Jehova Ni Atân I Inpeih Em?
“LALPA ni ropui tak chu a hnai e, a hnaiin a thleng thuai dâwn a ni.”—ZEPHANIA 1:14.
1-3. (a) Jehova nî chungchâng Bible-in eng nge a sawi? (b) ‘Jehova ni’ a eng ber hi nge kan hmachhawn?
JEHOVA ni ropui chu dârkâr 24 chhûng awh kan ni pângngai a ni lo. Mi suaksualte chunga Pathian rorêl hun chhûng a ni zâwk a ni. Pathian ngaihsak lote tân chuan chu thimna ni, thinurna ni, thinrimna ni, mangan leh ṭiauna ni chuan râp awm tak nih chhan tûr a nei a ni. (Isaia 13:9; Amosa 5:18-20; Zephania 1:15) “Chu nî chu a chung a pik e! LALPA ni chu a hnai si a, Engkimtitheia laka boralna ang a lo thleng ang,” tiin Joela hrilh lâwkna chuan a sawi. (Joela 1:15) Amaherawhchu, chu ni ropuiah chuan Pathian chu “thinlung dik tak pu” te Chhandamtu a ni ang.—Sâm 7:10.
2 ‘Jehova ni’ tih chuan hun hrang hranga Pathian rorêlna a kâwk a. Entîr nân, ‘Jehova ni’ chu Babulon mite’n B.C.E. 607-a Jerusalem an tihchhiat khân a thleng a ni. (Zephania 1:4-7) Chutiang bawk rorêlna chu C.E. 70-ah Pathianin a Fapa hnâwltu Juda hnam chunga rorêl tûra Rom mite a hman khân, a lo thleng bawk. (Daniela 9:24-27; Johana 19:15) Tin, Bible chuan Pathianin ‘hnam zawng zawng a do’ hun tûr, ‘Jehova nî’ chungchâng pawh a sawi lâwk bawk a ni. (Zakaria 14:1-3) Thlarau thâwk khuma awmin, tirhkoh Paula chuan chu nî chu Krista lo awm lehna nên a thlunzawm a, chu a lo awm lehna chu kum 1914-a vân lam Lalrama Isua lala a ṭhut khân a inṭan a ni. (2 Thessalonika 2:1, 2) Jehova nî a hnaih tawh êm avângin, kum 2007 atâna Jehova Thuhretute kum châng chu a inhmeh hle. Chu chu Zephania 1:14 aṭanga lâk chhuah: ‘Jehova ni ropui tak chu a hnai,’ tih a ni.
3 Pathian ni ropui tak chu a hnaih tawh avângin, tûn hi inring renga awm hun a ni. Engtin nge chu mi nî atân chuan i inrâlrin theih? Jehova nî atâna inring renga awm tûrin hma i lâk belh a ngai em?
Inring Rengin Awm Rawh
4. Eng fiahna nasa tak atân nge Isua chu a inrâlrin?
4 Khawvêl tâwpna chungchâng hrilh lâwknaah, Isua Krista chuan a zirtîrte hnênah: “Inring rengin awm rawh u,” tiin a sawi a. (Matthaia 24:44) Isua’n chu thu a sawi lai chuan, amah ngei pawh fiahna nasa tak—tlanna inthawina atâna a thihna tûr—atân a inring reng a ni. (Matthaia 20:28) Isua inrâlrin dân aṭangin eng nge kan zir theih?
5, 6. (a) Engtin nge Pathian leh mite hmangaihna chuan Jehova nî atâna kan inrâlrinnaah min ṭanpui? (b) Ṭhenawmte hmangaihna chungchângah eng entîrna nge Isua’n min hnutchhiah?
5 Isua chuan a thinlung zawng zawngin Jehova a hmangaih a, a tehna felte chu a ngainâ bawk a ni. A chungchângah Hebrai 1:9 chuan: “Felna chu i ngainâ a, bawhchhiatna chu i huat kha; chuvângin, Pathian, i Pathian chuan, i ṭhiante ai chuan hlimna hriak a thih nasat tâk che hi,” tiin a sawi a ni. Isua chuan a Pa vâna mi a hmangaih avângin a chunga a rinawmna chu a vawng tlat a ni. Chutiang bawk Pathian hmangaihna kan neih a, a thil phûtte kan nunpui chuan, ani chuan min humhim ang. (Sâm 31:23) Chutiang hmangaihna leh thuâwihna chuan Jehova nî atâna inring renga awm tûrin min ṭanpui ang.
