Thawhleh Beiseina​—I Tân Awmzia Eng Nge A Neih?

“I kut i phar a, thil nung zawng zawng châkna chu i tihrehsak ṭhîn.”​—SAM 145:16.

1-3. Ṭhenkhatin nakin hun atân beiseina eng nge an neih? Entîrna pe rawh.

KUM kaw mi Christopher-a leh a unaupa chuan an pi leh pu leh an fate pahnih nên England ram Manchester bulah Kristian rawngbâwla in tina kalin zîng lam hun chu an hmang a. He kan magazine kawppui, Awake! chuan thilthleng chu heti hian a sawi. “Tlai lamah chuan an vaiin tuipui kam bul, Blackpool-ah ram fangin an zin tlâng a. Police-hovin ‘chhiatna râpthlâk tak’ an tih motor chêtsualnaa a hmuna thi nghâl mi 12-te zîngah an 6 chuan an tel a ni.”

² Chu vânduaina a thlen hma zân chuan, an chhûngkuain thihna chungchâng sawihona Kohhran Lehkhabu Zirna inkhâwmah an tel a. A pa chuan: “Christopher-a hi naupang englai pawha thil chhût mi a ni a. Chu mi zân chuan khawvêl thar leh a nakin hun beiseina chungchâng chu chiang takin a sawi a ni. Tichuan, kan thusawi a kaltluan zêl laiin, Christophera chuan: ‘Thihna hian rilru tina hle mah se, engtik nîah emaw chuan leiah hian kan la inhmu leh dâwn tih kan hriatna hi Jehova Thuhretu nih hlâwkna chu a ni,’ tiin a rawn sawi chhuak phawng a. Chuta inkhâwm atua mah chuan, a ṭawngkamte chu hetianga hriat reng a ni dâwn tih rêng kan ngaihtuah pha lo,” tiin a sawi a ni.a

³ Chu mi hma kum tam tak kalta, kum 1940-ah chuan Austria rama Thuhretu pakhat, Franz-a chuan Jehova laka a rinawm avângin a lû tan chhum a ni dâwn tih a hria a. Berlin lung in aṭangin a nu hnênah lehkha a thawn a ni: “Ka hriat dân chuan, [sipai] ni tûrin chhia chham ta ila, thihna khawp thil sual ka ti a ni ang. Chu chu ka tân chuan rinawm lohna a ni dâwn si a. Kaihthawh ka ni lo vang. . . . Tichuan, ka nu duh tak leh ka unau zawng zawngte u, vawiin ni hian ka chungthu an rêlna chu hriattîr ka ni a, thlaphâng suh u, chu chu thih a ni; naktûk zîngah hian tihhlum ka ni dâwn. Pathian hnên aṭangin chakna ka dawng a ni, hun kal tawha Kristian dik zawng zawngte dawn ang chiah chu. . . . Thih thlenga in rinawm ngheh chuan, thawhlehnaah kan inhmu leh dâwn nia. . . . Kan inhmuh leh hma loh zawng,” tiin.b

4. Hêng thiltawn târ lante hian i chungah eng nghawng nge a neih a, eng nge kan ngaihtuahho dâwn?

⁴ Christopher-a leh Franz-a te tân chuan thawhleh beiseina chuan awmzia nasa tak a nei a. Chu chu an tân chuan thil awm tak tak a ni. Hêng chanchinte hian kan rilru a va khawih tak êm! Jehova chunga kan lâwmna tithûk lehzual tûrin leh thawhleh kan beiseina tichak lehzual tûrin, thawhlehna a lo awm chhan tûr leh a mi mal taka min nghawng dân tûr chu i lo ngaihtuah ang u.

Lei Lam Thawhlehna Inlârna

5, 6. Thu Puan 20:​12, 13-a tirhkoh Johana chhinchhiah inlârna chuan eng nge a târ lan?

⁵ Krista Isua Kum Sâng Rorêl chhûnga thilthleng tûr hmuh lâwkna inlârnaah chuan tirhkoh Johana chuan lei lam thawhlehna chu a hmu a. A ni chuan: “Mitthite, a lian atein, . . . ka hmu a. . . . Tuifinriat chuan a chhûnga mitthi awmte chu a chhuahtîr a, Thihna leh Mitthi khua chuan an chhûnga mitthi awmte chu an chhuahtîr bawk a,” tiin a sawi a ni. (Thu Puan 20:​12, 13) Eng ang mi pawh​—“alian” emaw ‘ate’ emaw pawh ni se​—Mithi Khua (Seol), mihring thlân pângngaia awm zawng zawngte chu chhuah an ni ang. Chu mi hunah chuan tuifinriata an nun chânte chu nungin an lo kîr leh ang. He thilthleng ropui tak hi Jehova thiltum zînga mi a ni.

