Pathianin A En Reng Che

MI ṬHENKHATTE’N AN RINHLELH CHHAN: Tûn hnaia zir chîknain a sawi angin, kan galaxy (arsi hlâwm)-ah chauh pawh hian a lo berah planet tlûklehdingâwn 100 lai a awm a. Lei leh vân zauzia ngaihtuahin mi tam tak chuan, ‘Engvângin nge Siamtu engkimtitheia’n planet te taktêa mihring tlâwm takte thiltih chu a en tehlul ang?’ tiin an zâwt a ni.

BIBLE ZIRTIRNA CHU: Pathian Jehova chuan Bible min pe ringawtin, min ngaihthah leh mai lo va. “Ka mita en reng chung chein rem ka ruatsak zêl ang che,” tiin min tiam zâwk mah a ni.—Sâm 32:8.

B.C.E. kum zabi 20-naa Aigupta hmeichhia Hagari hi han ngaihtuah teh. Hagari chuan a pi Sari chu a timualpho va, chuvângin a pi chuan a hnawtchhuak a, thlalêrah a tlân bosan ta a ni. Tûnah, Hagari chuan thil a tisual ta a, Pathian ngaihsakna a chân phah em? Bible chuan: “LALPA vântirhkoh chuan . . . a lo hmu a,” tiin a sawi a ni. Vântirhkoh chuan Hagari hnênah: ‘LALPA chuan i hrehawmzia hi a hria’ tiin a thlamuan a. Hagari chuan Pathian Jehova chu: “Nang hi hmu theitu Pathian i ni,” a ti a ni.—Genesis 16:4-13.

“Hmu theitu Pathian” chuan nang pawh a en che a. Entîr nân: Hmangaihna ngah tak nu chuan a fa naupangte chu a ngaihsak bîk ṭhîn a, fa chuan a naupan poh leh a nu leh pate ngaihsakna a mamawh zual a ni. Chutiang bawkin, Pathian chuan a bîk takin dinhmun tlâwm taka kan awm lai leh kan chak loh laiin min en reng a. Jehova chuan “hmun chungnung leh thianghlimah ka awm a, mi thuhnuairawlhte rilru tiharh tûr leh inchhîr ngawih ngawihte thinlung tiharh tûrin mi rilrua inchhîr ngawih ngawiha thuhnuairawlh tak hnênah pawh ka awm,” tiin a sawi a ni.—Isaia 57:15.

Mahse, heti hian i ngaihtuah mai thei: ‘Engtin nge Pathianin min thlîr? Ka lan dân aṭangin min en dik nge ni a, ka chhûng lam nihna enin min hre thiam tak tak zâwk?’ tiin. (w14-E 08/01)