Jehova Hmangaihtute Tân “Tlûkna Reng Reng” A Awm Lo

1. Engtin nge intlânsiaknaa tel nula pakhat rilru put hmang chuan tlâwm loh kan tum tlatna chu a târ lan?

MARY Deker-i chu a tleirâwl chhuah chhoh aṭangin intlânsiakna lamah khawvêl dêng chhuak khawpin a hmingthang tawh a. Kum 1984 Summer Olympics-a meter 3,000 intlânsiaknaah gold medal dawng ngei tûra rin a ni. Mahse, a tâwp thlengin a tlân zo ta lo. A tlânpuite zînga tuemaw ber ke chu palin, a tlu ta nawk mai a. A inhliam a, mittui tla ṭeuh chungin intlânsiakna chu a chhuahsan a ngai ta a ni. Mahse, Mary chu beidawng mai chi a ni lo. Kum khat pawh a ral hmain intlânsiaknaah a tel leh thei a, kum 1985 khân khawvêla hmeichhe tlân chak ber niin, world record thar a siam ta a ni.

2. Eng kawngin nge Kristian dikte chu intlânsiaknaa an tel a, eng nge kan tum ber tûr chu?

² Kristiante kan nih angin, intlânsiakna—entîr nei kea intlânsiaknaah kan tel mêk a. Lâwmman la ngei tûra tlân chu kan tum ber tûr a ni. Kan intlânsiakna hi hnehna chang tûra a chak thei ang bera tlân a ngaihna tawi têa intlânsiakna a ni lo va. Chak taka kal a, a kâr laka chawlh leh ṭhin ang pawh a ni hek lo. Chu ai chuan, hnehna chang tûra chhel a ngaihna thui tak intlânsiakna (marothon) nêna khaikhin theih a ni. Tirhkoh Paula chuan infiamna khawpui, Korinth-a chêng Kristiante hnêna a lehkha thawnah hmelhbelna ṭawngkam hmangin intlânsiaknaa tel chungchâng a sawi a. Ani chuan: “Intlânsiakhote chu an zain an tlân a, nimahsela pakhat chauhvin lâwmman a hmu ṭhîn tih in hre lo vem ni? In hmuh theih nân chutiang takin tlân rawh u,” tiin a ziak a ni.—1 Kor. 9:24.

3. Engtin nge chatuan nunna atâna intlâksiaknaa tel zawng zawng chuan lâwmman an lâk theih?

³ Bible chuan he entîr nei intlânsiaknaa tel tûrin min hrilh a. (1 Korinth 9:25-27 chhiar rawh.) A lâwmman chu hriak thih Kristiante tân vânah leh intlânsiaknaa tel mi dang zawngte tân leia chatuana nunna a ni. He intlânsiaknaah hian a dangte ang lo takin, a tâwp thlenga tuar peih a, tlân peihtu, a tel zawng zawngte chuan lâwmman an hmu thei a ni. (Mt. 24:13) Intlânsiaknaa telte chuan dân an zawm loh emaw, a tâwp thlenga an tlân loh emaw chauhvin lâwmman an dawng lo vang. Chu bâkah, hei hi chatuana nunna lâwmman petu intlânsiakna awmchhun a ni.

4. Engin nge chatuan nunna chang tûra intlânsiakna chu tiharsa?

⁴ A tâwp thlenga tlân chu thil awlsam a ni lo. Mahni inthunun leh tum nghet tak neih a ngai a. Vawi khat mah tlu lova a tâwp thlenga tlân thei awmchhun chu Isua Krista chauh a ni. A zirtîr Jakoba chuan Krista zuitute’n ‘thil tam tak an tisual fo ṭhîn’ tih a ziak a ni. (Jak. 3:2) A va dik tak êm! Kan za hian mahni leh mi dangte ṭhat famkim lohna kan tuar ṭhîn a. Chuvângin, a châng chuan kan inpal a, kan petek a. A tlûk pawh kan tlu hial mai thei; mahse, kan tho lehin, kan tlân chhunzawm leh a ni. Ṭhenkhatte chu an tlûk nat êm avângin tho leh tûr leh a tâwp thlenga tlân chhun zawm leh tûr chuan ṭanpui an ngai hial a. Chuvâng chuan, rei lo te chhûng kan tlu zauh emaw, kan tlu nawn fo emaw pawh a ni thei a ni.—1 Lal. 8:46.

