Zâwlneite Chu Entawn Atân Hmang Rawh—Jona
1. Eng mize ṭhate nge Jona’n a neih?
1 Zâwlnei Jona chanchin i ngaihtuah hian eng nge i rilruah lo lang? Mi ṭhenkhat chuan mi dawihzep tak emaw, thinlung khauh tak emaw angin an ngai mai thei a. Amaherawhchu, ani chuan inngaihtlâwmna te, huaisenna leh mahni inpêkna rilru put hmangte a târ lang chiang hle a ni. Engtin nge Jona mize chhuanawm tak takte chu “entawn atân” kan hman theih ang?—Jak. 5:10.
2. Engtin nge Jona inngaihtlâwmna chu kan entawn theih?
2 Inngaihtlâwmna: Atîrah Jona chuan a thu hrilhna tûr bial chu a tlânchhiatsan a. Assuria mite chuan tharum thawh an chîn êm avâng leh Ninevi pawh “thisen chhuah hmang khawpui” tia koh hial a nih avângin chutianga a tlânchhiatsan chu thil mak a ni lo. (Nahum. 3: 1-3) Nimahsela, hun remchâng pêk leh a nih huna inngaitlâwm taka a chanvo pawmtu Jona chu Jehova chuan a zilh a. (Thuf. 24:32; Jon. 3:1-3) Atîrah tlânchhe mah se, ani chuan Jehova duhzâwng chu a ti ta tho a ni. (Mt. 21:28-31) Zilh kan tâwk emaw, thu hrilh harsatna bialah kan thawk emaw pawh ni se, chanchin ṭha hrilh chu kan tum ve tlat em?
3. Eng ang rawngbâwlnaah nge huaisenna leh mahni inpêkna neih ngai?
3 Huaisenna leh Mahni Inpêkna: Jona chuan a thutlûkna siam ṭha lovin lawng pute nunna chu hlauhthâwnawmah a dah tih a han hriat khân, a nunna hial pawh pêk a huam a ni. (Jon. 1:3, 4, 12) A hnuah, Ninevi khuaa a mawhphurhna hlen tûra a kal chuan khawpui lun lai berah a kal a, chu chu Jehova rorêlna puan chhuah theihna tûr hmun ṭha a zawn vang a ni thei ang. A thiltihte chu dawihzepna ni lovin Pathian zâwlnei huaisen tak nihna a ni zawk! (Jon. 3:3, 4) Tûn laiah keini hi eng nge kan an ve? Dodâlna kâra huaisen taka thu kan hrilh theih nân Pathian pêk huaisenna chu kan mamawh a. (Tirh. 4:29, 31) Rawngbâwlnaa hun leh thil neihte pe tûr chuan mahni inpêkna neih a ngai a ni.—Tirh. 20:24.
4. Engvângin nge Jehova zâwlneite entawn tûr siam ṭha takte ngaihtuah nân hun kan hman ang?
4 Jehova zâwlneite zînga tuemaw chanchin i chhiar apiangin, an dinhmuna awm anga i inchan chuan i hlâwkpui ngei ang. Heti hian inzâwt rawh: ‘Engtin nge ka chhân lêt ang? Engtin nge a mize ṭhatnate chu ka nunah ka entawn theih?’ tiin. (Heb. 6:11, 12) Kan Lalram Rawngbâwlna-a lo la chhuak leh tûr thuziakahte chuan Jehova zâwlnei rinawm dangte aṭanga kan zir theih thu ṭha tak takte sawiho a ni ang.