Rawngbâwlnaah Ṭhahnemngaihna Nei Reng Rawh

CHANCHIN ṭha hrilh hi tûn lai khawvêla hnathawh mêkte zînga pawimawh ber a ni a. Jehova chhiahhlawh i nih angin, zirtîr siamnaa tel chu chawimawina angin i thlîr ngei ang. Mahse, pioneer-te leh thuchhuahtute chuan rawngbâwlna atâna ṭhahnemngaihna neih reng harsa tih châng an nei ang tih chu i pawm ngei ang.

Thuchhuahtu ṭhenkhat chuan in tin kalnaah biak tûr an hmu zo lo va. A nihna takah chuan, tualchhûnga mi a tam zâwkte chu inah an awm ṭhîn lo va. In neitu an va biak fuh hunah pawh Lalram thuchah an lo ngaihsak lo emaw, an do emaw thei a ni. Thuchhuahtu dangte chu chhân lêtna ṭha awmna bial zau taka rawng an bâwl avângin an huphurh a, an hna an thawh zawh loh an hlau thei bawk. Kohhrana mi ṭhenkhat chuan an beisei aia rei, kum tam tak chhûng rawng an lo bâwl tawh avângin an lunghnual ṭan bawk a ni.

Jehova mi zawng zawngte chuan rawngbâwlna atâna ṭhahnemngaihna tikiam thei harsatnate an hmachhawn chu mak kan ti tûr a ni em? Ni lo ve. Tihah chuan, kan zîngah hian “mi sual,” Diabol-Setana awpna khawvêla Pathian nun chhanhimna thutak puan chhuah chu awlsam tûra ngai kan awm dâwn em ni?—1 Joh. 5:19.

Chanchin ṭha puan chhuahnaah eng harsatna pawh tâwk mah la, chu mi hmachhawn thei tûr chuan Pathian Jehova’n a ṭanpui thei che tih ring tlat rawh. Mahse, Kristian rawngbâwlna atâna ṭhahnemngai lehzual tûr chuan eng nge i tih theih? Rawtna ṭhenkhat i lo bih chiang ang u.

THILTAWN LA NEI TLEMTE ṬANPUI RAWH

Kum tin hian, mi a sâng têlte chuan Jehova Thuhretute ni tûrin baptisma an chang a. Tuia baptisma channa hmanga Pathian hnêna i inpumpêkzia i lantîrna a la rei lo a nih chuan, kum rei tak chhûng rawng lo bâwl tawhte thiltawn hlâwkpui chu i hlut ngei ang. Kum rei tak chhûng Lalram thuchhuahtu i nih tawh chuan, mi tharte ṭanpui chu thil tihâwm leh tih manhla tak a ni dâwn lâwm ni?

Isua chuan a zirtîrte’n chanchin ṭha hriltu thiam tak ni tûrin kaihhruaina pêk an ngai tih a hria a, rawngbâwl dân tûr a entîr a ni. (Lk. 8:1) Tûn laiah pawh, rawngbâwltu hlawhtling ni thei tûrin mi tharte chu zirtîr an ngai bawk a ni.

Mi thar chuan rawngbâwlnaa a telna aṭangin zirtîr thiamna a nei mai tûrah kan ngai tûr a ni lo. Lainatna leh hmangaihna nêna mi mal zirtîrna a mamawh a ni. Chutiang zirtîrnaah chuan thiltawn la nei tlêm zâwk hnêna (1) thusawi dân tûr inbuatsaih dân leh tihchhin dân zirtîrna te, (2) in neitu emaw, kawnga kal lai emaw biak ṭan dân zirtîrna te, (3) thu leh hla pêk chhuah dân zirtîrna te, (4) tuina neite bawhzui dân zirtîrna te, leh (5) Bible zirna neih ṭan dân zirtîrnate a tel thei ang. Mi thar chuan rawngbâwlnaa amah zirtîrtu thusawi dân a hmuh a, a entawn chuan rah ṭha a chhuah ngei a rinawm a ni. (Lk. 6:40) Mi thar chuan a thusawi lai ngaithlaa a ṭûl huna amah ṭanpui thei tûr nêna inkawp chu a ngaihlu ngei ang a. Fakna thu leh thurâwn ṭangkai tak a dawnte chu a hlâwkpui thei bawk ang.—Thur. 4:9, 10.

