Pathian Thu Chu I Kawng Tihêntîr Rawh
“I thu hi . . . ka kawng atân êng a ni.”—SAM 119:105.
1, 2. Eng dinhmunah nge Jehova thu chuan kan kawng a tihên ang?
KAN phal phawt chuan, Jehova thu chuan kan kawng a tiêng ang. Chu thlarau lam êng chu hlâwkpui tûr chuan, Pathian Thu ziak zirlai taima tak kan niin, a zilhna thute kan nunpui ngei tûr a ni. Chutianga kan tih chauhvin, fakna hla phuahtu ngaih dân chu kan ṭâwmpui thei dâwn a ni: “I thu hi ka ke atân khâwnvâr a ni a, ka kawng atân êng a ni,” tih hi.—Sâm 119:105.
2 Tûnah Sâm 119:89-176 hi ilo ngaihtuahho ang u. Hla châng 11-a rem khâwm he Bible châng hian hriat tûr a va han pai hnem tak êm! Hêng chângte hian chatuana nunna kawnga kal tlat tûrin min ṭanpui thei a ni.—Matthaia 7:13, 14.
Pathian Thu Chu Engvânga Ngainat Tûr Nge?
3. Engtin nge Sâm 119:89, 90 chuan Pathian thuah kan innghat thei tih a lantîr?
3 Jehova thu ngainatna chuan thlarau lama ngelnghehna a thlen a ni. (Sâm 119:89-96) Fakna hla phuahtu chu: “Aw LALPA, kumkhua atân i thu chu vânah nghet takin a awm a. . . . Leilung hi i tinghet a, a awm reng a ni,” tiin a zai. (Sâm 119:89, 90) Pathian thu—a “vân thil ruatte”—hmangin vân lam thil, nî, thla, leh arsite chuan sawisêl bova dikin an kawng ṭheuh an zawh a, leilung hi chatuana tihnghehin a awm a ni. (Joba 38:31-33; Sâm 104:5) Jehova kâ aṭanga thu tin chhuak chu kan rinchhan thei; a thiltum tithleng famkim tûrin Pathian thusawi chu “a hlawhtling bawk ang.”—Isaia 55:8-11.
4. Pathian thu ngainatna chuan a chhiahhlawh hrehawm tuarte tân eng nge a tihsak?
4 ‘Pathian dânte chu a lâwmna nilo sela chuan’ fakna hla phuahtu chu ‘a hrehawmnaah a boral’ tawh tûr. (Sâm 119:92) Ani chu ram dang miin an tihrehawm lo; amah hawtute chu Israel mi dân bawhchhetute an ni. (Leviticus 19:17) Mahse, hei hian a chîmbuai chuang lo, amah châwmtu Pathian dân a hmangaih tlat avângin. Korinth khuaah chuan, tirhkoh Paula chu ‘unau derte zînga hlauhawmah’ a awm a, an zîngah chuan amah thiam loh chantîr dân kawng zawngtu “tirhkoh lian berte” pawh an tel mai thei a ni. (2 Korinth 11:5, 12-14, 26) Chutichung pawhin, Pathian thu a ngainat avângin Paula chuan thlarau lamah a chhiat phah lo. Jehova Thu ziakte kan ngainat leh kan nunpui avângin, kan unaute kan hmangaih a ni. (1 Johana 3:15) Khawvêl min huatna pawh chuan Pathian kaihhruaina a enga mah chu min theihnghilhtîr chuang lo. Chatuana Jehova rawng hlim taka bâwl hun tûr kan nghah mêk lai hian, kan unaute nên hmangaih taka inzawmkhâwmin a duhzâwng kan ti chhunzawm zêl a ni.—Sâm 119:93.
