Jehova, ‘Mangan Laia Kan Kulhbîng’

“Mi felte chhandamna chu LALPA lak ata a ni a: ani chu mangan laia an kulhbîng a ni ṭhîn.”​—SAM 37:39.

1, 2. (a) Isua’n a zirtîrte tân eng nge a dîl? (b) A mite tâna Pathian duhzâwng chu eng nge?

JEHOVA chu engkimtithei a ni a. Amah betu rinawmte a duh dân anga humhim tûrin thiltihtheihna a nei a ni. Ani chuan a mite chu khawvêl ata la hrangin, hmun him leh remna hmunah a dah thei a ni. Mahse, a zirtîrte chungchângah Isua chuan a Pa vâna mi hnênah: “Nangin anni chu khawvêl ata i lâk chhuah tûra ngên ka ni lo va, mi sual lakah chuan i hum tûr ka ti zâwk a ni,” tiin a ṭawngṭai a ni.​—Johana 17:15.

² Jehova chuan ‘khawvêl ata min lâk chhuah’ chu a duh lo va. Chu aimah chuan, beiseina leh thlamuanna a thuchah chu mi dangte hnêna puang tûrin, khawvêl mite zînga kan awm chu a duh a ni. (Rom 10:​13-15) Mahse, Isua’n a ṭawngṭainaa a târ lan angin, he khawvêla kan awm avângin “mi sual” lakah kan him lo va. Thuawih lo mihringte leh thlarau sual awmhote chuan nasa takin min tinain, min tihrehawm thei a; tin, Kristiante chu hrehawmna tawrhtîr loh an ni bîk lo bawk.​—1 Petera 5:9.

3. Rinawm taka Jehova betute pawhin eng nge an tawh a; mahse, Pathian Thu-ah thlamuanna thu eng nge kan hmuh?

³ Chûng hrehawmnate kan tawrh avânga lunghnual châng neih chu thil pângngai tak a ni. (Thufingte 24:10) Bible-ah chuan manganna tâwk mi rinawmte chungchâng tam tak a chuang a. Fakna hla phuahtu chuan: “M fel hrehawmnate chu a tam a, nimahsela LALPAN chûng zawng zawngah chuan a chhan chhuak ṭhîn,” a ti. (Sâm 34:19) Ni e, “mi fel” chungah pawh thil ṭha lo chu a thleng a ni. Fakna hla phuahtu Davida angin, a châng chuan kan ‘chauvin, kan sil ûrh’ hial thei a ni. (Sâm 38:8) Mahse, Jehova chuan “thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn” tih hriat chu a thlamuanthlâk hle.​—Sâm 34:18; 94:19.

4, 5. (a) Thufingte 18:10 nêna inmilin, Pathian vênhimna dawng tûrin eng nge kan tih ang? (b) Pathian ṭanpuina kan dawn theih nâna hma kan lâk theih rahbi ṭhenkhat chu engte nge?

⁴ Isua ṭawngṭaina nêna inmilin, Jehova chuan min vêng tak zet a. Ani chu ‘mangan laia kan kulhbîng a ni.’ (Sâm 37:39) Thufingte bu pawhin chutiang bawk ṭawngkam hmangin: “LALPA hming chu kulhpui a ni a, mi fel chu a tlân lût ṭhîn a, a him ṭhîn,” a ti. (Thufingte 18:10) He Bible châng hian Jehova’n a thil siamte a ngaihtuah êm êm tih thu dik chu a hai lang a ni. Inhumhim nâna kulhpuia kan tlân ang maiin, Pathianin inhumhimna min tiam a, chu chu mi fel, amah zawngtute tân a ni zual a ni.

⁵ Buaina manganthlâk tak takte kan tawh hunah, engtin nge Jehova vênhimna chu kan zawn theih ang? Jehova ṭanpuina dawn nâna kan tihtheih rahbi pawimawh pathumte chu lo ngaihtuah ta ila. A hmasa berin, kan Pa vâna mi hnênah kan ṭawngṭai ngei ngei tûr a ni. A dawtah, a thlarau thianghlim kaihhruaina kan zui tûr a ni a. Tin, a pathumna chu, kan manganna chhâwk theitu kan Kristianpuite nêna inkâwmin, Jehova ruahmanna siamah kan intulût tûr a ni.