THU HRILHNAA I KAWPPUI CHU BE RAWH

In neitu nêna thu sawiho theih i tum chung pawhin, engemaw châng chuan thlawhhma rawngbâwlnaa inbiakna i neih ṭhatpui ber chu i kawppui a ni thei a. Isua chuan thu hril tûrin a zirtîrte chu “pahnih zelin” a tîr chhuak tih hre reng ang che. (Lk. 10:1) An thawh dun chuan, an in tiphûr theiin an in tichak tawn thei a ni. Chuvângin, unau pakhat nêna rawngbawlnaa thawh dunna chuan “inthlamuan tawn theihna” hun remchâng min pe a ni.—Rom 1:12.

Eng chungchângte nge in sawi theih? Tûn hnai mai khân mi tichak thei thiltawn in nei em? Mi mal leh chhûngkuaa Bible zirna aṭangin thu ngaihvenawm tak hriat i nei em? Inkhâwmnaa i thu ngaihthlâk hian a ti chak che em? Thu hrilhnaa i la kawp ngai lohte nêna thawh dun châng pawh i nei mai thei a. Thutak a hmuh ṭan dân i hria em? Engin nge hei hi Jehova inawpna pâwl a ni tih rin nghehtîr? Eng chanvo leh thiltawnte nge a neih? I thiltawn ṭhenkhat chu i hrilh thei pawh a ni thei a. Thlawhhma rawngbâwlnaa mite chhân lêt dân chu eng ang pawh ni se, rawngbâwlnaa tuemaw kan thawhpuina chuan “intihsâwt tawn” theihna hun remchâng min pe a ni.—1 Thes. 5:11.

ZIRNA ṬHA I NEIH CHU VAWNG TLAT RAWH

Rawngbâwlna atâna ṭhahnemngai reng tûr chuan zirna ṭha neih a, vawn reng a ngai a. ‘Bâwih rinawm leh fing’ chuan thu chi hrang hrang chungchângah lehkhabute a ti chhuak a. (Mt. 24:45) Chuvângin, thlarau lam chaw i ei theih nân zir tûr thu chi hrang tam tak i nei a ni. Mi mala zirna atâna thu ṭha pakhat chu i lo ngaihtuah ang u: Engvângin nge Lalram thu hrilh rawngbâwlna hi pawimawh tak a nih? A chhan ṭhenkhat chu bâwmah hian târ lan a ni.

Bâwma târ lan thute ngaihtuahna chuan ṭhahnemngai taka thu hril reng tûrin a chettîr thei che a. Chhan dang ziak luh tûrte hre tûrin engvângin nge zir bingna i neih loh vang? Tichuan, a chhante leh chu mi thlâwptu Bible chângte chu ngun takin ngaihtuah ang che. Chutianga i tih chuan, rawngbâwlnaa i ṭhahnemngaihna a tizual ang tih rinhlehrual a ni lo.

RAWTNATE CHU RILRU INHAWNG TAKIN PAWM RAWH

Jehova inawpna pâwl chuan kan rawngbâwlna tihmasâwn tûra min ṭanpuitu rawtnate min pe ṭhîn a. Entîr nân, in tina kan rawngbâwlna bâkah, lehkha thawn ziaka thu hrilhna te, telephone-a thu hrilhna te, kawtthlêra thu hrilhna emaw, vântlâng hmuna thu hrilhna emaw te, leh tawnchawp leh sumdâwnna hmuna chanchin ṭha hrilhnate chu kan ti thei a ni. Tin, thawh ngun lohna hmuna thu hril tûrin ruahmanna kan insiam thei bawk a ni.

Hêng rawtnate hi rilru inhawng takin i pawm em? Chûng zînga ṭhenkhat chu i tichhin tawh em? Tichhin tawh tam tak chu a rah chhuah an hmuhte avângin an hlim hle a ni. Entîrna pathum hi lo ngaihtuah ta ila.

