Rilru Hahna Hmachhawn Thei Tûrin Mi Dangte Chu Ṭanpui Rawh

1. Engtin nge hmangaihna nei tak kan Pa, Jehova chu kan entawn theih?

JEHOVA chuan min hmangaih tak zet a. (Joh. 3:16) Hmangaihna nei tak kan Pa entawn chu kan duh a ni. Chuvângin, mi zawng zawng chungah ‘inlainat tawnna, unau anga inhmangaihna, khawngaihna’ lantîr chu kan duh a, a bîk takin “rinna chhûngte zînga” mite chunga lantîr chu kan duh lehzual a ni. (1 Pet. 3:8; Gal. 6:10) Thlarau lama kan chhûngkaw zînga mite’n harsatna khirh takte an hmachhawn hian, ṭanpui kan duh a ni.

2. He thuziakah hian eng nge kan sawiho vang?

² Jehova chhûngkaw zînga tel duh zawng zawngte chuan dinhmun khirh takte an hmachhawn dâwn a ni. (Mk. 10:29, 30) He khawvêl tâwpna a hnaih telh telh rual hian fiahnate kan hmachhawn nasa lehzual dâwn niin a lang. Engtin nge kan inṭanpui tawn theih? Bible-a chuang Lota, Joba, leh Naomi te hnên aṭanga kan zir theihte chu i lo ngaihtuah ang u. Tichuan, tûn laia kan unaute hmachhawn harsatna ṭhenkhat kan sawiho ang a, chûng harsatnate hmachhawn thei tûra ṭanpuina kan pêk theih dân pawh kan hre bawk ang.

DAWHTHEIHNA NEI RAWH

3. Petera thawn hnih 2:7, 8-a târ lan angin, Lota’n eng thu tlûkna ṭha lo tak nge a siam a, eng nge a rah chhuah?

³ Lota chuan nungchang bawlhhlawh tak Sodom khaw mite zînga awm tûrin duh thlanna ṭha lo tak a siam a. (2 Petera 2:7, 8 chhiar rawh.) Chu ram chu ram hausa tak ni mah se, Lota chuan Sodom khuaa a insawn avângin thil tam tak a chân phah a ni. (Gen. 13:8-13; 14:12) A nupui chuan Jehova thu zâwm lo khawpin chu khawpui, a nih loh leh chuta chêng ṭhenkhatte chu a ngaina niin a lang. Pathianin chumi hmunah mei leh kât a sûrtîr chuan a nun a chân a ni. Lota fanu pahnihte hi han ngaihtuah teh. A hnua boral Sodom khuaa mipate nên khân an lo inhual a. Lota chuan a in leh ro sumte a chân a, chûng ai maha atâna hrehawm zâwk chu, a nupui a chân hi a ni. (Gen. 19:12-14, 17, 26) Chûng hun khirh tak kârah chuan Jehova’n Lota chungah dawhtheihna a hloh em? Hloh lo ve.

4. Engtin nge Jehova’n Lota chungah dawhtheihna a lantîr? (A kâwma milem en rawh.)

⁴ Lota chuan Sodom khuaa awm chu thlang mah se, Jehova’n khawngaihna lantîrin, amah leh a chhûngte chhan chhuak tûrin vântirhkohte a tîr a. Mahse, hmanhmawh taka Sodom khua chhuahsan tûra vântirhkohte thupêk chu zâwm nghâl mai lovin, Lota chu “a la muang hle si a.” Vântirhkote chuan a kuta chelhin, amah leh a chhûngte chu khawpui chhuahsan tûrin an ṭanpui a ni. (Gen. 19:15, 16) Vântirhkote chuan tlâng ram lama tlân tûrin an hrilh a. Mahse, Jehova thu zawm aiin, Lota chuan a bul hnai khaw têa tlân a dîl a ni. (Gen. 19:17-20) Jehova chuan dawhthei takin a ngaithla a, chu khaw têa tlân chu a remti a. A hnuah, Lota chuan chuta awm chu a hlau va, a tîra tlân tûra Jehova’n a hrilhna hmun ngei, tlâng ram lamah chuan a tlân ta tho a ni. (Gen. 19:30) Jehova lantîr dawhtheihna chu a va chhinchhiah tlâk tak êm! Engtin nge kan entawn theih?

5-6. Pathian entawnin, 1 Thessalonika 5:14-na chu engtin nge kan nunpui theih?

⁵ Lota angin, thlarau lam chhûngkaw zînga tuemaw chuan thu tlûkna ṭha lo a siam avângin buaina khirh tak a tuar mai thei a. Chutiang thil a thleng a nih chuan, eng nge kan tih ang? A thiltih rah a seng kan ti duh mai thei a, dik pawh a dik rêng a. (Gal. 6:7) Mahse, chu aia ṭha zâwkin kan ti thei a. Jehova’n Lota a ṭanpui dân chu kan entawn thei a ni. Engtin nge?

