Pathianin Ṭawngṭai Tûra Min Sâwm Chhan

Pathian chuan a ṭhian ni tûrin min sâwm.

Inlaichînna ṭha nei tûrin ṭhiante chu an inbe tawn ṭhîn a. Chutiang chuan, Pathian pawhin inṭhianna ṭha tak kan neih theih nân amah be tûrin min sâwm a ni. “Mi lam ang a, ka hnênah in rawn ṭawngṭai ang a, ka ngaithla ang che u,” tiin a sawi. (Jeremia 29:12) Pathian i biak hian, ‘amah chu i hnaih ang a, tichuan anin a hnaih ang che.’ (Jakoba 4:8) “LALPA chuan a kotu zawng zawngte chu a hnaih ṭhîn,” tih Bible chuan a sawi. (Sâm 145:18) Pathian hnêna kan ṭawngṭai tam poh leh amah nêna kan inṭhianna chu a nghet zual sawt ang.

Pathianin ṭanpui che a duh.

Isua chuan: “Nangniho hi tupawh in fapain chhangpêr dîl che u sela, tunge lung pe ang che u? a nih leh, sangha dîl che u sela, tunge rûl pe ang che u? Chutichuan nangni . . . mahin in fate thil ṭha pêk nachâng in hriat chuan, in Pa vâna mi chuan a dîltute chu thil ṭha a pe zâwk êm êm dâwn lo vem ni?” tiin a sawi a. (Matthaia 7:9-11) Ni e, Pathian chuan “a ngaihsak” che avâng leh ṭanpui che a duh avângin ṭawngṭai tûrin a sâwm che a ni. (1 Petera 5:7) I buainate a hnêna thlen tûrin a sâwm bawk che a. Bible chuan: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tiin min hrilh a ni.—Philippi 4:6.

Mihringte chuan thlarau lam mamawh an nei.

Mi maktaduai tam takte’n ṭawngṭai mamawh niin an inhria tih mihringte nih phung zir chîk mite chuan an hre chhuak a. Chûng zîngah chuan Pathian awm ring lotute leh a awm leh awm loh hriat phâk a ni lo tih ringtute pawh an tel a ni.a Chu chuan mihringte chu thlarau lam mamawh neia siam an nihzia a tichiang a. Isua chuan: “Mahni thlarau lam mamawh hriate chu an hlim e,” tiin a sawi. (Matthaia 5:3, New World Translation) Thlarau lam mamawh phuhrûk theih dân kawng khat chu Pathian nêna inbiak ziah hi a ni.

Pathianin a hnêna ṭawngṭai tûra min sâwmna kan pawm chuan, eng hlâwknate nge kan beisei theih? (wp15-E 10/01)