A KAWM THU | LUNGKHAMNA HMACHHAWN DAN TUR
Hmun Tinah Lungkhamna!
“Ei tûr lei tûrin ka kal a, mahse biskut chauh ka hmu a —a man pângngai aiin a lêt 10,000-in a to leh nghâl! A tukah chuan dâwrah ei tûr chi rêng rêng a awm tawh lo.”—Paul-a, Zimbabwe.
“Ka pasal chuan min ṭhuttîrin, min chhuahsan a tum thu min hrilh a. Engtin nge a mi phatsanna chu ka tawrh theih ang? Ka fate chungah eng thil nge thleng ta ang?”—Janet-i, United States.
“Râlkhêl thâwm a rawn rîk chuan, bihrûkna tûr ka zawng a, rocket bomb a rawn puah chuan chhuatah ka bawk khup vat a. Dârkâr tam tak a liam hnuah pawh ka kutte a la khûr reng a ni.”—Alona-i, Israel.
‘Hun khirh tak’ lungkhamna hunah kan awm a. (2 Timothea 3:1) Mi tam tak chuan sum leh pai lama tlâk chhiatna te, chhûngkua keh darhna te, indona te, natna hlauhawm tak te, leh leilung pianken emaw, mihring siam emaw vânga lo awm chhiatna te chu mangang takin an tuar a ni. Chu bâkah, hetiang mi mal lungkhamna chi hrang hrang a awm thei a ni: ‘Ka taksaa bâwk awm hi cancer a ni thei ang em?’ ‘Ka tute seilenna tûr khawvêl hi eng ang nge ni ang?’ tiin.
Lungkhamna hi a sual vek kher lo va. Exam hma te, mipui hmaa din dâwnah te, a nih loh leh hna atâna interview neih dâwnah te hian rilru hahna engemaw chen kan nei tlângpui ṭhîn. Thil hlauhawmte hlauh chu a ṭha a, chûng chu pumpelh tûrin min ṭanpui a ni. Mahse, a lutuka lungkhamna emaw, lungkhamna neih reng emaw chu a hlauhawm hle. Tûn hnai maia puitling 68,000 chuang chunga zirna neih chuan lungkhamna engemaw chen neihna pawhin a hun lo va thihna a thlen thei tih a târ lang. Chhan ṭha tak neiin, Isua chuan: “Nangni zîngah lungkham avângin tuinnge mahni dung lam tawng khata tisâng chuang thei?” a ti a. Lungkhamna chuan tuma nun a pawt sei lo. Chuvângin, Isua chuan: “Lungkham suh u,” a ti. (Matthaia 6:25, 27) Mahse, lungkham nei lova awm chu thil theih a ni em?
A chhânnaah chuan finna dik tak hman te, Pathian rinna dik neih te, leh nakin hun atâna beiseina nghet neihte a tel a ni. Tûnah dinhmun khirh tak kan la tâwk lo a nih pawhin, nakinah kan tâwk thei a. Chuvângin, hêng rahbi pathumte hian an lungkhamna hmachhawn thei tûra Paul-a te, Janet-i te, leh Alona-i te a ṭanpui dân i lo en ang u. (wp15-E 07/01)