⁶ Jehova chuan vântirhkohte chu Lota vaukhân tûr chauh ni lovin, Sodom khaw chunga thleng chhiatna laka dam khawchhuak tûra ṭanpui tûr pawhin a tîr a ni. Chutiang bawkin, kan unuavin buaina a tâwk dâwn tih kan hriat chuan kan vaukhân tûr a ni a. Chu bâkah, ṭanpuina pawh ka pe thei bawk. Ani chuan Bible ṭanchhan thurâwnte chu a zâwm nghâl lo a nih pawhin, a chungah dawhtheihna kan lantîr tûr a ni. Vântirhkoh pahnihte ang ni rawh. Kan unau chu beidawng a, kalsan mai lovin, amah ṭanpui theih dân kawngte kan zawng zâwk tûr a ni. (1 Joh. 3:18) A kuta chelh tûrin, entîr nei kan kut kan pe ang a, tichuan, thurâwn ṭha a dawn chu nupui tûrin kan ṭanpui ang.—1 Thessalonika 5:14 chhiar rawh.

7. Engtin nge Jehova’n Lota a thlîr dân chu kan entawn theih?

⁷ Jehova chuan Lota ṭhat famkim lohnate chauh a en thei reng a. Chu aiin, Lota chu mi fel a ni tia sawi tûrin, a hnuah tirhkoh Petera chu thlarauvin a thâwk khum a ni. Jehova’n kan thil sual tihte min haidersak avângin kan va lâwm tak êm! (Sâm 130:3) Jehova’n Lota a thlîr dân chu engtin nge kan entawn theih? Kan unaute mize ṭha kan ngaihven tlat chuan an chungah dawhtheihna kan lantîr lehzual ang a. Kan ṭanpuina pêkte pawh an tân zawm a awlsam lehzual ang.

KHAWNGAIHNA NEI RAWH

8. Khawngaihna chuan engti tûrin nge min chêttîr ang?

⁸ Lota ang lo takin, Joba hrehawm tawrh chu thu tlûkna ṭha lo ṭhenkhat a siam avânga tuar a ni lo. Mahse, ani chuan leilung chhiatna nasa tak a tâwk a, a neih ro sumte leh khawtlânga a hming ṭhatnate a chân a, a hrisêlna ṭhate pawh a hloh a ni. Chu aia pawi zâwk chu, a nupui nên an fate zawng zawng an chân hi a ni. Joba chuan ṭhian ṭha lo pathumte dik lo taka sawichhiatna pawh a tâwk a. Chûng thlamuantu der pathumte’n Joba chunga khawngaihna an lantîr loh chhan pakhat chu eng nge ni? Anni chuan Joba dinhmun chu a pâwnlâng chauhva an hmuh vâng a ni. Chumi avâng chuan, thu tâwp dik lo tak siamin, Joba chu na takin an sawichhia a. Chutiang thil sual chu engtin nge kan pumpelh theih? Jehova chauhvin mite dinhmun dik tak a hria tih ring ang che. Hrehawm tuartu thusawi chu ngun takin ngaihthlâksak la. A thusawi chu ngaithla liam mai lovin, a hrehawmna chu tawrhpui tum ang che. Chutiang a nih chauhvin, i unaute chungah lainatna dik tak i lantîr thei ang.

9. Khawngaihna chuan eng ti lo tûrin nge min chêttîr ang a, engvângin nge?

⁹ Khawngaihna chuan mi dangte hmachhawn buaina chungchâng thehdarh lo tûrin min ṭanpui ang. Mi rêl chîngte chuan kohhran inpumkhatna a tichhia a ni. (Thuf. 20:19; Rom 14:19) Ani chu mi ngilnei a ni lo va, ngaihtuah lâwk lo va thusawi mi a nih avângin, a thusawite chuan hrehawm lo tuar tawhte chu a tina lehzual thei a ni. (Thuf. 12:18; Eph. 4:31, 32) Mite mize ṭha hmuh tum a, an fiahna tawhte hmachhawn thei tûra ṭanpui theih dân zawn chu a va ṭha zâwk dâwn êm!

