puma Lalram thuhrilh nân leh zirtîr siam nân a chawh rualin nî tin dârkâr nuai 30 aia tam an hmang ral a ni. Chutianga kan tih chhan chu Isua entawn tûr siam kan zui vâng a ni a. Ani chuan heti hian a ti: “Mi tîrtu duhzâwng tih leh, a hna thawh zawh tûr hi ka chaw a ni,” tiin. (Johana 4:34) Chu chu kan duhzâwng tak a ni bawk. (Johana 20:21) Thawk tûra min tuk hna thawh ṭan mai chu kan duh tâwk lo; thawh zawh kan duh a ni.—Matthaia 24:13; Johana 17:4.
11. Kan Kristian unau ṭhenkhatte chungah eng nge thleng a, eng nge keimahni leh keimahni kan inzawh ang?
11 Mahse, kan rinpui ṭhenkhat chu thlarau lamah an chau va, zirtîr siam tûra Krista thupêk thawhna kawngah an vuaicha emaw, an bânsan emaw hmuh chuan min tilungngai hle. Chûng mite chu kohhran mite nêna an inkawmna tithar leh tûr leh zirtîr siam rawngbâwlna chhunzawm leh tûra ṭanpui theih dân kawng a awm em? (Rom 15:1; Hebrai 12:12) Isua’n a tirhkohte rei lo te chhûng an chak loh laia a ṭanpui dân chuan tûn laia kan tih theihte a târ lang a ni.
Ngaihsakna Lantîr Rawh
12. (a) Isua thih hma lawk khân, a tirhkohte’n eng nge an tih? (b) A zirtîrte’n chak lohna nasa tak an lantîr chung pawhin, engtin nge Isua’n anni chu a ngaihsak?
12 Leia a rawngbâwlna tâwpnaa a thih dâwn hnaihah chuan, Isua chu a tirhkohte’n “an thlahthlam a, an tlân bo[san] ta vek a.” Isua sawi lâwk ang ngeiin, ‘mahni in ṭheuhvah an darhsan vek’ a ni. (Marka 14:50; Johana 16:32) Engtin nge Isua chuan thlarau lama chak lo tak a ṭhiante chu a ngaihsak? Thihna ata a thawhleh hnu lawkah, Isua chuan a hnungzuitu ṭhenkhat hnênah: “Hlau suh u, kal ta ula, Galili rama kal tûrin ka unaute va hrilh rawh u; chutah chuan mi hmu ang,” tiin a hrilh a ni. (Matthaia 28:10) Tirhkohte chuan chak lohna nasa tak lantîr mah se, Isua chuan “ka unaute” tiin a ko reng tho va. (Matthaia 12:49) Anni chu a rin loh phah chuang lo. Hetiang kawng hian, Jehova ang chiahin Isua chu zahngai thei tak leh ngaihdam peih tak a ni. (2 Lalte 13:23) Engtin nge Isua kan entawn theih ang?
13. Engtin nge thlarau lama chak lote chu kan thlîr ang?
13 Rawngbâwlnaa tla hniamte emaw, bânsante emaw chungah chuan lainatna thûk tak kan lantîr tûr a ni a. Chûng mite’n hun kal tawha hmangaihna an lo lantîr tawhte kha kan la hre reng a—a ṭhen phei chuan kum sâwmbi têl an lo lantîr tawh a. (Hebrai 6:10) Anni chu kan ngai hlawm êm êm a ni. (Luka 15:4-7; 1 Thessalonika 2:17) Mahse, engtin nge anmahni kan ngaihtuahzia kan lantîr ang?
14. Isua entawnin, engtin nge mi chak lote kan ṭanpui theih?
14 Isua chuan tirhkoh lungngai takte chu Galili ramah kal a, chutah chuan amah an hmuh tûr thu a hrilh a. A nihna takah chuan, Isua chuan inkhâwm dangdai bîk taka tel tûrin a sâwm a ni. (Matthaia 28:10) Chutiang bawkin, tûn laiah pawh, thlarau lama chak lote chu Kristian inkhâwmnaa tel tûrin kan fuih a, vawikhat aia tam pawh kan sâwm a ngai mai thei a ni. Tirhkohte chungchângah chuan, “zirtîr sâwm leh pakhatte chu Galili ramah, Isuan tlâng a ruatsakah chuan an kal” avângin, sâwmna chu a hlawhtling a ni. (Matthaia 28:16) Mi chak lote’n kan sâwmna chutiang bawka an pawm a, Kristian inkhâwma an lo tel hian kan va lâwm tak êm!—Luka 15:6.
15. Kan inkhâwmnaa lo kal thlarau lama chak lote lawmna kawngah hian engtin nge Isua entawn tûr siam chu kan zui theih?
15 Kristian thlarau lama chak lote Kingdom Hall-a an lo kalin engtin nge kan lo tih ang? Aw le, Isua’n rei lo te chhûng rinna chak lo a tirhkohte chu inhmuhkhâwmna tûra a hmun ruata a hmuh khân engtin nge a lo tih? “Isua chu an hnênah a lo kal a, anniho chu a bia a.” (Matthaia 28:18) Ani chuan ralkhat aṭangin a lo thlîr mai lo va, anmahni a va pan zâwk a ni. Chutianga Isua’n hma a lâk avânga tirhkohte rilru thâwl dân tûr chu han ngaihtuah teh! Keini pawhin thlarau lama chak lo, Kristian kohhrana lo kîr leh tûra theihtâwp chhuahte chu va panin, i lo lâwm ve ang u.
16. (a) Isua’n a hnungzuitute a dâwr dân aṭangin eng nge kan zir theih? (b) Engtin nge Isua’n thlarau lama chak lo zâwkte a thlîr dân chu kan lantîr theih? (Footnote en rawh.)