I TLUK PAWHIN, TLAN LEH ZEL RAWH

5, 6. (a) Engtin nge Kristian tân “tlûkna rêng rêng” a awm loh va, engin nge ani chu “tho leh” tûra ṭanpui ang? (b) Engvângin nge mi ṭhenkhat chu an tlûk hnuin an thawh leh loh?

⁵ Kan tlûk huna kan thiltih chuan kan nihna a târ lang. Tlu ṭhenkhatte chu inchhîrin, Pathian rawng an bâwl chhunzawm zêl tho va. Ṭhenkhat erawh chu an inchhîr duh lo a ni. Thufingte 24:16 chuan: “Mi fel chu vawi sarih tlu mah sela, a tho leh zêl ṭhîn; mi suaksual erawh chu chhiatnain a tiboral ṭhîn,” tiin a sawi a ni.

⁶ Jehova chuan amah ring tlattute chu tho leh thei tawh lo tûr khawpa an tlûk—dodâlna emaw, an Pathian biakna lama lunghnualna emaw an tawh—chu a phal lo vang. Ani chuan kan theih ang tâwka a hnêna kan inpumpêk zêl theih nâna “tho leh” tûrin min ṭanpui ang tih kan ring tlat a ni. Thinlung tak aṭanga Jehova hmangaihtu zawng zawngte tân chuan a va thlamuanthlâk tak êm! Mi suaksualte chuan chutianga thawh leh duhna chu an nei lo. Anni chuan Pathian thlarau thianghlim leh a mite ṭanpuina an zawng lo va, ṭanpuina pêk an nih lahin an pawm duh hek lo. Chu mi nêna inkalh takin, ‘Pathian Jehova dân ngainatute’ tân chuan nunna atâna intlânsiakna aṭanga chhuah hlentîr thei khawp tûr tlûkna rêng rêng a awm lo.—Sâm 119:165 chhiar rawh.

7, 8. Engtin nge mi chuan “tlu” chung pawh a, Pathian duhsak a hlawh theih?

⁷ Ṭhenkhat chu chak lohna engemaw avângin sual lian tham lovah an tlu nawn fo a. Mahse, “tho leh” a, thinlung taka an inlamlêt a, rawng an bâwl zui zêl chuan Jehova mithmuhah mi fel an la ni reng thei a. Chu chu Jehova’n hmân lai Israelte a dâwr dânah kan hmu thei a ni. (Is. 41:9, 10) A hmaa kan lâk chhuah tâk Thufingte 24:16 chuan a ṭha lo lam—kan ‘tlûkna’ lam—ni lovin, a ṭha lam, khawngaihna ngah tak Pathian ṭanpuinaa kan ‘thawh lehna’ lam chu a sawi uar a ni. (Isaia 55:7 chhiar rawh.) Pathian Jehova leh Isua Krista chuan kan chungah rin tâwkna târ langin, “tho leh” tûrin min fuih a ni.—Sâm 86:5; Joh. 5:19.

⁸ Intlânsiakna thui taka tlântu chu tlu mah se, hmanhmawh taka thil a tih phawt chuan tho lehin, a tâwp thlenga tlân nân hun a nei thei a. Chatuan nunna atâna kan intlâksiaknaah hian kan tlân tâwpna lo thlen “nî leh a hun” chu kan hre lo. (Mt. 24:36) Chuti chung chuan, kan tlûk khât poh leh kan tlân chak reng theiin, hlawhtling takin a tâwp chu kan thleng thei ang. Chuvângin, engtin nge tlûkna chu kan pumpelh theih ang?