⁶ Krista kum sâng rorêlna chu Setana phuara leilâwta thlâknain a inṭan ang a. Chu rorêlna chhûng chuan kaihthawh lehte leh hrehawm nasa taka dam khawchhuakte chu Setana’n a hruai sual thei lo vang, che châng thei lo dinhmuna a awm dâwn avângin. (Thu Puan 20:​1-3) Kum sâng khat chu i tân chuan a rei mai thei; mahse, Jehova tân chuan “ni khat ang” lek a ni.​—2 Petera 3:8.

7. Krista Kum Sâng Rorêl chhûnga rorêlna chu engah nge a innghah dâwn?

⁷ Inlârnain a sawi angin, Krista Kum Sâng Rorêlna chu rorêl hun a ni dâwn a. Tirhkoh Johana chuan: “Mitthite, alian atein, lalṭhutphah hmaa ding ka hmu a; tin, lehkhabute an hawng a; tin, lehkhabu dang, Nunna Bu chu an hawng bawk a; tin, mithite chu lehkha butea ziak an thiltih ang zêla rêlsakin an awm ta a. . . . Tin, mi tin an thiltih ang zêla rêlsakin an awm ta a,” tiin a ziak a ni. (Thu Puan 20:​12, 13) He rorêlna hi miin a thih hmaa a thiltih leh tih lohvah a innghat lo tih chhinchhiah ang che. (Rom 6:7) Chu ai chuan, nakina la hawn tûr “lehkhabute” nên a inkûngkaih zâwk a ni. Miin chu lehkhabutea thu awmte a hriat hnua a thiltihte chu ‘nunna bua’ a hming a awm leh awm loh hriltu a ni ang.

‘Nunna changa Thawhlehna’ Nge ‘Thiam Loh Changa Thawhlehna’

8. Tho lehte tân eng hmabâk pahnih nge awm?

⁸ Johana inlârna hmuh atîr lamah chuan, Isua chu “Thihna leh Mitthi Khaw chahbite” nei anga târ lan a ni a. (Thu Puan 1:18) Jehova tân “Nunna Siamtu” angin rawng a bâwl a, “mi nung leh mitthi” ngaihtuah tûra thuneihna pêk a ni. (Tirhkohte 3:15; 2 Timothea 4:1) Chu chu engtin nge a tih ang? Thihnaa muhîlte kaihthawh lehna hmangin. Isua chuan a thuhrilhna mipuite hnênah: “Hêng hi mak ti suh u, a hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang,” tih a sawi a. “Thil ṭha titute chu nunna changin an tho leh ang a, thil sual titute chu thiam loh changin an tho leh ang,” tiin a sawi belh a ni. (Johana 5:​28, 30) A nih chuan, hmân lai mi rinawm hmeichhia leh mipate chuan eng hmabâk nge an neih?

9. (a) Thawhlehnaa an lo kîr lehin, mi tam takte’n eng nge an zîr ngei ngei dâwn? (b) Eng zirtîrna hna lian tak nge thawh ni dâwn?

⁹ Hêng hmân lai mi rinawmte an lo thawhleh hian, thutiam an rinchhante chu tûnah chuan a tak a lo ni ta tih an hmu chhuak thuai ang. Genesis 3:​15, Bible hrilh lâwkna hmasa bera târ lan, Pathian hmeichhe Chi Thlah nihna hriat thiam chu an va duh dâwn êm! He thutiam Messia, Isua chuan a thih thlenga a rinawm avângin, a nun chu tlanna inthâwina atân a hlân tih an hriat chuan an va hlim dâwn êm! (Matthaia 20:28) A lo hmuaktute chuan he tlanna hi Jehova phu loh ngilneihna leh zahngaihna lantîrna a ni tih hre thiam tûra anmahni ṭanpui chu an hlimpui hle ang. Tho lehte chuan Pathian Ramin lei atâna Pathian thiltum a hlen chhuah dân an hriat hunah chuan an thinlung chu Jehova faknain a khat liam ang tih chu rinhlelh rual a ni lo. Anni chuan hmangaihna ngah vâna an Pa leh a Fapa chunga rinawmna lantîr theihna hun tam tak an nei ang. Chutih huna nung dam zawng zawngte chuan Pathian ruahman tlanna pawm ve ngai, thlân aṭanga tho leh mi tlûklehdingâwn tam takte zirtîrna hna lian tak chu hlim takin an thawk ang.

