Magazine Kawng—Bible Zirpui Ṭan Nân A Ṭangkai
1. Engvângin nge kum rei tak aṭang khân Jehova inawpna pâwl chuan thuchhuahtute chu magazine kawng nei chho tûra a fuih?
1 Mi tam tak chuan Bible kan zirpui chu an duh lo va; mahse, kan magazine chhiar chu nuam an ti a ni. Chuvângin, Jehova inawpna pâwl chuan kum rei tak aṭang tawh khân, thuchhuahtute chu magazine kawng nei chho tûrin a fuih a. Mite’n kan magazine an chhiar ṭhinna aṭangin Pathian Thu ngaihven duhna an neih phah fo a ni. (1 Pet. 2:2) Engtik hunah emaw chuan, an thu chhiar engemaw ber chuan an rilru a khawihin Bible zirna neih chu an duh thei a ni.
2. Engtin nge kan magazine la ṭhîntute tuina chu kan chhawmnun theih?
2 Thutak Chi Chu ‘Tuiin Châwm’ Rawh: Magazine pêk hnua kalsan mai ai chuan, inbiaknaah in neitu teltîrin, amah nên inṭhianna neih tum rawh. Chu chuan a dinhmun te, a tuizâwngte leh a thurinte hre tûrin a ṭanpui ang che a, remhre taka thu sawi tûrin a ṭanpui bawk ang che. (Thuf. 16:23) Tlawhkîr i neih dâwn apiangin inbuatsaih rawh. A theih chuan, a thu pawimawh lai pakhat leh chu mi nêna inkûngkaih magazine aṭanga Bible châng pakhat sawipuiin, a thinlunga awm thutak chi engpawh chu tuiin châwmsak ang che. (1 Kor. 3:6) I tlawhkîr nî te, thu leh hla i pêk te, i thusawi leh Bible châng sawihote chu ziakin chhinchhiah ziah ang che.
3. Magazine kawnga kan siamte chu eng anga zingin nge kan tlawhkîr ang?
3 Eng Anga Zingin Nge Kan Tlawhkîr Ang? I magazine kawnga mite chu magazine chhuak thar apiangte pe tûrin thla khatah vawikhat emaw, a thar a chhuah apiang emawah i tlawhkîr tûr a ni a. Mahse, i dinhmun leh in neitu tui dân azirin chu ai pawhin i tlawhkîr ngun zâwk thei a ni. Entîr nân, magazine i pêk hnu chawlhkâr hnih khat vêlah i tlawhkîr thei a, heti hian i sawi thei a ni, “Magazine ka hnutchhiah che aṭanga thu engemaw tâwi tê kawhhmuh tûr chein ka rawn lût lawk a ni,” tiin. Hei hian in neitu chu thuziak i sawi kha chhiar châkna a neihtîr ang. A lo chhiar tawh a nih chuan, thuziak chungchânga a ngaih dân chu i zâwt theiin, tawi têin i sawipui thei ang. A nih loh leh, kan thu leh hla chhuahte chhiar nuam a tih chuan chu mi thlaa pêk chhuah tûr tract emaw, brochure emaw, lehkhabu emaw chu pe tûrin i tlawhkîr thei a ni.
4. Magazine kawnga kan siamte’n Bible zirpui an duh leh duh loh hriat nân a khât tâwkin eng nge kan tih theih?
4 In neituin Bible zirpui a ngen che chu nghâk suh. Hma la vat zâwk rawh. Tûn hmain Bible zirna a lo hnar tawh a nih pawhin, Vênnainsâng aṭanga “Bible Ṭanchhan Zawhnate Chhânna” tih chu a khât tâwka kawhhmuhin, sawihona neih a duh leh duh loh zâwt ang che. Chutiang chuan kawtkaiah zirna neih ṭan chu i duh mai thei a. Mahse, Bible zirna i ṭan thei lo a nih pawhin a tuina chhawmnung tûrin magazine i pe zawm zêl thei a ni.