6 Mite hmangaihna chu Isua miziaah a langsâr hle a. Dik tak chuan, “vêngtu nei lo berâmte anga hrehawm leh darha an awm avângin a khawngaih ta êm êm a.” (Matthaia 9:36) Chuvâng chuan, Isua chuan mite hnênah chanchin ṭha a hril a ni, hmangaihnain min tur avânga kan ṭhenawmte hnêna Lalram thuchah kan puan chhuah ang hian. Pathian leh kan ṭhenawmte hmangaihna chuan Kristian rawngbâwltu thatho tak min nihtîr a, Jehova nî atâna inrâlring tûrin min ṭanpui bawk a ni.—Matthaia 22:37-39.
7. Jehova nî kan nghah rualin, engvângin nge kan hlim theih?
7 Pathian duhzâwng tih chu Isua lâwmzâwng tak a ni a. (Sâm 40:8) Chutiang bawk rilru put hmang kan neih chuan, Pathian rawngbâwl chu kan hlimpui ang. Isua angin, mahni hmasial lova petu kan ni ang a, chu chuan hlimna dik tak min pe ang. (Tirhkohte 20:35) Ni e, “LALPA chunga lâwmna chu [kan] chakna a ni.” Chu lâwmna nên chuan, Pathian ni ropui atân kan inrâlring ṭha lehzual ang.—Nehemia 8:10.
8. Engvângin nge Jehova chu ṭawngṭaia kan hnaih zual sauh vang?
8 Pathian hnêna ṭawngṭai ziahna chuan Isua chu a rinna fiahna hmachhawn tûra inrâlring tûrin a ṭanpui a. Johana’n baptisma a chantîr lai khân a ṭawngṭai a ni. A tirhkohte a thlan dâwn pawh khân Isua chu zankhuain a ṭawngṭai bawk a. (Luka 6:12-16) Tin, a lei lam nun tâwp dâwn zâna Isua ṭawngṭaina chuan Bible chhiartu tu rilru nge a khawih loh teh lul ang? (Marka 14:32-42; Johana 17:1-26) Isua angin, ṭawngṭai ziah mi i ni em? Jehova pan fo la, rilru pe takin ṭawngṭai la, thlarau thianghlim kaihhruaina zâwng la; tin, chu kaihhruaina chu a lo lan hunah pawm vat ṭhîn ang che. Pathian ni ropui tak lo thleng tûr kan hnaih lai he hun khirh takah hian, kan Pa vâna mi nêna inlaichînna nghet tak neih chu a pawimawh hle. A nih chuan, Jehova chu ṭawngṭaiin hnaih sauh tum tlat ang che.—Jakoba 4:8.
9. Jehova hming tihthianghlimna ngaihsak chu eng anga pawimawh nge ni?
9 Jehova hming tihthianghlimna a ngaihsakna pawhin Isua chu a hmachhawn tûr fiahna atâna inrâlring tûrin a ṭanpui a. A hnungzuitute chu Pathian hnêna an ṭawngṭainaah: “I hming zahawm [“thianghlim,” NW] rawh se,” tih ngenna telh tûrin a zirtîr a ni. (Matthaia 6:9) Jehova hming tihthianghlim kan duh tak zet chuan, a chawimawi lozâwnga thiltih engkim pumpelh chu kan tum tlat ang. Chutiang chuan, Jehova ni ropui atân kan inpuahchah ṭha lehzual dâwn a ni.
Inthlâkthlengna Ṭhenkhat I Siam Ang Em?
