Rawngbâwlnaah Kan Dawhtheih A Ngai
1. Engtin nge Pathian Jehova’n mihringte chungah dawhtheihna a lantîr?
1 Pathian chu mihringte chungah a dawhthei hle a. (Ex. 34:6; Sâm 106:41-45; 2 Pet. 3:9) A dawhtheihna duhawm tak a lanna ber zînga pakhat chu khawvêl pum huapa chanchin ṭha hrilhnaah hian a ni. Pathian Jehova chuan mihringte chungah kum 2,000 dâwn lai dawhtheihna a lantîr tawh a, tûn thlengin mi rilru ṭha pute chu a lamah a la hîp reng a ni. (Joh. 6:44) Engtin nge rawngbâwlnaah Jehova dawhtheihna kan entawn theih?
2. Kan thu hrilhnaah engtin nge dawhtheihna kan lantîr ang?
2 In Tina Rawngbâwlna: Mite’n tuina an la lantîr lohna hmuna ‘bâng lova’ thu hrilhna hmangin Jehova dawhtheihna kan entawn a. (Tirh. 5:42) Kan rawngbâwlnaah ngaihsak lohna te, nuihsawhna te, leh dodâlna te chu dawhthei takin kan tuar a ni. (Mk. 13:12, 13) Tin, tuina neite chu ina tawn an harsat hunah pawh thutak chi tuia châwm tuma kan tlawh leh ṭâng ṭângin dawhtheihna kan lantîr bawk.
3. Tlawhkîr neih hunah leh Bible zirna kaihhruai hunah engvângin nge dawhtheihna neih a ngaih?
3 Bible Zirpuina: Thlai enkawl tûr chuan dawhtheih a ngai a. Kan châwm thei a; mahse, kan ṭhantîr thut thei lo. (Jak. 5:7) Chutiang bawkin, thlarau lama ṭhan chhohna pawh a intahtawl tê têin zawi zawiin a thleng a ni. (Mk. 4:28) Kan Bible zirpuite chuan sakhaw dik lo rinnate emaw, Bible nêna inmil lo thil chînte emaw kalsan nghâl chu harsa an ti mai thei a. Kan zirpuite chu inthlâk thleng tûra nawrin ṭhan chaktîr kan tum tûr a ni lo. Zirlai thinlunga Pathian thlarauvin hna a thawh nâna hun inâwm tâwk pe tûr chuan dawhtheihna neih a ngai a ni.—1 Kor. 3:6, 7.
4. Ring lotu kan chhûngkhatte hnêna hlawhtling taka thu hril tûrin engtin nge dawhtheihna chuan min ṭanpui theih?
4 Ring Lotu Chhûngkhatte: Ring lotu kan chhûngkhatte’n thutak an zir chu duh hle mah ila, an hnêna kan rinna hrilh theihna hun ṭha chu nghâkin dawhtheihna kan lantîr a, thu tam tak hrilhna hmanga tihrilhhai lo tûrin kan fîmkhur bawk. (Thur. 3:1, 7) Chutih rual chuan, kan entawn tûr siam hmangin kan nihna kan târ lang a, thuhnuairawlh tak leh ṭih dêk chunga kan rinna sawi chhuak tûrin kan inpeih reng a ni. (1 Pet. 3:1, 15) Rawngbâwlnaa dawhtheihna lantîrna chuan min tihlawhtling lehzualin, kan Pa vâna mi a tilâwm ngei bawk ang.