A KAWM THU | ṬAWNGṬAIIN SAWTNA A NEI RENG EM?
Engvângin Nge Mite An Ṭawngṭai?
“Pawisa khelh hrât tak ka ni a. Ka vânneih theih nân ka ṭawngṭai ṭhîn a. Mahse, ka hlawhtling ngai lo.”—Samuel-a,a Kenya.
“School-ah chuan ṭawngṭai dân min zirtîrte chu en lovin kan sawi chhuah a ngai ṭhîn a ni.”—Teresa-i, Philippines.
“Harsatnate ka tawhin ka ṭawngṭai ṭhîn a. Sual ngaihdam nân leh Kristian ṭha tak ka nih theih nân ka dîl ṭhîn.”—Magdalene-i, Ghana.
Samuel-a te, Teresa-i te, leh Magdalene-i te thusawi chuan mite chu chhan hrang hrang avângin an ṭawngṭai tih a târ lang a, a chhan ṭhenkhat chu a dang aiin a pawimawh lehzual a ni. Mi ṭhenkhat chu tih tak zetin an ṭawngṭai a, mi dangte erawh chuan an chham mai mai thung. Mahse, mi maktaduai tam takte chu school exam pass nân an ṭawngṭai a, a nih loh leh sport lama an ṭan zâwngin an hneh theih nân te, Pathianin an chhûngkua a kaihhruai nân te, leh a chhan dang tam tak avânga ṭawngṭai ngai niin an hre bawk a ni. Ngaih dân lâk khâwmnate chuan sakaw vawn nei lo mi ṭhenkhatte pawh an ṭawngṭai ziah tih a târ lang a ni.
I ṭawngṭai ngai em? I ṭawngṭai a nih chuan, eng nge i dîl? I ṭawngṭai ngai emaw, ngai lo emaw pawh ni se, heti hian i ngaihtuah mai thei a ni: ‘Ṭawngṭaiin sâwtna a nei rêng em? Ngaithlatu tuemaw a awm em?’ tiin. Lehkha ziaktu pakhat chuan ṭawngṭaina chu “therapy (natna tihdamna) chi khat . . . mahni sangha khawi bia ang mai” nia a ngaih thu a sawi chhuak a. Damdawi lama thuneitu ṭhenkhat pawhin ṭawngṭaina chu “damdawi chi khat” angin an ngai a ni. Ṭawngṭai ṭhîntute chuan chîn ṭhanah an nei mai nge ni a, ṭawngṭaina aṭangin damna an hmu zâwk?
Chu mi nêna inkalh takin, Bible chuan ṭawngṭaina chu natna tihdamna chi khat ang mai a ni lo tih a sawi a. Ṭawngṭai dân tûr dik tak leh thil dik tak atâna kan dîl chuan ngaithlatu a awm ngei tih min hrilh a ni. Chu chu a dik em? A finfiahna i lo en ang u. (wp15-E 10/01)
a Hming ṭhenkhat thlâk a ni.