Zawhna Bâwm

◼ Kristian inkhâwm lai leh thlawhhma rawngbâwl laia cell phone hman dân chungchângah eng Bible thu bulte nge hman theih a nih?

“Engkim Tân Hian Hun Ruat A Awm.” (Thur. 3:1): Cell phone hmangin mite chu eng hunah pawh message an inthawnin, an inbe thei a. Mahse, Kristiante chuan an phone intihbuaitîr duh loh hun an nei a ni. Entîr nân, kan inkhâwmte hi Jehova biakna hun, thlarau lam kaihhruaina dawnna hun leh inthlamuan tawn theihna hun a ni a. (Deut. 31:12; Sâm 22:22; Rom 1:11, 12) Inkhâwmna hmun kan thlen hunah kan phone chu kan off-in, kan chhuahsan hnuah chauh kan message dawnte chu kan en thei ang em? Rîkrum thil thleng thei nia kan hriat avânga phone kan off theih loh chuan, mi dangte tibuai lo tûr zâwngin kan dah tûr a ni.

“Chanchin Ṭha Avângin Engkim Ka Ti Ṭhîn.” (1 Kor. 9:23): Rawngbâwlnaah cell phone hman theih châng a awm a. Entîr nân, rawngbâwlnaa hmaruaitu unaupa chuan thu hrilhna bial chhûng hmun danga thawkte chanchin hriat nân phone chu a hmang mai thei a. Thu hrilhna bial him lova thuchhuahtu dangte hnêna mipui pungkhâwmte beihna awm thei hrilh nân emaw, mipui pungkhâwmte beihna, a nih loh leh police inrawlhna chungchânga upate biak pawh nân emaw cell phone chu a ṭangkai a ni. Thuchhuahtute chuan an phone chu tuina neite biak nân emaw, a bîk takin, hla taka awm an Bible zirpuite an tlawh hmaa biak nân emaw an hman châng a awm bawk. Phone kan keng a nih chuan in neitu nêna thu kan sawi laia min tibuai lo tûrin kan fîmkhur tûr a ni. (2 Kor. 6:3) Thuchhuahtu dangte nghah laia, ṭhiante phone emaw, message thawn emaw ai chuan kan rawngbâwlna leh thawhpuite ngaihsak chu a ṭha zâwk dâwn lâwm ni?

Mi Dangte Ngaihtuah Rawh. (1 Kor. 10:24; Phil. 2:4): Group-a thu hrilhna hmun zawn hmuh nân phone hmangin emaw, message thawnin emaw kan zâwt thei anga ngaiin, chu chu rawngbâwlna atâna inkhâwm tlai phah nâna hman kan duh ngai lo vang. Kan thlen tlai chuan inkawp tûr siam danglam a ngai ṭhîn a. Mahse, kan thunun theih loh dinhmun avânga tlai châng chu kan nei ngei mai. Amaherawhchu, a hun taka thlen chu chîn ṭhana kan neih chuan Pathian Jehova ruahmanna zahna leh hmahruaitu unaupa leh thuchhuahtu dangte ngaihtuahna kan lantîr a ni ang.