Pathian Hming Chu Tu Nge Ni?

Mi tuemaw hriat kan tum hian, kan zawh duh hmasa ber ni thei chu “Tu nge i hming” tih hi a ni. Chu zawhna chu Pathian hnênah zâwt ta la, engtin nge a chhân ang che?

“Kei JEHOVA ka ni.”—Exodus 6:2.

Chu hming chu i hriat ngai loh a ni em? Bible letlingtu tam takin Pathian hming an hman khât êm avângin i hre ngai lo pawh a ni thei. Chu hming aiah nihna sawina “LALPA” tih chu an hmang fo va. Mahse, Pathian hming chu a tîra ziak Bible bu pumpuiah vawi 7,000 vêl lai a chuang a. Chu hmingah chuan Hebrai hawrawp pali YHWH, a nih loh leh JHVH a tel a, chu chu hmân lai aṭang tawhin “Jehova” tia lehlin a ni.

Pathian hming chu Hebrai Bible-ah leh Bible lehlin tam takah hmuh theih a ni

PATHIAN HMING A PAWIMAWH CHHAN

A hming chu Pathian tân ngei pawh a pawimawh. Pathian hming chu tuma pêk ni lovin, amah ngeiin a thlan a ni a. Pathian Jehova chuan: “Hei hi kumkhuaa ka hming chu a ni a, tin, hei hi chhuan zawng zawng thlenga mi hriat rengna chu a ni,” tiin a sawi. (Exodus 3:15) Bible-ah hian, Pathian hming chu Engkimtithei, Pa, LALPA, a nih loh leh Pathian tih ang chi a nihnate aiin a chuang tam zâwk a, Abrahama, Mosia, Davida, leh Isua ang chi mi mal hmingte ai pawhin a lang tam zâwk bawk. Chu bâkah, Jehova duh zâwng chu mite’n a hming an hriat hi a ni a. Bible chuan: “Nangmah chauh hi JEHOVA hming pu, Leilung zawng zawng chunga Chungnungber i nih an hriat theih nân,” tiin a sawi a ni.—Sâm 83:18.

A hming chu Isua tân a pawimawh. Kan Pa, a nih loh leh Lal Ṭawngṭainaah khân Isua chuan a hnungzuitute chu: “I hming zahawm rawh se” tia Pathian hnêna ṭawngṭai tûrin a zirtîr a. (Matthaia 6:9) Isua ngei pawhin Pathian hnênah: “Ka Pa, i hming chawimawi rawh,” tiin a ṭawngṭai a ni. (Johana 12:28) Isua chuan Pathian hming chawimawi chu a nuna a dah hmasak ber avângin a ṭawngṭainaah: “An hnênah i hming ka hriattîr a, ka hriattîr leh fo vang,” tiin a sawi thei a ni.—Johana 17:26.

A hming chu Pathian hretute tân a pawimawh. Tûn hmaa Pathian mite chuan an inhumhimna leh chhandamna chu Pathian hming danglam bîk tak nên a inthlunzawm tlat tih an hria a. “LALPA hming chu kulhpui a ni a, mi fel chu a tlân lût ṭhîn a, a him ṭhîn.” (Thufingte 18:10) “Tupawh LALPA hming lam apiang chu chhanhim an ni ang.” (Joela 2:32) Pathian hming chuan a rawngbâwltute chu a tidanglam ang tih Bible chuan a târ lang a. “Hnam tinin mahni pathian ṭheuh an bia ang a, keini pawh LALPA kan Pathian chu kumkhuain kan bia ang.”—Mika 4:5; Tirhkohte 15:14.

A HMINGIN A TAR LANTE

A hming chuan Pathian nihna chiang takin a târ lang. Bible lama mi thiam tam takin Jehova hming chuan “A Nihtîr,” tih awmzia a nei tih an pawm a. Pathian Jehova’n a chungchângah: “Ka Duh Ang Apiang Chu Ka Ni Ang,” tia Mosia hnêna a sawi khân, a hming awmzia hre thiam tûrin min ṭanpui a ni. (Exodus 3:14, New World Translation) Chuvângin, Pathian hming chuan thil zawng zawng awmtîrtu, Siamtu nia a nihna aia tam a târ lang a. A hming chuan amah leh a thil siamte chu a thiltum hlen chhuah nân a ṭûl dân azirin a nihtîr theihzia a târ lang a ni. A nihnate chuan Pathian dinhmun, thuneihna, leh thiltihtheihnate a târ lan laiin, Jehova tih a hming chauhvin a chungchâng engkim leh a nih theih dân zawng zawng a entîr a ni.

A hming chuan Pathianin min ngaihsakzia a târ lang. Pathian hming awmzia chuan keimahni pawh tiamin, a thil siamte chunga a rinawmzia a târ lang a. Chu bâkah, Pathianin a hming a hriattîr tih hian a hming hre tûrin min duh tih a târ lang bawk. Dik tak chuan, a hming zawh nachâng kan hriat hma aṭang rêngin, min hrilh tûrin hma a la a. Pathian chuan ani chu hriat chian theih loh leh hnaih theih loh milem pathian ang ni lovin, kan hnaih theih Mi tak tak anga thlîr tûrin min duh tih a chiang hle.—Sâm 73:28.

Pathian hming kan lamnain amah kan ngaihsakzia a târ lang. Entîr nân, i ṭhian ni tûra i duh tuemaw chu i hminga ko tûr chein i hrilh a. Mahse, i hminga a koh duh tlat loh che chuan engtin nge i awm ang? I ṭhian nih a duh tak tak emaw tih i ringhlel mai thei a ni. Pathian chungchângah pawh chutiang bawk chu a ni a. Jehova chuan mihringte chu a hming a hrilh a, a hming lam tûrin min fuih bawk. Chutianga kan tih chuan, Jehova kan hnaih duh tih kan lantîr a ni ang. Dik takin, ani chuan “a hming ngaihsaktute” chu a hria a ni!—Malakia 3:16.

Pathian hming hriat chu amah hriat chian nâna rahbi pawimawh hmasa ber a ni a. Mahse, amah hriat mai chu kan duh tâwk lo vang. A hming phêna Awma chu kan hriat chian a ngai a. Eng ang mi nge a nih tih kan hriat chian a ngai a ni.