10. Engvângin nge kan nun bih chian chu thiltih âwm a nih?
10 Jehova nî chu naktûkah lo thleng ta se, chu mi atân i inpeih tak zet em? Kan vaiin kan nuna thiltih emaw, rilru put hmang emaw siam ṭhat ngaite chu kan inbih chiang ṭheuh tûr a ni. Mihring dam chhûng tâwi tak leh chiang lo tak hi rilrua dah rengin, kan vaiin nî tin thlarau lama kan harhvân reng chu a ngai a ni. (Thuhriltu 9:11, 12; Jakoba 4:13-15) Chuvângin, kan nuna kan ngaihsak ngai thil ṭhenkhat ilo ngaihtuah ang u.
11. Bible chhiar chungchânga i thiltum chu eng nge ni?
11 Thil pawimawh tak pakhat chu nî tina Bible chhiar tûra ‘bawi rinawm’ fuihna hi a ni. (Matthaia 24:45) Kum tinin Pathian Lehkha Thu Genesis aṭanga Thu Puan thleng chhiar a, ngun taka chhût ziah chu i thiltuma neih i duh thei a. Nî tin bung li vêl chhiarin, kum khatah Bible-a bung awm zât 1,189 chu i chhiar chhuak thei a ni. Israel lalte chuan Jehova Dân chu ‘an dam chhûng zawng an chhiar tûr a ni.’ Josua chuan chutiang bawka a tih ngei a rinawm. (Deuteronomy 17:14-20; Josua 1:7, 8) Thlarau lam berâm vêngtute chuan “zirtîrna dik tak” pe thei tûra anmahni ṭanpuitu atân Pathian Thu nî tina an chhiar chu a va pawimawh tak êm!—Tita 2:1.
12. Jehova nî a hnaihna chuan eng ti tûrin nge a chêttîr ang che?
12 Jehova nî a hnaihna chuan Kristian inkhâwma tel ziah tûr leh a theih ang tâwka chhânnate pe tûrin min chêttîr tûr a ni. (Hebrai 10:24, 25) Chutianga i tihna chuan chatuana nun duhna rilru dik tak neite hmuh chhuah tum leh ṭanpui tum Lalram thu puangtu i nih angin, chu mi kawnga i thiamna chu a tât hriam ang. (Tirhkohte 13:48, NW) Kohhranah tarte ṭanpui leh ṭhalaite fuih ang chi kawng dangah pawh i inhmang lehzual thei a ni. Chutianga thawh rimnate chu a va lungâwithlâk ṭhîn tak êm!
Mi Dangte Nêna In Inlaichînna
13. Mihring thara inthuam chungchângah eng zawhnate nge kan inzawh theih?
13 Jehova nî chu a hnaih tawh êm avângin, “mihring thar, thutak felna leh thianghlimnaa Pathian anga siam khân [i] inthuam” nân i thawh rim lehzual a ngai em? (Ephesi 4:20-24) Pathian miziate i lantîr hian, ‘thlarauvah i awm’ tih leh thlarau rah i lantîr tih mi dangte chuan an hmu ang. (Galatia 5:16, 22-25) Nangmah leh i chhûngte’n mihring tharin in inthuam tih târ langtu thiltih engemaw tak sawi tûr i hria em? (Kolossa 3:9, 10) Entîr nân, i rinpuite leh mi dangte chunga ngilnei tak nia hriat i ni em? (Galatia 6:10) Pathian Lehkha Thu zir ziahna chuan Jehova nî atâna inrâlring tûra ṭanpuitu tûr Pathian miziate nei tûrin a ṭanpui ang che.
14. Engvângin nge mi chuan insûmtheihna nei tûra a beih rualin, thlarau thianghlim dîla a ṭawngṭai ang?
14 Thinrim awl tak i nih a, insûmtheihna i neih lehzual a ngai tih i inhriat chuan engtin nge ni ang? Chu mizia chu Pathian thlarau thianghlimin nangmaha a rah chhuah theih miziate zînga mi a ni. Chuvâng chuan, Isua thu: “Dîl rawh u, tichuan an pe ang che u; zawng rawh u, tichuan in hmu ang, kik rawh u, tichuan an hawnsak ang che u. . . . Nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!” tih nêna inmilin, thlarau thianghlim dîlin ṭawngṭai rawh.—Luka 11:9-13.