5. Engtin nge Lal Asa chuan Jehova a zawn?
5 Jehova hnêna kan inpêkna chu târ langin: “I ta ka nih hi, mi chhandam ang che; i thununna thute chu ka zawng si a,” tiin kan ṭawngṭai ve thei a ni. (Sâm 119:94) Lal Asa chuan Pathian a zawng a, Judai rama kalpênna chu a nuai bo vek a ni. Lal Asa a lal kum 15-na (B.C.E. 963)-ah chuan mipui pungkhâwm Judai rama chêngte chuan ‘Jehova zawng tûrin thu an thlung a.’ Pathian chu “hmuh pawh an hmu ta rêng a,” tichuan, “hmun tinah râlmuangin an awm ta a.” (2 Chronicles 15:10-15) He entîrna hian Kristian kohhran aṭanga kal bo tawh tute pawh chu tha thar thawha Pathian zawng leh tûrin a fuih ngei tûr a ni. A mite nêna inkâwm khâwm lehte chu mal a sâwmin, a vênghim ang.
6. Eng thiltihin nge thlarau lama thil hlauhawm awmte lakah min vênghim ang?
6 Jehova thu chuan thlarau lam chhiatna laka min vêng theitu finna chu min pe a. (Sâm 119:97-104) Pathian thupêkte chuan kan hmêlmate aiin min tifing a ni. A thuhriattîrte bengkhawnna chuan min tifing a, ‘a thununna thute vawn ṭhatna chuan tarte aiin thil hre thiam thei zâwk min nihtîr a ni.’ (Sâm 119:98-100) Jehova thusawite chu ‘kan kâ atân khawizû aia a thlum zâwk’ chuan “awm dân dik lo tinrêng” hi kan huain, kan pumpelh ang. (Sâm 119:103, 104) Hei hi ni hnuhnûnga mi chapote, mi kawlhsente, leh Pathian ngaihsak lote kan tawn hian thlarau lama thil hlauhawm awmte laka vênhimna a ni ang.—2 Timothea 3:1-5.
Kan Ke Atân Khâwnvâr
7, 8. Sâm 119:105 nêna inremin, eng nge kan tih ngai?
7 Pathian thu hi thlarau lam êng reh ngai lo chhuahna hnâr a ni a. (Sâm 119:105-112) Hriak thih Kristian kan ni emaw, an ṭhian “berâm dang” kan ni emaw pawh ni se: “I thu hi ka ke atânte hian khâwnvâr a ni a, ka kawng atân êng a ni,” tiin kan puangchhuak a ni. (Johana 10:16; Sâm 119:105) Pathian thu hi thlarau lama kan tlûk loh nân kan kawngte êntu khâwnvâr ang a ni a. (Thufingte 6:23) Chutichung pawhin, Jehova thu chu kan ke atân khâwnvâr kan nihtîr ṭheuh tûr a ni.
8 Sâm 119 phuahtu anga kan din ngheh tlat a ngai a. Pathian thupêkte lak aṭanga vah bo loh chu a tum tlat a ni. “I [Jehova] rorêlna fel takte chu zâwm tûrin chhia ka chham a, ka tinghet bawk a,” tiin a sawi. (Sâm 119:106) Bible zir ziah leh Kristian inkhâwmnaa tel ziah hlutna chu i ngainêp ngai lo vang u.
9, 10. Engtin nge Jehova hnêna inpumpêk tawhte chuan ‘a thununna thute an vah bosan’ theih a, mahse engtin nge hei hi pumpelh theih a nih?
9 Fakna hla phuahtu chuan ‘Pathian thununna thute chu vah bosan lo’ mah se, Jehova hnêna inpumpêk tawhte tân vah bosan châng a awm thei a. (Sâm 119:110) Lal Solomona chu Jehova tâna inpumpêk hnam thlan zînga mi niin, ani chu atîra Pathian pêk finna mila thil ti ni mah se, a vâk bo a ni. “Ani meuh pawh chu ram dang hmeichhiain” pathian diklo be tûra hminin, “a tisual ta mai a ni.”—Nehemia 13:26; 1 Lalte 11:1-6.
