Ṭawngṭaina Nêna Chhût Ngun—Rawngbâwltu Ṭhahnemngai Takte Tâna Thil Pawimawh
1. Engin nge Isua chu a hna pawimawh ber pênsan lo tûra ṭanpui?
1 Isua chuan tlai lam hun chu mite tihdam nân leh ramhuaite hnawh chhuah nân a hmang a. A tûka a zirtîrte’n an va hmuh chuan, a hnênah: “Mi zawng zawngin an zawng che asin le,” tiin a thilmak tihna chhun zawm tûrin an fuih a. Mahse, Isua chuan a hna pawimawh ber, chanchin ṭha hrilh chu a pênsan dâwn lo. Heti hian a chhâng a ni: “Hmun dangah khaw hnaiahte chuan i kal ang u, chûngahte pawh chuan thu ka hrilh theihna tûrin; chu chu ka rawn chhuah chhan a ni si a,” tiin. Isua chu rawngbâwlnaa a rilru pe tlat tûrin engin nge ṭanpui? Zîng hma taka tho va, a ṭawngṭaina leh ngun taka a chhût ngunna chuan a ṭanpui a ni. (Mk. 1:32-39) Engtin nge ṭawngṭaina nêna chhût ngunna chuan thu hriltu ṭhahnemngai tak ni tûra min ṭanpui theih?
2. Rawngbâwlnaa ṭhahnemngai zêl tûra min ṭanpui tûrin eng nge kan ngaihtuah theih?
2 Eng Nge Kan Chhût Ngun Ang? Isua chuan mipuite chu “vêngtu nei lo berâmte anga hrehawm leh darha” awmin a hmu a ni. (Mt. 9:36) Chutiang bawkin mite’n chanchin ṭha an mamawh nasatzia chu kan ngaihtuah thei a. Hun a hmanhmawhthlâk tawhzia kan ngaihtuah thei bawk. (1 Kor. 7:29-31) Jehova hnathawhte leh a miziate, Jehova Thuhretu kan nih theihna chanvo te, leh kan biala mite la hriat loh Pathian Thu aṭanga kan hriat thlarau lam ro hlu te chu kan ngaihtuah thei a ni.—Sâm 77:11-13; Is. 43:10-12; Mt. 13:52.
3. Eng hunah nge kan chhût ngun theih?
3 Engtikah Nge Kan Chhût Ngun Ang? Ṭhenkhat chu Isua ang bawkin zîng hma tak, a la reh laiin an tho va. Mi dangte chuan mut hmaa ngun taka ngaihtuah chu ṭha an ti ber a ni. (Gen. 24:63) Kan buai hle a nih pawhin chhût ngun nân hun kan insiam thei a. Ṭhenkhat chuan vântlâng veivahna lîrtheia an chuan hunte chu chhût ngun nân an hmang a ni. Mi dangte erawh chuan, an chhûn chawlh hun chu tibuaitu awm lova chhût ngun nân an hmang bawk. Tin, mi tam tak chuan rei lo te chhûng pawh ni se, rawngbâwla an chhuah hmaa chhût ngunna chuan huaisen tak leh ṭhahnemngai taka thu hril tûrin a ṭanpui niin an hria a ni.
4. Engvângin nge thil kan chhût ngun ang?
4 Ṭawngṭaina nêna chhût ngunna chuan Jehova rawngbâwl kan duhna a tizualin, Pathian kan biakna chu kan nuna thil pawimawh ber anga thlîr tûrin min ṭanpui ang a; tin, thu hrilh zêl kan tumna chu a tinghet sauh bawk ang. Pathian Rawngbâwltu Lian Ber Isua chuan thil chhût ngunna chu a hlâwkpui a, keini pawhin kan hlâwkpui ve dâwn a ni.