HMA SAWNNA DALTU TLUKNA

9. Min tlûktîr thei thil engte nge kan sawiho vang?

⁹ Min tlûktîr thei thil panga—mi mal chak lohna te, tisa châkna te, kan Kristian unaute rorêl dik lohna te, hrehawmna leh tihduhdahna te, leh mi dangte ṭhat famkim lohna te—chu i lo ngaihtuah ang u. Mahse, kan tlu a nih chuan Jehova chu a dawhthei hle tih i hre reng ang u. Ani chuan rinawm lo angin min ruat nghâl mai ṭhîn si lo va.

10, 11. Davida khân eng mi mal chak lohna nge a neih?

¹⁰ Mi mal chak lohna chu intlânsiakna kawnga lung awm nêna khaikhin theih a ni a. Lal Davida leh tirhkoh Petera nuna thilthlengte kan en chuan, chûng chak lohna pahnih chu insûmtheihna tlâkchhamna leh mihring hlauhna a ni tih kan hmu thei a ni.

¹¹ Bath-sebi chunga a thiltih aṭanga a lan angin, Lal Davida chuan insûmtheihna tlachhamin chak lohna a nei tih a lang a. Nabala hmuhsitna a tawh pawh khân, hmanhmawh takin a chhâng lêt ṭêp a ni. Ni e, insûmtheihna lantîr theih loh châng nei mah se, Jehova tihlâwm a tuma chu a bânsan ngai lo. Davida chuan mi dangte ṭanpuinain thlarau lama inbûk tâwkna a nei lêt leh thei a ni.—1 Sam. 25:5-13, 32, 33; 2 Sam. 12:1-13.

12. Engtin nge Petera chu tlu chung pawhin a tlân leh zêl?

¹² Petera chuan mihring hlauhna avângin tlûk chhiat châng nei mah se, Isua leh Jehova chungah a rinawm tlat a. Entîr nân, a Pu chu vântlâng hmaah vawi khat mai ni lo, vawi thum lai a phat a ni. (Lk. 22:54-62) A hnuah, Petera chuan Jentail ringtute chu serh tan Juda Kristiante anga ṭha ve lo anga cheibâwlin, Kristian tihâwm lo takin thil a ti a. Mahse, tirhkoh Paula chuan thil nih dân chiang takin a hmu a ni—kohhranah inthliarna a awm thei lo tih chu. Petera rilru put hmang chu a dik lo va. A nungchangin inunauna a tihchhiat hmain, Paula chuan Petera chu hmaichhanah a zilh ta a ni. (Gal. 2:11-14) Petera chuan a chapona avângin, nunna atâna intlânsiakna chawlhsan phah nân a hmang em? Hmang lo ve. Paula zilhna chu ngun taka ngaihtuahin, a nunpui a, a tlân chhunzawm zêl a ni.

13. Engtin nge tisa lama chak lohna chuan min tihtlûk theih?

¹³ A châng chuan hrisêl lohna chu mi mal chak lohna thlentu a ni thei a. Chu pawh chuan min titlu thei a ni. Kan thlarau lam a tibuai thei a, min tipetekin, min tichau hial thei a ni. Entîr nân, Japan unaunu pakhat chu baptisma a chan hnu kum 17-ah hrisêl lohnain a tlâk buak a. Thlarau lama chau khawp hialin a hrisêlna chu a ngaihtuah ta a. A hnuah chuan kohhranah a inhmang tawh lo hial a ni. Upa pahnih chuan an va tlawh a. An thusawi chuan ani chu a tihchak êm avângin, a inkhâwm ṭan leh ta a. Heti hian a sawi a ni, “Unaute’n phûr taka min lo lawm avângin ka mittui a tla hial a ni,” tiin. Tûnah chuan kan unaunu chu nunna atâna intlânsiaknaah a tel zawm leh ta a ni.

14, 15. Châkna dik lo a chhuah hunah eng anga hma chak taka lâk nge ngai? Entîrna pe rawh.

¹⁴ Tisa châkna chuan mi tam tak chu a titlu a. He mi kawnga thlêm kan nih hunah, rilru lam, nungchang lam, leh thlarau lama kan thianghlimna vawng tûrin hma chak taka kan lâk a ngai a ni. Kan mit emaw, kan kut emaw pawh ni se, min titlu thei a piang chu “paih daih” tûra Isua zilhna min pêk kha hre chhuak leh rawh. Chutah chuan mi ṭhenkhatte intlânsiakna chawlhsantîrtu nungchang bawlhhlawhna lam ngaihtuahna leh thiltihte pawh a tel dâwn lâwm ni?—Matthaia 5:29, 30 chhiar rawh.