10. Joba 6:2, 3-a thu chuan eng nge min zirtîr?

¹⁰ Joba 6:2, 3 chhiar rawh. Joba pawhin ‘bung taka’ thusawi châng a nei a. Mahse, a thusawi ṭhenkhat chu a dik lo tih a hnuah a pawm leh a ni. (Job. 42:6) Joba angin, tûn laiah pawh, buaina khirh tak hmachhawntu chuan a hnua a inchhîr lehna tûr thute chu bung takin a sawi mai thei a. Engtin nge kan chhân lêt ang? Sawisêl mai ai chuan, khawngaihna kan lantîr tûr a ni. Jehova chuan tûn laia kan hmachhawn buainate leh rilru hahnate kan neih chu a duh lo tih hre reng ang che. Chuvângin, Jehova chhiahhlawh rinawm tuemaw chuan rilru hahna nasa tak a neih huna ngaihtuah chiang lo va thu a sawi chu hriatthiamawm tak a ni. Jehova leh kan chungchâng dik lo takin a sawi a nih pawhin, a chungah kan thinrim nghâl emaw, chutiang thil a sawi avângin kan sawisêl ngâl emaw tûr a ni lo.—Thuf. 19:11.

11. Kohhran upate chuan fuihna an pêk hunah engtin nge Elihua an entawn theih?

¹¹ A châng chuan, buaina khirh tak hmachhawntu chuan fuihna ṭangkai tak a mamawh thei a. (Gal. 6:1) Kohhran upate chuan engtin nge an ṭanpui theih? Anni chuan lainatna nasa tak nêna Joba thusawi ngaithlatu Elihua chu an entawn thei a ni. (Job. 33:6, 7) Elihua chuan Joba rilru awm dân a hriatthiam hnuah chauh fuihna a pe a. Elihua entawn tûr siam zuitu kohhran upate chuan mite thusawi chu ngun taka ngaithlain, an dinhmunte hriatthiam an tum a. Chumi hnua fuihna an pêk chuan ngaithlatu thinlung chu an hneh thei lehzual ngei ang.

MITE CHU THLAMUAN RAWH

12. A pasal leh a pafa pahnihte a chânnain Naomi chu eng angin nge a nghawng?

¹² Naomi chu Jehova hmangaihtu hmeichhe rinawm tak a ni a. A pasal leh a fapa pahnih a chân hnu chuan, a hming Naomi tih chu “Kha” tih awmze nei “Maraii,” tia thlâk a duh a. (Rut. 1:3, 5, 20, 21) Naomi monu Ruthi chuan hrehawm tuartu a pizawn chu a kalsan duh lo va. Ruthi chuan ṭanpuina ṭha tak a pe mai ni lovin, Naomi chu a thlamuan a. Thinlung taka a hmangaihziate hrilhin, a thlâwp tlat a ni.—Rut. 1:16, 17.

13. Thihnaa kawppui chânte chuan engvângin nge kan ṭanpuina an mamawh?

¹³ Thlarau lama kan chhûngkaw zînga tuemawin thihnaa a nupui emaw, a pasal emaw a chân chuan ani chu kan ṭanpui a ngai a. Nupate chu thing pahnih, inhnaih taka ṭo dûn nên tehkhin theih an ni. Kum tam tak chhûngin, thingkûng zungte chu a inchingchivêt a. A pakhat zâwk chu a zung chawpa phawi a nih a, a thih chuan, a dang pakhat chuan nasa takin a tuar thei a ni. Chutiang bawkin, tuemawin thihnaa a kawppui a chân hian, rilru lamah hun rei tak chhûng a tuar thei a ni. Paula-ib chu a pasalin a boralsan thut chuan, ani chuan: “Ka nun chu a inthlâk danglam thawk a, engmah tihtheih nei tawh lo ni hian ka inhria. Ka ṭhian ṭha ber chu ka chân a. Ka pasal chu thil engkim ka hrilh ṭhîn a. Ani chuan min hlimpui ṭhînin, hun harsate chu kan paltlang dûn a. Ka harsatnate ka hrilh hian ṭha takin min ngaihthlâksak ṭhîn. Ka dâr leh lam sahthlâksak ang mai ni hian ka inhria,” tiin a sawi.

14-15. Thihnaa kawppui chân tuemaw chu engtin nge kan thlamuan theih?

¹⁴ Thihnaa kawppui chân tuemaw chu engtin nge kan thlamuan theih? Nuam lo i ti emaw, sawi tûr i hre lo emaw pawh ni se, kan tih theih hmasa ber chu amah va biak hi a ni. A chunga kan sawi tâk Paula-i chuan: “Thihna chuan mite chu rilru nuam lovin a siam a. Chuvângin, mi dang tâna thu ngaihthlâk nuam lo sawi palh an hlau va. Mahse, engmah sawi lova an awm hian a hrehawm zâwk,” tiin a sawi. Lusûntu chuan thu ṭha tak sawi tûrin min beisei kher lo vang. Paula-i chuan: “Ka ṭhiante’n, ‘I chunga he thil a thleng chu pawi ka ti khawp mai,’ tia an sawi mai pawh hian ka lâwm,” tiin a sawi.