16 Isua’n eng dang nge a tih? A hmasa berin: “Lei leh vâna thuneihna zawng zawng ka hnênah pêk a ni tawh,” tih a puang a. A pahnihnaah an hna thawh tûr hetiang hian a tuksak a ni: “Chutichuan kal ula, hnam tina mi zirtîrahte siam ula,” tiin. A pathumnaah chuan: “Kei kumkhuain . . . in hnênah ka awm zêl ang,” tiin thu a tiam a ni. Mahse, Isua’n a tih loh thil eng nge awm i hria em? A zirtîrte chu an tlin lohna leh an rinhlelhna avânga a hau lo chu a ni. (Matthaia 28:17) Chutianga tih chu a hlawhtling em? Hlawhtling e. A hnu lawkah chuan, tirhkohte chu chanchin ṭha ‘zirtîr leh hrilhin’ an buai leh ta thuai a ni. (Tirhkohte 5:42) Thlarau lama chak lo zâwkte a thlîr dân leh a dâwr dân chungchânga Isua entawn tûr siam kan zui chuan, kan kohhranah pawh chutiang bawka rah ṭha chu kan hmu ve thei a ni.b—Tirhkohte 20:35.
“Kei Kumkhuain . . . In Hnênah Ka Awm Zêl Ang”
17, 18. Isua thusawi “kei kumkhuain . . . in hnênah ka awm zêl ang” tiah hian eng thu mi tichak thei tak nge tel?
17 Isua hna pêka a thu hnuhnung ber, “Kei kumkhuain . . . in hnênah ka awm zêl ang,” tih hian zirtîr siam tûra Krista thupêk zâwm ṭâng ṭângte tân mi tichak thei tak thu a keng tel a ni. Kan Lalram thuhrilh rawngbâwlna kalh zâwngin hmêlmate chuan eng ang dodâlna pawh rawn thlenin, eng anga sawichhiatna pawh tawng mah ila, hlauh chhan tûr rêng kan nei lo. Engvângin nge kan neih loh? “Lei leh vâna thuneihna zawng zawng” neitu, min Hruaitu, Isua’n min chhawmdâwl tûra min awmpui tlat avângin.
18 Isua thutiam, “Kei kumkhuain . . . in hnênah ka awm zêl ang” tih pawh hi thlamuanna hnâr a ni bawk. Zirtîr siam tûra Krista thupêk thawh kan tum hrâm hrâm hian, ni hlimawm chauh ni lo, lungngaihna nî pawh kan tawng tel a. (2 Chronicles 6:29) Kan zînga ṭhenkhat chuan kan hmangaih takte an boralin lungchhiatna namên lo kan tawng a ni. (Genesis 23:2; Johana 11:33-36) A dangte chu an tarin, an hrisêlna leh chakna te a tlachhia a. (Thuhriltu 12:1-6) Mi danglehte chuan lungngaihna namên lo an tâwk bawk. (1 Thessalonika 5:14) Tin, ei leh bâr lama harsatna tâwk lah kan pung tial tial bawk. Nimahsela, chutianga harsatna tâwk chung pawhin, kan hrehawm ber lai pawh tiama Isua chu “kumkhuain” kan hnêna a awm avângin, kan rawngbâwlnaah kan hlawhtling a ni.—Matthaia 11:28-30.
19. (a) Zirtîr siam tûra Isua hna pêkah chuan eng zirtîrna nge tel? (b) Engin nge Krista hna pêk chu min thawhtîr thei?
19 He thuziakah leh thuziak hmasaa kan hmuh tâk ang khân, zirtîr siam tûra Isua hna pêk chuan engkim a huam vek a. Isua chuan he a thupêk hi kan hlen chhuah chhan tûr leh hlen chhuahna tûr hmun min hrilh a ni. Tin, eng nge kan zirtîr tûr tih leh eng chen nge kan thawh dâwn tih pawh min hrilh bawk. Dik takin, he hna min pêk thawh chhuah hi thil khirh tak a ni ngei mai. Mahse, Krista thuneihnain min ṭanpui avâng leh ani kan bula a awm tlat avângin, kan hlawhtling thei a ni! Chu chu i pawm a ni lâwm ni? (w04 7/1)
[Footnote-te]
a Lehkhabu pakhat chuan baptis tûr leh zirtîr tûra thupêk chu “thiltih pahnih a indawta tih tûr . . . a ni kher lo” a ti. Chutiang ni lovin, “zirtîr chu thil tih reng chi, baptisma chan hma pawha tih a . . . baptisma chan hnu pawha tih zawm zêl chi a ni.”
b Thlarau lama chak lote thlîr dân leh ṭanpui dân chungchânga thu kim chang lehzual chu Vênnainsâng February 1, 2003, (Mizo) phêk 15-17-ah hmuh theih a ni.
Engtin Nge I Chhân Ang?
• Engtin nge Isua thupêkte pawm tûra mi dangte kan zirtîr?
• Eng thilte nge zirtîr thar chuan kohhrana mi dangte hnên aṭangin a zir theih?
• Thlarau lama chak lote ṭanpui tûrin eng nge kan tih theih?
• Isua thutiam, “kei kumkhuain . . . in hnênah ka awm zêl ang” tih aṭang hian eng chakna leh thlamuanna nge kan neih theih?
[Phêk 25-naa milemte]
Zirtîrtu leh kaihruaitu kan nih kawp a ngai
[Phêk 27-naa milemte]
Zirtîr tharte chuan mi dangte entawn tûr siam aṭangin thil ṭha tak an zir