Engvângin Nge Pathianin Hrehawm Tawrhna Awm A Phal?

ENGTIN NGE PATHIANIN KAN HREHAWM TAWRHTE HI A NGAIH?

Michelle-i: Sophia, i dam em? Ina ka hmu thei che chu ka lâwm hle mai.

Sophia-i: Kei pawh.

Michelle-i: Kan inbiak hnuhnûng ber ṭum khân, engtin nge Pathianin kan hrehawm tawrhte hi a ngaih tih chungchâng kan sawi dûn a.a Hemi chungchâng hi i lo ngaihtuah fo ṭhin thu leh; a bîk takin, i nuin motor chêtsualna a tawh hnuah phei chuan i ngaihtuah nasat ṭhin thu kha i sawi a. Ti ta daih ila, i nu eng nge a an zêl?

Sophia-i: A châng leh a ṭha a, a châng leh a ṭha lo va. Vawiin tak chu a ṭha e.

Michelle-i: A va lâwmawm ve. Hetiang dinhmuna pa chang taka awm reng hi a awlsam lo ngawt ang.

Sophia-i: A dik alâwm. A châng chuan engtia rei nge maw hetianga hrehawm a tawrh reng dâwn tiin ka ngaihtuah ṭhîn.

Michelle-i: Chutianga ngaihtuah chu a awl duh ngawt ang. Ka rawn tlawh hnuhnûng ber ṭum che khân, Pathianin kan hrehawm tawrhte hi a titâwp vek thei a nih chuan, envângin nge kan tawrh chhunzawm zêl hi a la phal tih zawhna ka hnutchhiah che kha i la hria em?

Sophia-i: Aw, hria e.

Michelle-i: Bible chhânna kan en hmain, kan sawi tâkte kha tlêm azâwng ennawn hmasa ang aw.

Sophia-i: Awle.

Michelle-i: Bible hun laia mi rinawm pakhat pawhin Pathianin hrehawm tawrhna awm a phal chhan a ngaihtuah thu kan hria a. Mahse, Pathianin ani chu chutiang ngaihtuahna a neih avângin a hau lo va, rinna tam lehzual a mamawh thu lah a hrilh hek lo.

Sophia-i: Chutiang lam chuan ka lo ngaihtuah ngai miah lo.

Michelle-i: Chu bâkah, Pathian Jehova chuan hrehawm kan tuar lai hmuh chu a duh lo va. Entîr nân, Bible chuan A mite mangannaah chuan “ani pawh a mangang ve ṭhîn,”b tih min hrilh a ni. Hrehawm kan tawrh hian Pathianin min tawrhpui tih hriat chu a thlamuanthlâk hle a ni lâwm ni?

Sophia-i: Ni e, a thlamuanthlâk khawp mai.

Michelle-i: A tâwp berah chuan, min Siamtu thiltihtheihna nasatzia kan ngaihtuah hian, hrehawm tawrhnate chu eng hunah pawh a titâwp thei tih kan sawi dûn bawk a.

Sophia-i: Chu tak chu alâwm ka hriatthiam loh. Pathian hian thil ṭha lo zawng zawngte hi a titâwp vek thei a nih si chuan engvângin nge a awm a phal?

TUIN NGE THU DIK SAWI?

Michelle-i: I zawhna chhân nân Bible-a bu hmasa ber Genesis kha lo keu ta ila. Adama leh Evi leh thei rah ei phal loh chungchâng hi i lo hre tawh ṭhîn em?

Sophia-i: Aw, Sunday school-ah kan zir ṭhîn a. Pathianin thing pakhat rah chu ei lo tûrin a hrilh a; mahse, thu awih lovin an ei lui ta a nih kha.

Michelle-i: A dik lutuk. Tûnah chuan, Adama leh Evi te thil sual tihtîrtu thilthlengte kha lo ngaihven bîk ta ila. Chûng thilthlengte chuan hrehawm kan tawrh chhan chungchânga zawhnate chu a keng tel a ni. Khawngaihin Genesis bung 3, châng 1 aṭanga châng 5 kha i lo chhiar thei ang em?

