Brochure Thar Sem Chhuah A Ni Ang!
1. November thlaah eng nge kan sem chhuah ang a, he thu leh hla chhuahin a tum chu eng nge ni?
1 Kum 2009-a “Inring Rengin Awm Rawh U!” tih District Inkhâwmpuiah khân, Bible—Eng Thuchah Nge A Ken? tih brochure thar chu tlâng zarh a ni a. Khawvêl pum puia Jehova Thuhretute chuan November thla chhûng hian he brochure hi a vawikhatna atân an sem chhuak ang. Kan bial chhûnga mite’n he thu leh hla chhuah hi engtin nge an hlâwkpui ang? Mi tam zâwk chuan Bible chungchâng an hre mang meuh lova, a bîk takin Kristian sakhua vuan lotute chuan an hre lo lehzual a ni. Chuvângin, brochure phêk 3-na chuan “Bible chhûnga thu awmte a tlângpui thua i hriat theih nâna” siam a nih thu a sawi a ni.
2. Engtin nge brochure chu kan sem chhuah ang?
2 Sem Chhuah Dân Tûr: Kristianna Rama mi in neitu hnênah chuan hetiang deuh hian i sawi thei ang: “He mi chungchânga i ngaih dân hriat kan duh a. [2 Timothea 3:16 chhiar rawh.] Kan mi biak tam tak chuan hêng thute hi an pawm a; mi dangte erawh chuan Bible hi lehkhabu ṭha satliah mai niin an ngai a ni. Nang, eng nge i neih ve dân? [ A chhânna nghâk rawh.] Sakhaw thurin engpawh nei mah ila, mahni ngeia Bible bih chian chhan tûr ṭha tak a awm a ni. [Phêk 3-na chunga thuhmahruai paragraph awm chu chhiar rawh.] He brochure aṭanga Bible-a thu awm ngaihnawm taka kaihtâwite i chhiar hian, thu ngaihvenawm tak pakhat i hmu ang: Bible hian khaikhâwmtu thupui leh thuchah pakhat a nei, tih chu,” tiin.
3. A bîk takin Kristian sakhua vuan lotute kan biak huna hman theih tûr thusawi dân dang chu eng nge ni?
3 A bîk takin Kristian sakhua vuan lo, Bible zahna erawh nei site i biak huna hman theih tûr tih dân dang chu hei hi a ni: “Pathianin awpbehna leh rorêl dik lohna tuar ṭhîn thuhnuairawlhte chungchâng hi a ngaihtuah i ring em? [Chhânna hun pe ang che.] Bible aṭangin an hnêna Pathian thutiam chu ka chhiarsak ang che aw? [In neituin rem a tih chuan Sâm 37:11 chhiar rawh.] He hrilh lâwkna a thlen famkim hunah leilung hi eng anga a awm nge i rin? [A chhânna nghâk rawh.] Hei hi hnam tin leh sakhaw tinrêng vuantute’n Bible aṭanga an neih theih thlamuanna leh beiseina entîrna pakhat mai a ni,” tih hi. Phêk 3-na chunga thuhmahruai paragraph awm chu chhiarin, brochure chu sem chhuak ang che.
4. Engtin nge Bible zirpui ṭan nân brochure hi kan hman theih?
4 Bible Zirna Nei Ṭan Rawh: Kan tlawhkîr leh hunah, in neitu chu kan inbiak tawhna kan hriat chhuahtîr hnuah, ṭhen tâwpnaa lang zawhnate chu hmangin kan thusawi chungchânga paragraph pakhat emaw, pahnih emaw chu kan sawipui thei a. A nih loh leh, Bible Zirtirna lehkhabu hmêlhriattîr a ṭhat chuan, brochure kâwm hnung lama awm thuziak chu kan chhiarpuiin, lehkhabu chu kan pe thei a; chutah, a ngaihven zâwng thupuite chu zâwtin, a chhûnga awm paragraph pakhat emaw, pahnih emaw chu kan sawipui nghâl thei bawk a ni. November thla chhûng hian he brochure hi theih tâwp chhuahin i sem ṭheuh ang u!