Ṭawngṭaina Thiltihtheihzia

6. Engtin nge Kristian dikte’n ṭawngṭaina chu an thlîr?

⁶ Hrisêlna lama mi thiam ṭhenkhat chuan ṭawngṭaina chu lungngaite leh mangangte enkawl nân an chawh a. Rei lo tê ri lova ṭawngṭai lai anga thil ngaihtuahna chuan manganna a tihnêp theih laiin, ram hnuaia thâwm chi hrang hrang, sava hrâm ri te, thli tleh ri te, luitui luang ri te, a nih loh leh hnungzâng han inchhûlsakte pawhin manganna a chhâwk zângkhai thei tho a ni. Mahse, Kristian dikte chuan ṭawngṭaina chu rilru hah tihdamna ang lekin an thlîr lo. Ṭawngṭaina chu Siamtu nêna inbiakna zahawm tak angin kan thlîr zâwk a ni. Chutah chuan Pathian hnêna kan inpêkna leh amah kan rinchhan tlatna a tel a. A ni, ṭawngṭaina hi Pathian kan biakna pêng pakhat a ni.

7. Rinna nêna ṭawngṭai tih awmzia chu eng nge ni a, engtin nge chutiang ṭawngṭaina chuan manganna hneh tûra min ṭanpui?

⁷ Kan ṭawngṭaina chu Jehova rinna, a nih loh leh rinchhanna nên a inkawp tlat tûr a ni a. Tirhkoh Johana chuan: “Hei hi ama chunga kan huaina chu a ni, engpawh a duhzâwng anga kan dîl chuan anin min ngaihthlâksak ṭhin hi,” tiin a ziak a ni. (1 Johana 5:14) Lal Chungnungber, Pathian dik awmchhun leh engkimtithei Jehova chuan amah betute tih tak zeta ṭawngṭaina chu ṭha takin a ngaihthlâksak a. Kan lungkhamna leh buainate a hnên kan thlen hian, hmangaihna nei kan Pathian chuan min ngaithla tih hriat ringawt pawh chu a thlamuanthlâk hle a ni.​—Philippi 4:6.

8. Engvângin nge Kristian rinawmte chu ṭawngṭaia Jehova an pan hunah an tîm emaw, tlâk lo angin emaw an inngai ngai tûr a nih loh?

⁸ Kristian rinawmte chuan ṭawngṭaia Jehova an pan hunah an tîm emaw, tlâk lo emaw, a nih loh leh an ringhlel emaw ngai tûr a ni lo. Kan lunghnual chângin emaw, harsatnain min tlâk buak chângin emaw ṭawngṭaia Jehova pan chu kan duh lo mai thei. Chutiang hunah chuan, Jehova chuan ‘hrehawm tuarte chu a khawngaihin,’ ani chuan ‘inngaitlâwmte a thlamuan’ tih chu kan hre reng tûr a ni. (Isaia 49:13; 2 Korinth 7:6) A bîk takin, hrehawm kan tawrh hunah leh kan mangan hunah kan Pa vâna mi chu kan kulhbîng angin rinchhan taka kan pan a ngai a ni.

9. Ṭawngṭaia Pathian kan pannaah rinnain eng hmun nge a chan?

⁹ Ṭawngṭaina hlâwkpui tak zet tûr chuan, rinna dik tak kan nei tûr a ni. Bible chuan “Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni,” a ti. (Hebrai 11:6) Rinna tih chu Pathian “a awm” tih rinna mai a ni lo. Rinna dik takah chuan Pathian thiltihtheihna leh a thuâwihna kan nun kawng chu mal a sâwm duh tih rin tlatna a tel a ni. “Lalpa mit chu mi felte chungah a fu a, a beng pawh an ṭawngṭaina lamah a chhi si ṭhîn.” (1 Petera 3:12) Jehova min ngaihsakna hriat rengna chuan kan ṭawngṭainate chu awmzia a neihtîr lehzual a ni.

