Tawn Chawpa Thu Hrilhna I Nei Thei!
1. (a) Tawn chawpa thu hrilhna chu eng nge? (b) He inkhâwmnaa lo telte zîngah hian mi engzâtin nge tawn chawpa thu hrilhna aṭanga thutak hmu che u?
1 In kohhranah tawn chawpa thu hrilhna aṭanga thu tak hretu mi engzât nge awm? A chhânna chu mak i ti hle mai thei a ni. Tawn chawpa thu hrilhnaah hian nî tina kan thiltih—kan zinvah vêlnaah te, chhûngkhat leh ṭhenawm khawvêng kan tlawhnaah te, a nih loh leh kan bazârnaah te, leh school-ah te, hna thawhna hmunah te, leh chutiang hmun hrang hrang—te-a kan mi tawhte hnêna thu hrilhna a tel a ni. Jehova Thuhretu baptisma chang tawh mi 200 chuang awmnaah, za zêla 40-te chu tawn chawpa thu hrilhna an dawn aṭanga thutak hmu an nih chu! Chuvângin, he thu hrilh dân kawng hi a hlawhtling hle a ni.
2. Tawn chawpa thu hrilh chungchâng entîrna engte nge Bible-ah kan hmuh?
2 Kum zabi khatnaa chanchin ṭha hriltute pawh khân tawn chawpin thu an hril fo ṭhîn. Entîr nân, Isua chuan Samari ram pal tlanga a zin khân, Jakoba tuichhunchhuaha tui chawi hmeichhe pakhat hnênah thu a hrilh a. (Joh. 4:6-26) Philipa pawhin Isaia lehkhabu chhiar lai mêk, Ethiopia mi lian chu: “I chhiar kha a awmzia i hria em?” tia zâwtin inbiakna a ṭan bawk a ni. (Tirh. 8:26-38) Tirhkoh Paula pawhin Philippi khuaa lung ina a tân lai khân, tân in vêngtu hnênah thu a hrilh bawk. (Tirh. 16:23-34) A hnua ina khuahkhirh a nih chhûng pawh khân, Paula chuan “a hnêna lût apiang a lâwm ṭhîn a. Pathian ram thu a hrilh a, Lal Isua Krista thu pawh huai takin a zirtîr ṭhîn a.” (Tirh. 28:30, 31) Mi zakzum tak pawh ni mah la, nang pawhin tawn chawpa thu hrilhna chu i nei ve thei a ni. Engtin nge i neih theih?
3. Zahzumna hneh tûrin engin nge min ṭanpui thei?
3 Bul Ṭan Rawh: Kan zînga mi tam tak chuan hmêl hriat ngai lohte biak ṭan chu harsa kan ti ṭhîn a. Kan hmêl hriatte ngei ngeite hnênah pawh thutak han hrilh chu a remchâng lo riauvin a lang thei. Amaherawhchu, Pathian Jehova ṭhatna te, a chhiahhlawhte hnêna a pêk thlarau lam ro hlu tak mai te, leh he khawvêla mite dinhmun chhiatzia te kan ngaihtuah chuan an hnêna thu hril tûra chêttîrin kan awm ang. (Jon. 4:11; Sâm 40:5; Mt. 13:52) Chu bâkah, ‘huaina’ nei tûra min ṭanpui tûrin Pathian Jehova kan ngên thei bawk a ni. (1 Thes. 2:2) Gilead zirlai pakhat chuan: “Mite hnêna thu hrilh harsa ka tih hunah ṭawngṭaina hian min ṭanpui ṭhîn,” tiin a sawi. Mite hnêna thu hrilh i tîm a nih chuan, i rilruin tâwi têin ṭawngṭai ṭhîn ang che.—Neh. 2:4.
4. Eng thiltum nge kan insiam theih a, engvângin eng?
4 Tawn chawp a nih ang ngeiin, hetianga thu hril tûr hian thu hmahruai emaw, Bible châng emaw nêna titina ṭan thlap thlap a ṭûl kher lo. Thu hrilh nghâl tum rên rûn lêm lo va, titina ṭan hrim hrim tum chu a ṭangkai hle thei a ni. Chutianga tihna chuan a tâwpa chanchin ṭha hrilh nâna an mamawh inrintâwkna a pe tih thuchhuahtu tam tak chuan an sawi. Mahse, i mi biakte’n an chhân ṭhat peih loh che chuan, titipui tum luih tlat a ṭûl chuang lo. Hawihhâwm takin in inbiakna chu titâwp la, kalsan mai rawh.
