Vântirhkoh Chungchânga Thu Dik

Pathian chu Thlarau a nih ang bawkin, vântirhkohte pawh ‘tisa leh ruh nei lo,’ hmuh theih loh thlarau an ni a. Vântirhkoh rinawmte chu vânah an awm a, Pathian awmna hmunah an kal thei a ni.—Luka 24:39; Matthaia 18:10; Johana 4:24.

Vântirhkohte chuan Pathian pêk leia an mawhphurhnate an hlen theih nân mihring anga inlan châng an nei a, an mawhphurhnate an hlen zawh chuan thlarau taksa an pu leh a ni.—Rorêltute 6:11-23; 13:15-20.

Vântirhkohte chu Bible-ah mipa anga sawi lan an niin, mihring anga an rawn lan hunah mipa angin lang ṭhîn mah se, an zîngah mipa leh hmeichhia an awm lo. Nupui pasal an innei lo va, an anpui fate pawh a hring hek lo. Chu bâkah, vântirhkohte chu he leiah hian mihringte—nausên te, naupang te, leh puitlingte—an ni hmasa lo va. Jehova siam an nih avângin Bible-in anni chu Pathian fapate” tiin a ko a ni.—Joba 1:6; Sâm 148:2, 5.

Bible-in ‘mihring ṭawngte leh vântirhkoh ṭawngte’ tia a sawi hian thlarau mite chuan ṭawng leh thusawi dân an nei tihna a ni. Pathianin mihringte biak pawh nân vântirhkohte hmang mah se, vântirhkohte chibai bûk emaw, an hnêna ṭawngṭai emaw a phal lo.—1 Korinth 13:1; Thu Puan 22:8, 9.

Vântirhkohte sîng hmun sîng tam tak an awm a, chu chu tlûklehdingâwn aia tam pawh a ni thei.a—Daniela 7:10; Thu Puan 5:11.

Vântirhkohte chu “chaknaa ropuite” an ni a—mihringte aiin an chak zâwk daih—mihringte aiin finna an nei zâwk a. Chak takin an thlâwk thei a, he khawvêla thlâwk chak ber ai pawha chak zâwkin an thlâwk thei a ni.—Sâm 103:20; Daniela 9:20-23.

Rilru lamah leh thlarau lamah chungnung zâwk mah se, vântirhkohte chuan tihtheih chin an nei a, an hriat loh thilte pawh a awm a ni.—Matthaia 24:36; 1 Petera 1:12.

Vântirhkohte chu mize neia siam an ni a, Pathian miziate leh zalên taka duhthlan theihna neia siam an ni a. Chuvângin, mihringte ang bawkin, thil dik leh dik lo titûrin duh an thlang thei a ni. Vântirhkoh ṭhenkhat chu Pathian laka an hel avângin a lungchhiatthlâk hle.—Juda 6.