15. Nangmah leh i rinpui tuemaw inkârah inhuatna awm ta se, eng nge tih ngai?
15 Nangmah leh i rinpui tuemaw inkârah inhuatna awm ta se. Chutiang a nih chuan, in inlaichînna siam ṭha tûrin ṭan la rawh, chutiang chuan kohhranah remna leh inlungrualna awmtîr ang che. (Sâm 133:1-3) Isua fuihna thu Matthaia 5:23, 24 emaw, Matthaia 18:15-17 emawa chhinchhiahte chu nunpui rawh. I thinur chu niin a tlâkpui a nih chuan, chu chu siam ṭha vat ang che. Tam takah chuan ngaihdam duhna neih hi thil ngai awmchhun a ni fo ṭhîn. Paula chuan: “Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u,” tiin a ziak a ni.—Ephesi 4:25, 26, 32.
16. Eng kawngtein nge inneihnaah lainatna neih a ṭûl?
16 Nupa inlaichînnaah inlainatna leh a châng chuan ngaihdamna neih a ngai a. I kawppui chunga hmangaihna leh khawngaihna i neih lehzual a ngai a nih chuan, Pathian leh a Thu ṭanpuinain chu miziate nei tûr chuan thawk rim rawh. Lungngaihna titlêm tûr leh rinawm lohna pumpelh tûrin, nangma lamah 1 Korinth 7:1-5-a thute i zawm a ngai em? Hei hi pasal emaw, nupui emaw tân “lainatna” neih a ṭûlna lai a ni.
17. Miin sual nasa tak a tih chuan eng nge a tih ang?
17 Kawng engemaw takin sual nasa tak ti ta la engtin nge ni ang? Dinhmun chu siam ṭha vat rawh. Kristian upate ṭanpuina dîl ngei ang che. An ṭawngṭaina leh zilhna chuan thlarau lamah hrisêl leh tûrin a ṭanpui dâwn che a ni. (Jakoba 5:13-16) Inchhîrna rilru nên Jehova hnênah ṭawngṭai rawh. Chutia tih lohna chuan mahni inthiam lohna a neihtîr chein, i chhia leh ṭha hriatna chu a tibuai ang. Davida chuan chûng chu a tawng a, mahse Jehova hnêna inpuanna aṭanga lo awm rilru hahdamna neih chu a va ṭha zâwk êm! Ani chuan: “A bawhchhiatna ngaihdama awma, a sualna hliahkhuha awma chu, a eng a thâwl e. Mi, LALPAN khawlohna neia a ruat lohva, a thlarauva tihderna rêng rêng awm lova chu, a eng a thâwl e,” tiin a ziak a ni. (Sâm 32:1-5) Jehova chuan inlamlêt tak zette sualna chu a ngaidam a ni.—Sâm 103:8-14; Thufingte 28:13.
Khawvêla Mi Ni Suh
18. Engtin nge khawvêl hi i thlîr ang?
18 Kan Pa vâna mi thutiam khawvêl thar ropui taka nun chu i nghâkhlel ngei ang a. A nih chuan Pathian laka inmihran mi fel lote awmna he khawvêl hi engtin nge i thlîr? “Khawvêl lal,” Setana chuan Isua Kristaah chuan chan engmah a nei lo. (Johana 12:31; 14:30) Diabola leh a khawvêlin nangmaha chan a neih chu i duh lo ngei ang; chuvângin, tirhkoh Johana thu: “Khawvêl hi hmangaih suh ula, khawvêla thil awmte pawh hi hmangaih hek suh u,” tih hi nunpui ang che. “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang” tih a nih avângin, chu chu kawng finthlâk a ni.—1 Johana 2:15-17.
19. Kristian ṭhalaite chu eng thiltumte nge nei tûra fuih an nih?
19 I fate chu ‘khawvêl bawlhhlawh kai lovin’ i siam em? (Jakoba 1:27) Miin, nghakuaia sangha a man ang chiahin, Setana chuan i fate man chu a duh a ni. Pâwl hrang hrangte chu ṭhalaite Setana khawvêla hîp luh nâna siam a ni a. Mahse, Jehova chhiahhlawhte chu he khawvêl suaksual tâwp huna dam khawchhuak tûr inawpna pâwl awmchhunah an awm tawh a ni. Chuvângin, Kristian ṭhalaite chu “Lalpa hna ṭhahnemngai taka thawk” tûra fuih tûr an ni. (1 Korinth 15:58) Pathian ngaihsak nu leh pate chuan an fate chu hlimna pe a, Pathian chawimawitu leh Jehova nî atâna anmahni inring renga awm tûra ṭanpuitu nun awmze nei neih chu an thiltuma siam tûrin an ṭanpui thei a ni.