5. Engin nge unaunu zakzum tak pakhat chu tawn chawpa thu hril tûra ṭanpui?
5 Unaunu pakhat zakzum thei tak mai chuan a bazârnaa a mi tawhte chu nêlawm taka enin, a nuih hmasa ṭhîn a. An lo nuih lêt ve chuan tâwi têin a be ṭan a. An lo chhân lêt ṭhat chuan, be chhunzawm zêl tûrin inrintâwkna a neih phah a. An chhân lêtna chu ngun taka ngaithlain, chanchin ṭha hmêlhmang a eng berin nge an rilru la ang tih hriat a tum ṭhîn a ni. Chutiang tih dân hmang chuan thu leh hla chhuah tam tak a sem chhuakin, Bible zirpui pawh a ṭan thei hial a ni.
6. Engtin nge tum lâwk hran lo pawha titina kan ṭan theih?
6 Titina Ṭan Rawh: Eng nge titi ṭan nân kan sawi theih? Tuichhunchhuah bula hmeichhia a titipui khân, Isua chuan tui in tûr dîlin a ṭan a. (Joh. 4:7) Keini pawhin, nêlawm taka chibai bûk emaw, zawhna engemaw zâwt emawin kan ṭan ve thei a ni. Pathian Ram chungchâng emaw, Bible thu kawhhmuh tum nghâl mai emaw chu a ṭûl kher lo. A bîk takin, mite chuan thleibîk an neih phei chuan, titina nuam tak neih chhunzawm mai chu kan tum tûr a ni. Chutianga in inbiak lai chuan Bible thu han hrilh tel zauh va, a thinlunga thutak chi tuh theihna hun remchâng i hmu mai thei a ni. (Thur. 11:6) Ṭhenkhat chuan hriat châkna leh zawhna awmtîr thei chi thu bengverh takte sawi chhuakin, titina hlawhtling tak an ṭan thei a. Entîr nân, inentîr tûra doctor i nghah laiin, “Natna awm tawh loh hun ka nghâkhlel ngawt mai!” han tih mai pawh hian titina a awmtîr thei a ni.
7. Engtin nge thil chîkna chuan tawn chawpa thu hrilhna min neihtîr theih?
7 Thil chîkna pawhin titina ṭan thei tûrin min ṭanpui ang. Fa thuâwih tak nei nu leh pa i hmuh chuan anmahni fak zauh pahin, “Nu leh pa hlawhtling tak ni tûrin engin nge ṭanpui che u?” tiin kan zâwt thei a ni. Unaunu pakhat chuan a hnathawhpuite titi duhzâwng chu lo chhinchhiahin, chu an tuizâwng nêna inmil chuan a titipui ta ṭhîn a. A hnathawhpui pakhat chuan pasal a nei dâwn tih a hriat chuan, inneihna ruahman dân chungchâng sawina Awake! magazine a pe a. Chu chuan Bible thu sawihona kawng a hawng a ni.
8. Engtin nge kan thu leh hla chhuahte chu titina ṭan nân kan hman theih?
8 Titina ṭan theih dân kawng dang leh chu mi dangte hmuha kan thu leh hla chhuahte chhiar hi a ni. Unaupa pakhat chuan Vênnainsâng emaw, Awake! magazine emaw-a thu ngaihvenawm takte chu keuvin, a ri lovin a chhiar a. A bul hnaia mite’n a magazine chhiar chu an lo en ve tih a hriat chuan, zawhna a lo zâwt emaw, a thu chhiar lai chu tâwi têin a hrilhfiah emaw ṭhîn a. Chu chuan titina leh thu hrilhna a neihtîr ṭhîn a ni. Kan hnathawhpuite emaw, school kalpuite emaw hmuh theiha kan thu leh hla chhuahte dahna mai pawh chuan anni chu hriat châkna a neihtîr theiin, lehkhabu chungchângah zâwt tûrin anni chu a chêttîr thei a ni.
9, 10. (a) Engtin nge tawn chawpa thu hrilh theihna hun remchâng kan siam theih? (b) Engtin nge chu chu i tih theih?
9 Hun Remchâng Siam Rawh: Thu hrilh a hmanhmawhthlâkzia han ngaihtuah hian, tawn chawpa thu hrilhna hi a remchân huna tih atân kan dah mai tûr a ni lo tih a chiang hle. Chutih a hnêkin, nî tina kan thiltihte kan tih pahin thu hrilhna hun remchâng siam kan tum tlat zâwk tûr a ni. I hmuh theih tûr âwm mite chu ngaihtuah lâwkin, nêlawm taka anmahni i titipui theih dân tûr ngaihtuah bawk ang che. Tuina neite i chhiarsak atân Bible leh anmahni i pêk chhuah atân thu leh hla chhuahte chu pai reng bawk ang che. (1 Pet. 3:15) Ṭhenkhat chuan ṭawng chi hrang hranga chhuah “tract-te” ah reng chu ṭangkai an ti hle.—km 6/07 p. 3.
