1 Pathian Chu Hriat Thiam Theih A Ni Lo—Hei Hi A Dik Em?

I lo hriat tawh mai theih chu: “Pathian hnathawh dân chu hriat thiam theih a ni lo.”

“Pa chu hriat thiam theih a ni lo va, Fapa pawh hriat thiam theih a ni lo va, Thlarau Thianghlim pawh hriat thiam theih a ni hek lo.”—Kristianna rama sakhaw tam takte thurin Trinity chungchânga Athanasian Creed hrilhfiah dân.

Bible zirtîrna chu: Isua chuan “Pathian tak chauh . . . hriat” chu malsâwmna dawnna niin a sawi a. (Johana 17:3) Mahse, ani chu hriat thiam theih a nih si loh chuan engtin nge Pathian hriatna kan neih theih ang? Pathian chuan inthup ahnêkin mi tinin amah hria se a duh a ni.—Jeremia 31:34.

Pathian chungchâng hriat kim nî chu kan nei ngai dâwn lo ngei mai. A ngaihtuahna leh a kawngte chu kan ngaihtuahna leh kan kawngte aiin a chungnung zâwk daih si a.—Thuhriltu 3:11; Isaia 55:8, 9.

Thutak hriatnain a ṭanpui dân che: Pathian chu hriat thiam theih loh a nih chuan engah nge amah hriat chu a tum pawha kan tum chhin tehrêng ang? Mahse, ani chuan amah hre thiam tûr mai ni lovin, inṭhianna ṭha tak nei tûrin min ṭanpui a ni. Pathian chuan mi rinawm Abrahama chu “ka ṭhian” tiin a ko va; Israel Lal Davida pawhin: “Amah ṭihtute chu LALPA ṭhian an ni,” tiin a ziak a ni.—Isaia 41:8; Sâm 25:14, C.L. Re-edited.

Pathian nêna inṭhianna neih chu thil theih loh angin a lang em? Lang mai thei; mahse, Tirhkohte 17:27-na chuan heti hian min hrilh thung a ni: “[Pathian] chuan min hlat lo ṭheuh si a,” tiin. Eng kawngin nge min hlat loh? Pathian chuan amah hriat chian nâna kan mamawh Bible min pein, min hlat lo a ni.a

Ani chuan a hming chu Jehova a ni tih min hrilh a. (Exodus 6:2) A hming phêna Awma chu kan hriat theih nân mihringte nêna an indâwr dân chu Bible-ah a lo chhinchhiah vek a ni. Chu bâkah, Pathian chuan a miziate min hriattîr bawk a. Ani chu “Pathian lainatnaa khat, mi khawngaih thei tak, thin nel tak, ngilneihna leh thu tak ngah” a ni. (Exodus 34:6) Kan thiltih chuan a rilru a khawih thei a. Entîr nân, hmân lai Israelte chuan a laka helin ani chu an “tilungngai” ṭhîn a; chutih rual chuan a thu âwihtute chuan a thinlung an tilâwm ṭhîn thung a ni.—Sâm 78:40; Thufingte 27:11. (w11-E 10/01)

[Footnote]

[Phêk 4-naa thu lâk chhuah]

Pathian chu hriat thiam theih loh Trinity ni sela chuan, engtin nge ani chu kan hriat theih tehrêng ang?

[Phêk 4-naa Milem Hawhtîrtu]

The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International