10 “Thang kamtu,” Setana chuan thang tam tak a kam a. (Sâm 91:3) Entîr nân, tûn hmaa Pathian betute chuan thlarau lam kawng êng ata thim hnuaia kalpênna lama pêng tûrin min thlêm an tum mai thei a. Thuatira Kristiante zîngah chuan hmeichhe ṭhenkhat, inngaih leh milem biakna ti tûra mi dangte zirtîrtu ni thei âwm tak “hmeichhia Jezebeli” chu a awm a. Isua’n chûng thil sualte chu a dawh mai lo va, keini pawhin kan dawh bîk tûr a ni lo. (Thu Puan 2:18-22; Juda 3, 4) Chuvângin, Jehova thununna thute vah bosan lova a ênga kan awm reng theih nân a ṭanpuina dîlin i ṭawngṭai ang u.—Sâm 119:111, 112.
Pathian Thua Châwm
11. Sâm 119:119 sawi angin, Pathianin engtin nge mi sualte a thlîr?
11 A thuruatte kan vah bosan ngai loh chuan, Pathianin min kai, a nih loh leh min châwm zêl ang. (Sâm 119:113-120) Isua pawhin tûn laia Kristian nia inchhâl lum chang changte a pawm loh ang chiahin, keini pawhin “rilru mumal neilo mite” chu kan pawm lo. (Sâm 119:113; Thu Puan 3:16) A chhan chu, thinlung zawng zawngin Jehova rawng kan bâwl a, amah chu ‘kan bihrûkna hmun’ a ni a, ani chuan min châwm zêl ang. Bumna leh dâwt hmanga ‘a thuruatte vah bosantu zawng zawng chu a hmusit’ ang. (Sâm 119:114, 117, 118; Thufingte 3:32) Ani chuan chûng mi suaksualte chu “englo êkchhia”—thil hlu tak, rangkachak leh tangkaruate tihthianghlim nâna an paih ang lekin a thlîr a ni. (Sâm 119:119; Thufingte 17:3) Mi sualte englo êkchhe paihkhâwm zînga tel ve kan duh loh avângin, Pathian thuhriattîrte kan ngainatzia chu i tilang fo ṭhîn ang u!
12. Engvângin nge Jehova ṭih chu a pawimawh?
12 “Ka tisa hi nangmah [Jehova] ṭihin a khûr a,” tiin fakna hla phuahtu chuan a sawi a. (Sâm 119:120) A chhiahhlawh anga min châwm zêl tûr chuan, Pathian pawm loh thilte pumpelhna hmanga amah kan ṭihna kan lantîr a pawimawh a ni. Jehova ṭihna chuan Joba chu fel takin a nuntîr a. (Joba 1:1; 23:15) Pathian ṭihna chuan engpawh tuar mah ila a duhzâwng kawngah min kaltîr ṭâng ṭâng a ni. Mahse, chhelna nei tûr chuan rinnaa tih tak zeta ṭawngṭai a ngai a ni.—Jakoba 5:15.
Rinnaa Ṭawngṭai
13-15. (a) Engvângin nge kan ṭawngṭainate chhân a ni ang tih rinna kan neih theih? (b) Ṭawngṭainaah sawi tûr kan hriat lohvin eng nge thleng thei? (c) Ṭawngṭainaa kan ‘rûm sawi hleih theih loh’ chu Sâm 119:121-128 nên a inkûngkaih theih dân sawifiah rawh.
13 Kan tân Pathian a inrawlh dâwn tih ring tlat chungin kan ṭawngṭai thei a. (Sâm 119:121-128) Fakna hla phuahtu angin, kan ṭawngṭaina chhân a ni ang tih kan ring nghet tlat a ni. Engvângin nge? Pathian thupêkte chu ‘rangkachak aiin, rangkachak thianghlim ai pawhin’ kan ngainat zâwk vâng a ni. Chu bâkah, ‘kawng tinrêng thua Pathian thununna thu zawng zawngte chu a dikin kan hria a ni.’—Sâm 119:127, 128.