10 Thuchhuahtu tam tak chuan remhriatna hmangin tawn chawpa thu hrilh theihna hun remchâng an siam a. Ṭha taka vênhim apartment-a chêng unaunu pakhat chuan chu apartment-a chêngte intihhlimna hmun chu ram lem mawi taka siam jigsaw puzzles rem khâwm nân a hmang a. Miin chu ram lem mawi an tihzia an sawi chuan, unaunu chuan titi ṭan nâna lo hmangin, Bible min tiam, “vân tharte leh lei thar” chungchâng chu a lo hrilh ta ṭhîn a ni. (Thup. 21:1-4) Tawn chawpa thu hrilh theihna hun remchâng siam dân tûr hriat i nei em?
11. Tawn chawpa thu hrilhnaa tuina nei kan hmuhte chu engtin nge kan bawhzui ang?
11 Tuina Neite Bawhzui Rawh: Ngaithla duhtu i tawng a nih chuan, bawhzui tum hrâm ang che. A rem chuan, a hnênah: “Kan inkawmna chu nuam ka ti khawp mai. Engtin nge ka biak leh theih ang che?” tiin i zâwt thei a ni. Bial ṭhenkhatah chuan tuina nei tak takte hre hrang tûrin fin thiam a ngai hle a. Thuchhuahtu ṭhenkhat chu tuina nei anga inlantîr dodâltute thang kamah an âwk a ni. Tuina neitu chu mahni ngeia i bawhzui thei lo a nih chuan, a bawhzui tûr tak kohhranin a bawhzui theih nân in kohhran secretary hnênah Please Follow Up (S-43) form theh lût nghâl thuai ang che.
12. (a) Engvângin nge tawn chawpa thu hrilh nâna kan hun hman zât chu kan chhinchhiah ang? (b) Tawn chawpa thu hrilhna chuan eng rah nge a chhuah? (“Tawn Chawpa Thu Hrilhnain Rah Ṭha A Chhuah!” tih bâwm en rawh.)
12 Tawn chawpa thu hrilh nâna kan hun hman chu report tûr a ni a. Chuvângin, nî khatah minute tlem tê pawh hmang mah la, ṭha takin chhinchhiah ang che. Han ngaihtuah teh: Thuchhuahtu tinte’n tawn chawpa thu hrilh nân nî tin minute 5 lek pawh an hman chuan, thla khatah dârkâr maktaduai 17 aia tam an hmang tihna a ni ang!
13. Tawn chawpa thu hril tûrin engin nge min chêttîr ang?
13 Pathian leh ṭhenawmte hmangaihna chu tawn chawpa thu kan hrilh chhan tûr ṭha ber a ni a. (Mt. 22:37-39) Jehova miziate leh a thiltumte kan ngaihhlutna chuan ‘a ram ropuizia’ thu sawi tûrin min tîrlui a ni. (Sâm 145:7, 10-12) Ṭhenawmte ṭhatna tûr kan ngaihtuahna chuan hun a la awm chhûnga thu hrilh theihna hun remchâng apiang hmang ṭangkai tûrin min chêttîr a ni. (Rom 10:13, 14) Rem hriatna te, ngaihtuah lâwkna te, leh inbuatsaihnate hmangin kan vai hian tawn chawpin thu kan hril theiin, thinlung ṭha pu mi tuemaw hnêna thutak hriattîrna hlimawm tak chu kan tawng thei a ni.
[Phêk 4-naa thu lâk chhuah]
Mite hmuh a, titipui hrim hrim tum chu ṭangkai i ti hle thei
[Phêk 5-naa thu lâk chhuah]
Thuchhuahtu tam tak chuan remhriatna hmangin tawn chawpa thu hrilh theihna hun remchâng an siam
[Phêk 5-naa bâwm]
Titi Ṭan Nâna Rawtnate
◼ Bul ṭan thei tûrin ṭanpuina dîl rawh
◼ Mi nêlawm leh âwlthâwng deuhte thlang rawh
◼ Anmahni enin, nuih la, an tui zâwng tûr thu engemaw sawi rawh
◼ Ngaithlatu ṭha ni rawh
[Phêk 6-naa bâwm]
Tawn Chawpa Thu Hrilhnain Rah Ṭha A Chhuah!
• Unaupa pakhat chuan a motor chhia siam ṭha tûra a nghah laiin, a kiang vêla mite chu thu hrilhin, vântlâng thusawia lo tel tûra sâwmna chu a pe hlawm a. A kum leh inkhâwmpuiah chuan a hriat ngai loh unaupa pakhat chuan phûr takin a rawn chibai a ni. Chu pa chu a hma kuma a motor siamnaa sâwmna a pêkte zînga pakhat kha a lo ni reng mai a! Chu pa chuan vântlâng thusawi chu a va ngaithla a, Bible zirna nei tûrin a hming a pe bawk a. Tûnah chuan a nupui nên baptisma an chang ve ve tawh a ni.
