Pasalte U—Chhûngkaw Hlim Nei Tûrin Ṭan La Rawh U

ENGTIN nge pasal chuan a nupui chu hlim taka a awmtîr theih? Mi tam tak chuan pasalte thiltum bul ber chu an chhûngkuate sum leh pai lama ngelnghet tûra ṭanpui hi a ni tih ngaih dân an nei a. Mahse, sum leh pai tam tak nei nupui ṭhenkhat chu rilru lamah an hlim lo va—an thla a phâng hial a ni. Entîr nân, Spain mi Rosa-i chuan a pasal chungchângah heti hian a sawi a: “Mi dangte tân chuan pa ṭha tak a ni a; mahse, in chhûngah chuan pa rothap tak a ni,” tiin. Nigeria rama Joy-i chuan: “Ka pasal nêna kan thu a inhmuh loh hunah, ‘I pasal ka nih hi, ka thu âwih ta che,’ min tih khum ṭhîn,” tiin a sawi a.

Engtin nge mipa chuan pasal mawhphurhna chu hmangaihna nêna a hlen theih? Pasalin a nupui tân “khawsakna” chhûngkaw nuam tak siam tûr chuan eng nge a tih ngai?—Ruthi 1:9.

PASAL THU NEIHNA CHUNGCHANG BIBLE SAWI CHU

Pathian mit hmuhah chuan pasal leh nupui nihna chu inang khat reng ni mah se, Bible chuan nupate’n chhûngkuaah mawhphurhna bîk an nei tih a sawi a. Rom 7:2 chuan hmeichhe pasal nei chu ‘danin a pasalah a phuar,’ a nih loh leh a pasal dân hnuaiah a awm tih a sawi a. Pâwl din tam tak chuan enkawltu tûr lû pakhat a ruat ṭhîn a; chutiang bawkin, Pathian chuan pasal chu a nupui tâna lû ni tûrin a ruat a ni. (1 Korinth 11:3) Chuvângin, pasal chuan a chhûngkuaah hma a hruai tûr a ni.

Pasal i nih chuan, engtin nge Pathian pêk thu neihna chu i hman ang? Bible chuan: “In nupuite chu hmangaih rawh u, Kristan kohhranho a hmangaih . . . ang khân,” tiin a sawi a. (Ephesi 5:25) Isua Krista chuan nupui nei lo mah se, a entawn tûr siam chuan pasal ṭha tak ni tûrin a ṭanpui thei che a ni. A nih theih dân i lo en ang u.

ISUA NUN—PASALTE TAN ENTAWN TUR ṬHA FAMKIM

Isua chuan mi dangte tihhahdam leh an phurrit chhâwk a tum tlat. Isua chuan hnehchhiaha awm zawng zawngte leh mi mal harsatna avânga rilru hahna neite hnênah: “Ka hnênah lo kal ula, keiman ka chawlhtîr ang che u,” a ti a. (Matthaia 11:28, 29) Tîsa lama hrehawm an tawrhte chu tihdamsakin, Jehova hnaih tûrin a ṭanpui a ni. An phurritte a chhâwksak ang tih ring tlat chunga Isua hnêna mi tam tak an lo kal pawh chu a mak lo ve!

Pasalte’n Isua an entawn theih dân. I nupui phurrit chhâwksak theih dân kawng dap rawh. Nupui ṭhenkhat chu: “A tân chuan awmpui ang lek ka ni ringawt alâwm,” tia pawiti taka sawitu Rosa-i sawi angin an inngai a. Chu mi nêna inkalh takin, pasal ṭha tak Kweku-a chuan: “Ka nupui hnênah a phurrit ka chhâwk theih dân tûr ka zâwt ṭhîn a. Ka hmangaih avângin, in chhûng chêt vêlah pawh kan ṭanpui ṭhîn,” tiin a sawi.