14 Rinnaa kan ṭawngṭai avâng leh a thupêkte fîmkhur taka kan zawm avângin, Jehova chuan kan dîlnate a ngaithla a. (Sâm 65:2) A châng chuan buainain min tihchi-ai hneh êm avângin ṭawngṭainaah chham tûr pawh hre lo ta hial ila engtin nge ni ang? “Thlarau chuan rûm sawi hleih theih lovin min ṭawngṭaisak ṭhîn.” (Rom 8:26, 27) Chutiang hunah chuan, Pathian chuan a Thua kan mamawh chungchâng sawinate chu kan ṭawngṭaina angin a pawm a ni.
15 Pathian Lehkha Thu chu kan ‘rûm sawi hleih theih loh’ nêna inkûngkaih ṭawngṭaina leh ngaihtuahna hlîrin a khat a ni. Entîr nân, Sâm 119:121-128 hi lo ngaihtuah ta ila. Heta thil awm dân sawi chhuahte hi kan dinhmun nên a inmil pawh a ni thei a. Entîr nân, hnehchhiaha awm kan hlau a nih chuan, fakna hla phuahtu tih dân angin Pathian ṭanpuina kan dîl thei a ni. (Châng 121-123) Thu tlûkna khirh tak kan siam ngai ta se. Chuti a nih chuan, a thuhriattîrte ngaihtuah chhuak leh tûr leh nunpui thei tûrin Jehova thlarau ṭanpuina kan dîl thei a ni. (Châng 124-125) ‘Awm dân dik lo tinrêng kan haw’ chung pawhin, a dân bawhchhe lo tûra thlêmna laka kan tlâwm loh nân Pathian ṭanpuina kan dîl chu a ngai mai thei bawk. (Châng 126-128) Nî tina Bible kan chhiar chuan, chûng thuziak ṭangkai tak takte chu Jehova ṭawngṭaia kan biak hunah kan rilruah a lo lang thei ang.
Jehova Thuhriattîrte Ṭanpuina
16, 17. (a) Engvângin nge Pathian thuhriattîr chu kan mamawh a, chûng chu engtin nge kan thlîr ang? (b) Mi dangin engtin nge min ngaih ang a; mahse, eng nge a pawimawh ber chu?
16 Pathianin kan ṭawngṭaina ngaihthlaa a duhsakna dawng tûr chuan, Pathian thuhriattîrte kan bengkhawn a ngai a ni. (Sâm 119:129-136) Thil theihnghilh hmang kan nih avângin, Jehova thuhriattîrna duhawm tak chu kan mamawh a, chu chuan a kaihhruaina leh a thupêkte min hriatchhuahtîr a ni. Chûng thuhriattîrte bâkah, Pathian thu hriatthiamna thar tinrêng hmanga thlarau lam êng lo êng chhuak chu kan ngaisâng hle bawk. (Sâm 119:129, 130) Mi dangte’n Pathian dân an bawhchhiat avângin ‘kan mittui hi lui tui angin luang’ mah se, Jehova’n a duhsakna ‘hmêla min chhun ên’ avângin kan lâwm bawk a ni.—Sâm 119:135, 136; Number 6:25.
17 A thuhriattîr fel tak kan zawm chuan Pathian duhsakna kan hlawh zêl dâwn tih kan chiang a ni. (Sâm 119:137-144) Jehova chhiahhlawh kan nih angin, a thuhriattîrna felte min hriattîr tûr leh chûng chu zâwm tûrin min beisei thei tih kan pawm a ni. (Sâm 119:138) Fakna hla phuahtuin Pathian thupêkte a zawm tawh avângin, engvângin nge: “Mi tê leh hmusit ka ni,” a tih? (Sâm 119:141) A hmêlmate’n an thlîr dân a sawi a ni tih a lang. Felna atâna nghet taka kan dinchan tlat chuan, mi dangte’n min hmusit mai thei. Chutichung pawhin, a thuhriattîrna fel tak mila kan nun avânga Jehova’n duhsakna nêna min en chu a pawimawh ber a ni.
Him Tak leh Thlamuang Taka Awmin
18, 19. Pathian thuhriattîrte kan zawmna hian eng rah nge a chhuah?
