Kristian Rawngbâwltute Ṭanpuitu
1. Kum 1938 khân eng ruahmanna thar nge neih ṭan a nih a, chu chuan eng nge a tum?
1 Kum 1938-ah Jehova inawpna pâwl chuan ruahmanna thar a nei a. Zone inkhâwmpui, tûna bial inkhâwmpui kan tiha tel tûrin kohhrante chu sâwm an ni. Chu chu eng atân nge? January 1939 chhuak Informant (tûna Kan Lalram Rawngbâwlna) chuan: “Hêng inkhâwmpuite hi Jehova Theocratic Inawpna Pâwl pêngte zînga mi a ni a, Lalram rawngbâwlna atân a ni. Chûng inkhâwmpui aṭanga kan dawn kaihhruainate chu kan hna thawh tûr ṭha taka kan thawh theih nân kan mamawh ṭheuh a ni,” tiin a chhâng a ni. Lalram puang chhuaktute chu kum 1938-a mi 58,000 vêl chauh an nihna ata kum 2009-a 70,00,000 chuanga an punna kan ngaihtuah hian, bial inkhâwmpuite hi rawngbâwltute ‘an hna thawh tûr ṭha taka thawhtîr’ a tumna kawngah a hlawhtling hle tih a lang a ni.
2. Rawngbâwl kum thara kan neih tûr bial inkhâwmpui-ah eng thute nge kan ngaihthlâk dâwn?
2 Rawngbâwl Kum Thar Atâna Thupui: September thlaa neih ṭan tûr bial inkhâwmpui leh chuta pêk chhuah tûr fuihna thute hriat chu kan nghâkhlel tawh hle. A thupui, “Khawvêla Mi In Ni Si Lo” tih hi Johana 15:19 aṭanga lâk chhuah a ni. Kristian rawngbâwltute hlâwkpui ngei tûr thusawi ṭhenkhatte chu engte nge? Inrinni-ah chuan, “Hunbi Kima Rawngbâwlna Chuan Min Vênghim—Engtin Nge?” tih chu kan ngaithla ang. Hmun thuma ṭhen thusawi inzawm, “Hêng Hian Tibawlhhlawh Che Suh Se . . . ” “Sakawlh,” “Nawhchizuar Ropui Tak,” leh “Sumdâwngtute” tihte chu kan ngaithla bawk ang. Chawlhni-ah chuan, “Khawvêl Hmangaih Lovin, Pathian Jehova Hmangaih Rawh,” tih thupui hmanga thusawi inzawm chu kan ngaithla ang. Thusawi dangte zîngah chuan, “‘Mikhual leh Khualzin’ Angin Awm Zêl Rawh,” tih leh “Thlamuang Takin Awm Rawh! Khawvêl I Ngam Theih Avângin,” tihte pawh a tel ang.
3. Bial inkhâwmpuia kan inkhâwmna aṭangin eng hlâwkna nge kan dawn theih?
3 Rawngbâwlnaa thatho taka tel tawh lo unaunu pakhat chuan tûn hnaia bial inkhâwmpuia a tel hnuah, inkhâwmpuia thusawite’n a dinhmun bih chiang tûr leh “chhuanlam siam bânsan a, rawngbâwlnaa chhuah” tum tlat tûra a ṭanpui dân a ziak a ni. Rinhlelhrual lohvin, rawngbâwl kum thara neih tûr bial inkhâwmpuia thusawite chuan khawvêl hmangaih lova, Pathian Jehova hmangaih zâwk tûrin min ṭanpui ṭheuh ngei ang. (1 Joh. 2:15-17) Kristian rawngbâwltute ṭanpuitu he ruahmanna duhawm tak hi hlâwkpui ngei tûrin inkhâwmpuinaah tel ngei la, ngun takin ngaithla ngei bawk ang che.