Thu Hril Lovin Awm Suh
1. Engti tûrin nge huaisenna a ngaih a, engvângin nge?
1 Mi dangte nuihsawh i hlauh vângin school-ah thu i hrilh loh phah tawh ngai em? Thu sawi tûr chuan huaisen a ngai hle a, mi zakzum tak i nih phei chuan a ngai lehzual. Chutianga ti tûrin engin nge ṭanpui ang che?
2. School-a thu hrilhnaah engtin nge remhriatna kan hman theih?
2 Remhriatna Hmang Rawh: School chu i mi mal bial anga thlîr theih ni mah se, in tina thu i hrilh huna i tih ṭhin ang bawkin, i mi tawh apiangte thlarau lam thil sawipui ṭan nghâl vek tûra beisei i ni lo tih hre reng ang che. Thu hrilh hun tûr hriat nân remhriatna hmang rawh. (Thur. 3:1, 7) Class-a in thu sawiho emaw, school-a in thil tih tûr emaw chuan i rinna sawi chhuah theihna hun remchâng a pe mai thei che a. A nih loh leh, i school kalpuite’n thiltihna engemawa i tel duh loh chhan an zâwt che pawh a ni thei. Kristian ṭhenkhat chuan school an luh tirhin an zirtîrtute hnênah Jehova Thuhretu an nih thu an hriattîr a, kan rin dân târ lânna thu leh hla chhuahte an pe bawk. Mi dangte chuan an school kalpuite’n zawhna an zawh phah mial beiseiin thu leh hla chhuahte chu dawhkânah an hnutchhiah lui a ni.
3. Engtin nge school-a thu hril tûrin i inbuatsaih theih?
3 Inbuatsaih Rawh: I inbuatsaih chuan inrintâwkna i nei sawt ang a. (1 Pet. 3:15) Chuvângin, zawhna awm thei tûrte leh i chhân dân tûrte lo ngaihtuah lâwk tum ang che. (Thuf. 15:28) A theih chuan, i mamawh huna i râwn zêl atân i Bible leh thu leh hla chhuah ṭhenkhat Reasoning bu te, Young People Ask bute leh thil siam chungchâng sawina lehkhabu ang chite chu school-ah kawl la. I nu leh pate hnênah chuan chhûngkuaa Pathian biakna in neih huna tihchhinna telh tûrin dîl ang che.
4. Engvângin nge school-a thu hrilhna chu i chhunzawm zêl ang?
4 Rilru Put Hmang Dik Nei Rawh: I school kalpuite chuan Pathian thutak i sawi hunah an nuihsawh ang che tih ring mai suh. Ṭhenkhat chuan, i huaisenna avânga ngaisâng chein, i thusawi an ngaithla pawh a ni thei asin. Tumahin an chhâng lêt lo che a nih pawhin lunghnual suh ang che. Chutianga anmahni hrilh i tumna chuan Jehova a tilâwm tho tho va. (Heb. 13:15,16) ‘Huai taka thu hril’ thei tûra ṭanpui tûr chein dîl chhun zawm zêl ang che. (Tirh. 4:29; 2 Tim. 1:7, 8) Mi tuemawin a ngaihthlâk che huna i phûr dân tûr chu ngaihtuah teh. Chu mi chu a tawpah chuan Jehova chhiahhlawh pawh a lo ni ve thei hial si a!