¹⁵ Kristian chhûngkuaa sei lian unaupa pakhat chuan a hriat theih chin aṭangin neih inang kawp châkna a neih chu a do tih a ziak a. Heti hian a sawi a ni: “Ka zak hle ṭhîn a. Khawiah mah ka leng ve lo niin a lang,” tiin. Kum 20 a nih chuan, regular pioneer niin, kohhranho rawngbâwltu a rawn ni chho va. Chutah a tlu chhe ta a, Bible hmanga zilhna leh upate ṭanpuina a dawng a ni. Ṭawngṭaina te, Pathian Thu zirna te, leh mi dangte ṭanpui tûra thawhrimnate hmangin, a tho leh a, intlânsiaknaah chuan a tel zawm leh ta a. Kum tam tak hnuah heti hian a sawi a ni: “Chutiang châkna neih châng chu ka la nei tho va; mahse, kan inhnehtîr lo. Jehova chuan kan hmachhawn theih bâk fiahna kan tawn a phal lo tih ka hre tawh a. Chuvângin, Pathianin ka hneh theih a ring a ni tih ka hria,” tiin. Chu unaupa chuan: “Tûna ka thil tawrh chhuah zawng zawng hi khawvêl tharah chuan rulh ka ni ang. Chu chu ka duh a ni! Chutih hma loh zawng, kan bei chhunzawm zêl dâwn,” tiin a titâwp a. Intlânsiaknaa tel chhunzawm zêl chu a tum tlat a ni.

16, 17. (a) Rorêl dik lohna tuar anga inngai unaupa pakhat chu engin nge ṭanpui? (b) Tlu lo tûrin eng nge rilrua kan vawn tlat ngai?

¹⁶ Kan Kristian unaute rorêl dik lohna chuan tlûkna a thlen thei a. France ramah, tûn hmaa upa lo ni tawh ṭhîn unaupa pakhat chu rorêl dik lohna tuartu nia inngaiin, a rilru a na hle a. Chuvâng chuan, kohhran bêl tawh lovin, kohhran thiltihah a inhmang tawh lo va. Upa pahnihin an va tlawh a, thilthleng nia a hriat dân a sawi lai chuan pawh chahsak miah lovin, an ngaihthlâksak a. Jehova chungah a phurritte nghat tûra fuihin, thil pawimawh ber chu Pathian tihlâwm a nihzia an sawipui a ni. Ani chuan ṭha takin a chhâng lêt a, intlânsiaknaah chuan tel lehin, kohhranah a inhmang zawm leh ta a ni.

¹⁷ Kristian zawng zawngte chuan mihring ṭha famkim lote en lovin, kohhran Lû atâna ruat Isua Krista chu an en tlat a ngai a. Mit “meialh ang” nei Isua chuan thil engkim hi a nihna ang takin a hmu a, chuvângin kan hmuh theih aia tam daih a hmu a ni. (Thup. 1:13-16) Entîr nân, ani chuan kan tâna rorêl dik lohna ang taka langte chu kan hriat sual vâng emaw, hriat thiam loh vâng emaw a ni thei tih a hria a. Isua chuan kohhran mamawhte chu ṭha famkimin, a hun takah a chingfel dâwn a ni. Chuvângin, kan Kristian unaute thiltih emaw, thutlûkna siam emaw chu tlûk phah nân kan hmang tûr a ni lo.

