Thiltawnte

◼ Australia: John-a chu lehkha thiam sang tak a ni a, a naupang lai chuan inkhâwm ṭhîn mah se, “Pathian awm ring lotu ruh tak” a ni. Pioneer pakhat chuan brochure pakhat a hnutchhiah a. Pioneer unaupa chuan a tuina chhâwmnunsak tûrin thu leh hla chhuah dangte leh magazine chhuak thar berte a rawn kensak ṭhîn a, thil siam chungchâng târ lanna leh Bible hrilh lâwknate chu a kawhhmuh ṭhîn a ni. Chûngte a chhiar hnu chuan John-a chu “Pathian chungchâng mihringte chhui phâk a ni lo tih ringtu ruh lutuk lo” niin a insawi a. Pioneer unaupa chuan Bible Zirtîrna bu chu hmêlhriattîrin, phêk 20-naa paragraph 8-na leh phêk 23-24-naa paragraph 13-16-na chu a hmuh a. Chuta Bible châng lâk chhuahte chuan John-a rilru a khawih êm avângin, “Bible ka bih ṭhat leh a ngai a ni mai thei,” tiin a sawi a ni.

◼ Mexico: Pa pakhat chuan thuchhuahtu unaupa hnênah Bible hi Pathian thâwk khum a ni tih a rin loh thu a hrilh a. Thuchhuahtu chuan Bible hi thâwk khum a nihzia finfiahna a hmuhtîr a. Sawihona vawi tam vak lo an neih hnu chuan, Bible aṭanga a thu zir chuan chu pa thinlung chu a khawih ṭan ta a. Pathian tehnate chungchâng an han zîr chuan a rilru a khawih lehzual a ni. Thuchhuahtu hnênah chuan: “Bible kan chhiar dun hmasak ber ṭum chuan, lehkhabu dang ang lekah ka ngai a, min nghawng lo. Mahse, tûnah chuan Bible kan chhiar hian, a bîk takin nungchang lama a thurâwnte kan chhiar hian ka thinlung a tinâ a ni,” tiin a hrilh a ni.

◼ United States: Khawpuia rawngbâwl nupa tuak khat chuan Pathian a ring chung pawha Bible hi Khaw Thlang Lam mite tân chauh nia ngai Taiwan aṭanga lo kal nu pakhat an tâwk a. Ani chu nuamsa takin khawsa mah se, kim lo leh bo nia inhriatna a nei a; chuvângin, thu leh hla chhuah an târ chhuahnaah chuan a lo kal a. Bible-in nunin a tum hmu chhuak tûra a ṭanpui a beisei a ni. Nupate chuan Bible Zirtîrna bu leh brochure pakhat hmangin an zirpui ṭan a. A thu ṭhenkhat an han zir zawh chuan chu nu chuan Bible hi sakhaw dangte lehkhabu a danglam bîk chu mak a tih thu a sawi chhuak a. Thleng famkim tawh Bible hrilh lâwknate an zir zawh chuan, ani chuan, “Bible tluka dik lehkhabu dang ka hre ngai lo!” tiin a sawi a ni.

◼ Japan: In neitu chuan thuchhuahtu hnênah Pathian a rin loh thu hrilh tawh mah se, thuchhuahtu unaupa chuan rei lo tê tê tlawhin, kan magazine-a thu ṭhenkhat chu a hrilh ṭhîn a. Chu pa chuan zawi zawiin a thil thlîr dân chu a thlâk a, Siamtu a awm mai thei tih a pawm ṭan ta a. Tûnah chuan Pathian a awm tih a ring tawh a, thuchhuahtu nên chuan Pathian Min Pêk Chanchin Ṭha! tih brochure hmangin Bible an zir mêk a ni.

◼ Canada: Unaunu pakhat chuan kal chhuak tûra a motor dahna lam pan mêk nu pakhat hnênah chuan magazine chhuak thar ber chu a pe a. A hnua unaunuin a va tlawh leh chuan chu nu chuan a tui loh thu leh Pathian a rin loh thu a lo hrilh a ni. Unaunu chuan tlâwm mai lovin brochure pakhat kensak chu a tum a. Unaunuin ina a va hmuh chuan, chu nu chuan Pathian a ring lo tih hre mah se, pasal tel lovin chhûngkua a enkawl tih a hriat avânga a ngaihtuah reng thu a hrilh a ni. Chu nu hnênah chuan thurâwn ṭha tak hmuh theihna chungchâng sawihona brochure a ṭhen laite chu a kawhhmuh a. Chu nu chuan lâwm takin brochure chu a dawng ta a ni.