BIBLE ṬANCHHAN ZAWHNATE CHHANNA
Engvângin nge Isua thihna chu kan hriat reng ang?
Isua thihna chuan nakin hun atân eng beiseina nge a siam?—Isaia 25:8; 33:24
Isua thihna chu thilthleng pawimawh ber a ni a—mite’n nun an neih theihna tûrin a thi a ni. Mihringte chu sual tûr te, na tûr te, leh thi tûr tea siam an ni lo. (Genesis 1:31) Mahse, mihring hmasa ber Adama avângin sual khawvêlah a lût a. Isua chuan sual leh thihna ata min chhan chhuah nân a nun a hlân a ni.—Matthaia 20:28; Rom 6:23 chhiar rawh.
Pathian chuan a Fapa leia thi tûra rawn tîrin min hmangaihzia a târ lang a. (1 Johana 4:9, 10) Isua chuan a hnungzuite chu chhang leh uain hmanga a thihna hre reng tûrin a hrilh a ni. Chutianga kum tina tih chu Pathian leh Isua târ lan hmangaihna kan ngaihhlutzia lantîrna a ni.—Luka 22:19, 20 chhiar rawh.
Tute’n nge chhang leh uain chu kîl thei?
Isua’n a thihna hre reng tûra a zirtîrte a hrilh hmasak ber khân, thuthlung, a nih loh leh inremna chungchâng a sawi a. (Matthaia 26:26-28) Chu chuan Isua ruala vâna lal leh puithiam ni tûrin an tân leh mi tlêm tête tân beiseina kawng a hawnsak a ni. Isua thih hriatrengna hun serh chu mi maktaduai tam takin hmang mah se, chhang leh uain chu thuthlunga telte chauhvin an kîl thei a ni.—Thu Puan 5:10 chhiar rawh.
Kum 2,000 dâwn lai chu, Pathian Jehova chuan lal tûrte chu a thlang tawh a. (Luka 12:32) Anni chu leia chatuana nung tûrte nêna khaikhin chuan tlêm tê chauh an ni.—Thu Puan 7:4, 9, 17 chhiar rawh. (wp15-E 03/01)