10. Jehova hnên aṭanga thlarau lama châwmna dawng tûr chuan kan ṭawngṭaina chu eng ang nge a nih ngai?

¹⁰ Thinlung zawng zawnga hlan a nihin, Jehova chuan kan ṭawngṭaina a ngaithla ṭhîn a. Fakna hla phuahtu chuan: “Ka thinlung zawng zawngin ka ko chia; aw LALPA, min chhâng ang che,” tiin a ziak a ni. (Sâm 119:145) Sakhua tam takte ṭawngṭaina thu chham ang mai ni lovin, kan ṭawngṭaina chu a hming mai emaw, thinlung tel lo emaw a ni lo. Kan “thinlung zawng zawngin” Jehova hnêna kan ṭawngṭaiin, kan thu chhamte chuan awmzia leh thiltum a nei a ni. Chutianga tih tak zeta kan ṭawngṭai hnuah chuan, kan “rit phurh chu” Jehova chunga nghahna aṭanga lo awm hahdamna chu kan nei ṭan a ni. Bible min tiam angin, ‘anin min tichak’ ang.​—Sâm 55:22; 1 Petera 5:​6, 7.

Pathian Thlarau Chu Min Ṭanpuitu A Ni

11. A ṭanpuina kan ‘dîl reng’ hian, Jehova min chhân dân kawng khat chu eng nge?

¹¹ Jehova chu ṭawngṭaina Ngaithlatu mai a ni lo va, Chhângtu pawh a ni. (Sâm 65:2) Davida chuan: “Ka mangan nî chuan ka ko vang che; nangin mi chhâng dâwn si a,” tiin a ziak a ni. (Sâm 86:7) Chutiang bawkin, Isua chuan a zirtîrte chu “in Pa vâna mi chuan a dîltute chu thlarau thianghlim” a pêk dâwn avângin “dîl rawh u,” tiin a fuih a. (Luka 11:​9-13) Ni e, Pathian chakna chevêl reng chuan a mite tân ṭanpuitu, a nih loh leh thlamuantu angin hna a thawk a ni.​—Johana 14:16.

12. Buaina a nasat viau hian engtin nge Pathian thlarau chuan min ṭanpui?

¹² Fiahna kan tawh hunah pawh, Pathian thlarau chuan ‘thiltihtheihna nasa takin’ min thuam thei a ni. (2 Korinth 4:7) Dinhmun harsa tam tak tâwktu, tirhkoh Paula chuan ringngam takin: “Mi tichaktuah chuan engkim ka ti thei a ni,” a ti a. (Philippi 4:13) Chutiang bawkin, tûn laia Kristian tam takte chuan thlarau lam leh rilru lama chakna thar nei tûra an dîlnate chu chhânsak a ni tih an hria a ni. Dinhmun harsatnate chu Pathian thlarau ṭanpuina kan dawn hnu chuan nasa lutuk angin a lang tawh lo ṭhîn. He Pathian pêk chakna avângin, tirhkoh Paula sawi angin kan sawi ve thei a ni: “Lehlam lehlama nêksâwrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo; tihduhdahin kan awm a, nimahsela kalsanin kan awm si lo; vuak thlûkin kan awm a, nimahsela tihboralin kan awm si lo,” tih chu.​—2 Korinth 4:​8, 9.

13, 14. (a) Engtin nge Jehova chu a Thu hmangin kan kulhbîng a nih? (b) Bible thu bulte nunpuina chuan engtin nge nangmah a ṭanpui che?

¹³ Thlarau thianghlim chuan kan ṭhatna tûrin Pathian Thu chu a thâwk khum a, a vawng ṭha bawk a ni. Engtin nge Jehova chu a Thu hmangin mangan laia kan kulhbîng a nih? A nih dân kawng khat chu finna leh ngaihruat thiamna min pêkna hmangin a ni a. (Thufingte 3:​21-24) Bible chuan kan rilru a tichak a, thil chhût thiamna lamah min tichangkâng a ni. Pathian Thu chhiar leh zir ziah ruala nunpuina hmangin, ‘chhia leh ṭha fiah tûrin kan hriat theihnate chu kan sawizawi’ thei a ni. (Hebrai 5:14) Harsatna i hmachhawn hunah thutlûkna fing siam tûrin Bible thu bulte ṭanpuina chu i dawng tawh mai thei a. Bible chuan dinhmun harsa chingfel tûra remhriatna chhâwr tlâk min pe a ni.​—Thufingte 1:4.