Sophia-i: Awle. “Tin, LALPA Pathianin ramsa a siam zawng zawngah chuan rûl a fing vervêk ber a. Tichuan, ani chuan hmeichhe hnênah chuan, ‘Pathianin, “Huana thing rah rêng rêng hi in ei tûr a ni lo,” a ti elo maw?’ a ti a. Tin, hmeichhia chuan rûl hnênah chuan, ‘Ti lo ve, huana thing rahte hi kan ei thei asin; huan lai taka thing awm rah erawh chu Pathianin, “In ei tûr a ni lo, tawh pawh in tawk tûr a ni lo; chutilochuan, in thi ang,” a ti a ni’ a ti a. Tin, rûl chuan hmeichhe hnênah chuan, ‘Thi teh suh e; in ei nî apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,’ a ti a.”

Michelle-i: Ka lâwm e. Hêng Bible chângte hi ngun takin lo ngaihtuah ta ila. A hmasain, rûlin hmeichhia, Evi a bia tih kha i lo chhinchhiah dâwn nia. Bible châng dangte chuan rûl hmanga Evi betu dik tak chu Diabol-Setana a nihzia a târ lang a.c Setana chuan Evi chu thingkûng pakhat rah nêna inkhûngkaiha Pathian thupêk chungchângah zawhna a zâwt a ni. Adama leh Evi’n chu thei rah chu an ei a nih chuan, an chunga hremna thleng tûr Pathianin a sawi kha i lo chhinchhiah em?

Sophia-i: An thi ang.

Michelle-i: A dik chiah. Tichuan, Setana chuan sawi chhunzawmin, Pathian chu dik lo takin a puh a. Ani chuan: “Thi teh suh e,” tiin a sawi a ni. Setana chuan Pathian chu dâwt sawiah a puh a nih chu!

Sophia-i: : Hetiang zâwnga hrilhfiahna hi ka la hre ngai miah lo.

Michelle-i: Pathian chu dâwt sawia a puh hnuah, Setana chuan chinfel nâna hun tam tak duh tûr thu buai chu a chawk chhuak a. A chhan i lo hria em?

Sophia-i: Hmm. Ka hre chiah lo.

Michelle-i: A nih chuan, i hriatthiam theih nân, entîrna han sawi ta ila. Ni khat chu i hnênah rawn kalin, nang aia ka chak zâwk thu ka rawn hrilh che a. Ka thusawi chu a dik lo tih engtin nge i finfiah ang?

Sophia-i: Enchhinna ṭhenkhat kan neih ngei ka ring.

Michelle-i: Ni e, a dik lutuk. Thil chawi tûr rit tak pakhat kan zawng ang a, tu nge chawi thei zâwk tih kan chhin a ngai ang. Dik tak chuan, tu nge chak zâwk tih hriat chu thil harsa lutuk a ni lo.

Sophia-i: I sawi tum ka hre thiam.

Michelle-i: Mahse, ka chak zâwk thu sawi aiin, nang aia ka dik zâwk thu rawn sawi ta ila eng tin nge ni ang? Chu chu buaina hran daih a ni ngei ang tiraw?

Sophia-i: Ni e, a ni ngei ang.

Michelle-i: A thu hrimin, dikna hi enchhinna ho tê hmanga finfiah theih chakna thahrui ang a ni lo va.

Sophia-i: A dik alâwm.

Michelle-i: Dik taka sawi chuan, chungtiang buaina chinfel dân kawng awm chhhun chu, mi dangte’n kan pahniha min hriat chian theih nân leh tu nge dik zâwk tih chiang taka an hriat theih nâna hun tam tâwk liamtîr hi a ni.

Sophia-i: Chu chuan awmzia a nei khawp mai.

Michelle-i: Tûnah, Genesis bu-a kan thu chhiarte kha lo en leh ta ila. Setana khân Pathian aia a chak zâwk thu a sawi em?

Sophia-i: Sawi lo.

Michelle-i: Chutiang chu ni se, Pathianin Setana thusawi dik lohzia chu a finfiah nghâl thei ngei ang. Mahse, Setana chuan Pathian aia dik zâwk niin a insawi a. Dik tak chuan, Evi hnênah, ‘Pathianin dâwt a hrilh che a, kei chuan thu dik ka hrilh che,’ tia sawi ang a ni.

Sophia-i: A ngaihvenawm hle mai.

