‘Jentailte Zînga In Chêtzia Chu Mawi Tak Ni Rawh Se’

1. Engvângin nge lo awm tûr inkhâwmpui chhûnga chêtze mawi tak kan lantîr a pawimawh?

¹ Kum tin kan inkhâwmpui chhûngin mite ngaihven kan hlawh ṭhîn a, chuvâng chuan kan chêtze hmanga kan biak Pathian aiawhtu kan nih a pawimawh hle a ni. (Lev. 20:26) Kan hawihhâwmna leh kan silhfên leh inchei dân chuan Krista hnungzuitu dikte kan ni tih chiang takin a târ lang tûr a ni. Lo awm tûr regional inkhâwmpui emaw, international inkhâwmpui emawa kan tel hian engtin nge kan Pa vâna mi chawimawi tûrin ‘Jentailte zînga kan chêtzia chu mawi tak’ a nih theih ang?—1 Pet. 2:12.

2. Inkhâwmpui chhûngin Kristian mizia târ lan theihna hun remchâng eng nge kan neih?

² Kristian Mizia Târ Lang Rawh: Hmangaihna kan inlantîr tawnna leh “pâwn lama mite” kan dâwr dân chu khawvêla langsâr tak rilru put hmang nên chuan a inang lo hle a. (Kol. 3:10; 4:5; 2 Tim. 3:1-5) Buaina a chhuak a nih pawhin, hotel leh restaurant-a hnathawkte kan dâwrnaah kan ngilneiin, kan dawhthei tûr a ni. A mi mala min ṭanpuitute hnêna tih ṭhin dân angin lâwmman pawisa tlêm azâwng pêkna chuan hawihhâwmna a târ lang bawk a ni. Ṭhutna kan hauh hunah leh inkhâwmpuia tih chhuah kan thu leh hlate la tûra kan intlar hunah pawh mahni chauh ni lovin, mi dangte kan ngaihtuah tûr a ni. (1 Kor. 10:23, 24) Tuina nei pa pakhat chuan inkhâwmpuia a tel hmasak ber ṭum chu heti hian a sawi: “Chu mi nia thusawi chu engmah ka hre tawh lova; mahse, Thuhretute nungchang chuan keimahah nghawng a nei thui hle a ni,” tiin.

3. Nu leh pate hnênah eng hriattîrna nge pêk a nih a, engvângin nge?

³ Nu leh pate chuan an fate chu inkhâwmpuinaah te, restaurant-ah te, leh hotel-ahte chuan ṭha takin an vêng tûr a ni a. (Thuf. 29:15) Hotel pakhata manager chuan nupa tuak khat hnênah: “Nangniho hi kan ngaina che u a. In chhûngte leh in fate hi an nungchang a ṭhain, an hawihhâwm hlawm hle a. Hnathawktu zawng zawng chuan in chungchâng an sawi a, chawlhkâr tâwp tin lo thleng ula kan duh hle,” tiin a hrilh a ni.

4. Inkhâwmpuina khawpuia kan awm laiin kan inchei dânah eng nge kan ngaihsak ang?

⁴ Silhfên Inâwm Tak: Inkhâwmpui chhûnga kan silhfên chu khawvêla mite anga a lutuka inchei lovin, inchawih tak leh inâwm tâwk tak a ni tûr a ni. (1 Tim. 2:9) Hotel-a kan va thlen lai leh kan chhuahsan dâwn laite, inkhâwm hma leh hnua hun âwl kan hman laite chuan duhdah takin kan inchei tûr a ni lo. Chuvângin, kan inkhâwmpui badge-te chu inchhuang takin kan inbel ang a, chu chuan hun remchâng kan neih hunah thu hrilh min tîmtîr lo vang. Lo awm tûr inkhâwmpui chhûnga kan lan dân leh chêtze mawi chuan mi rilru ṭha pute chu nun chhanhim thei Bible thuchah lama a hîp bâkah, Jehova a tilâwm bawk dâwn a ni.—Zep. 3:17.

Kum 2014 Inkhâwmpui Hriattîrnate

◼ Inkhâwm Hun: Inkhâwmpuina hmun chu zîng dâr 8:00-ah hawn a ni ang a. Inkhâwmpui chhûng hian 9:20-ah rimawi a inṭan ang. Chutih hunah chuan zahawm taka ṭan a nih theih nân mahni ṭhutna tûr hmunah kan ṭhu ṭheuh tûr a ni. Inrinni chuan inkhâwm bânna hla leh ṭawngṭaina chu tlai 4:55-ah neih a ni ang a, Chawlhni-ah erawh chuan tlai dâr 3:50-ah neih a ni thung ang.