Entîrna hmasa ber chu Bible zirna neih ṭan theih dân chungchânga Kan Lalram Rawngbâwlna thuziakte zînga pakhatin nghawng ṭha a neih hi a ni a. Chu chuan unaunu April-i chu a hnathawhpui pathum Bible zirpuia sâwm tûrin a chêttîr a ni. An pathum chuan a sâwmna an pawm a, kohhran inkhâwmahte an tel bawk avângin, mak a tiin a hlim hle a ni.

Entîrna pahnihna chu magazine sem chhuah chungchângah a ni a. Kan magazine-a thuziak engemaw bîkte chhiar duhtu tûrte zawng tûra fuih kan ni a. United States-a bial kantu pakhat chuan hmun pakhata motor tyre dawr zawng zawnga manager-te hnênah chuan tyre chungchâng thuziak telna Awake! magazine chu a sem a. A nupui nên chuan “I Doctor Hre Thiam Rawh” tih thuziak chuanna Awake! chu a bial chhûnga doctor 100 chuangte hnênah an sem bawk a ni. Ani chuan heti hian a sawi a ni: “Hetianga tlawh hi keimahni leh kan thu leh hla chhuahte hmêlhriattîr nân a ṭangkai hle. Anni nêna kan inhmêlhriat hnuah chuan kan inbe pawh ziah thei ta a ni,” tiin a sawi.

Entîrna pathumna chu telephone hmanga thu hrilhna a ni a. Unaunu Judy-i chuan telephone hmanga thu hril tûra fuihna avânga a lâwmna chu world headquarter-ah lehkha thawnin a hrilh a. Hrisêl lohna chi hrang hrangin a tlâkbuak kum 86 mi a nu chuan telephone hmanga thu hrilhna neiin rawngbâwlna thianghlimah a tel ziah a, kum 92 mi nu pakhat nên telephone hmanga Bible zirna a neihna aṭangin hlimna nasa tak a neih thu a sawi a ni.

Kan thu leh hla chhuaha thu hrilh dân tûr rawtnate hi a hman tlâk tak zet a. Chûng chu hmang rawh! Rawngbâwlnaah hlimna nei tûr leh ṭhahnemngai reng tûrin a ṭanpui thei ang che.

THILTUM INAWM TAKTE INSIAM RAWH

Kan thu hrilh rawngbâwlna hlawhtlinna chu thu leh hla chhuahte kan sem chhuah tam lam emaw, Bible zirpui neih tam lam emaw, Jehova chhiahhlawhte ni tûra ṭanpui tam lam emawa teh a ni ber lo. Tihah chuan, Nova chuan a chhûngte ni lo mi dang eng zât nge Jehova betu ni tûra a ṭanpui theih? Chutichung pawhin, a thu hrilhnaah a hlawhtling a ni. A pawimawh ber chu rinawm taka Jehova rawng kan bâwlna hi a ni si a.—1 Kor. 4:2.

Lalram thuchhuahtu tam tak chuan thu hrilh rawngbâwlnaa phûrna nei tûrin thiltum inâwm takte an insiam a ngai tih an hria a. Chûng zîngah chuan engte nge tel thei ang? Thiltum inâwm tak ṭhenkhat chu bâwmah târ lan a ni.

Jehova ṭanpuina dîlin, rawngbâwlna manhla tak leh hlawhtling tak neih theih dân kawngte zawng la. I thiltumte i hlen hnu chuan, i hlawhtlinna avânga hlimna i neih bâkah, theih tâwp chhuahin chanchin ṭha i hril tih hriatna aṭanga lo awm lungâwina i nei ang.

Chanchin ṭha hrilh chu thil harsa tak a ni thei ngei mai. Mahse, ṭhahnemngai taka Lalram puang chhuaktu ni tûrin tih theih i nei a ni. Thu hrilh rawngbâwlnaa i kawppui nên infuih tawnna hlimawm tak nei la, zirna ṭha neiin vawng reng bawk la, bâwih rinawm min pêk thurâwnte chu nunpuiin, thiltum inâwm takte insiam ang che. A pawimawh ber chu, Pathianin a Thuhretu pakhat anga chanchin ṭha puan chhuahna chavo hlu tak a pe che tih hre reng ang che. (Is. 43:10) Rawngbâwlnaa ṭhahnemngaihna i neih reng avânga i hmuh tûr hlimna chu a va nasa dâwn êm! (w15-E 02/15)