¹⁴ Pathian Thu chuan tichaktu dang min pe a ni​—chhandam beiseina chu. (Rom 15:4) Bible chuan thil ṭha lote chu chatuanin a awm chhunzawm zêl dâwn lo tih min hrilh a. Hrehawm kan tawrh engpawh chu rei lo tê atân chauh a ni. (2 Korinth 4:​16-18) ‘Pathian dâwt sawi thei lova’n khawvêl awm hmaa a tiam chatuana nun beiseina’ chu kan nei a ni. (Tita 1:​1, 2) Chu beiseinaah chuan kan lâwm a, Jehova thutiam nakin hun beiseina kan hriat reng chuan, hrehawm tawrhna kawngah kan chhel thei a ni.​—Rom 12:12; 1 Thessalonika 1:3.

Kohhran​—Pathian Hmangaihna Lantîrna

15. Engtin nge Kristiante chu an inṭanpui tawn theih?

¹⁵ Mangan huna min ṭanpui tûra Jehova ruahmanna min pêk dang leh chu Kristian kohhrana kan neih ṭhiante an ni. Bible chuan: “Ṭhian chuan englai pawhin a hmangaih reng a, mangan nî atâna unauva piang a ni,” a ti. (Thufingte 17:17) Pathian Thu chuan kohhran mi zawng zawngte chu inchawimawi tawn leh inhmangaih tawn tûrin a fuih ṭheuh va. (Rom 12:10) “Tupawhin mahni ṭhatna tûr zawng lovin mi dang ṭhatna tûr zawng zâwk rawh se,” tiin tirhkoh Paula chuan a ziak a ni. (1 Korinth 10:24) Chutiang rilru put hmang chuan mahni harsatna aia mi dangte mamawh ngaihsak zâwk tûrin min ṭanpui ang. Mi dangte tâna kan inpêkin, anmahni kan ṭanpui chauh ni lovin, kan rit phurh tizângtu hlimna leh lungawina nasa tak kan neih phah a ni.​—Tirhkohte 20:35.

16. Engtin nge Kristian tinte chu mi tichaktu an nih theih?

¹⁶ Thlarau lama puitling mipa leh hmeichhiate chuan mi dangte tihchakna kawngah chanvo pawimawh tak an chelh thei a. Chutianga ti tûrin, pan nuam leh pan theihin an insiam a ni. (2 Korinth 6:​11-13) Mi zawng zawngin ṭhalaite fak nân, ringtu tharte tihchak nân, leh lungngaite fuih nâna hun an insiam hian, kohhranin a hlâwkpui tak zet a ni. (Rom 15:7) Unau inhmangaihna pawhin inrinhlelhna rilru nei lo tûrin min ṭanpui ang. Mi mal harsatnate chu thlarau lama chak loh vângah kan ngai nghâl tûr a ni lo. Inâwm takin, Paula chuan Kristiante chu “rilru tête chu fuih” tûrin min tur a ni. (1 Thessalonika 5:14) Bible chuan Kristian mi rinawmte pawhin manganna an tâwk ṭhîn tih a târ lang si a.​—Tirhkohte 14:15.

17. Kristian inunauna tihchak nân eng hun remchângte nge kan neih?

¹⁷ Kristian inkhâwmnate chuan inthlamuan tawn leh infuih tawn theihna hun remchâng ṭha tak min pe a. (Hebrai 10:​24, 25) Mahse, he hmangaihna hi kohhran inkhâwm atân chauh a ni lo. Pathian mite chuan hun dangah pawh inkawmna ṭha neih theihna hun remchâng an zawng bawk a ni. Dinhmun manganthlâk tak a lo thlen hian, inṭhianna nghet tak kan neih tawh avângin kan inṭanpui nghâl thuai ang. Tirhkoh Paula chuan: “Taksaah hian inṭhenna rêng rêng a awm lova, a pêngte hian . . . an inbuaipui tawn ṭheuh zâwkna tûrin, . . . pêng khatin a tuar chuan pêng zawng zawngin an tuarpui ṭhîn, pêng khat chawimawiin a awm chuan pêng zawng zawngin an lâwmpui ṭhîn,” tiin a ziak a ni.​—1 Korinth 12:​24-26.