Jehova Ni Ropui Piah Lam Chu Thlîr Rawh
20. Engvângin nge chatuan nunna chu kan rilrua kan dah ang?
20 Chatuana nunna chu rilrua i dah chuan, Jehova ni ropui chu rilru hahdam takin i nghâk thei ang. (Juda 20, 21) Paradis-a chatuan nunna chu i nghâkhlel a, chuvângin ṭhalai chakna neih thar leh a, thiltum ṭha leh Jehova chungchâng zir belh tûra hun tam tak neih chu i inbeisei a ni. Mihringte’n Pathian ‘chanchin an hriat hi a beitham êm’ avângin, chatuana a chanchin zir tûr i nei dâwn a ni. (Joba 26:14) Beiseina phûrawm a va ni êm!
21, 22. Nangmah leh tholehte inkârah eng thu inhrilh tawnna nge awm dâwn?
21 Paradis-ah chuan, tholehte chuan hun kal tawha kan hriat loh thil ṭhenkhat chu min hrilh thei ang. Enoka chuan Pathian ngaihsak lo mite hnêna Jehova thuchah puang chhuak tûra huaisenna a neih dânte chu min hrilh thei ang a. (Juda 14, 15) Nova pawhin lawngtuk chungchâng min hrilh thei ngei ang. Abrahama leh Sari te chuan Ur khawpui nuam tak kalsan a, puan ina an khawsak laia an rilru put dânte chu an sawi thei dâwn a. Estheri’n a mite tâna ṭan la a, Hamana’n anmahni a phiar rûkna a tihhlawhchham dân kimchang taka a sawi lai chu han ngaihtuah bawk teh. (Estheri 7:1-6) Jona’n sangha lian pum chhûnga ni thum a awm chungchâng emaw, Baptistu Johana’n Isua a baptis laia a awmdân emaw a sawi lai chu han ngaihtuah bawk teh. (Luka 3:21, 22; 7:28) Thil hriat tûr a va tam tak êm!
22 Krista Kum Sâng Rorêl chhûngin, tholehte chu “Pathian hriatna” nei tûra ṭanpui theihna hun remchâng i nei thei ang a. (Thufingte 2:1-6) Mite’n Pathian Jehova hriatna nei a, chu mi mila thil an ti han hmuh chu a va nuam tak êm! Mahse, Jehova’n nakinah hmân laia mite i zirtîrna mal a sâwm a, lâwm taka an chhân lêt huna i hlim dân tûr hi ngaihtuah teh!
23. Eng tih nge kan tum tlat ang?
23 Jehova mite kan nih avânga hlâwkna kan neihte chhiar emaw, chhût emaw chu kan ṭhat famkim lohnain a thawh theih phâk bâk a ni. (Sâm 40:5) A bîk takin, Pathian thlarau lam thilpêkte avângin kan lâwm hle a. (Isaia 48:17, 18) Kan dinhmun chu eng pawh lo ni se, Jehova ni ropui kan nghah rualin thinlung zawng zawngin a rawng i bâwl ang u.
Engtin Nge I Chhân Ang?
• ‘Jehova nî’ chu eng nge ni?
• Jehova nî atân i inrâlring reng tih engtin nge i lantîr theih?
• Pathian ni ropui a hnaih tawh êm avângin, eng inthlâkthlengnate nge kan siam ngai mai thei?
• Jehova ni a tâwp hnuah eng tih nge i nghahhlelh?
[Phêk 14-naa milem]
Isua chu fiahnate atân inring rengin a awm
[Phêk 17-naa milem]
Jehova hriatna nei tûra tholehte ṭanpui chu chanvo ropui a va ni dâwn êm!