Michelle-i: Mahse, finnaa khat Pathian chuan chu buaina chinfel dân kawng ṭha ber chu hun pêk hi a ni tih a hria a. A tâwpah, thu dik sawitu leh dâwt sawitu chu chiang takin a rawn la lang chhuak ang.

THU BUAI PAWIMAWH TAK CHU

Sophia-i: A nih leh, Evi a thih khân, chu chuan Pathianin thu dik a sawi tih a finfiah lo vem ni?

Michelle-i: Nia, finfiah a tih theih alâwm. Mahse, Setana chuan thu buai dang pawh a chawk chhuak a. Châng 5-na kha han ennawn leh teh. Setana khân Evi hnênah eng thil dang nge a sawi?

Sophia-i: Thei rah a ei chuan a mit a lo vâr ang a ti.

Michelle-i: Ni e. Tichuan, Evi chu “a chhia leh a ṭha hriain Pathian ang” a ni dâwn tih a hrilh bawk. Chuvângin, Setana chuan Pathian chu mihringte laka thil ṭha eng emaw pe phal lo angin a puh a ni.

Sophia-i: Ka hre thiam e.

Michelle-i: He puhna pawh hi buaina lian tak a tling a ni.

Sophia-i: Eng nge i sawi awmzia?

Michelle-i: Chûng a thusawite hmang chuan Setana chuan Evi—a huap zau zâwnga sawi chuan mihring zawng zawngte—chu Pathian rorêlna tel lovin a nun a nuam zâwk dâwn a ti a ni. Hemi chungchângah pawh hian, Jehova chuan a chinfel dân ṭha ber chu Setana thusawite a dik leh dik loh finfiah a nih theih nâna hun pêk hi a ni tih a hria a. Chuvângin, Pathian chuan Setana’n hun eng emawti chhûng khawvêl a thunun chu a remti a ni. Chu chuan kan chhehvêla hrehawm tawrhna a tam êm êm chhan chu a hrilhfiah a ni—khawvêl thununtu dik tak chu Pathian ni lovin, Setana a nih vâng a ni tih chu.d Mahse, chanchin ṭha a awm.

Sophia-i: Eng chanchin ṭha nge?

Michelle-i: Bible chuan Pathian chungchângah thu dik thlamuanthlâk tak pahnih min hrilh a. Pakhatna chu, hrehawm kan tawrh hian Jehova’n min awmpui tih hi a ni a. Entîr nân, Sâm 31:7-naa chhinchhiah Lal Davida thusawite hi han ngaihtuah teh. Davida chuan a dam chhûngin hrehawm tam tak a tuar a; mahse, ṭawngṭaia Pathian hnêna a thusawite hi lo chhinchhiah rawh aw. Khawngaihin i lo chhiar thei ang em?

Sophia-i: : Awle. “I ngilneihna avâng hian ka hlimin ka lâwm ang, ka manganna hi i hmu si ṭhîn a; ka nunna hi a hrehawm laite pawhin i hre ṭhîn.”

Michelle-i: Chuvângin, Davida chuan hrehawm tawrhna tam tak hmachhawn mah se, chûng zawng zawng chu Jehova’n a hmu vek tih a hriatna chuan thlamuanna a neihtîr a ni. Kan mihringpuite’n min hriatthiampui vek theih loh kan rilru hahnate leh lungchhiatnate pawh tiamin, thil engkim hi Jehova’n a hmuin, a hre vek tih hriatna aṭanga thlamuanna ang chu i nei ve tawh ngai em?

Sophia-i: Aw, nei ve tawh e.

Michelle-i: Thu dik thlamuanthlâk tak pahnihna chu, Pathianin kan hrehawm tawrhnate hi chatuana a awm a phal dâwn lo tih hi a ni. Bible chuan Setana rorêlna suaksual tak hi A rawn titâwp thuai dâwn tih min hrilh a. Chu bâkah, i nu leh nangmah ngeiin in tawrh hrehawmnate pawh hi telin, thil ṭha lo zawng zawngte chu a tiboral hlen vek dâwn a ni. Kâr leh lamah Pathianin hrehawm tawrhna zawng zawng a titâwp thuai dâwn tih kan chian theih chhante sawipui tûr chein ka lo kal leh thei ang em?e

Sophia-i: A ṭha viau vang.