¹⁵ Kum engemaw zât kaltaa a nupuiin a boralsan Williama-a chuan: “Mite’n ka nupui chanchin an sawi hian ka lâwm hle a; chu chuan ani chu mite’n an hmangaihin, an zah tih min hriattîr a ni. Chutianga min ṭanpuina chuan nasa takin min hnêm a. Ka nupui chu ka tâna a hlut êm avâng leh ka nun pêng pawimawh tak a nih avângin ka lungawi tak meuh a ni,” tiin a sawi. Hmeithai Bianca-i chuan: “Mite’n min ṭawngṭaipui a, Bible châng pahnih khat min chhiarsak hian ka thla a muang hle a. Ka pasal chungchâng an sawi hunah leh ka pasal chungchâng ka sawi huna min ngaihthlâksakte hian ka thla a muang tak zet a ni” tiin a sawi.

16. (a) Thihnaa hmangaih tak chântu chu engtin nge kan ṭanpui ang? (b) Jakoba 1:27-a sawi angin, eng tihna hun remchâng nge kan neih?

¹⁶ Ruthi chuan hmeithai Naomi a kalsan lo angin, thihnaa hmangaih tak chântute chu hun rei tak chhûng kan ṭanpui a ngai a. A chunga kan sawi tâk Paula-i chuan: “Ka pasal a thih chuan, ṭanpuina tam tak ka dawng nghâl a. Hunte a liam zêl chuan, mite chu nun dân pângngaiin an nung leh niin a lang. Mahse, ka nun chu a inthlâk danglam pumhlum a. Lusûntu chuan thla rei tak—kum tam tak—chhûng ṭanpuina a la mamawh zêl tih mite’n an hriat hian a thlamuanthlâk hle,” tiin a sawi. Ni e, mi tin chu kan inang lo va. Mi ṭhenkhat chu an dinhmun thar milin an insiamrem nghâl vat niin a lang. Mahse, mi dangte tân chuan an hmangaih tak nêna thil an lo tih dûn ṭhinte chuan an hmangaih thi ta chu a hriatchhuahtîr leh ṭhîn a ni. Mite lusûn dân chu a inang lo va. Jehova chuan thihnaa hmangaih tak chân tate ngaihsak theihna hun remchâng min pe tih hre reng ang che.—Jakoba 1:27 chhiar rawh.

17. Kawppuite kalsana awmte chuan engvângin nge kan ṭanpuina an mamawh?

¹⁷ Kawppuite kalsana awm mi ṭhenkhat chuan rilru hahna nasa tak an tuar a. Hmeichhe dang kawp duh vânga a pasalin a kalsan tâk Joyce-i chuan: “Inṭhenna avânga rilru hrehawmna chu pasal boralsanna aiin a na zâwk niin ka hria. Chêtsualna emaw, dam lohna emaw avânga thi lo ni ta se chuan, chu chu a duh thlanna a ni dâwn lo va. Mahse, hemi ṭumah hian, ka pasalin duh rêng vângin min ṭhen a ni. Tihmualpho leh hlutna nei lo ni hian ka inhria,” tiin a sawi.

18. Kawppui nei tawh lote tân eng ṭanpuina nge i pêk theih?

¹⁸ Kawppui nei tawh lote chunga ngilneihna chhe tê kan lantîr hian anni chu kan hmangaih tih kan lantîr a. Anni chuan thil dang zawng aiin, ṭhian ṭha an mamawh a ni. (Thuf. 17:17) An ṭhian i ni tih engtin nge i lantîr theih? Chaw ei tûrin i sâwm thei a. Intihhlimnaah emaw, thlawhhma rawngbâwlnaah emaw hun i hmanpui thei a ni. Tih theih dang leh chu, chhûngkua Pathian biaknaa lo tel ve ṭhîn tûrin i sâwm thei bawk. Chutianga i tih chuan, ‘thinlunga lungchhiate hnaihtu’ leh “hmeithaite ngaihtuahtu,” Jehova chu i tilâwm ang.—Sâm 34:18; 68:5.

19. Petera thawn khat 3:8-na chu rilrua dahin, eng tih nge kan tum tlat ang?

¹⁹ Nakin lawka Pathian Ramin leilung a awp hunah chuan ‘mangannate chu theihnghilhin’ a awm tawh ang. ‘Tûn hma thilte hriat renga a awm tawh loh va, rilruah pawh a luh tawh hek loh’ hun chu kan nghâkhlel tak zet a ni. (Is. 65:16, 17) Chumi nî a thlen hma chu in ṭanpui tawnin, thlarau lama kan chhûngkuaa mi zawng zawng chu kan thusawi leh thiltihin kan hmangaih tak zet tih i lantîr ang u.—1 Petera 3:8 chhiar rawh.