18. Engtin nge fiahna emaw, dinhmun harsa emaw chu kan tawrh chhuah theih ang?

¹⁸ Min titlu theitu thil dang pahnih chu hrehawmna leh tihduhdahna leh kohhran chhûnga mi dangte ṭhat famkim lohna a ni. Isua chuan buh chi tehkhin thu a sawiah thu avânga “hrehawmna emaw, tihduhdahna emaw” lo awm chuan mi ṭhenkhat a titlu ang tih a sawi a. Tihduhdahna chu khawi aṭanga lo chhuak pawh ni se—chhûngkua te, ṭhenawm te, a nih lo leh sawrkâr thuneitute hnên aṭang pawhin ni se—thlarau lama chak lo, ‘amaha zung awm lo’ chungah chuan nghawng a nei nasa lehzual thei a ni. (Mt. 13:21) Mahse, thinlung ṭha kan neih tlat chuan, Lalram chi chuan rinnaa zung kaih nghet tûrin min ṭanpui ang. Fiahna kan tawnin, thil fak tlâkte chu ngun taka ngaihtuah kan tum tlat tûr a ni. (Philippi 4:6-9 chhiar rawh.) Pathian Jehova chakna rinchhanin, fiahnate chu kan tuar chhuak thei ang a, dinhmun harsate chu tlûk phah nân kan hmang lo vang.

19. Engtin nge thinrimna chu tlûk phahna kan nihtîr loh theih?

¹⁹ Lungchhiatthlâk takin, kum kal ta chhûngte khân mi ṭhenkhat chuan mi dangte ṭhat famkim lohna chu intlâksiakna aṭanga chhuah phah nân an hmang a. Chhia leh ṭha hriatna chungchânga thil thlîr dân inan lohna chu an tân tlûkna a lo ni ta a ni. (1 Kor. 8:12, 13) Mi tuemawin min tih thinrimin, chu chu buaina lian thamah kan chantîr ang em? Bible chuan Kristiante chu mi dangte sawisêl lo tûr te, ngaidam tûr te, leh mahni dikna neih phût tlat lo tûrtein a fuih a ni. (Lk. 6:37) Tlûk theihna tûr thil i hmachhawn hunah, heti hian inzâwt rawh: ‘Mi dangte chu ka duhzâwng ṭanchhanin ka sawisêl em? Ka unaute chu an ṭha famkim lo tih hre reng chungin, tuemaw ṭhat famkim lohna chu nunna atâna intlânsiakna aṭanga chhuah phah nân kan hmang ang em?’ tiin. Jehova kan hmangaihna chuan mi dangte thiltih chu a tâwp thlenga tlân loh phah nâna hmang lo tûrin min ṭanpui thei a ni.

CHHEL TAKIN TLAN LA, TLUKNA PUMPELH RAWH

20, 21. Nunna atâna intlânsiaknaah hian eng nge tih i tum tlat?

²⁰ ‘Intlânsiakna kawng hlen chhuah’ chu i tum tlat em? (2 Tim. 4:7, 8) Chuti a nih chuan, mahnia Bible zirna neih chu tih mâk mawh a ni. Bible leh Bible ṭan chhan thu leh hlate chu zir bingna neih nân te, chhût ngun nân te, leh tlûkna lo awm thei âwm thil hriat nânte hmang ang che. I mamawh thlarau lama chakna nei tûrin thlarau thianghlim ṭanpuina dîl rawh. Nunna atâna intlânsiaktu chu a petek emaw, a tlûk hial emaw avângin hlawhchham ngei ngei tûr a ni chuang lo tih hre reng ang che. Ani chu a tho lehin, a tlân chhunzawm leh thei a. Tlûk theihna âwm thilte chu hmang ṭangkai zâwk mahin, a rinna atâna harsat thlentîr thei engpawh aṭangin thil hlu tak a zir chhuak a ni.

²¹ Bible chuan intlânsiaknaa tel chu chechâng lo ang ni lovin, thatho taka awm angin a târ lang a. Chu chu a chuangtute hnehna chang tûra tlânpuitu bus-a chuan ang mai a ni lo. Intlânsiaknaah chuan mahni ngeia kan tlân a ngai a ni. Chutianga kan tih chuan Jehova hnên aṭanga kan dawn “thlamuanna nasa tak” chu kan hnung lam aṭanga min ṭanpuitu thlî ang a ni ang. (Sâm 119:165) A tâwp thlenga tlântu zawng zawngte chuan tûna malsâwmna leh nakina malsâwmna tâwp nei lo chu kan beisei tlat thei a ni.—Jak. 1:12. (w13-E 03/15)