◼ International Inkhâwmpuite: Hmun ṭhenkhatah chuan international inkhâwmpui thlen a ni ang a. Branch office chuan ṭhutna tûr awm zâtte, lîrthei dahna tûrte, hotel room awm thei tûr zâtte ngun taka a chhût hnuah kohhran sâwm bîk leh ram dang palai sâwm bîk a nei tih hre reng ang che. Thuchhuahtute chu sâwm ni lo chunga international inkhâwmpuia an tel a nih chuan, mipui an tâwt lutuk thei a ni. I dinhmun avânga tel tûra ruat i nih lohna inkhâwmpui danga i tel a ngai a nih chuan, international inkhâwmpui chu thlang suh ang che.

◼ Lîrthei Dahna: Lîrthei dah dân chunga thu kan neih theihna inkhâwmpuina hmunahte chuan, a lo thleng hmasa apiang hnênah dah man chawi lova hmun chantîr a ni ang. Lîrthei dahna hmun hi a zau vak ṭhin loh avângin, lîrthei pakhatah a theih anga tam chuanho hrâm tûr a ni. Ramtuileilote lîrthei chauh chu an tâna hmun hauhah dah phal a ni ang.

◼ Ṭhutna Hauh: Zîng tinin inkhâwmpuina hmun hawn a nih hunah, khawngaihin inkhâwmpuia lo tel mi dangte’n an ṭhut khalh che hlau ang hrimin chuhhelh takin i ṭhut duhna hmun chu pan suh ang che. Mahni inpêkna rilru put hmang chuan mi dangte ṭhatna tûr zawng tûrin min chêttîr a, chu chuan Kristian dik kan nihzia a târ lang a, min lo hmutute chu Pathian chawimawi tûrin a chêttîr bawk a ni. (Joh. 13:34, 35; 1 Kor. 13:4, 5; 1 Pet. 2:12) Ṭhutna chu motor-a i chuanpuite emaw, in khata i chênpuite emaw, a nih loh leh i Bible zirpuite tân chauh hauhsak theih a ni ang. Tarte leh dam lote tâna ṭhutna tûr hmun chu a bîka siam a ni a. Chûng ṭhutnate chu a tam vak ṭhin loh avângin, tarte leh dam lote chu anmahni enkawltu bîk mi pakhat emaw, pahnih emawin an ṭhutpui thei ang.

◼ Chhûn Chaw: Chhûn chawlh chhûnga chaw ei tûra inkhâwmpuina hmun kalsan ai chuan, chhûn chaw rawn keng ang che u. Ṭhutna hnuaia dah theih tûr chaw kennate chu a hman theih ang. Chaw kenna lian leh thil kenna keh thei chi rêng rêng chu inkhâwmpuina inah ken luh phal a ni lo.

◼ Thawhlâwm: Inkhâwmpui ruahmanna avânga kan lâwmzia târ lan nân inkhâwmpuinaa khawvêl pum huap rawngbâwlna atâna thawhlâwm bâwmah phal takin kan thawh thei a. Inkhâwmpuinaa cheque hmanga thawhlâwm thawh eng pawh chu “The Watch Tower Bible and Tract Society of India” hminga dawn theih tûra siam tûr a ni.

◼ In Enkawl Mêkte: In enkawl mêk i nih chuan, inkhâwmpuinaah damdawi hmuh theih a nih dâwn loh avângin i mamawh tûr âwm tâwk rawn keng ang che. Zunthlum neite chuan an inchiuna hriaute chu inkhâwmpuina leh hotela bawlhhlawh bâwmah te paih mai lovin, a paihna hmun tûr dik takah an paih tûr a ni.

◼ Chêtsualna Laka Invênna: Khawngaihin rah tleu palh leh inpaltlûk palh avânga intihnatna awm theite lakah a bîk takin fîmkhur ang che. Kum tinin pheikhawk leh a kaihhnawih thil avânga intihpalhna a thleng deuh nual ṭhîn a. Kailâwn leh hmun danga him taka i kalpui theih tûr i bun tâwk leh mawihnai tak bun chu a ṭha ber a ni.

◼ Naute Ṭhutna Nawrlirh Theih leh Ṭhut Mutna: Naute ṭhutna nawrlirh theih leh ṭhut mutna te chu inkhâwmpuinaah ken luh tûr a ni lo. Mahse, ṭhutnaa vuah theih naute ṭhutnate chu ken luh theih a ni ang.