18 Pathian thuhriattîrte zawmna chuan amah min hnaihtîr a ni. (Sâm 119:145-152) Jehova hriattîrte kan ngaihsak avângin, kan thinlung zawng zawngin amah kan ko thei tih kan hria a; tin, kan kohnate chu a hriat ngei kan beisei thei bawk. ‘Khawfîng chat chu khalha’ ṭhangharhin, ṭanpuina kan dîl thei a. Chu chu ṭawngṭaina hun ṭha tak a va ni êm! (Sâm 119:145-147) Isua ngei pawhin a tih angin, ngaihtuahna sual pumpelha a thu chu thutak nia kan thlîr avângin, Pathianin min hnaih bawk a ni. (Sâm 119:150-151; Johana 17:17) Jehova nêna kan inlaichînna chuan he khawvêl buainaa khatah hian min châwmin, a indona ropui Armageddon-ah pawh min châwm zêl ang.—Thu Puan 7:9, 14; 16: 13-16.
19 Pathian thu kan zahna thûk tak avângin, himna dik tak kan nei a. (Sâm 119:153-160) Mi suaksualte ang lo takin, ‘Jehova thuhriattîrte chu kan kal kawisan lo.’ Pathian thupêkte chu kan hmangaih a, a ngilneihnaah chuan kan him a ni. (Sâm 119:157-159) Jehova thuhriattîrte chuan dinhmun engemaw taka a thil min phûtte kan hriat chhuah theih nân thil kan chhinchhiah theihna chu a chawk tho va. Kawng lehlamah chuan Pathian thupêkte chu inkaihhruaina a ni a, min Siamtuin min kaihruai tûra dikna a neih chu kan pawm thlap bawk. ‘Pathian thu infinkhâwm chu thutak a ni’ tih leh kan pheikhai ngei pawh kan hruai thei lo tih kan hriat avângin, Pathian kaihhruaina chu lâwm takin kan pawm bawk.—Sâm 119:160; Jeremia 10:23.
20. Engvângin nge “thlamuanna nasa tak” kan neih?
20 Jehova dân kan hmangaihna chuan thlamuanna chhiarsên loh a thlen a ni. (Sâm 119:161-168) Tihduhdahna chuan tehkhin rual loh “Pathian thlamuanna” chu kan lak aṭangin a la bo thei lo. (Philippi 4:6, 7) Jehova rorêl felte kan ngaihsân êm avângin—“ni khatah vawi sarih” kan fak fo ṭhîn. (Sâm 119:161-164) “I dân ngainatute chuan thlamuanna nasa tak an nei a; tlûkna rêng rêng an nei lo,” tiin fakna hla phuahtu chu a zai a ni. (Sâm 119:165) A mi mala Jehova dânte kan hmangaiha kan vawn tlat chuan, mi dangte thiltih avângin emaw, thil dang engemaw vâng mahin thlarau lamah kan tlu lo vang.
21. Eng Pathian Lehkha Thua entîrnain nge kohhrana harsatna a lo chhuah pawhin kan tlûk phah a ngai lo tih lantîr?
21 Bible-a chhinchhiah mi tam takte’n engmah hi an tâna tlûk hlenna an nihtîr lo. Entîr nân, Diotrepha nungchang ṭha lo avângin Kristian pakhat Gaia chu a tlu chuang lo, ‘thutakah a awm reng’ tho a ni. (3 Johana 1-3, 9, 10) Paula chuan Kristian hmeichhia Euodii leh Suntuki inkâra harsatna a awm avângin, anni chu “Lalpaah chuan rilru hmun khat pu tûrin” a ngên a ni. An harsatna sukiang tûra ṭanpuina an dawng niin a lang, Jehova rawng rinawm taka an bâwl chhunzawm avângin. (Philippi 4:2, 3) Chuvângin, kohhranah harsatna engemaw a lo chhuahin kan tlûk phah a ngai lo. ‘Kan awm dân zawng zawng hi a hmâah a awm’ a ni tih hre rengin, Jehova thununna thute vawn chu i tum tlat ang u. (Sâm 119:168; Thufingte 15:3) Tichuan, kan “thlamuanna nasa tak” chu engmahin min chhuhsak lo vang.
