Zâwlneite Chu Entawn Atân Hmang Rawh—Joela
1. Engtin nge thu kan hrilh hian Joela inngaihtlâwmna chu kan entawn theih ang?
1 Zâwlnei Joela chu tu nge? Ani chuan “Pethuela fapa” a nih thu chauh a târ lang a. (Joel. 1:1) Chu zâwlnei inngaitlâwm tak chuan thuchah puang chhuaktu a nihna aiin Pathian Jehova thuchah chu a sawi uar zâwk a ni. Chutiang bawkin, kan rawngbâwlnaah pawh hian mite’n min fak leh min hriat aiin Pathian Jehova leh Bible lam an ngaihsak chu kan duh zâwk a ni. (1 Kor. 9:16; 2 Kor. 3:5) Kan thuchah puan chhuahah chuan chakna kan hmu bawk a. Joela hrilh lâwkna a engin nge tûn laiah hian taimâkna leh beiseina min pe thei ang?
2. Pathian Jehova nî a hnaihna chuan eng ti tûrin nge min chêttîr?
2 “LALPA Nî Chu A Hnai.” (Joel. 1:15): Hêng thute hi kum sâng tam tak kal taa ziak ni mah se, a thlen famkimna hun hnuhnûng berah kan awm mêk a. Khawvêl chhe chho zêl leh kan thu hrilhna biala ngaihsak lohna leh nuihsawhna kan tawhna te hian he khawvêl suaksual tâna ni hnuhnûng a lo thleng tawh tih chiang takin a târ lang a ni. (2 Tim. 3:1-5; 2 Pet. 3:3, 4) Tâwpna a hnaih tawh zia kan ngaihtuah hian kan nuna rawngbâwlna dah pawimawh chhan tûr ṭha tak kan nei a ni.—2 Pet. 3:11, 12.
3. Hrehawm nasa tak a lo thlen ṭêp tawh lai hian engvângin nge rawngbâwlna chu a pawimawh lehzual?
3 “LALPA Chu A Mite Tân Inhumhimna A Ni Ang.” (Joel. 3:16): He Bible chânga tihnghînna chungchâng a sawi hian hrehawm nasa tak chhûnga Pathian Jehova rorêlna a sawina chauh a kâwk thei a ni. Chu mi hunah chuan Jehova’n a mite a chhanchhuak dâwn tih hriatna chuan min thlamuan thei a. (Thup. 7:9, 14) Thu hrilh hna kan thawh a, Jehova min chhawmdâwlna leh tihchakna kan dawn hian, hrehawm nasa tak lo awm tûra min ṭanpui thei tûr rinna leh chhelna kan nei a ni.
4. Engvângin nge hlim taka awm a, inrin tâwkna nei chunga hma lam hun kan hmachhawn theih?
4 Joela thuchah chu lungngaihna thu angin ṭhenkhat chuan an sawi a; mahse, chu chuan Pathian mite chu chhanchhuah beiseina ropui tak a pe thung a ni. (Joel. 2:32) Chuti a nih chuan: “LALPA in Pathianah chuan hlim rawh u,” tih Joela 2:23 thu hi zâwm tlat chungin, kan hma lam hun chu inrin tâwkna nei tak leh taima taka Pathian Ram chanchin ṭha puang chhuak chungin i hmachhawn ang u.