Isua chu mite ngaihtuahna nei tak leh lainat thei tak a ni. Hmeichhe pakhat chuan kum 12 chhûng chu natna khirh tak a tuar a. Isua’n thiltihtheihna mak tak a nei tih a hriat chuan: “‘A puan chauh pawh dek ila, tihdamin ka awm mai ang,’ tih a rilrûk a.” A sawi dik a ni. Isua chu a va pan a, a puan hmâwr chu a va dek a, chawp leh chilhin a dam ta nghâl a. A hmutu ṭhenkhat chuan he hmeichhe thiltih hi luhlulna angin an thlîr mai thei a; mahse, Isua chuan a beidawn vâng a ni tih a hria a.a A hnênah chuan: “Ka fanu, . . . i natna ata chu lo dam hlen tawh ang che,” tiin zaidam takin a hrilh a ni. Chu nu chu zak takin a siam lo va, zilhna pawh a pe lo mai ni lovin, a natna chu a hriatthiampui zâwk a ni. Chutiang chuan, mite lainat thei tak a nihzia a târ lang a ni.—Marka 5:25-34.

Pasalte’n Isua an entawn theih dân. I nupui a dam loh hunah, i ngaihtuahzia lantîr lehzual la, a chungah dawhthei hle bawk ang che. A thil thlîr dânte hriatthiam tum la, a chhân lêt dân chu hre thiam ang che. Entîr nân, Ricardo-a chuan: “Ka nupui chu a thinchhe zual nia ka hriat hian, a rilru tina thei ṭawngkamte hmang lo tûrin ṭan ka la lehzual a ni,” tiin a sawi.

Isua chuan a zirtîrte a be pawh. Isua chuan a zirtîrte chu thu tam tak a hrilh a. An hnênah: “Pa hnêna thil ka hriat zawng zawng in hnênah ka puang tawh,” a ti. (Johana 15:15) Isua chuan thil ngaihtuah nân leh ṭawngṭai nâna amah chauhva awm duh châng a nei ngei mai a. Mahse, a zirtîrte hnênah chhûngrila a thil ngaihtuahte a hrilh ṭhîn. Thiam loh chantîr mi sual anga a thih hma zân khân, a zirtîrte hnênah a rilru “a lungngai êm êm” tih a hrilh a ni. (Matthaia 26:38) An thiltihin a tihbeidawn hle hunah pawh, Isua chuan a ṭhiante chu a be pawh reng tho a ni.—Matthaia 26:40, 41.

Pasalte’n Isua an entawn theih dân. I nupui chu i rilru leh thinlung takin be ṭhîn ang che. Hmeichhe pakhat chuan a pasal chu puipunnaah ṭawng duh hle mah se, inah chuan a ngawi tlat ṭhîn tiin a lung nih loh thu a sawi chhuak pawh a ni thei a. Kawng leh lamah chuan, a pasalin a rilru chhûnga a ngaihtuahte a hrilh hian, Ana-i chuan: “Ka pasalin min hmangaih tak tak tih ka hria a, amah ka hnaih zual sauh a ni,” tiin a sawi a ni.

I nupui hrem nân, ngawih chu râlthuam angin hmang suh. Nu pakhat chuan: “Ka pasalin ka chunga lungâwi lohna a neih hian a ni têlin min be duh lo va. Inthiam lohna bâkah, hmuhsit nia inhriatna min neihtîr a ni,” a ti a. Mahse, Edwin-a erawh chuan Isua entawn a tum tlat a. “Ka thin a ur hian, ka chhâng lêt nghâl lo va, sawiho theihna hun ṭha ka zawng zâwk a ni,” tiin a sawi.

Kan sawi tâk Joy-i chuan, a pasalin Jehova Thuhretute nêna Bible a zir ṭan aṭangin inthlâkthlengna a nei tih a hmu a. “Isua entawnin, hmangaihna nei tak pasal nih tumin theih tâwp a chhuah a ni,” a ti. Nupa maktaduai tam takte chuan chutiang Bible zirna chu an hlâwkpui hle. Bible zirtîrna hlâwkpui ve chu i duh ang em? Jehova Thuhretute zînga pakhat hnênah a thlâwna Bible zirna neih i duh thu hriattîr ang che. ▪ (wp15-E 01/01)