10, 11. (a) Kum Sâng khat chuan leia awm zawng zawngte tân eng remchânna nge a pêk dâwn? (b) Chu chuan eng anga min nghawng tûr nge a nih?

¹⁰ Kaihthawh leh Abrahama chuan a nghahhlelh “khua” rorêlna hnuaia nun chu a thlamuanpui hle ang. (Hebrai 11:10) Hmân lai mi rinawm Joba chuan a nun dânin rinawmna fiahna tawng Jehova chhiahhlawh dangte a tichak tih a hriat chuan a va hlim dâwn êm! Tin, Daniela chuan thâwk khuma a ziah hrilh lâwknate thlen famkimna chu hriat a va châk dâwn êm!

¹¹ Dik takin, thawhlehna emaw, hrehawmna nasa taka dam khawchhuahna emaw hmanga felna khawvêl thara nunna nei zawng zawngte chuan lei leh a luahtute tâna Jehova thiltum chungchâng zir tûr tam tak an nei ang. Chatuana nun leh kum khuaa Jehova chawimawi theih beiseina chuan Kum Sâng zirtîrna chu a tihlimawm tak zet dâwn a ni. Mahse, lehkhabute chhûnga thu awm kan zir a, a mi mala kan thiltih chu a pawimawh ber ang. Kan thu zirte chu kan nunpui ang em? He thu pawimawh tak, thutak pênsan tûra Setana beihna hnuhnûng ber do tûra min tichaktu tûr hi chhûtin, kan nunpui ang em?

12. Zirtîrna leh lei paradis-a chantîrna hnaa theih tâwp chhuaha tel tûrin engin nge mi tinte ṭanpui dâwn?

¹² Kan theihnghilh loh tûr chu Krista tlanna inthâwina aṭanga kan neih theih malsâwmna ropui takte chu a ni. Kaihthawh lehte chuan tûna kan tawn mêk dam lohnate emaw, piansualnate emaw chu an nei lo vang. (Isaia 33:24) Taksa hrisêl leh hrisêlna ṭha famkim beiseina chuan khawvêl thara chêng zawng zawngte chu tho leh mi maktaduai têlte hnêna theih tâwp chhuaha nun dân kawng zirtîrna a pêktîr thei ang. Tin, anni chu leia hnathawh tum tawh zînga hna lian ber​—leilung zawng zawng hi Jehova chawimawi nâna paradis-a chantîrnaah an tel bawk ang.

13, 14. Fiahna hnuhnûng bera Setana chhuahtîrna thiltum chu eng nge ni a, mi mal tin tân eng rah nge a chhuah theih?

¹³ Fiahna hnuhnûng ber atâna Setana chu leilâwt aṭanga chhuah a nih hunah chuan, mihringte hruai bo chu a tum leh dâwn a. Thu Puan 20:​7-9-a sawi angin, Setana thununna suaksual laka tlu ‘a bum theih hnam,’ a nih loh leh mipui pungkhâwm zawng zawngte chuan tihboralna rorêlna chu an tâwk ang: ‘Vân aṭangin mei a lo tla ang a, anni chu a kângral ang.’ Kum Sâng Khat chhûnga thawhlehna an chan hnua tihboralte zînga telte tân, an thawhlehna chu thiam loh changa thawhlehna a ni ang. Chu mi nêna inkalhin, rinawnna vawngtu tho lehte chuan chatuana nunna thilpêk an chang ang. Dik takin, an thawhlehna chu ‘nunna changa thawhlehna’ a ni ang.​—Johana 5:29.

¹⁴ Engtin nge thawhleh beiseina chuan tûnah pawh min thlamuan theih? A aia pawimawh zâwk chu, nakinah thawhlehna hlâwkpui ngei tûrin tûnah eng nge kan tih ngai?

