“Tâwpna”—Eng Tihna Nge Ni?

“Tâwpna a hnai!” tih thu i han hriat hian i rilruah eng nge lo lang? Messia a lo kal a, mi ṭhate chu vâna hruai chhoh va, mi sualte chu hrem hmun meidîla a thlâk hun nge i ngaihtuah a; a nih loh leh thih huna mihring nun tâwpna mai zâwk? Tâwpna chungchânga chutiang ngaihtuah chu mi ṭhenkhat tân lungngaihna thlentu a nih laiin, mi dangte tân chuan thil âwih awm lo, a nih loh leh nuihzatthlâk tak a ni hial thei a ni.

Bible chuan: “Tâwpna chu a lo thleng ang,” tih a sawi a. (Matthaia 24:14) Chu chu ‘Pathian ni ropui’ tih leh “Armageddon” tia koh a ni bawk. (Thu Puan 16:14, 16) Tâwpna chungchângah hian lungngaih manganna hriltu sakhaw lam ngaih dân hnawk leh maksak tam tak a awm ngei mai a. Mahse, Bible chuan tâwpna chungchâng a sawi chiang hle—eng nge a nih a, eng nge a nih loh tih chu. Chu bâkah, Pathian Thu chuan tâwpna a hnaih leh hnaih loh chiang taka hre thiam tûrin min ṭanpui bawk. Bible-in dam khawchhuah dân min zirtîr hi a va ṭha tak êm! A hmasain, mi ṭhenkhatte ngaih dân dik lote paih bovin, tâwpna chu eng nge a nih chiah tih ilo en ang u. Bible sawi dânin “tâwpna” chu eng tihna nge ni?

TAWPNA CHU HENG HI A NI LO

1. TAWPNA CHU LEILUNG MEIA NASA TAKA KAN RALNA A NI LO.

   Bible chuan: “[Pathianin] leilung nghahchhante chu a phûm a, kumkhuaa a nghîn loh nân,” tiin a sawi a. (Sâm 104:5) Chu Bible châng leh a dangte chuan Pathianin engtikah mah leilung hi a tichhe lo vang a, tihchhiat a phal ngai dâwn hek lo tih min tiam a ni.—Thuhriltu 1:4; Isaia 45:18.

2. TAWPNA CHU BEISEI LOH TAKA LO THLENG THUT TUR A NI LO.

   Bible chuan tâwpna hun tûr chu ruat lâwk a ni tih a sawi—Pathianin a hun tur dik tak a ruat a ni. “Nimahsela chu mi ni leh a dâr thu chu Pa chauh lo chuan tuman, vâna vântirhkohte pawhin, Fapa pawhin an hre lo. ‘Fîmkhur ula, inring renga awmin ṭawngṭai rawh u; a hun chu in hre si lo va,’” tiin kan chhiar a ni. (Marka 13:32, 33) Pathian (“Pa”) chuan tâwpna a thlentîrna tûr “a hun” chiah chu a ruat tawh tih a chiang hle.

3. TAWPNA CHU MIHRING VANG EMAW, ARSI THLAWKIN LEI A DEN VANG EMAWA LO THLENG ṬAN TUR A NI LO.

   Engin nge tâwpna thlentîr ang? Thu Puan 19:11 chuan: “Tin, vân inhawng ka hmu a; tin, ngai teh, sakawr vâr leh a chunga chuang, Rinawma leh Diktaka an tih chu ka hmu bawk a,” tiin a sawi a. Châng 19 chuan heti hian a sawi zawm a: “Tin, sakawlh te, leia lalho te, an sipaiho te, sakawr chunga chuang kha do tûr leh a sipaiho do tûra an inkhâwm ka hmu a,” tiin. (Thu Puan 19:11-21) Heta thusawi tam tak hi entîr nei ni mah se, hei hi awlsam takin kan hre thei a ni: Pathianin a hmêlmate tiboral tûrin a vântirhkohte a tîr dâwn tih chu.

TAWPNA CHU HENG HI A NI

1. MIHRING SAWRKARTE TAWPNA.

   Bible chuan: “Vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi a. (Daniela 2:44) A chunga point number 3-naa kan târ lan tâk angin, ‘sakawr chunga chuang do tûr leh a sipaiho do tûra kalkhâwm’ ‘leia lalho te leh an sipaiho te’ chu tihboral an ni ang.—Thu Puan 19:19.

2. INDONA, INPAWNGNEKNA, LEH ROREL DIK LOHNA TAWPNA.

   “[Pathian] chuan indonate chu kâwlkil thlengin a tireh ṭhîn.” (Sâm 46:9) “Mi tluangte chu leilungah hian an chêng ang a, ṭha famkimte chu chutah chuan an awm reng a; mi suaksualte erawh chu leilung ata tihboral an ni ang a, vervêk taka titute chu tihboral phiar an ni ang.” (Thufingte 2:21, 22) “Ngai teh, thil engkim ka siam thar e.”—Thu Puan 21:4, 5.

3. PATHIAN LEH MIHRINGTE TIHLAWHCHHAMTU SAKHUATE TAWPNA.

   “Zâwlneite chuan dâwt thu an hril a, puithiamte chuan an thu thuin ro an rêl a, . . . a tâwpah chuan engtin nge in tih tâk ang le?” (Jeremia 5:31) “Chu mi niah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thil mak tam takte kan ti ṭhîn lo vem ni, an la ti ang. Chu mi hunah chuan, ‘Nangni thil sual tite u, ka hre ngai lo va che u, ka hnên ata kal bo rawh u,’ tiin anni chu ka la hrilh ang!’”—Matthaia 7:21-23.

4. TUN LAI KHAWVEL THLAWPA CHHAWM NUNG RENGTUTE TAWPNA.

   Isua Krista chuan: “Hei hi thiam lohna a ni, êng khawvêlah a lo kal a, nimahsela miten êng aiin thim an duh zâwk, an thiltihte a sual avângin,” tiin a sawi a. (Johana 3:19) Mi rinawm Nova hun laiin khawvêl hmasa chu a boral tih Bible chuan a sawi a ni: “Chu mi laia khawvêl awm chu tuiin a chîm a, a boral ta, . . . nimahsela tûnah vânte leh lei awmte hi chu mi thu avâng vêk chuan Pathian ngaihsak lo mite rorêl leh boral nî atana dahin hâl tûra khêk a ni,” tiin.—2 Petera 3:5-7.

Lo thleng tûr “rorêl leh boral nî” chu Nova hun laia “khawvêl” tihboralna nên khaikhin a ni tih chhinchhiah ang che. Eng khawvêl nge tihborala awm chu? Kan leilung chu a boral lo va; ‘tihborala awm’ chu “Pathian ngaihsak lo mite”—Pathian hmêlmate—an ni. Lo thleng tûr Pathian ‘rorêlna nîah’ hian, Pathian hmêlma nih thlangtute chu tihboral an ni ve ang. Mahse, Nova leh a chhûngte ang bawkin, Pathian ṭhiante chu an dam khawchhuak ang.—Matthaia 24:37-42.

Pathianin mi suaksualte thununna zawng zawng a tihboral hnua leia awm a nawm dân tûr chu han mitthla teh! Bible-a tâwpna chu thil râpawm tak ni lovin, chanchin ṭha a ni zâwk tih a chiang hle. Chutichung pawhin, heti hian i la ngaihtuah mai thei a ni: ‘Bible chuan tâwpna lo thlen hun tûr min hrilh em? Chu chu a hnai tawh em? Engtin nge ka dam khawchhuah theih ang?’ tiin. (wp15-E 05/01)