◼ Rimtui Inhnawih Chite: Inkhâwmpui tam tak chu khâwl hmanga boruak fîm lak luhna hmun inkhâr ûp taka neih a ni ṭhîn a. Chuvângin, thâwk lam pang leh a kaihhnawih lam thila harsatna neite’n buaina an tawh loh nân rimtui inhnawih chi rim na lutuk hman loh chu ngilneihna lantîrna a ni ang.—1 Kor. 10:24.

◼ Please Follow Up (S-43) Form: Please Follow Up form chu inkhâwmpui chhûnga tawnchawpa thu hrilhna kan neih aṭanga tuina lantîrtute chungchâng hriattîrna ziah nâna hman tûr a ni. Form kimchang taka ziah khah chu Book Room-ah emaw, i haw hunah i kohhran secretary hnênah emaw i theh lût thei ang.

◼ Restaurant-ah: Restaurant-ah chuan i nungchang mawi hmangin Pathian Jehova hming chawimawi la. Kristian rawngbâwltute nêna inchawih takin inthuam rawh. Tih ṭhin dân a nih chuan, lâwm thu sawi nân lâwmman tlêm azâwng (tips) hnutchhiah ang che.

◼ Hotel-ah:

Mamawh zât tûr aia tam pindan la lo la, an phal zât aia tam khawsa suh u.
Rîkrum thil vâng a nih loh chuan i pindan hauh lâwk tawh chu cancel lo la; chutiang thil a thleng a nih chuan pindan mamawhtu mi dangte’n an luah theih nân hriattîr vat ang che. (Mt. 5:37) I cancel a ngaih chuan, cancel-na number chu dîl rawh. I room hauh tawh chu i luah hma dârkâr 48-a i cancel loh chuan i sum pêk tawh chu i hmu kîr leh thei lo vang.
Hotel-a i luh hunah debit card leh credit card i hmang a nih chuan, i account aṭanga i pindan luah man bâkah, i châm chhûnga thil tihchhiat palh awm theite phuhru thei tûr khawp sum hrên a ni ṭhîn. Chûng i hman tak tak bâk an hrênte chu hotel i chhuahsan hnua bank lama tihfel a nih hma loh zawng i hmang thei lo vang.
Bungraw nawrna nawrlîr chu hman i inpeih hunah chauh la la, i hman zawhah mi dangin an hman ve theih nân dah lehnghâl ṭhîn rawh.
In awmna ram atân tih ṭhin dân a nih chuan hotel hnathawktute’n i bungrua an dah felsak hunah che lâwmman pe la, in chhûng tifaitu tân lâwmthu sawi nân sum tlêm azâwng hnutchhiah rawh.
A theih lohna hmunah ei rawng bâwl suh.
Hotel-a thlengte tâna a thlâwna an pêk zîng chaw, coffee, a nih loh leh vûr te chu inkhâwmpuinaah keng suh.
Hotel-a thawkte nêna in indâwrnaah thlarau rah lantîr reng rawh. Anni chuan mikhual tam tak an enkawl ṭhîn a, kan ngilneihna, dawhtheihna, leh remhriatna chu an hlut a ni.
Nu leh pate chuan an fate chu hotel leh a chhehvêla an awm laiin—inkhai chhohnaah te, swimming pool-ah te, innghahkhâwmna hmunah te, exercise lâkna hmunah te, leh hmun dangahte pawh—an vêng reng tûr a ni.
Hotel Luah Theih Ziak Chhuahna-a târ lan luah man chu tax pêk tûr tel lovin, ni khat chhûng luah man tûr a ni. Chawi belh tûra tih i nih chuan, pe nghâl mai lo la, inkhâwmpuinaa Rooming Department hriattîr vat ang che.
I thlenna hotel room chungchânga buaina i neih chuan, inkhâwmpuinaa i awm chhûng ngeiin Rooming Department hriattîr la, an ṭanpui thei ang che.

◼ Tlâwmngaia Rawngbâwlna: Inkhâwmpuina hmuna a ṭûlna apianga ṭanpui duhte chuan Volunteer Service Department-ah inhriattîr tûr a ni. Kum 16 hnuai lam naupangte pawhin an nu leh pa emaw, enkawltu emaw, a nih loh leh anni’n an ruat puitling pakhat emaw enkawlna hnuaiah thawkin ṭanpuina hlu tak an pe ve thei a ni.