18. Kan lunghnual hunah eng rilru put hmang nge kan pumpelh ang?

¹⁸ A châng chuan, kan Kristianpuite nêna inkawmna nei tlâk lo khawpin kan lunghnual thei a. Kan rinpuite’n min pêk theih thlamuanna leh ṭanpuina kan chân loh nân, chutiang ngaih dân chu kan do tûr a ni. Bible chuan: “Mi inkulh hrang mi chuan mahni duhzâwng a zawng ṭhîn a, finna dik zawng zawng a tai ṭhîn,” tiin min vaukhân a ni. (Thufingte 18:1) Kan unaupate leh unaunute chu Pathian min ngaihsakzia târ lanna an ni a. Chu ruahmanna ṭha tak kan hriatthiam chuan, kan mangan hunah chhâwk zângkhaina kan hmu ang.

Ngaihtuahna Ṭha Nei Zêl Rawh

19, 20. Engtin nge Pathian Lehkha Thuin ngaihtuahna ṭha lo hnâwl tûrin min ṭanpui?

¹⁹ Lunghnualna leh lungngaihna a lo thlen hian, ngaihtuahna ṭha lo neih a âwl hle a. Entîr nân, vânduaina a lo thlen hian ṭhenkhat chuan Pathian hnâwlna hriltuah ngaiin thlarau lama an dinhmun chu an ringhlel ṭan thei a. Mahse, Jehova chuan tumah ‘thil sualin a thlêm’ lo tih chu hre reng rawh. (Jakoba 1:13) Bible chuan: “Mihring fate tihhrehawm leh tihvui hi [Pathian] duhzâwng a ni si lo,” a ti a ni. (Jeremia Ṭah Hla 3:33) Chutih ahnêkin, a chhiahhlawhte’n hrehawm an tawrhin Jehova chu a lungngai tak zet zâwk a ni.​—Isaia 63:​8, 9; Zakaria 2:8.

²⁰ Jehova chu “khawngaihnate Pa leh thlamuanna zawng zawng Pathian,” a ni. (2 Korinth 1:3) Ani’n min ngaihsak a, a hun têah min chawimawi ang. (1 Petera 5:​6, 7) Jehova min ngainatna hriat rengna chuan ngaihtuahna ṭha nei tûr leh hlim thei hial tûrin min ṭanpui ang. Jakoba chuan: “Ka unaute u, . . . thlêmna tinrêng in tawh hunin lâwmna hlîrah ngai rawh u,” tiin a ziak a ni. (Jakoba 1:2, 3) Engvâng nge? Ani chuan heti hian a chhâng a ni: “Fiaha a awm hnuin nunna lallukhum, Lalpan amah hmangaihtute hnêna a tiam chu a hmu dâwn si a,” tiin.​—Jakoba 1:12.

21. Kan harsatna tawhte chu engpawh ni se, Pathianin a laka rinawmte hnênah eng nge a tiam?

²¹ Isua’n min vaukhân lâwk angin, khawvêlah hian hrehawm kan tuar dâwn a. (Johana 16:33) Mahse, Bible chuan “hrehawmnain emaw, lungngaihnain emaw, tihduhdahnain emaw, ṭâmin emaw, saruaknain emaw, hlauhawmnain emaw,” engmahni Jehova leh a Fapa hmangaihna ata min ṭhen thei lo tih min tiam a ni. (Rom 8:​35, 38, 39) Manganna kan tawh apiang chu rei lo te tân chauh a ni tih hriat chu a va thlamuanthlâk tak êm! Chu mi kan tawh chhûng, mihringte hrehawm tawrhna tihtâwp hun kan nghah chhûng hian, hmangaihna nei kan Pa, Jehova chuan min vêng reng a ni. A vênhimna lama kan tlân luh chuan, ani chu “hnehchhiahna tuarte tân chuan kulhbîng sâng a lo ni ang a, mangan hunahte chuan kulhbîng sâng a lo ni ang.”​—Sâm 9:9. (w04 8/15)

Eng Nge Kan Zir?

• He khawvêl suaksuala kan nun laiin, Kristiante’n eng nge kan beisei ang?

• Engtin nge tih tak zeta kan ṭawngṭainain fiahna kan tawh hunah min tihchak?

• Engtin nge Pathian thlarau chu ṭanpuitu a nih?

• Inṭanpui tawn tûrin eng nge kan tih theih?

[Phêk 14-naa milem]

Kulhpuia tlân lût ang maiin Jehova chu kan zawng tûr a ni

[Phêk 16-naa milemte]

Thlarau lama mi puitlingte chuan mi dangte fak nân leh fuih nân hun remchâng apiang an hmang