Tûna Kan Zir Theihte Chu

15. Thawhlehna rin chu engtin nge tûnah pawh a ṭangkai?

¹⁵ Tûn hnai mai khân i hmangaih tak tuemaw i chânin, chu chânna nasa tak avâng chuan insiamremna lian tak i nei pawh a ni thei. Thawhleh beiseina chuan thutak hre lo mite’n an neih theih loh chhûng lam thlamuanna leh chakna nei tûrin a ṭanpui che a ni. “Mi dang beiseina rêng nei lote anga in lungngaih loh nân, muhîlte chanchin in hriat loh kan duh lo ve,” tiin Paula’n Thessalonika khuaa mite chu a thlamuan a ni. (1 Thessalonika 4:13) Khawvêl thara thawhlehna hmu tûrah i inruat em? A nih chuan, i hmangaihte nêna inhmuh leh beiseina ngaihtuahin thlamuanna nei ang che.

16. Thawhlehna a awm hunah engtin nge i awm i rin?

¹⁶ Adama helna rah chhuah chu natna lam hawiin i tuar pawh a ni thei a. Chu mi avânga i lungngaihna chuan khawvêl thara i chan tûr thawhlehna i beiseina leh hrisêlna leh chakna thar neih i beiseina chu theihnghilhtîr che suh se. I han men chhuah a, i thawhleh avânga i hlimna ṭâwmpuitu hmêl hlim takte i han hmuh hian, a ngilneihna avângin Pathian hnênah lâwm thu i hrilh hmaih hauh lo vang.

17, 18. Eng zir tûr pawimawh pahnih nge kan rilruah kan dah ang?

¹⁷ Thawhlehna a lo thlen hma chuan, kan hriat reng tûr thil pahnih chu ngaihtuah rawh. Pakhat chu tûn aṭang ngeia thinlung zawng zawnga Jehova rawngbâwl a pawimawhzia hi a ni. Kan Hotu, Isua Krista entawnin, mahni inphat kan nun kawng chuan Jehova leh kan ṭhenawmte kan hmangaihzia a lantîr a. Dodâlna emaw, tihduhdahna emawin ka thil neihte emaw, kan zalênna emaw a lâk bo chuan, fiahna engpawh tâwk mah ila rinnaa ngheh tlat chu kan tum a ni. Dodâltute’n tihhluma min vau a nih pawhin, thawhleh beiseina chuan Jehova leh a Lalram laka rinawm reng tûrin min thlamuan a, min tichak bawk. Ni e, Lalram thuhrilhna leh zirtîr siam rawngbâwlnaa ṭhahnem kan ngaihna chuan mi felte tâna Jehova dahṭhat chatuan malsâwmna beiseina min pe a ni.

¹⁸ Zir tûr a pahnihna chu kan ṭhat famkim lohna avânga lo awm thlêmnate kan hmachhawn dân nên a inkûngkaih a ni. Thawhleh beiseina kan hriatna leh Jehova phu loh ngilneihna kan hlutna chuan rinnaa ngheh reng kan tumna chu a tizual sauh a ni. Tirhkoh Johana chuan: “Khawvêl hi hmangaih suh ula, khawvêla thil awmte pawh hi hmangaih hek suh u. Mi tupawhin khawvêl hi a hmangaih chuan Pa a hmangaihna amahah a awm lo. Khawvêla thil awm zawng zawng, tisa châkna te, mit châkna te, dam chhûng ropuina lem te hi Paa chhuak a ni lo va, khawvêla chhuak a ni zâwk si a. Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tiin a vaukhân a ni. (1 Johana 2:​15-17) Hausak âtchilhna lama khawvêl hîpna chu “nunna taktak” nêna kan khaikhin chuan engmah lo mai a ni ang. (1 Timothea 6:​17-19) Nungchang bawlhhlawhna lama thlêm kan nih chuan, kan do tlat ang. Armageddon a lo thlen hmaa thi tûr pawh lo ni ta ila, Jehova tilâwm lo nungchang zui zêlna chuan thawhleh beiseina nei lote dinhmunah min dah thei tih kan hria a ni.