• Tawn chawpa thu hrilhna aṭanga thutak hmu unaunu pakhat chuan a fate pathum kal tlanga a mi tawhte chu a thu hrilhna bial bîk angin a thlîr a. A bial chhûngah chuan a ṭhenawm te, a fate school-a a hmuh nu leh pate, leh school-a nu leh pate kalkhâwm huna a hmuh nu leh pate an tel a. Chûng mite hnêna a inhmêl hriattîr apiang chuan, a fate enkawlnaa Bible-in a ṭanpui nasatzia chu tih tak zetin a sawi chhuak zauh ṭhîn a, a hnuah thu dang a sawipui ta ṭhîn a ni. Chutianga titipuina a ṭan hnu chuan, Bible thu dang sawi chhunzawm chu awlsam a tisawt ṭhîn a. Chutiang tih dân hmang chuan mi 12 lai baptisma chang tûrin a ṭanpui tawh a ni.
• Unaunu pakhat chuan amah rawn tlawhtu insurance company-a thawk pa pakhat chu thu a lo hrilh a. Hrisêlna ṭha te, hlimna te, leh chatuan nunna te neih ngei a duh leh duh loh a lo zâwt a ni. Chu pa chuan a duh thu hrilhin, eng insuarance chungchâng nge a sawi tih a zâwt a. Unaunu chuan Bible thu tiamte chu hmuhin, kan thu leh hla chhuahte chu a pe a, chu pa chuan chu mi tlai chuan a chhiar zo nghâl a ni. Bible zirpui tûra ruahmanna siam a ni a, a inkhâwm ṭan bawk a, a hnuah baptisma a chang ta a ni.
• Unaunu pakhat chuan a zinnaa a bula ṭhu nu pakhat chu titipuiin, thu hrilhna a nei thei a. An inṭhen dâwn chuan unaunu chuan chu nu hnênah chuan a address leh phone number a pe a, Jehova Thuhretute’n an tlawh leh huna Bible zirpui tûra lo dîl tûrin a fuih bawk a ni. A tûkah chuan, Thuhretu pahnih chuan a inah an va tlawh ta chiah mai a. Chu nu chuan Bible a zir ṭan ta nghâl a, hma a sâwn chak hle a, baptisma a chang a, Bible zirpui pathum lai a nei nghâl bawk a ni.
• Kum zaa upa, unaupa pakhat dam lo enkawlna (nursing home)-a awm chuan “Pathian ram kan mamawh a ni,” tiin a sawi fo va. Chu chuan nurse-te leh dam lote hnêna Pathian Ram chungchâng thu sawina hun remchâng a siamsak a ni. Chu mi hmuna hnathawktute zînga hmeichhe pakhat chuan Paradis-a a tih tûr chu a zâwt a. Ani chuan, “Thil ka hmu leh thei ang a, ka kal leh thei bawk ang a, ka ṭhutna lîr thei (wheelchair) hi ka hâl chhe vek ang,” tiin a chhâng a. A mit a del avângin, chu nu chu magazine chhiarsak tûrin a ngên a ni. Chu unaupa chu a fanuin a va tlawh chuan, hnathawktu chuan magazine-te chu ina hawn a lo dîl a. Nurse pakhat chuan a fanu hnênah, “Kan dam lo enkawlna hmuna kan thupui thar neih chu: ‘Pathian ram kan mamawh’ tih hi a ni,” tiin a lo hrilh a ni.
• Unaunu pakhat chuan restaurant-a ei tûr nghâka a intlar laiin, a bul hnaia ṭhu pa upa tawh ho khatin politics chungchâng an sawiho thâwm chu a hria a. Pa pakhat chuan sawrkârin kan buainate a tihven theih loh thu a sawi a. Unaunu chuan, ‘Hei ngei hi a ni, ka hun remchâng neih hi,’ a ti rilru a. Tâwi fel taka a ṭawngṭai hnu chuan anni chu a va pan ta a. A inhmêlhriattîr hnu chuan, mihringte buaina tiveng theitu tûr, Pathian Ram chungchâng chu a hrilh a, brochure a neih pakhat chu a pe bawk a. Chutih lai tak chuan an manager chuan a rawn pan hnai a. Unaunu chuan rawn hnawt chhuak tûrah a ngai a. Mahse, a thusawi a lo ngaihthlâk rêng thu leh brochure a duh ve thu a rawn hrilh zâwk a ni. A lo ngaithla vetu hnathawktu dang pakhat pawhin mittui tla ṭeuh chungin a rawn pan ve bawk a. Ani chu tûn hmain Bible lo zir tawh ṭhîn a ni a, tûnah Bible zir zawm leh chu a duh ta a ni.