Pathian Hnaih Rawh

A Thutiamte Hlentu Chu

JOSUA 23:14

MI DANGTE rin chu harsa i ti em? Lungchhiat thlâk takin, mi dangte rinna tlâkchham tial tialna khawvêlah kan chêng a. I mi rin tak tuemaw chuan dâwt emaw, a thutiam hlen lohna emaw hmanga i rilru a tihnat chuan, amah i rinna chu a bo vek ngei ang. Mahse, beidawnna pawh tâwk ngai lo va, engtik lai pawha i rin tlat theih tûr tuemaw a awm a. Thufingte 3:5 chuan: “I thinlung zawng zawngin LALPA ring la,” tiin min fuih a ni. Engvângin nge Pathian Jehova chuan chutianga kan rin chu a phu? A chhân nân, Pathian Jehova chunga a rinna nghat tlattu Josua thusawi, Josua 24:14-a chhinchhiah hi i lo bih chiang ang u.

Thil awm dân chu han ngaihtuah teh. Israel hruaitu atâna Mosia thlâktu, Josua chuan kum 110 a hnaih thuak tawh a. Ani chuan a hma kum 60 vêla Tuipui Sen ata mak tak maia chhan chhuahna pawh tiamin, Israelte tâna Jehova thiltih ropui tam tak chu a dam chhûng zawngin a hmu a ni. Tûnah chuan a hun kal tawhte thlîr lêtin, Josua chuan Israel-ho “upate leh an puipate, an rorêltute leh an hotute chu” a ko khâwm a. (Josua 23:2) Tûna a thusawite hian kum upat vânga neih finna mai ni lovin, rinnaa khat thinlunga chhût ngunna aṭanga lo awm finna chu a târ lang a ni.

“Tûnah hian leilung zawng zawng dân angin ka kal ve dâwn ta a ni,” tiin Josua chuan a sawi a. “Leilung zawng zawng dân,” tih hi thihna sawina atâna hman a ni a. Josua chuan, “Ka dam rei tawh dâwn lo,” a tihna a ni. A thi dâwn tih hriain, Josua chuan a nun thlîr lêt nân amah chauhvin hun tam tak a hmang ngei ang. A rinpuite hnênah eng thuchah hnuhnûng ber nge a sawi?

Josua chuan: “LALPA in Pathianin in chungchâng a ṭha lam a lo sawi tawh zawng zawgte kha thlâwn pakhat mah a awm lo tih chu . . . in hria e; in chungah a lo thleng ta vek a, pakhat mah thlâwn a awm lo ve,” tiin a sawi zawm a. Hêng thute hi Pathian ring tlattu thusawi a ni. Engvângin nge a rin tlat theih? Josua chuan a thil lo tawn tawh zawng zawngte a thlîr lêtin, Pathian Jehova chuan a thutiamte a hlen lo ngai lo tih a hriat vâng a ni.a Josua’n chûng thute a sawi chhan chu a chiang a ni: Israelte’n an hma lam hun atâna Pathian Jehova thutiam zawng zawngte pawh a lo thleng famkim bawk ang tih an rin thlap a duh vâng a ni.

Josua 23:14 thu chungchângah Bible hrilhfiahna lehkhabu pakhat chuan: “Pathianin a thutiam pakhat tal a bawhchhiain, a theihnghilh em tih finfiah nân, Bible-a a thutiam zawng zawngte la chhuakin, thilthleng chanchin chhinchhiah zawng zawngah a thlen famkim dân zawng chhuak vek la, khawvêla nunna nei tawh phawt hnênah zâwt chhuak ang che,” tiin a sawi. Chutianga finfiah theih ni ta se la chuan, keini pawhin Josua thu tâwp siam ang bawk chu kan siam ve ngei ang—Pathian Jehova thutiamte chu a thleng famkim lo ngai lo, tih chu.—1 Lalte 8:55, 56; Isaia 55:10, 11.

Bible-ah chuan Pathian thutiam thleng famkim tawhte a chuang a, chûng zînga ṭhenkhat chu kan mit hmuh ngeiah a thleng famkim a ni. Bible-ah chuan kan nakin hun atâna Pathian Jehova thutiam ropui takte pawh a chuang bawk.b Engvângin nge chûng chanchinte chu nangmah ngeiin i bih chian loh vang? Bible zirna chuan thutiamte Hlentuin i rin a phuzia a rin nghehtîr thei che a ni. (w10-E 01/01)

[Footnote-te]