19. Eng chanvo hlu tak mai nge kan theihnghilh ngai loh vang?

¹⁹ A bîk takin, tûnah leh chatuana Jehova thinlung tihlâwm theihna chanvo hlu tak mai chu kan theihnghilh ngai tûr a ni lo. (Thufingte 27:11) Thih thleng emaw, he khawvêl kalhmang suaksual tâwp thleng emawa kan rinawmna chuan Jehova hmaah lei leh vâna lalchungnunna thu buaia kan ṭan lam chu a târ lang a ni. Tichuan, hrehawmna nasa taka dam khawchhuahna emaw, thawhlehna mak tak emaw hmanga lei lam Paradis-a nun chu a va hlimawm dâwn êm!

Kan Châknate Tirehin

20, 21. Thawhlehna chungchânga zawhna chhân theih loh kan nei a nih pawhin, engin nge rinawm reng tûrin min ṭanpui ang? Hrilhfiah rawh.

²⁰ Thawhlehna kan sawihona chuan kan zawhna neih zawng zawng a chhâng vek lo. Jehova’n nupui pasal neia thite tân eng ruahmanna nge a siam dâwn? (Luka 20:​34, 35) Mite an thihna hmunah ngei hian kaihthawh leh an ni ang em? An chhûngte awmna bulah an tho leh ang em? Thawhlehna ruahmanna chungchâng zawhna tam tak chu chhân a la ni lo. Amaherawhchu, Jeremia thu: “LALPA chu amah nghâktute tân a ṭha a, amah zawngtu tân chuan. LALPA chhandamna beiseia nghah veng veng chu a ṭha a ni,” tih hi kan rilruah kan dah a ngai a ni. (Jeremia Ṭah Hla 3:​25, 26) Jehova hun ruatah chuan, thil engkim chu lungawithlâk taka laihlan a ni ang. Chu chu engtin nge kan chian theih?

²¹ Jehova chungchânga fakna hla phuahtu thâwk khum hla thu: “I kut i phar a, thil nung zawng zawng châkna chu i tihrehsak ṭhîn,” tih hi ngaihtuah rawh. (Sâm 145:16) Kan lo upat zêl angin, kan châknate pawh chu a inthlâk zêl a. Kan naupang laia kan thil beisei chu tûnah kan thil châk zâwng a ni tawh lo. Nunna kan thlîr dân chu kan thiltawnte leh kan beiseina chuan a ngawng a ni. Chutichung pawhin, khawvêl thara châkna ṭha kan neih tûr chu engang pawh lo ni se, Jehova chuan min tihrehsak ngei ngei ang.

22. Engvângin nge Jehova chawimawina tûr chhan ṭha tak kan neih?

²² Tûna kan ngaihtuah ṭheuh tûr chu rinawm taka awm hi a ni. “Enkawltu chu mi rinawm nih a ngai bawk a ni.” (1 Korinth 4:2) Pathian Ram chanchin ṭha ropui tak enkawltu kan ni a. Kan tawh apiangte hnêna he chanchin ṭha taima taka kan puanna chuan nunna kawnga awm reng tûrin min ṭanpui a ni. Kan chungah “hun leh khawrêl ang angin a thleng” ṭhîn tih hi i theihnghilh lo vang u. (Thuhriltu 9:11) Nun ngelngheh lohna avânga ṭûl lo taka lo awm lungkhamna engpawh do lêt nân, thawhleh beiseina ropui tak chu vawng tlat rawh. Krista Kum Sâng Rorêlna ṭan a nih hmain i thi dâwn tih i hriat chuan, hahdamna lo thleng tûr chu i thlamuanpui thei a ni. Jehova hun ruatah chuan Joba’n Siamtu hnêna a sawi: “Mi ko vang a, keiin ka chhâng ang che,” tih hi i sawi ve thei dâwn a ni. A hriatrengnaa awm zawng zawngte nunnaa hruai kîr leh châk ngawih ngawihtu, Jehova chu chawimawiin awm rawh se.​—Joba 14:15. (w05 5/1)

[Footnote-te]

I Hre Chhuak Em?

• Kum Sâng khat chhûngin mite chu eng ṭanchhanin nge rorêlsak an nih dâwn?

• Engvângin nge ṭhenkhatin ‘nunna changa thawhlehna’ an chan ang a, mi dangte erawh chuan ‘thiam loh changa thawhlehna’ an chan ang?

• Engtin nge thawhleh beiseina chuan tûn la laah min thlamuan theih?

• Engtin nge Sâm 145:16 thute chuan thawhlehna chungchânga zawhna chhân lohte hmachhawn thei tûra min ṭanpui?