BIBLE ṬANCHHAN ZAWHNATE CHHANNA
Mihringte hmabâk tûr chu eng nge ni?
Isua thihna chuan engtin nge mi dangte ngaihsakna nei pâwl a siam theih?
Mihringte science lama thiamna chuan hma a sâwn chho zêl ang a. Mahse, inngaihsak tawn tak takna awmna pâwl chu mihringte’n an din thei ang em? Thei lo vang. Tûn lai hian, khawvêl hi mahni hma sialna leh duhâmnain a khat a. Mahse, Pathian chuan mihringte tân thiltum ṭha zâwk a nei a ni.—2 Petera 3:13 chhiar rawh.
Pathian Thu chuan, khawvêl mihring zawng zawngte inhmangaih tawnna hun tûr chungchâng a sawi a. Mite chu him takin an nung ang a, tuman anni chu an tina lo vang.—Mika 4:3, 4 chhiar rawh.
Engtin nge mahni hmasialna chu nuaibo a nih ang?
Pathianin mihring a siam khân mahni hmasialna nei lovin a siam a. Mahse, Pathian thu âwih loh chu thlangin, mihring hmasa ber chuan a ṭhat famkimna chu a hloh a ni. A hnên aṭangin mahni hmasialna kan rochung a. Mahse, Pathian chuan Isua chu mihringte ṭhat famkimnaa hlân kai nân a hmang ang.—Rom 7:21, 24, 25 chhiar rawh.
Pathian duhzâwng nêna inmilin, Isua chu inthawina angin a thi a, mihring hmasa ber thu âwih lohna nghawng chu a sût lêt a. (Rom 5:19) Chutiangin, Isua chuan mite’n thil sual tih duhna neihtîr thei mahni hmasialna aṭanga an fihlîm hun tûr hmabâk ropui tak a siam a ni.—Sâm 37:9-11 chhiar rawh. (w15-E 04/01)