22. (a) Pathian thu kan âwih chuan eng chanvo nge kan chan theih? (b) Kristian kohhran vah bosan ṭhenkhat chu engtin nge kan thlîr ang?
22 Jehova thu kan âwih reng chuan, amah kan fak reng thei ang. (Sâm 119:169-176) Pathian thupêkte mila kan nun chuan, thlarau lam himna kan nei mai ni lovin, ‘kan hmui hian Jehova fakna thu a sawi reng’ bawk ang. (Sâm 119:169-171, 174) Hei hi he ni hnuhnûnga kan neih theih chanvo hlu ber chu a ni. Fakna hla phuahtu chuan nung renga Jehova fak reng chu duh mah se, a rûkin ‘berâm bo angin a vâk bo’ bawk a ni. (Sâm 119:175, 176) Kristian kohhran aṭanga vâk bo ṭhenkhat chuan Pathian an la hmangaih thovin, fak an la duh reng thei a ni. Chuvângin, thlarau lam himna an neih leh a, a mite nêna Jehova an fak avânga hlimna chu an neih lêt leh theih nân, kan tihtheih apiang i ti ang u.—Hebrai 13:15; 1 Petera 5:6, 7.
Kan Kawng Atâna Chatuan Eng
23, 24. Sâm 119 aṭangin eng hlâwkna nge i hmuh?
23 Sâm 119 chu kawng tinrêngin kan hlâwkpui thei a. Entîr nân, Pathian rinchhan lehzual tûrin min siam thei a ni, chu chuan ‘LALPA dân zawhna’ hian hlimna dik tak a thlen tih a kawhhmuh avângin. (Sâm 119:1) Fakna hla phuahtu chuan ‘Pathian thu infinkhâwm chu thutak a ni,’ tih min hriattîr a. (Sâm 119:160) Hei hian Pathian Thu pum pui kan ngaihhlutna a tipung ngei tûr a ni. Sâm 119 ngun taka ngaihtuahna chuan Pathian Lehkha Thu taima taka zir tûrin min chêttîr tûr a ni bawk. Fakna hla phuahtu chuan: “I thu ruatte chu mi zirtîr ang che,” tiin Pathian a ngên châmchi a. (Sâm 119:12, 65, 135) “Ngaihtuah thiamna leh hriatna mi zirtîr ang che; i thupêkte chu ka ring si a,” tiin a ngên bawk. (Sâm 119:66) Chutiang bawk chuan kan ṭawngṭai ve tûr a ni.
24 Pathian zirtîrna chuan Jehova nêna inlaichînna hnai tak min neihtîr thei a. Fakna hla phuahtu chu Pathian chhiahhlawh tiin a inko châmchi a ni. Dik takin: “I ta ka nih hi,” tia sawiin Jehova chu ṭawngkam thinlung khawih tak hmangin a bia a ni. (Sâm 119:17, 65, 94, 122, 125; Rom 14:8) A Thuhretute zînga mi anga Jehova biak leh a rawng bâwl chu chanvo hlu a va ni tehrêng êm! (Sâm 119:7) Lalram thupuangtu angin Pathian rawng chu hlim takin i bâwl em? Chuti a nih chuan, Jehova chuan a thu i âwih reng a, chu chu i kawng i kah êntîr phawt chuan, he rawngbâwlna hlu takah hian a ṭanpui chein, mal a sâwm zêl ang che. (w05 4/15)
Engtin Nge I Chhân Ang?
• Engvângin nge Pathian thu kan ngainat ang?
• Engtin nge Pathian thu hian min châwm?
• Eng kawngin nge Jehova thuhriattîrte chuan min ṭanpui?
• Engvângin nge Jehova mite chu him tak leh thlamuang taka an awm?
[Phêk 28-naa milem]
Jehova thuhriattîrte kan ngainat chuan, ani chuan “englo êkchhia” angin min ngai ngai lo vang
[Phêk 29-naa milem]
Nî tina Bible kan chhiar chuan, kan ṭawngṭai hunah thuziak ṭangkai tak takte chu kan rilruah a lo lang ang