Pathian Thu Aṭangin Inzir Rawh

Engvângin Nge Pathian Hnên Aṭanga Kan Inzir Ang?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a ni. Jehova Thuhretute chuan chûng chhânnate sawipui che chu an châk hle a ni.

1. Engvângin nge Pathian hnên aṭanga kan inzir ang?

Pathian chuan mihringte tân chanchin ṭha lehzual a nei a. Chu chu Bible hmangin min hrilh a ni. Bible chu min hmangaihtu kan Pa vâna mi hnên aṭanga lehkha thawn ang a ni.—Jeremia 29:11 chhiar rawh.

2. Chanchin ṭha chu eng nge ni?

Mihringte hian sawrkâr ṭha an mamawh a. Roreltu tumahin tharum thawhna te, rorêl dik lohna te, natna te, a nih loh leh thihnate ata tumah a chhuah zalên ngai lo. Mahse, chanchin ṭha tak a awm. Pathianin hrehawm tawrhna thlentu zawng zawng ata chhuah zalêntu tûr sawrkâr ṭha tak chu mihringte hnênah a pe ang.—Daniela 2:44 chhiar rawh.

3. Engvângin nge Pathian hnên aṭanga inzir a pawimawh?

Nakin lawkah Pathian chuan hrehawm tawrhna awmtîrtute chu lei ata a paih bo vek dâwn a. Chu mi hma chuan, thuhnuairawlh mi maktaduai tam takte chu hmangaihnaa innghat nun dân kawng ṭha zâwk nei tûrin a zirtîr a ni. Mite chuan Pathian Thu aṭangin buaina hmachhawn dân te, hlimna dik tak neih theih dân te, leh Pathian tihlâwm theih dânte an zir a ni.—Zephania 2:3 chhiar rawh.

4. Bible ziaktu hi tu nge ni?

Bible hi lehkhabutê 66 infinkhâwm a ni a, mi 40 vêlin an ziak a ni. A bu hmasa pangate chu kum 3,500 kaltaa Mosia ziah a ni a. A bu hnuhnûng ber chu kum 1,900 chuang kaltaa tirhkoh Johana ziah a ni thung. Mahse, Bible ziaktute chuan anmahni ngaih dân ziak lovin, Pathian ngaih dân an ziak a. Chuvângin, Bible Ziaktu dik tak chu Pathian a ni.—2 Timothea 3:16; 2 Petera 1:21 chhiar rawh.

Bible chuan nakina thil lo thleng tûrte chu kimchang tak leh dik taka a hrilh lâwk avângin Pathian aṭanga chhuak a ni tih kan hre thei a ni. Mihring tumahin chutiang chuan an ti ve thei lo. (Isaia 46:9, 10) Chu bâkah, Bible chuan Pathian mize duhawm takte chiang takin a târ lang bawk a. Mite nun a ṭha zâwnga thlâk tûrin thiltihtheihna a nei bawk. Hêng thilte hian mi maktaduai tam tak chu Bible hi Pathian Thu a ni tih a rin nghehtîr a ni.—Josua 23:14; 1 Thessalonika 2:13 chhiar rawh.

5. Engtin nge Bible i hriatthiam theih ang?

Isua chu Pathian Thu zirtîrtu hmingthang tak a ni a. A mi biak a tam zâwkte chuan Bible hmêlhriat hlawm mah se, hre thiam tûrin ṭanpui an ngai a ni. Anmahni ṭanpui nân, Isua chuan, Bible châng dang dang la chhuakin, “Pathian Lehkha Thu hriat nân” a awmzia a hrilhfiah ṭhîn. He thuziak “Pathian Thu Aṭangin Inzir Rawh,” tih hian nangmah ṭanpui tûr chein chutiang tih dân chu a rawn hmang ang.—Luka 24:27, 45 chhiar rawh.

Nunin a tum chungchâng Pathian hnên aṭanga zir tluka thil phûrawm chu a tam lo hle. Mahse, i Bible chhiar avângin mi ṭhenkhat chu an lâwm lo mai thei. Mahse, lunghnual mai suh. I chatuan nun beiseina chu Pathian i hriatnaah a innghat si a.—Matthaia 5:10-12; Johana 17:3 chhiar rawh. (w11-E 01/01)

Hriat tam lehzual nân Jehova Thuhretute tihchhuah, BIBLE ZIRTIRNA Dik Tak Chu ENG NGE NI? he lehkhabu bung 2-na hi en ang che.